JESUS SIHORHON HALUAON SALELENGLELENGNA
Heber 5:7-10
TURPUK
Tagan jolma Ibana dipelehon do angka pangidoanNa dohot elekelekNa mardongan angguk bolon dohot iluilu tu na boi paluahon Ibana sian hamatean; jadi ditangihon do Ibana, gabe malua sian hatahuton i. Ai atik pe Anak i Ibana, diguruhon do pangoloion marhite sian na tinaonNa i. Jala dung rimpas gabe sihorhon haluaon salelenglelengna do Ibana di sude na mangoloi Ibana. Digoar Debata do Ibana Sintua ni Malim mangihuthon horong ni si Melkisedek.
PATUJOLO
Di Jumat Agung sadari on, marningot do hita di panghophopion ni Tuhan Jesus Kristus sipalua hajolmaon sian dosa dohot hamatean marhite hamamateNa i. Ibana do Naposo ni Debata na tumaon na bernit ala ni dosanta. Dipaandar tu hita hadirion ni Jesus uju mangadopi angka sitaonon na bolon i Ibana. Asa gabe tiruan i di angka na mangolu, i ma panindangionta taringot tu haporsuhan nang parungkilon di ngolunta. Debata sandiri nama di bagasan Jesus Kristus na manggarar utang dosa ni jolma i, asa saut malua jolma sian dosa dohot hamatean. Marhite hamamate ni Jesus na tigor i, boi hita saor dohot Debata. Dipatigor Jesus hita tu Debata. Ibana do patupa haluaon di angka na porsea di Ibana. Ala ni i naeng lam tangkas panandaonta di Tuhan Jesus, asa lam bagas haporseaonta mangoloi Ibana mandapothon haluaon na manongtong i.
Baca juga!
HATORANGAN
Sian mamungka jongjong huria na parjolo i tongtong do adong situhukon di na mangoloi Kristus. I do nang na masa di halak Kristen na adong di luat parserahan. Masa do di tongatonga ni huria angka ragam ni hamaolon, ala ni panggomgomi, lumobi ma na ro sian horong ni halak Jahudi. Dilele, dipungkuli jala dipusa, pola torop sian nasida na agoan hosa. Ala borat ni sitaonon i gabe torop do sian nasida na gabe sumurut sian haporseaonna laos manadinghon hakristenon. Siala sitaonon na niae ni halak Kristen i do disurathon buku Heber on laho mamangkulingi, maniroi jala pahot na porsea i asa unang gabe mandele nasida mangihuthon Jesus Kristus. Sotung ganggu na porsea i marpanindangion jala unang mabiar mamaritahon asi dohot holong ni roha ni Debata di bagasan Jesus Kristus, marhite hamamateNa dohot haheheonNa.
Turpuk jamita sadari on, paandarhon tu hita paboa Jesus Kristus do Sintua ni Malim na pinabangkit ni Debata (ayat 5). Ibana gabe Sintua ni Malim mangihuthon horong ni si Melkisedek. Adong tolu na ringkot sitiopon ni sahalak malim manang imam di tongatonga ni bangso Israel.
Na parjolo, sahalak malim/ imam dipabangkit laho humophop angka jolma, mangatur angka aturan taringot tu Hata ni Debata huhut mangatur angka ulaon haporseoan ni Bangso ni Debata. Ala ni i do di Padan na Robi tangkas do dipabotohon sada sian ulaon ni malim i, i ma mamelehon pelean situtungon manang korban persembahan laho manobus dosa ni jolma.
Na paduahon, sahalak malim ingkon do manghilala na masa di donganna jolma. Ingkon mian do holong nang roha na marpanarihon di dongan jolma. Ingkon jumolo do ibana pasahathon pelean bahen tobus ni dosana. Dung i dipasahat ma muse pelean bahen panobusion di dosa ni jolma.
Na patoluhon, malim dipabangkit Debata do. Ndang boi sahalak jolma pabangkithon dirina sandiri gabe sahalak malim. Panjouon ni sasahalak gabe malim pe marharoroan sian Debata do.
Sian on, dipabotohon buku Heber do tu hita ganup. Ia Kristus i, didok do i Sintua ni Malim na bolon. Tarida ma hasurungan ni Jesus sian angka malim na adong di bangso Israel. Debata do na pabangkithon manang na pasahathon sahala Sintua ni Malim i tu Jesus Kristus. Dipasahat ma i uju masa pandidion na badia di batang aek Jordan. Didok Debata tu Ibana, "AnakHu do Ho, sadari on do Ho Hutubuhon" (ida Psalmen 2:7). Ibana ma Anak ni Debata naung gabe jolma, ro tu portibi on laho paluahon jolma pardosa. Dipasahat Debata do saluhutna huaso tu Jesus Kristus, asa margogo Jesus i patupahon haluaon di portibi on. Diboto Jesus do saluhutna na masa di ngolu ni angka jolma, angka hagogoon dohot hagaleon ni jolma tangkas do diboto Ibana. Jala diboto Jesus do angka parungkilon na laho adopanNa.
Tagan di portibi on dope Jesus, marragam do parungkilon na niadopanNa. Dipaburuburu halak Parise dohot siboto surat do Jesus jala dihasogohon angka panggomgomi do Jesus sahat tu na tarsilang Ibana songon halak si pardosa di Dolok Golgata. Ala ni borat ni sitaonon i, dipelehon do angka pangidoanNa dohot elekelekNa mardongan angguk bolon dohot iluilu tu na boi paluahon Ibana sian hamatean. Martangiang Jesus tu Ama i, ndang na laho pataridahon hagaleonNa, alai dipasahat Ibana do sude angka pangidoanNa i pataridahon haundukonNa tu Ama i. Ingkon saut do sangkap ni Ama i di portibi on.
Baca juga!
Sitaonon ni Jesus i tarida ma uju na rap Jesus dohot angka siseanNa di porlak Getsemane. Didok Jesus tu angka siseanNa, “Mansai marsak situtu do rohangKu, hira na mate do” (ida Mateus 26:38). Dipatungkap Jesus ma bohiNa tu tano martangiang, ninna ma, "Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangKu; rohaM do." Sitaonon na mansai borat do na niadopan ni Jesus, na so dung hea dope songgop manang diadopi halak na asing si songon i. Atik pe Kristus i Anak ni Debata, ndada dihaginjangkon Ibana diriNa. Ndang dipangasangkon Jesus hadirionNa songon Debata, dipillit Ibana do songon na patuduhon hasereponNa. Ndang dipangasahon Ibana huasoNa laho manjua parungkilon i, alai diguruhon Ibana do pangoloion marhite sian na tinaonNa i. Ala ni pangoloion manang ketaatanNa tu Debata na marsuru Ibana do gabe ditangihon Ama i Ibana, gabe malua sian hatahuton i.
Di parningotan Jumat Agung on. Marningot do hita di Naposo ni Debata na tumaon na bernit. Posi jala parir situtu do na ingkon adopan ni Mesias i, dileai, dipasiding jolma do Ibana, ditijuri, tartullang, mabugang, dipasipal sahat tu na mate Ibana di hau pinarsilang di dolok Golgata. Alai ndang mangalo Jesus, ndang dipangido Ibana api sian banua ginjang laho manguhum angka jolma na mambahen songon i tu Ibana. Alai baliksa, didok Ibana do asa marpamuati roha ni Debata mida jolma i. Ndang alani dosaNa, ndang ala ni pangalahoNa umbahen na songgop i tu Jesus, alai ala ni dosa ni Jolma i do.
Marhite pangoloionNa di Debata na manggogoihon Kritus mangadopi ragam ni hamaolon i, gabe rimpas ma Jesus sihorhon haluaon i. Di hata Junani dipangke hata "teleioun" marharoroan sian hata "teleios" lapatanna sempurna manang rimpas. Molo didok rimpas paboa naung gok jala dapot tujuan ma i, tujuan naung ditotaphon sian na parjolo, jala naung gok tujuan i. Hata "teleios" mangarahon jala manghonai tu fungsi manang maksud. Ala ni i dung rimpas luhut na masa i, gabe sihorhon haluaon si salelenglelengna ma Kristus i. Ndang be hamatean i ujungNa, alai haheheon do. Ai nunga monang Ibana, nunga ditaluhon hamatean dohot sibolis. Marhite hamamatena di hau pinarsilang, gabe dipauli Ibana ma hubungan ni jolma i dohot Debata. Ndang marhite mudar ni hambing manang anak ni lombu, tung marhite mudarNa sandiri do, naung durus di hau pinarsilang. Gabe dipatupa ma haluaon si salelenglelengna. Jesus do Mesias i jala Ibana do sihorhon haluaon si saleleng ni lelengna.
HAHONAAN
Nunga tarjalo hita haluaon na pinatupa ni Tuhan Jesus Kristus marhite naung mate Ibana ala ni angka dosanta. Diparsilangkon Jesus singkat ni dosanta. Tartanom Ibana jala dipahehe di ari patoluhon bahen haluaonta. Tuhanta sandiri do patupahon i di hita ganup angka na porsea. Ala ni i marsihohot jala maporus ma hita tu Anak i, i ma Jesus Kristus Sintua ni Malim na tutu. Nunga dipataridahon songon dia pangoloion ni Anak i tu Debata, hita pe ingkon ta hangoluhon ma pangoloionta tu Jesus. Tapasahat ma ngolunta tu Debata, asa diramoti Debata Pargogo na so hatudosan i hita sahat ro di saleleng ni lelengna jala dipatau hita mangauhon HataNa. Molo dung tapasahat saluhutna tu Ibana sai na pargogoanNa jala dongananNa do hita.
Nunga sahat tu hita haluaon i. Alai na marungkil dope hita tagan di hasiangan on. Paima sahat hita tu hatongamon na di ginjang i. Naeng ma gomos hita maniop hata ni Tuhanta jala manghangoluhon songon naung pinatupa ni Jesus uju mangadopi sitaonon Ibana. Nang pe hira na diloas sangombas songgop na bernit tu angka siihuthon Jesus, ndada na so margogo Ibana paluahon, ndada na so diida hita di na masa i. Alai dalan do i asa hot jala togu angka na porsea i nang pe ingkon tumaon na hansit. Ndang adong jumpang haluaon di halak na tois di Barita na Uli na binoan ni Tuhan Jesus. Ndang adong be haporusan na asing laho mandapot haluaon, so holan Jesus Kristus. Ibana do sihorhon haluaon si saleleng ni lelengna. Amen. (sds)
Posting Komentar