Jamita Partangiangan Epistel Minggu 15 November 2026 Minggu 24 Dung Trinitatis tarsurat di buku Daniel 6 ayat 1 - 6. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Naposo na Denggan Roha jala na Satia." Rap ma hita mangihuthon hatoranganna.
Pendahuluan
Godang do halak Batak na manghalomohon goar ni Daniel. Goar on sian hata Heber na marlapatan “Debata do Panimbangkon” (God is my Judge). Mansai uli lapatan ni goar Daniel, i do umbahen na sai jumpangta goar i di luat dia pe, ndang holan di tano Batak, di luat na asing pe sai jumpangta do na margoar Daniel. Sungkunsungkun roha boasa godang halak Kristen na manghalomohon goar i? Tontu sada alasan boi tarjalo roha: ala ibana do naposo ni Debata na denggan roha jala na satia. Songon dia do parange na si songon i ringkot sitiruonta? Adong tolu na boi taida sian turpuk on, na parjolo, hapistaran; na paduahon, tondi na mangula; na patoluhon satia tu patik. Nian, ndada holan lapatan ni goar na uli alai lobi sian i tung mansai godang do jolma na lomo roha na manjaha buku Daniel ala marisi barita na manghatindangkon hatigoran dohot habasaon ni Debata.
Pembahasan
Raja Darius i ma sada raja na manggantihon Beltsasar, ala baru dope ibana manguluhon harajaonna mansai ringkot adong na mangurupi ibana di bidang politik asa boi denggan dihobasi ibana harajaonna i. Dirajumi ibana do na so tolap sahalakna laho marhobas, dipabangkitma 120 induk parentahon harajaon i (ay 1). Tamba sian i, dipillit muse 3 halak sintuanasida, si Daniel ma sada na dipabangkit raja. Boi taetong na dipabangkit ibana i ndada jolma biasa, tontu nunga godang seleksi dipatupa taringot tu hapistaran, pengalaman, dohot keterampilan manang skill. Nunga tung timbo kwalitas nasida, ala ulaon na maol do na naeng siadopanna.
Hapistaran
Si Daniel termasuk ma sada na tarpillit raja Darius. Tarjalo roha do boasa tarpillit ibana muse, ala nunga tolu sundut sian Nebukadnesar, Beltsasar, nunga tarbarita hapistaran ni si Daniel. Gari inong ni raja Darius pe nunga dihatindangkon hasurungan ni si Daniel mulai sian ompungna, raja Nebukadnezar (Dan. 5:10-12). Jadi, patut do didok jolma “mora di arta boi do habis ndang sadia leleng, alai mora di parbinotoan ndang boi habis saleleng mangolu”. Jolma na pistar maol do dilupahon ala godang parbinotoanna mangkorhon ngolu na denggan jala sonang. Hapistaran ni si Daniel tontu marharoroan sian Debata (Dan 1:17), jotjot do ibana martangiang mangido dalan asa Debata na mangalehon asi ni roha (Dan. 2:18).
Di zaman nuaeng on, nunga mansai timbo hapistaran ni jolma. Marhite sian teknologi digital nunga rarat be hapistaran na mamangke Artificial Intelligence (AI) di ganup ulaon ni jolma. Gari di Jerman, di huria na margoar St. Paul, Fuerth, pandita na marjamita pe nunga gabe tenaga AI dipangke. Di sada sisi boi do denggan ala boi mangurupi ulaon ni parhobas, alai di sisi na asing, unang gabe sude tergantung sude ngolunta tu hapistaran na di portibion. Nunga godang angka hapistaran (smart) di ganup ngolunta, isarana smart-phone, smart-card, smart-TV dohot angka na asing ni, denggan do molo tapangke jala taparhaseang to ngolu na marimpola. Jala tarajumi ma, ai ringkot do hita manjamoti haporseaonta taringot tu hasurungan ni jolma marhite tondi na mangula didirinta be.
Tondi na Mangula
Tangkas do didok di ay 4, tondi na sumurung do di bagasan si Daniel. Tondi ni Debata do na manogu tondina asa mangulahon ulaon na denggan (Patud. Joh. 15:26). I do umbahenna dipillit jala diargai raja ibana, ai nunga tarbarita sian tolu sundut naung dipasingkop ibana do ulaon harajaon na borat. Godang ni na pistar di harajaon i, holan ibana do na ummangat mambahen haputusan (decision maker). Ibana gabe parhitean ni Debata laho patulushon sangkapna. Somal do dipangke Debata angka naposona mandalani mamolus rura hamatean, alai boi monang di ujungna. Singkop do sude ulaon na ummaol di portibion molo dohot Tondi ni Debata mangarmoti tondinta jala mangula di bagasan hita.
Satia tu Patik
Raja Darius pabangkithon si Daniel ndang marhite kepentingan pribadi. Objektivitas do dipangke ibana ndada alani “ABS” (Asal Bapak/ Bos Senang). Ndang adong KKN dipatupa ala halak Jahudi do si Daniel, ndang adong mudar ni Babel dohot mudar ni Persia. Ai diboto raja Darius do masalah harajaon na so boi neang dihobasi, ingkon botulbotul mangasahon kwalitas. Nunga tarbarita si Daniel halak Jahudi na manomba Debata, marasing sian haporseaonna, alai tongtong do ndang gabe pangambat di raja i, asal ma pistar manang aha pe ugamo ni parhobasna.
Dison ma sada kesempatan ni angka sintua dohot induk ni raja i laho mambahen sindir tu si Daniel (ay 6). Dibahen ma sada parenta asa ditotophon raja i taringot tu uhum na maralo tu harajaon. Uhum i mandok oraora, paboa na so jadi manang ise di bagasan tolupulu ari mangido manang aha, nang tu debata dia nang tu jolma, nda holan tu raja, ingkon timpalhononhon ibana tu godung parbabiatan (ay 7). Dison ma taida hajahaton ni jolma, molo nunga adong pangiburu dohot hosom di roha, manang aha pe diula do, dohot masalah ugamo pe gabe diboan tu politik.
Alai manang dia pe na masa, tongtong do si Daniel satia tu patik ni Debata. Piga hali pe ibana mangadopi hamaolon tong do roha na tu Jerusalem, ndang meret haporseaonna sian i, nang pe di toru ni huaso Babelonia manang Persia. Diingot ibana do haporseaon na tu tradisi Jerusalem na hot di bagasan patik ni Debata. Jala tongtong do ibana martangiang tu Debata asa malua sian parmaraan (ay 10). Dison ma ingkon tarida gogo ni haporseaon, songon na dipatudu Jesus, tangiang do dalan asa margogo hita mangadopi hajahaton ni portibion. Didok Tuhan Jesus: “Dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging!” Hot do si Daniel tu patik ni Debata jala malua do ibana sian angka parmaraan, nang pe ditimpahon ibana tu godung parbabiatan i, dipalua Debata do ibana sian baba ni singa (ay 22).
Kesimpulan dan Refleksi
Marhite turpuk on diajari do hita na parjolo ma i: asa manat mangulahon angka ulaonta. Molo sintong pangalahonta laho mangulahon ulaonta manang didia pe, sai adong do parbue na denggan. Ingkon dipatudu jolma na marhaporseaon do huhut kwalitas na mangula di tongatonga ni humaliangta, manang di dia hita ditugashon. Dihalomohon angka uluanta ma i, songon na masa di si Daniel, gabe nangkok ma prestasi dohot promosi jabatan. Alai ingot ma, saleleng mangolu di hasiangan on, adong na manghalomohon, jala adong muse na laho manghosomi. Ndang sai sude jolma lomo roha marnida parbue ni suansuananta di ladang, ndang sai sude lomo roha mangida nangkok jabatanta di kantor, jala ndang sai sude lomo roha ni jolma marnida langku tigatiga di donganna. Jadi, ingkon manat ma hita mamboan dirinta. Ndang sai sude jolma gabe dongan, nang pe rap di sada ulaon, sai adong do na ganggu rohana nang pe na denggan na taula. Alani i, manat ma hita alai unang gabe moru haringgasonta mangulahon na denggan i, sai diurupi Debata ma hita laho mangulahon na mambangun hadengganon di luatta be.
Na paduahon, ingkon tulus do hita mangula. Sude na taula di tongatonga ni keluarga, di huria dohot humaliang, sada do tujuanna, i ma laho pasangaphon Debata. Didok Apostel Paulus: “Onpe, na mangan manang na minum hamu, manang dia pe diula hamu: Bahen hamu ma saluhutna i, pasangaphon Debata!” I do na diula si Daniel, ndada laho kepentingan pribadi i, alai tu kepentingan bersama marhite tulus ni rohana. Malua ma ibana sian baba ni singa, malua donganna si Sadrakh, Messakh, Abednego. Malua ma raja Darius dohot keluargana. Malua nang sude luat i marhite ulaon si Daniel na tulus rohana pasangaphon Debata.
Na patoluhon, holan tu Debata ma hita marhaposan. Ala nunga dijou hita gabe naposo na denggan jala na satia, antong holan tu Jesus ma hita marsigantung. Songon si Daniel na so olo marsigantung tu huaso ni portibi, nang pe na pistar, na terampil ibana, na dihaholongi raja Darius, ndang tusi ibana marsigantung. Torop do halak Kristen naung mangaranto songon si Daniel, alai tongtong ma hita marhaposan tu Debata. Sai ditatap ibana do Jerusalem, disi do parjolo jumpang ibana pangajarion dohot poda na sian Debata. Hita pe taingot ma i, Jerusalem inganan hatutubu ni Jesus. Taihuthon ma poda ni Tuhan Jesus, manang didia hita maringanan. Denggan do tabahen gombar ni Tuhan Jesus, silang (salib) di bagasta, asa gabe adong dalan siingoton, alai ingkon lobi sian i do hita, ndang haporseaon na simbolik (holan dompak duru), manang haporseaon na metaforik (holan gombar). Ingkon gabe siihuthon Jesus do hita marhite etik (parange na denggan), dohot otentik (na polin). Songon si Daniel, naposo na denggan roha jala na satia. Amen.
Posting Komentar