MARLAS NI ROHA ALA PORSEA
Psalmen 5:8-13
TURPUK
Alai ianggo ahu, sian godang ni asi ni roham sai bongotanku do bagasmu, marsomba dompak bagas ni habadiaonmi, mangkabiari Ho. Ale Jahowa, sai togu ma ahu marhitehite hatigoranmu ala ni angka na mangonggop ahu, sai pahornop ma dalanmu di jolongku. Ai ndang pos roha di hatanasida i, sai hamagoan do tahi ni rohanasida di bagasan, godung na talak do tolonnasida i, torui ma nasida, ale Debata, sai ambalhon ma tahi ni rohanasida i, ambolongkon ma nasida ala hinadeak ni pangalaosionnasida i, ai dompak Ho do nasida manenganenga. Sai marlas ni roha ma sude angka na marhaposan tu Ho, sai marendei ma nasida ro di salelenglelengna ala ni ondinganmu nasida, sai marolopolop ma mida Ho angka na holong roha di goarmu. Ai Ho do, ale Jahowa, mamasumasu na tigor marroha i, songon lombulombu do dihaliangkon Ho asi ni rohami tu ibana.
PATUJOLO
Pantun do hangoluan jala tois do hamagoan.
I ma sada poda na mansai arga, na membangun peradaban ni Bangso Batak. Karakter na terbangun di bagasan hapantunon dohot toruk ni roha do padaohon hamusuon. Alai tois do mula ni hamagoan. Sai dipodahon natoras do karakter on tu angka ianakhon manang sundut na umposo. Asa manontong mangolu di bagasan hapantunon dohot toruk ni roha. Asa adong bohal di parngoluonna jala na so jadi tois maradophon manang ise pe.
Santun terhadap siapa pun dan jangan egois atau nakal maupun kurang ajar.
Parange na si songon i ingkon tapataridahon do di parngoluon na maraleale, mardongan, maruluan suang songon i ma nang di na marbawahan. Molo talapati hata i di Bahasa Indonesia, hata pantun lapatanna santun, ramah jala hata tois lapatanna angkuh, biadab, kurang ajar, nakal, ceroboh, suka melawan, membangkang. Hapantunon maradopon dongan i do mula ni pardonganon, mangolu jala siat manang tu dia pe. Alai molo tois do pangalaho, hamusuon ma na ro.
Baca juga!
Di turpuk ni Epistel Minggunta on diingot si Daud do situasi ni ngoluna, na adong di bagasan tantangan na borat sian angka musuna. Dipasahat ibana do pergumulanna i di bagasan tangiang tu Jahowa. Dihaporseai rohana do adong Jahowa na mandongani ibana. Situasi na niadopan ni si Daud on paingothon upa ni haporseaon na mangolu, paboa sai na pargogoan ni Debata do ibana di na mandalanhon ngoluna. Ndang pasombuon ni Debata naposoNa mangula sandiri, mangadopi sumbia ni hamusuon i. Turpuk on paingothon hita songon na tarsurat di Bibelta i na mandok, " ... molo Debata donganta, ise ma alonta?" (ida Rom 8:31). Tapabagas ma pangantusionta taringot tu Epistel Minggu 19 Maret 2023 di angka hatorangan na mangihut.
HATORANGAN
Tujuan utama di turpuk on tarsurat do i di ayat 12 dohot 13, didok di si: "sai marlas ni roha ma sude angka na marhaposan tu Ho, sai marendei ma nasida ro di salelenglelengna ala ni ondinganmu nasida, sai marolopolop ma mida Ho angka na holong roha di goarmu. Ho do, ale Jahowa, mamasumasu na tigor marroha i, songon lombulombu do dihaliangkon Ho asi ni rohami tu ibana." Porsea situtu do si Daud di bagabaga ni Jahowa na tongtong mangaramoti huhut marmahani ngoluna. "Na sintong do angka hata ni Jahowa, songon perak naung nilala di bagasan balanga, pola pitu hali tinapis. Ho do, ale Jahowa, mangondingi nasida, paluaonmu do ibana sian halak na sansundut on, ro di salelenglelengna (ida Psalmen 12:7-8). On ma na sai patogu rohana asa tongtong marsihohot jala marpos ni roha holan tu Jahowa.
Tung mansai marsihohot do rohana di Debata arian nang borngin na i, "sogot ma, ale Jahowa, tangihon soarangku, sogot do ahu marhobas manopot Ho, jala manatapnatap ahu. Ai ndang lomo roham mida hageduhon, ale Debata, jala ndang tarsorang na geduk marroha i Ho" (ida Psalmen 5:4-5). Ringkot siparrohahononta, ia bagabaga ni Jahowa ndada tu angka halak na marhageduhon, holan tu angka na sintong marroha i do. "Ndang manahan angka na ginjang marroha maradophon pamerengmu, dihosom roham do nasa siulahon na so uhum. Matua diago Ho do, ale Jahowa, angka sidon gabus, jala dihagigihon roham do halak angka na tumahi mudar dohot sipaotooto" (ida Psalmen 5:6-7). Pandohan on dipagomos muse di ayat 12, didok: "Sai marlas ni roha ma sude angka na marhaposan tu Ho, sai marendei ma nasida ro di salelenglelengna ala ni ondinganmu nasida, sai marolopolop ma mida Ho angka na holong roha di goarmu."
Di konteks haporseaon ni Halak Kristen, halak na pintor i ma halak na dipintori marhite haporseaon tu Tuhan Jesus Kristus. Halak na dipintori jala na marhaposan tu Jahowa i ma angka halak na patujolohon hasintongan, hatigoran, halak na tigor marroha jala ndang margabus di adopan ni Jahowa. Halak na sintong marroha i ma na sai patigor rohana huhut pature ualonna. Halak si songon i do na dapot asi ni roha dohot pasupasu jala na ni ondingan ni Jahowa.
Sai na pasupasuon ni Jahowa do angka na porsea di Ibana jala malua sian uhuman. Bagas ni angka na porsea i pe sai na suksuk pasupasu na so ra suda do. Di Poda 3:32-35, didok: "ai marbiasbias do Jahowa mida halak na geduk, alai rosu do Ibana tu halak partigor. Manginona do torutoru ni Jahowa tu jabu ni parjahat, alai dipasupasu do ianggo undungundung ni halak partigor. Ibana marengkelengkelihon halak pangelesi, alai dilehon do asi ni roha anggo tu halak na unduk marroha. Hamuliaon do teanon ni halak na bisuk sogot, alai luahonon ni haurahon do halak na oto i." Marhite pandohan on ma taboto mandao do uhum sian angka na porsea.
Baca juga!
Apostel Paulus pe gomos do paingothon, paboa sai na paluaonna do angka na porsea i. Ndada sian gogo ni pambahenanna, alai holan ala ni asi ni roha ni Debata do, didok: "gabe dipintori do nasida dalan basabasa binahen ni asi ni rohana hinorhon ni panobusion na di bagasan Kristus Jesus" (ida Rom 3:24). Sian on botoonta ma na so margogo jolma i patigorhon dirina di adopan ni Jahowa. Ai ndang adong haluaon ni jolma sian dirina sandiri. Alai martua ma ganup partigor di adopan ni Jahowa, ai Jahowa do dibahen ngoluna. Martua ma angka halak na tigor roha, ai sai asian ni Jahowa do ibana, jala nasida do nampuna harajaon banua ginjang (ida Mateus 5:8-10).
Keadaan marlas ni roha ndada bersifat partisi, olo mengkel holan diduru ni roha. Ndang otomatis sikap dohot gejolak hati pataridahon ngolu na marolopolop. Marlas ni roha ndada bersifat marsanggasangga, marbagi di tingki, situasi dohot inganan. Manang di dia jala sadihari pe ingkon tong do mian roha na marolopolop, hinorhon ni na hot jala manontong mian Jahowa di ngoluna. Molo tapadomu do haporseaon tu marlas ni roha, i ma pataridahon panandaion na sintong tu Jahowa. Ndang boi longa, ingkon jelas do. Ndang boi lomos manang leas, ingkon tepat do antong hapeahan ni haporseaon i.
Taringot tu hapeahan ni haporseaon i adong sada ilustrasi na boi gabe sipahusorhusoron di bagas rohanta. Songon on ma ilustrasina i:
Adong ma sahalak ama na manggadis hodana, didok ma tu sahalak panuhor: "Pasaut ma amang! Asa diboto amang, hoda na spesial do on. Ndang dapot manang di dia pe songon on mantapna. Sandok spesial ma.” ninna mandok tu panuhor i. I ma dalanna dibahen martigatiga asa hatop langku hoda na on. Ditorushon ama i muse mandok: "Bereng amang ma da, nunga be hulatik hoda on gabe hoda Kristen." Hampir tersinggung ma calon panuhor i ala didok hoda i hoda Kristen. Dialusi calon panuhor i ma mandok, "Hamu pe nian, tung boha do dohot hoda sarupahononmu tu parugamo?" "Hoda Kristen?" ninna na naeng manuhor hoda i. Ala masibotoan do nasida sarupa na marugamo Kristen. Dialusi ama na manggadis hoda on ma muse, "On ma nian hamu, bereng ma, jala nangkok ma hamu. Molo naeng mardalan hoda on, dok hamu ma "Puji Tuhan!", pintor mardalan do annon hoda on. Molo naeng so hamu, dok hamu ma “Haleluya”, pintor so do i." "Nangkok ma amang!" ninna parhoda on. Dung dipatorang nampuna hoda i, sai sungkunsungkun do roha ni panuhor i. Nangkok ma ibana tu hoda i huhut las rohana. Lumobi ma uju didok ibana, “Puji Tuhan!” mardalan hoda on. Didok ibana ma muse "Haleluya!" laos so ma hoda i. Songon i ma dibahen ibana hurang lobi mar satonga jom. Aman do hape didok roha ni panuhor on. Ujungna tarida ma las ni roha ni na naeng manuhor hoda i. Saut ma dituhor ibana hoda i. Mansai las situtu rohana nangkok tu hoda on, sai didok ibana ma, "Puji Tuhan!" hinorhon ni i sai dinunuti hoda on ma mardalan laos diboan ma hoda i mulak tu hutana. "Haleluya!" ninna amang i ma asa so hodana on, laos so ma tutu. Hinorhon ni las ni rohana marende ma amanta i mandok, "Puji Tuhan, .... Puji Tuhan, ... Puji Tuhan ... " laos mardalan ma torus hodana on. Hape ndang disadari ibana na adong lombang di jolona. Songgot ma rohana laos panik. Ala ni songgot ni rohana i sai didok ibana ma tu hodana on dohot soara na gogo, "Eh … eh ... eh ... berhenti!" "So jo!" "Stop! Stop! Stop!" Hape ndang marna so hoda i sahat tu topi ni lombang i, sai tong mardalan hodana on. Tuani ma pintor diingot ibana hata pasohon hoda na i. Didok ibana ma, "Haleluya!" Pintor so ma hodana i. Alai molo di roha ni amang i nunga be angka bukbak taroktokna, bohina pe nunga mamontar huhut sai hodokan so ala ni loja. Boha ma na naeng madabu tu lombang.
HAHONAAN
Minggu 19 Maret 2023 on digoari ma Minggu Letare lapatanna marlas ni roha ma hamu manang di Bahasa Indonesia didok bersukacitalah bersama-sama, tarsurat di Jesaya 66:10a. Minggu Letare dipamasa i ma dua pulu sada ari andorang Minggu Paskah manang parningotan di haheheon ni Tuhanta Jesus Sipalua i, na di pamasa di ari Minggu 9 April 2023. Somalna didok do Minggu-minggu andorang so Minggu Paskah i songon tingki panaonon ni Tuhan Jesus (Passion). Di partingkian si songon on ma marningot hita di sude angka denggan basa ni Jahowa di bagasan ngolunta. Mansai balga do holong ni Debata di bagasan ngolunta, pola do dilehon Anak-Na na Sasada i laho humophop hita jolma pardosa. Di nasa ulaonta pe sai tong do Ibana mangaramoti hita huhut patupahon luhut angka na ringkot i di ganup parngoluonta.
Alai jotjot dope jolma i ndang manghaporseai Ibana, ndang marpos ni roha di Ibana. Marhite turpuk Epistel di Minggu Letare on dipaingot hita asa marlas ni roha. Marlas ni roha ala naung tangkas do taboto pasupasu na pinasahat ni Jahowa di bagasan ngolunta, pangaramotionNa, pandonganionNa di sude angka ngolunta. Ndang adong be sidalian ndang manghaporseai Ibana, jala didok do "marlas ni roha ma hita ala na porsea do Tuhan i". Tapeop ma i di bagasan ngolunta, tahaporseai ma Ibana, jala tapasahat ma ngolunta on tu Ibana. Amen. (sa)
Bahan Epistel ini dapat diunduh dengan meng-klik link di bawah ini!
Posting Komentar