JESUS SIHORHON HALUAON SALELENGLELENGNA
Psalmen 22:18-25
TURPUK
Habilangan ahu do sude holiholingku, martilla be do ianggo nasida mida ahu. Dibagi nasida do angka uloshu, mandabu tondung do nasida taringot tu bajubajungku. Alai sai unang mandaodao ianggo Ho, ale Jahowa, parsigantunganhu, hapogani ma mangurupi ahu. Sai palua ma hosangku sian podang, sian sisilon ni biang hosangku na tarpunjung. Sai palua ma ahu sian baba ni babiat, jala alusi ahu maradophon tanduk ni angka horbo jalang. Sai jamitahononhu ma goarmu tu angka hahanggingku, jala pujionhu ma Ho di tongatonga ni huria na marluhut i. Puji ma Jahowa hamu ale angka na manghabiari Ibana, sude pinompar ni si Jakob pasangaphon Ibana, jala sude pinompar ni Israel manghormat Ibana. Ai ndang lea rohaNa manang marbiasbias mida pardangolan ni na dangol, jala ndang ditabunihon bohiNa maradophon ibana, jala ditangihon do anggukna i tu Ibana.
PATUJOLO
Jotjot do tubu panghilalaan ni jolma songon na ditadinghon Debata ibana di pardalanan ni ngoluna. Boi do masa songon i ala ragam ni haporsuhon na ro so mansadi di ngoluna. Somal do tabege di ngolu siapari on hata manang andung ni halak, mandok "Aha do dosangku Tuhan, boasa ingkon masa si songon on?" Jotjot do angka haporsuhon i mambahen marsitaitan rohanta. Haporsuhon i gabe inganan pergumulan jala parporangan ni haporseaon maradophon Debata.
Di sada sisi, bernit ni sitaonon na masa di ngolunta mambahen hita gabe gale jala naeng maninggalhon Debata. Alai di sisi na asing haporsuhon i boi do lam pasolhothon, lam patoguhon rohanta tu Debata. Haporsuhon i dibereng ma i songon dalan na dipaloas Debata masa di ngolunta, laho manguji jala laho patoguhon haporseaon dohot panghiriman di angka na porsea. Jala i do na masa di ngolu ni angka na porsea.
Ndang gabe jaminan ngolu ni halak na porsea di Kristus Jesus ingkon marhasonangan ganup ari, dao sian angka parsoalan dohot parmaraan. Alai halak na porsea dilehon Kristus do hagogoon laho manaluhon haporsuhon i, dipargogoi mangadopi parungkilon asa gabe lam tu toguna haporseaonna dohot panghirimonna tu Debata. Jesus sandiri pe ingkon manaon sitaonon na dokdok do di portibi on. Pola mate tarsilang Ibana laho paluahon angka na porsea, ala ni i didok Tuhan Jesus Kristus di angka na naeng mangihuthon Ibana asa olo mamorsan silang na tu Ibana i.
HATORANGAN
Di Psalmen 22 on, tangkas do dipabotohon ragam ni haporsuhon na ro mardapotdapot na niadopan ni Raja Daud. Terancam do ngoluna hinorhon ni angka musuna. Dihaeleson halak do ibana pola dipatudos dirina songon gea, diparengkelengkelhon halak do ibana jala mangupirupiri halak mida ibana. Hansintan sude pamatangna, hira na tangging sude holiholina jala songon pantis na malala ateatena di bagasan. Mansai godang do musu ni si Daud na naeng pamatehon ibana jala naeng mangahut harajaon i sian ibana. Ndang adong sian hajolmaon na boi mangurupi jala paluahon ibana.
Dung i dibagibagi angka musuna, angka na manghasogohon ibana do ulosna jala mandabu tondung do nasida maradophon bajubajuna i. Ala posi ni sitaonon i, pola do ibana manghilala na ditadinghon Debata Jahowa, didok ibana "Ale Debatangku, Debatangku, boasa tung tadinghononMu ahu? Sai mandaodao do angka hata ni anggukhon sian hatuaonhu" (ayat 2).
Di ragam ni parungkilon na masa i margumul situtu do Raja Daud. Di son ma tarida parbue ni haporseaonna, ndang gabe ditadinghon ibana Debata, ndang madabu ibana tu pandelean jala ndang talu ibana mangalo angka sitaonon i. Marpos ni roha situtu do Raja Daud tu Debata, na so tadinghonon ni Debata ibana. Sai dipargogoi jala paluaon ni Debata do ibana sian nasa musuna. Tu Debata sambing do ibana pasahathon angka na masa i jala holan tu Debata do ibana manghirim pangurupion. Umbahen i do marpangidoan si Daud tu Debata asa dipalua hosana sian musuna, sian podang dohot sian sisilon ni biang, sian baba ni babiat jala maradophon tanduk ni angka horbo jalang. Marhaposan situtu ibana tu Jahowa jala porsea do ibana di pangiringiring ni Jahowa, ala asi ni roha do jambarna.
Dung sahat pangidoanna i tu Debata, laos dipasahat ibana ma padanna tu Debata. Ala ditangihon Debata do ibana jala dipalua sian angka haporsuhon. Marpadan ma Raja Daud laho manjamitahon goar ni Jahowa tu angka hahaanggina jala sai pujionna ma goar ni Jahowa di tongatonga ni huria i. Ndang holan i, diarahon ibana do sude pinompar ni si Jakob laho pasangaphon Debata, sude pinompar ni Israel manghormat Debata.
Dison dipataridahon si Daud do komitmen dohot hasation na polin mangulahon padanna tu Debata. Ndang holan di hata, ndang holan padan sambing--ala naung dialusi Jahowa tangiangna--ndang lupa ibana, marsitutu do ibana, marhasatiaon mangulahon padanna tu Debata. Sian ragam ni haporsuhon na masa i, tubu ma panandaion na sintong tu Debata. Tubu ma haporseaon tu Debata. Ala ni i dipabotohon Raja Daud do alana boasa ingkon pujionta Jahowa Debata:
1. Parasi roha do Jahowa di angka halak na dangol.
Didok Raja Daud "Ndang lea rohaNa manang marbiasbias mida pardangolan ni na dangol." Lapatanna ndang mardia imbar jolma i di adopan ni Debata, halak na dangol manang halak na marlas ni roha arga do i di adopan ni Debata. Songon na niadopan ni Raja Daud, lea do ibana di mata ni halak, pola songon gea. Alai molo di adopan ni Debata arga do ibana, ndang dipasiding jala ndang marbiasbias roha ni Debata mida Raja Daud. Molo pe godang taida di hajolmaon marnida bohi, pangkat dohot angka lan na asing, molo di adopan ni Debata arga do hita saluhutna angka na porsea di Ibana.
2. Ndang ditabunihon Debata bohiNa maradophon halak na dangol.
Lapatanna ndang ditadingkon Debata angka jolma na dangol, satia do Debata manarihon ngolu ni jolma. Tung pe marragam angka parungkilon, alai ndang gabe dipasombu Debata hita marsasahalak mangadopi luhutna i. Manongtong do asi ni rohaNa mandongani hita.
Baca juga!
3. Ditangihon Jahowa do angka anggukangguk ni na dangol.
Holong do roha ni Jahowa di angka na joujou tu Ibana. Ndang holan manatap manang manangihon Ibana molo joujou hita di goarNa. Alai dohot do Ibana paluahon angka na dangol i sian hagogotan, parmaraan manang hamatean.
HAHONAAN
Di bagasan sadari on tapatupa do ulaon parningotan di hamamate ni Jesus manang Jumat Agung. Di partingkian on tangkas do taida songon dia panghophopion ni Jesus tu hita jolma na dangol on. Dipatuduhon Jesus do haradeonNa manaon na porsuk laho paluahon hita sian hurungan ni dosa dohot hamatean. Nunga dipamonang Jesus hita maralohon hamagoan dohot hamatean i. Nuaeng naeng ma tongtong hita porsea jala satia mangihuthon Ibana. Tongtong ma hita manghangoluhon HataNa i ai marhite hamatean dohot haheheonNa i dipatupa Jesus do haluaon di angka na porsea di Ibana.
Di pardalanan ni ngolunta si ganup ari jotjot do ro angka ragam ni parungkilon tu hita alai dipaingot turpuk Epistel on do hita, asa tongtong mangalualu tu Jesus Kristus jala manongtong ma hita marhaposan tu Ibana, ditatap Jahowa do ngolunta. Sai paluaonNa do hosanta sian angka musu dohot angka hasusaan i. Ala ni i tongtong ma hita satia mamujimuji Ibana sian nasa roha dohot tondi jala tabaritahon ma Ibana tu angka hahaangginta, pinomparta dohot sude angka na humaliangta pe. Amen. (sds)
Posting Komentar