Jamita Minggu 8 November 2026 Minggu 23 Dung Trinitatis tarsurat di buku Hesekiel 18 ayat 21 - 29. Tapabagas ma pangantusionta taringot tu turpuk ni Jamita Minggu on. Hombar tu Almanak ni Hurianta dibahen ma ojahan ni Jamita Minggu "Mangulahon Hatigoran dohot Hasintongan." Rap ma hita mangihuthon hatoranganna.
Pendahuluan
Di bagasan turpuk jamita on digombarhon dua pangalaho ni hajolmaon ima: Mangulahon hatigoran dohot mangulahon hajahaton. Tu na dua pangalaho i dipamasa Debata do pamaloson hombar tu na niulana be. Mangihuthon angka ayat na di jolo ni turpuk on, didok ia pangalaho hatigoran ima: na manguluhon uhum, ndang mangan tibaltibal di atas ni angka dolok, ndang manaili matana tu angka ganaganaan ni pinompar ni Israel, ndang diramuni jolma ni donganna, ndang jumonok tu parompuan jumpa diida hasomalanna, ndang dirupa manang ise; gade jinalona dipaulak tu parutang, ndang olo mangarampas ugasan ni halak, rotina dilehon do tu na male, diparulosi do na marsaemara, ndang paurangkon hepeng, ndang torbang pambuatna di laba, ditait do tanganna mulak sian hageduhon, uhum hasintongan do dibahen manguhum halak na marsalisi. Dohot hata na jempek didok: Diparangehon do angka patik ni Jahowa jala diradoti angka uhum laho mangulahon hasintongan (ayat 5-9). Pamasaon ni Debata do pamaloson tu ganup halak na so manguluhon hatigoran alai lehononNa do upa tu angka na mangulahon hasintongan dohot hatigoran.
Pembahasan
Dung dihatahon si Hesekiel taringot tu pamaloson, dipatorang ibana ma taringot tu angka jolma na manundalhon hajahaton jala gabe mangulahon hatigoran, suang songon i nang angka jolma na manundalhon hatigoran jala gabe mangulahon hajahaton. Molo ditundalhon parjahat i do nasa hajahaton, dioloi nasa patik ni Debata jala diulahon uhum dohot hatigoran, mangolu ma jolma on (ayat 21). I ma bukti ia Debata parholong jala parasiroha, na dihalomohonNa ima hamubaon ni roha sian dosa tu hatiuron. Alai sebalikna, molo ditadingkon halak partigor hasintongan jala diulahon hajahaton, disi ma Debata mambalos pambahenanna, gabe ndang boi ibana mangolu. Sude hatigoran na binahenna i ndang diingot be, alai mate ma ibana ala ni pambahenanna na jahat i (ayat 24), i ma patuduhon na partigor do Debata. Saluhut hatigoranna angka na niulana na sai laon, ndang be ingoton, ingkon di bagasan panundaliaonna na niulana do ibana mate dohot di bagasan dosana angka naung binahenna i.
Alai, di tingki i, adong do halak na mangalo mandok: “Ndang tingkos pambahenan ni Tuhan i!” (ayat 25). Ra, ala adong do konsep akumulasi dohot deduksi ni jolma di tingki i, na marpingkir na boi do dipapungu-pungu etongan ulaon na denggan, ulaon na roa boi do i seimbang dohot ulaon na denggan, songon manabung dohot balanjo, isarana mangulahon na denggan i ma manabung, na roa i ma balanjo, hubungan ni na dua i ima hubungan na sederhana. Alai, disoadahon si Hesekiel do konsep on, jala ndang lomo roha ni Debata di konsep on, sai hira na boi do patupahon na denggan papintorhon hajahaton, permainan debit-kredit pambahenan na denggan dohot pambahenan na roa ndang na laho mangurangi jolma i sian na mangulahon hajahaton, alai baliksa mangalehon kesempatan tu jolma laho mangulahon hajahaton.
Na dihalomohon ni Debata i ma menyadari dohot manolsoli sian sude hajahaton na binahenna (ayat 28), jala na diargai Debata ima serep ni roha, hamubaon ni roha, on ma keadilan di adopan ni Debata, holan hamubaon ni roha sian hajahaton (dosa) do na boi padaohon diri sian hamatean.
Sadalan do konsep na pinasahat si Hesekiel taringot tu hamubaon ni roha dohot haporseaon di pamintorion marhite haporseaon. Ndang hea hita malua marhite na papunguhon jasa, alai boi do hita malua marhite na paubahon roha jala porsea tu Debata. Ngolu na marhaporseaon secara alami manghorhon tu na manadingkon dosa, jala haporseaon secara alami manghorhon tu ulaon hatigoran dohot hasintongan. Nang pe dipintori hita ala ni haporseaon, alai ulaon pe ringkot do songon parbue ni haporseaon i.
Mansai tangkas do patik sebagai tanggungjawab pribadi na diondoshon si Hesekiel i, asa boi ganup jolma mamillit ngolu na hinalomohon ni Debata manang ndang. Ganup jolma ikkon do maninggalhon jejak na so holan implikasi sementara alai dohot do sebagai konsekuensi pangalaho na manongtong selama di ngoluna, ala uhumon ni Debata do ganup jolma hombar tu na niulana be (ayat 30). Lapatanna disi, saluhut ulaon selama di ngoluna paretongkonon ni Debata do antara hadosaon tu hamubaon ni roha, manang sebalikna antara mangulahon hatiuron alai di ujungna gabe mangulahon dosa. Alani ima, nasa na mangulahon dosa dipauba ma rohana (bertobatlah), ia halak naung mangolu di hatiuron manongtong ma mangulahon patik dohot hasintongan na sian Debata sahat tu ujung ni ngoluna. Tuhan Jesus pe didok do: “na manahan ro di ujung ido paluaonna” (Mat 24:1).
Panurirang Hesekiel manjou hajolmaon marhitehite goar ni Debata asa marhamubaon jala mulak tu dalanNa. Didia adong haimbaruon ni roha dohot tondi, disi ma adong haluaon (ayat 31). Marsadasada, boi do hita ditogihon tu hamubaon ni roha. Pingkirhon ma: Ibarat ganup ari do hita mangadopi kebebasan laho mamillit menu sipanganonta, songon i nang Debata mangalehon kebebasan laho mamillit dalanta di ngolu on. Alai turpuk on mangondoshon: Pillit ma hangoluan i marhitehite manguluhon hatigoran dohot hasintongan. Halak na mangulahon na denggan, parade ma las ni roham manjalo balosna, jala di angka na mangulahon na jat, parade ma nang arsak ni roham manjalo uhuman.
Sude do jolma hea mangulahon na sala di adopan ni Debata. Ndang adong jolma na lias sian dosa i. Jadi aha do sibahenonta molo madabu hita tu bagasan dosa? Tapintori do dirinta manang tapauba rohanta jala mulak tu Debata? Dilehon Debata do barita marhitehite si Hesekiel tu bangsoNa. Barita on ditujuhon tu sude bangso Israel, baik na di habuangan dohot na tinggal di Jerusalem. Lomo do roha ni Debata asa tongtong bangsoNa mangolu di bagasan hatigoran. Dihalungunhon Ibana do hamubaon ni roha sian bangsoNa.
Na rumingkot di jolmai ima asa marserep ni roha marhatopothon hasalaan dohot dosana di adopan ni Debata jala marhamubaon ni roha situtu marhite hata dohot pambahenan na diulahon di ngolu siganup ari. Ringkot do i ala godang do hita marpingkir, hamubaon ni roha i holan taringot tu “ahu dohot Debata”, hape sasintongna, hamubaon ni roha i pe taringot tu “ahu dohot donganku”.
Marusaha do angka sintua ni malim, sibotosurat dohot sintua di bagas joro di panjahaon ni Barita na Uli i laho mangunjuni Jesus, sada usaha na binahen nasida laho patundukhon Tuhan Jesus tu jolo ni natorop i. Ndang marnaloja nasida marusaha ala terancam ajaran nasida ala ni hadirion ni Jesus. Tu angka pangalaho ni jolma sisongon i, tegas do didok si Hesekiel: Na mardosa, i do na ingkon mate. Ndang tagamon manginona tu anak i hajahaton ni amana, jala ndang manginona tu amana i hajahaton ni anakna (ayat 20).
Tangkas do dipatuduhon di turpuk on sikap ni roha ni Debata maradophon halak partigor dohot parjahat, tarlumobi taringot tu uhuman hinorhon ni dosa. Na mamorsan panghorhon ni dosa i ma jolma i sandiri (ibana sendiri). On ma na tangkas patuduhon hatigoran ni Debata maradophon ganup jolma jala sadalan do i tu turpuk na mandok ingkon ganup do martanggungjawab di pambahenanna jala muse di Rom 2:6 dipaboa do: “Baloshononna do ganup hombar tu pambahenanna.”
Turpuk on ndang maralo tu turpuk na manaringoti pamaloson ni Debata tu jolma pardosa sahat tu sundut patoluhon dohot paopathon songon na ditaringoti di 2 Musa 20:5, manang na jotjot didok: dosa teanteanan. Adong do sada syarat na marlangku ayat 2 Musa 20:5, ima molo gabe dohot sude pinomparna mardosa (manguluhon pangalaho na sala songon angka ompuna nahinan). Alai, molo marhamubaon pinomparna, marpamuati do roha ni Debata tu ibana.
Mambege turpuk on, ingkon mandok mauliate do hita ai ternyata ndang pola hita mamorsan dosa dohot hasalaan ni ompunta najolo. Jala malua do hita sian uhum ala ni dosa ni ompunta. Alai boha do taringot tu dosanta sandiri? Malua do hita sian uhumNa?
Sada las ni roha godang di hita angka siihuthon Jesus i ma nunga dipalua Tuhan Jesus hita sian bura ni patik i (Galatia 3:13) jala nunga dipalua hita sian uhum ni Debata na masa tu angka pardosa. Alai ndada sae holan porsea di Tuhan Jesus marhite pamangan; ingkon sian nasa roha do jala ingkon patuduhononta do i di angka ulaon siganup ari. Ingkon mardongan do haporseaon i dohot pambahenan, ai molo so adong pambahenan, haporseaon i secara pokok mate do (Jakobus 2:17).
Kesimpulan dan Refleksi
Antong, pauba ma roham jala porsea ma ho di Tuhan Jesus, jala tardidi ma ho tu bagasan goar ni Tuhan Jesus. Dung i tama ma hamu marlas ni roha, ai di hamu do haluaon dohot hangoluan saleleng ni lelengna. Hatigoran dohot hasintongan 2 hal na so boi dipapulik, siala memang hatigoran do dasor ni hasintongan. Hatigoran nang dohot hasintongan ingkon saling membutuhkan jala saling memperkuat asa tarpatupa tatanan sosial na mian di bagasan holong. Tarida do hatigoran dohot hasintongan ni Debata maradophon bangsoNa, buktina dang mardia imbar Debata maradophon bangsoNa, molo salah tetap salah, molo sintong, ingkon sintong do diadopan ni Debata.
Debata mangalehon hasonangan tu halak na parjahat na olo mulak tu adopan ni Debata, na olo mangaradoti saluhut angka patik ni Debata, jala mangulahon uhum dohot hatigoran. Ditogihon Debata do saluhut halak na mardosa i tu bagasan habadiaonNa, jala dang dihalomohon Debata molo parjahat i mate di bagasan hadosaonna, alai hamumulak ni parjahat i do na dihalomohon roha ni Debata. Angka naung mangaramoti patik ni Tuhan i, manongtong ma ibana disi, dijamoti ma dirina, langkana, pikkiranna nang parulaonna unang meret sian hasintongan ni Debata asa taruli di tumpal hasonangan i. Amen.
Posting Komentar