PANGHOPHOPION NI JESUS KRISTUS NA PALUAHON
2 Musa 24:1-8
TURPUK
Dung i didok Jahowa ma tu si Musa: Nangkok ma hamu mandapothon Jahowa, ho dohot si Aron, Nadab dohot Abihu, ro di na pitupulu halak sintua ni Israel, mandaodao ma hamu marsomba Ahu. Sasada si Musa pe jumonok mandapothon Jahowa, alai anggo nasida ndang jadi jumonok, bangso i pe ndang jadi nangkok rap dohot ibana. Dung i ro ma si Musa, jala dipajojor tu bangso i saluhut hata ni Jahowa dohot sude angka uhum. Jadi sahata ma sandok bangso i mangalusi, didok nasida ma: Sude hata angka na pinaboa ni Jahowa, sai bahenonnami do. Jadi disurathon si Musa ma sude hata ni Jahowa, jala dipasogot manogotna i, dipauli ma sada langgatan di bona ni dolok i dohot sampuludua tiang parningotan marguru sian na sampuludua marga ni Israel. Dung i disuru ma angka dolidoli sian halak Israel, asa dipelehon nasida angka pelean situtungon dohot mamotongi lombu bahen angka pelean hamauliateon di Jahowa. Dung i dibuat si Musa ma mudar i satonga, jala dibahen tu bagasan angka saoan; alai anggo mudar na satonganari, tu langgatan i do dipispishon. Dung i dibuat ma pustaha parpadanan i, jala dijaha tu pinggol ni natorop i. Jadi didok nasida ma: Sude na nidok ni Jahowa, sai bahenonnami do, jala tangihononnami do. Dung i dibuat si Musa ma mudar i, jala dipispishon tu na torop i, jala ninna ma: Ida ma, on ma mudar ni parpadanan i, naung pinahot ni Jahowa tu hamu ala saluhut hata ondeng.
PATUJOLO
Buku Musa na paduahon on marisihon angka hatotapan taringot tu ulaon pajongjonghon parpadanan ni Debata dohot bangso Israel. Panurirang Musa do na mamungka ulaon on marhite na pasahathon sampulu Patik ni Debata. Jala ulaon on pataridahon hadirion ni bangso Israel laho mangihot sada parpadanan. Tung mansai serep do roha ni Debata jala lambat tarrimas mida hagaleon dohot dosa ni bangso i. Dilehon do partingkian tu bangso Israel laho marhamubaon asa malua nasida sian dosa huhut gabe bangso na badia.
Songon dia do asa boi bangso Israel manongtong di bagasan habadiaon ni Debata? Di turpuk on adong do joujou sian Debata tu bangso Israel asa mandapothon Jahowa. Dipasahat Debata do asi dohot holong ni rohaNa marhite parpadanan na pinatupaNa maradophon bangso Israel.
Baca juga!
HATORANGAN
Marhite na dipatupa parpadanan di bangso Israel maradophon Debata, gabe sada dalan ma i pahothon parpadanan di bangso i maradophon Debata na niolohon ni bangso i nang dohot Debata. Debata do na mamungka jala pasauthon padan i marhite pangaramotionNa tu bangso Israel. Bangso i ma na gabe sijalo huhut manghilala holong ni Debata jala i do na ingkon dihatindangkon nasida songon bangso ni Debata jala ingkon mangoloi do nasida di sude Patik ni Debata.
Na marpadan do bangso Israel laho mangulahon angka Patik ni Debata. Parpadanan ni Debata dohot bangso Israel dipatupa jala dipungka marhite na pasahathon mudar sian pelean situtungon dohot mamotongi lombu bahen angka pelean hamauliateon di Jahowa. Mudar di Padan na Robi i ma songon gombaran ni hangoluan. I do umbahen na mudar sian pelean situtungon i dipasahat satonga tu langgatan (gabe gombaran paboa na rap do Debata di tongatonga nasida).
Dipatupa nasida ma i songon pataridahon hamauliateon nasida ala ni hasatiaon ni Debata na mangaramoti jala marmudumudu pardalanan ni parngoluan nasida. Satonga nari sian mudar pelean situtungon i dipispishon ma i tu bangso Israel dung dihatindanghon nasida paboa na olo nasida manangihon dohot mangulahon Hata ni Debata. Lapatanna, mudar i ma songon tanda naung hot parpadanan nasida rap dohot Debata asa dapotan hangoluan nasida. Nunga diihot bangso i dirina di bagasan Hata ni Debata. Ingkon dipatuduhon ma i marhite angka ulaonna si ganup ari maradophon Debata dohot maradophon bangso na asing.
Di turpuk on dilehon do tu panurirang Musa sada ulaon asa nangkok tu dolok Sinai laho manjalo batu na marsurat dohot patik ro di uhum nang angka aturan pajongjonghon bagas joro ni Debata. Hata ni Debata tu Panurirang Musa mandok asa ro nasida mandapothon Jahowa. Ibana rap dohot si Aron, Nadab, Abihu dohot pitupulu halak sintua ni Israel parsidohot ditogihon. Alai ingkon sian na dao do nasida marsomba tu Jahowa ala holan Panurirang Musa do na boi nangkok jala jumonok mandapothon Jahowa. Alai molo na asing na i ndang jadi jumonok nang bangso i pe ndang jadi nangkok rap dohot Panurirang Musa.
Dung mulak sian dolok Sinai dipaboa Panurirang Musa ma tu sandok bangso Israel taringot tu Hata ni Debata dohot sude angka aturan nang uhum naung jinalona. Dung dipajojor Panurirang Musa Hata ni Debata dohot sude angka aturan nang uhum, sahata ma bangso i mangalusi songon naung disurathon di ayat 3 mandok, "sude hata angka na pinaboa ni Jahowa, sai bahenonnami do." Pandohan on ma na mambahen bangso Israel marasing maradophon bangso na asing, na gabe tanda na pinillit ni Debata nasida gabe bangsoNa. Ingkon unduk do nasida tu Hata ni Debata.
Adong do dua hali bangso i mandok songon i, na parjolo di ayat 7 jala ditambai nasida do mandok "tangihononnami do." Pola dua hali didok nasida, i ma pataridahon hadirion nasida di na laho mangulahon hata na nidok ni Debata. Sian pandohan ni bangso Israel i taboto ma ndang na holan manangihon nasida alai huhut do mangulahon. Manang baliksa ndada holan mangulahon alai ingkon do manangihon Hata ni Debata. Sian on boi botoonta paboa manangihon dohot mangulahon Hata ni Debata ndang boi tarsirang i boi dohonon sada do i. Adong do tingkina hita manangihon Hata ni Debata, jala adong do tingkina hita mangulahonsa. Alai taingot ma, molo ndang taulahon Hata ni Debata songon alogo sambing do i na mangullus nang pe tatangihon.
Baca juga!
Dung adong alus ni bangso Israel na rade nasida mangoloi Hata ni Debata, disurathon Panurirang Musa ma sude Hata ni Jahowa i, jala dipasogot ma manogotna i, dipauli ma sada langgatan di bona ni dolok i dohot sampulu dua tiang parningotan marguru tu sampulu dua marga ni Israel, dipatupa songon i asa adong tugu na gabe tanda parsaoran ni Debata dohot luhut Israel, tu sude marga ni Israel, ndang holan sada marga. Dungkon ni i, disuru ma angka dolidoli sian halak Israel, asa dipelehon nasida angka pelean situtungon. Boasa ingkon dolidoli? Hatiha i ndang adong dope jongjong songon sada punguan angka malim manang hasadaan secara struktur di angka malim. Hata ni Debata do na mandok jala manjou sude bangso i manjadi harajaon malimmalim jala gabe bangso na badia. Jadi ndang adong imbarna, tung sude do ingkon siparsidohot di harajaon malimmalim jala bangso na badia na nidok ni Debata, termasuk ma sian horong ni na umposo manang na tumua.
HAHONAAN
Sadari on tapatupa do ulaon Kamis Putih na marningot do hita di tingki parpudi uju na rap marpungu Jesus dohot angka siseanNa andorang so ditangkup Jesus. Marhite hatorangan ni Epistel on, aha ma na boi sipahusorhusoron di bagasan rohanta? Di turpuk Epistel on nunga tangkas dipaboa taringot tu na pinasahat ni Panurirang Musa satonga mudar sian pelean situtungon jala dibahen tu bagasan saoan, satonganari tu langgatan ma dipispishon. Mudar na pinasahat ni bangso Israel i patandahon naung mardame do nasida dohot Debata. I ma songon sada gombaran di hita halak Kristen (angka na porsea) paboa mudar ni Kristus na use di hau pinorsilang i, i ma naung padamehon hita dohot Debata.
Haluaon na pinasahat ni Debata tu hita digohi ma i marhitehite Tuhanta Jesus Kristus. Panghohopion ni Jesus Kristus do naung paluahon hita angka na porsea marhite mudarNa na durus di dolok Golgata. Dipelehon Jesus do dirina laho manesa angka dosanta. Debata marhite Jesus Kristus nunga pasahathon padanNa tu angka na porsea, i ma pangaramotion dohot pambahenanNa na burju i. Nuaeng, dijou do hita laho manghatindanghon hasatiaon dohot haoloonta manangihon huhut mangulahon hataNa.
Ingkon sihol do rohanta laho pasonanghon roha ni Debata marhitehite haunduhonta di hataNa mardonganhon Tondi Porbadia. I do umbahen di halak Kristen sai dipamasa ulaon Parpadanan na Badia, songon sada ulaon na paingothon paboa na adong do padan ni Debata dohot jolma i marhitehite na manganhon roti dohot manginum anggur. Roti dohot anggur i ma songon gombaran daging dohot mudar ni Jesus Kristus. Jadi, molo taihuthon ulaon Parpadan na Badia, ingkon adong do haradeon di hita asa lam tu satiana huhut patuduhon haoloonta tu Debata tanda naung parjolo hita manjalo hasatiaon dohot holong na pinatupaNa. Amen. (as)
Posting Komentar