PANGHOPHOPION NI JESUS KRISTUS NA PALUAHON
Lukas 22:14-23
TURPUK
Asa dung dapot tingkina, hundul ma Ibana rap dohot angka apostel. Dung i ninna ma mandok nasida: Mansai masihol rohangku, naeng mangan birubiru Paska on Ahu rap dohot hamu, tagan so songgop dope sitaononki. Ai hudok ma di hamu: Na so tupa panganonku be i, ia so dapot hagogokna i di harajaon ni Debata! Jala dibuat Ibana ma panginuman, dipasupasu ma, laos ninna ma: Buat hamu ma on, sagihon hamu ma i sama hamu! Ai hudok ma di hamu: Na so tupa be inumonku parbue ni hau anggur, paima songgop harajaon ni Debata! Jala dihindat ma roti, dipasupasu ma, diponggoli jala diparlehon ma tu nasida, huhut ma didok: Dagingku do on, na nilehon humongkop hamu; ula hamu ma i, bahen parningotan di Ahu! Songon i do dihindat nang panginuman, dung sun nasida na mangan i, didok ma: Ia panginuman on, padan na imbaru do i, marhitehite mudarhu, na durus humongkop hamu! Tangan ni na manjehehon Ahu do hape rap dohot Ahu di atas meja on! Tong do nian langka ni Anak ni jolma i, songon naung diaturhon tu Ibana; alai marjea do halak na manjehehon Ibana! Gabe dipungka nasida ma masitangkasan, manang ise nasida ulaning na olo mangulahon i.
PATUJOLO
Parningotan Kamis Putih i ma sada sian rangkaian ulaon Paskah laho marningot huhut mangulahon borngin parpudi, mangihuthon songon naung pinatupa ni Tuhanta Jesus rap dohot angka siseanNa uju di panghobasionNa. Di parningotan Kamis Putih on marningot do hita di panghophopion ni Jesus naung paluahon hita sian dosa.
Ulaon Kamis Putih na pinatupa ni Jesus uju rap dope dohot angka Apostel, i ma na rap hundul nasida huhut marsipanganon. Ulaon on dipatupa ala sihol ni rohaNa naeng manganhon birubiru Paskah rap dohot angka sisean andorang so songgop dope angka sitaonon tu Ibana jala mate tarpajal Ibana di hau pinarsilang. Di turpuk Evangelium on ma disurathon partingkian ni Jesus di borngin na parpudi di na naeng mandapothon ari na laho pasingkophon panghohopionNa i marhite hamamateNa di hau pinarsilang i.
HATORANGAN
Di angka ulaon molo dipatupa rap marsipanganon, songon sada tanda ma i paboa adong na ringkot siingoton manang angka ulaon na ringkot ma i. Isarana ulaon martading hata, dipatupa do angka na denggan laos dohot ma ulaon marsipanganon lumobi ma ala marpungu do angka na marholong ni roha di ulaon i. Nian, ndang na ulaon marsipanganon i na gabe mata ni ulaon i manang na gabe i na rumingkot, alai gabe ringkot ma ulaon i ala di partingkian si songon i do dipangke laho manghatai sian roha tu roha andorang so marsirang. Songon i do na pinamasa ni Jesus andorang marsirang dohot angka siseanNa nang sude naung mangihuthon Ibana.
Parsirangan i ma sada tingki na mambahen lungun ni roha di sasahalak ala ndang boi be rap dohot angka na hinaholonganna. Tung godang do jolma ndang apala lomo rohana molo adong parsirangan lumobi ma na sinirang ni hamatean. Tontu ndang lomo roha molo marsirang dohot na hinaholongan. Songon i do na masa di panghobasion ni Tuhanta Jesus ala Tuhan Jesus pe dihilalahon do lungun ni roha ala ingkon marsirang nama Ibana sian angka Apostel i.
Dipatupa Jesus do parsaoran rap dohot angka siseanNa, marhite "Perjamuan Paskah" (ari raya mangan roti na so niasoman), ala mansai masihol do rohaNa tu angka siseanNa. Jala di partingkian on do dipangke Jesus laho pasahathon na di bagasan rohaNa. Uju na mangan i do dipaboa Jesus paboa naeng dapot ma tingki partinaonanNa i. Diboto Jesus do na naeng songgop nama sitaonon i tu Ibana.
Andorang sahat Ibana tu hamatean, nunga diboto Ibana paboa naeng sae nama ngolu dohot angka panghobasionNa di portibi on jala ingkon marsirang dohot angka naung mangihuthon Ibana. Alai ndada holan i, diboto do tong paboa naeng ro ma Ibana gabe siparmonang. Di tingki na mangan i, dipasahat Jesus do angka pangajarion na mansai porlu botoon ni angka sisean dohot sude angka na porsea taringot tu padan na binahenNa.
Ditonahon do tu angka sisean na rap dohot Ibana asa manongtong patupahon Perjamuan Paskah laho marningot sitaonon na niadopan ni Jesus. Dipangke do istilah anamnesis (sian hata Junani) na marlapatan "ingot ma" alai ingkon manongtong do parningotan i. Molo di buku Padan na Robi, diajarhon do paboa adong do lapatanna molo marningot angka sejarah. Songon bangso Israel na disuru Debata laho patupahon Ari Paskah, marningot sude angka pambahenan ni Debata naung paluahon nasida sian tano parhatobanon Misir. Jala sahat nuaeng on, dipatupa nasida do ulaon si songon i.
Tangkas do taboto paboa sitaonon na dokdok na niadopan ni Jesus sudena i laho patulushon sangkap ni Debata taringot tu haluaon. I do umbahen dipatupa halak Kristen do Parpadanan na Badia. Laho paingothon sude angka na porsea taringot tu sangkap ni Debata na mansai uli jala denggan. Pasahathon haluaon tu jolma manisia. I do impola ni pangajarion ni halak Kristen, haluoan dohot padan haroro ni Tuhan Jesus na padua halihon.
Ari Paskah mansai bagas do lapatanna di halak Kristen. Paboa naung manjalo haluaon sian Debata marhitehite Jesus Kristus naung mate di hau pinarsilang. Di ayat 19–20 di turpuk on ma songon cara naung ditotophon Jesus laho marningot Ibana. Marningot di haluaon naung pinatupaNa huhut paluahon jolma sian hagiot ni dosa tu hangoluan si saleleng ni lelengna. Dipatupa ma i marhite roti dohot anggur. Roti i ma gombaran ni dagingNa, jala anggur i ma gombaran ni mudarNa.
Baca juga!
Di borngin i dipatupa Tuhan Jesus do perjamuan, rap mangan dohot siseanNa. Dihindat Ibana ma roti, dipasupasu ma dung i diponggoli laos diparlehon ma i tu angka siseanNa, huhut didok "DagingKu do on, na nilehon humophop hamu, ula hamu ma i, bahen parningotan di Ahu!" Roti i ma na gabe gombaran ni Daging ni Kristus na ingkon mate. Songon i nang anggur, dilehon tu angka siseanNa huhut didok, "Ia panginuman on, padan na imbaru do on, marhitehite mudarHu, na durus humophop hamu!" Anggur i ma songon gombaran ni mudarNa na durus di dolok Golgata laho paluahon hita angka pardosa. Marhite na manganhon dohot manginum di Ulaon na Badia, luhut dosanta diburi Tuhan Jesus. Gabe taruli ma di hita haluaon, gabe mardame hita dohot Debata jala marhite i ma hita na gabe partohap di hangoluan si saleleng ni lelengna, naung pinaradeNa di surgo hasonangan i.
HAHONAAN
Molo marningot hita di haluaon na pinatupa ni Debata marhitehite Jesus Kristus, sasintongna ingkon mangolu do hita di bagasan hasintonganNa. Tarlumobi ala panghophopion ni Jesus Kristus naung paluahon hita. Di parningotan Kamis Putih on, i ma marningot borngin na parpudi mandapothon tingki ari partinaonan ni Tuhan Jesus. Dipatupa Jesus do rap mangan jala minum dohot angka siseanNa. Ingkon tangkas do di hita, panghophopion ni Kristus do na mambahen haluaon di hita.
Sasintongna nunga mardosa saluhut jolma ala ni dosa na parjolo i jala ndang adong jolma na tuk paluahon dirina sandiri sian hadosaonna. I do umbahen na ro Jesus Kristus tu portibi on. Ala ni i ma ringkot do sasintongna di hita marningot di angka ulaon naung dipatupa Tuhan Jesus holan humophop hita. Angka naung manjalo haluaon sian Debata ingkon mardalan do di bagasan haporseaon tu Debata marhite Jesus Kristus jala ingkon manongtong do marningot angka sitaonon ni Jesus Kristus di sude gulmit ni parngoluon on.
Hita naung dohot mamparsaulihon panghophopion ni Tuhanta Jesus ingkon do pataridahon ngolu na imbaru, na hombar tu hataNa nang lomo ni rohaNa. Ala panghophopion ni Jesus Kristus naung paluahon angka jolma manisia, tama do sude naung manjalo haluaon i satia jala unduk di na laho paimahon haroroNa na padua halihon. Amen. (as)
Posting Komentar