MARLAS NI ROHA ALA PORSEA
Johannes 9:35-41
TURPUK
Dibege Jesus ma, naung dipabali nasida ibana, jadi ninna ma mandok ibana, dung jumpangsa: Na porsea do ho di Anak ni jolma i? Dung i ninna halak i ma mangalusi: Ai ise do i, Tuhan, asa huhaporseai Ibana? Jadi didok Jesus ma tu ibana: Na niidam, na mangkatai dohot ho, I ma Ibana. Gabe didok ma: Na porsea do ahu, ale Tuhan! Laos disomba ma Ibana. Dung i didok Jesus ma: Mamboan uhum do, umbahen na ro Ahu tu portibi on, asa marnida angka na so marnida hian, jala asa gabe mapitung angka na marnida. Jadi dibege na deba sian angka Parise na rap dohot Ibana ma i, jadi didok ma tu Ibana: Nda tung dohot hami mapitung? Jadi didok Jesus ma tu nasida: Aut na mapitung hamu, gabe so mardosa hamu. Alai didok hamu do: Na marnida do hami, gabe hot ma dosamuna.
PATUJOLO
Marnida do nian alai ndang marroha, hira i ma na masa di turpuk on. Torop do nang nuaeng masa si songon on. Mata pardagingonna marnida alai molo tondina ndang marnida, ala mate do haporseaonna. Dipabali angka natorop i (halak Jahudi dohot angka halak Parise) na paihutihut Jesus, i ma sahalak na mapitung hian na manjalo hamamalum sian Jesus. Hinorhon ni sogo ni roha nang pangiburuon na mansai balga, gabe ndang diantusi nasida be tujuan ni na mangihuthon Jesus. Dirimpu nasida do dirina songon parmahan na denggan jala daulat marroha alai na mago do anggo birubiruna.
Baca juga!
Turpuk on dipungka do marhite pangajarion ni Jesus di bagas ni sogo ni roha ni halak Parise marnida Jesus. Tongon uju di ari Sabbat do dipamalum Jesus sahalak na mapitung sian hatubuanna marhite gambo. Laos gambo i ma dibahen nasida manungkun Jesus. Hira na mandok: "Laos gambo ma bahenon laho pamalumhon na marsahit?" "Dia ma dalanna asa gambo bahenon tu simalolong?" Dilului nasida do angka dalan laho mangalo Jesus. Ala ndang tarjalonasida Jesus. "Tung boha ma dalanna gabe Anak ni Debata Ibana?" Ndang na ala diparhatutu manang na so diparhatutunasida taringot tu si, alai holan ala ni sogo ni rohanasida do tu Jesus. Masa ma hatiha i partontangan di halak Parise dohot angka na mangihuthon Jesus, pola pasang do partontangan i.
Alai hot do dihatindangkon halak na mapitung i hian haporseaonna di Anak ni Jolma i. Dihatindangkon ibana do paboa na sian Debata do Ibana (ayat 32-33). Nang pe sai disungkuni jala sai ditontang halak Jahudi dohot Parise halak na mapitung i hian, alai hot do ibana porsea. Nang pe naung diboto konsekuensina paboa na pabalion do sian huria ganup na marhatopothon Jesus (ayat 22). Tema ni Minggunta sadari on i ma "Marlas ni Roha Ala Porsea". Paboa na ingkon porsea do hita di Jesus Kristus Tuhanta i jala ingkon marlas ni roha do hita di si. Molo didok marlas ni roha ala porsea, ingkon togu do tatiop haporseaonta i, songon halak na mapitung hian na pinamalum ni Jesus di turpuk on. Tapabagas ma pangantusionta taringot tu hata ni Debata marhite hatorangan na mangihut.
HATORANGAN
Adong do pangantusion di halak Jahudi molo halak na mapitung sian hatutubuna, dirajumi do i songon dosa na balga. Ai gabe mabiar do natorasna marnida halak Jahudi (ayat 22). Gabe mardos ni roha ma angka halak Jahudi i na ingkon pabalionna do sian huria ganup na marhatopothon Kristus. Sai disungkuni nasida do na mapitung i hian, laos didok muse: "Pasangap ma Debata! Huboto hami do, pardosa Halak i." Sian pandohan on dipatarida nasida sai hira na umbadiaan do nasida sian na mapitung i. Sai digogohon nasida do asa unang diparhatutu na mapitung i hian Jesus. Dibege jala dialusi Jesus do partontangan nasida i huhut ma dibela na mapitung i hian. On ma na masa songon na jotjot didok, "lempar batu sembunyi tangan." Manutupi hahuranganna, laos manalahon donganna. Sai diparhatutu do nasida songon parmahan na denggan, alai dipabali do angka birubiruna. Sarupa ma i tu na torop masa di angka partingkian si nuaeng on.
Dipatandahon Jesus do diriNa songon Anak ni Jolma i (ayat 35-37). Gabe lam bagasma panandaion ni na mapitung i hian taringot tu Jesus. Andorang jumpang dohot Jesus nunga diboto ibana hian ai panurirang do Jesus (ayat 17). Dihatindangkon ibana do muse mandok "na sinuru ni Jahowa" do Jesus i (ayat 33). Di turpuk on dipatuduhon Jesus ma diriNa "Anak ni Jolma" i (ayat 35-37). Na nidok ni Jesus on ma mambahen na mapitung i hian lam mananda Jesus.
Ndang piga halak na jumpangan manang masa si songon i di ngoluna. Godang dope na mananda Jesus holan ala ni hinaringkotna. Ndang tuk marnida tujuan ni haroro ni Jesus na paluahon ibana. Ndang tuk haporseaonna manghaporseai boasa tung pola ro Jesus tu portibi on jala dilehon tingki boi pajumpang dohot Jesus. Ala holan sian pingkiran dohot panghilalaanna sambing do dibahen dalan mananda Jesus. Sai dipajogal do rohana, ndang tarjalo rohana Jesus. Sai ditulak ibana do haroro ni Jesus sipalua i jala mangihuthon halak Jahudi dohot Parise na sai manghasogohon Jesus, gabe diambati haporseaonna jonok tu haluaon i.
Boi do adong sidalian mandok, ndang adong na hot parrohaon di portibi on, di na deba lam dipajonok tu Tuhan i alai lam torop muse do na manghasogohon, gabe lam dipadao ma dirina sian haluaonna dohot manghasogohon Jesus. Alai ganup na girgir ro tu Jesus sai na mangolu do ibana mananda haluaon i. Tauji ma di bagasan ngolunta, molo lam dipasupasu hita, lam gok holong, lam gok do hamonangan maralohon musu nang sumbia ni sibolis dohot dosa. Songon i do nang di huria i, molo lam torop ruas ni huria i na marsitutu ro tu Jesus, lam tangkas panandaionna tontu mian ma hadameon, haluaon dohot pasupasu. Mura do tubu las ni roha. Alai molo pola do di na deba mangalului Jesus ala sihol ni roha di haluaon, na deba nari mangambati, manghasogohon Jesus tontu maol ma mian las ni roha, maol ma sahat haluaon i.
Tangkas do disungkun Jesus tu na mapitung i hian, mandok: "Na porsea do ho di Anak ni Jolma i?" Mulana i ndang apala tangkas dope panandaionna, gabe dialusi ibana ma: "Ai ise do i, Tuhan, asa huhaporseai Ibana?" Dung i dipagomos Jesus ma roha ni na mapitung i hian mandok: "Na niidam, na manghatai dohot ho, i ma Ibana." Nian ndang apala dipatorang hajongjongan ni na mapitung i hian taringot tu panjaloonna di pandohan ni Jesus i. Alai na pasti pintor gomos do dialusi ibana Jesus patuduhon haporseaonna: "Na porsea do ahu, ale Tuhan!" Laos disomba ma Jesus. Pandohan on patuduhon hadirion ni na mapitung i hian di hormatna tu Jesus na mansai gomos do las ni rohana. Pintor dipatuduhon ibana do tanda ni haporseaonna. Marasing do hadirionna sian na torop i, nang pe sai dipaihutihut Jesus, sai didok parmahan na denggan, ringgas mandok porsea jala mananda Jesus alai ndang tarida 'tanda ni haporseaonna.' Godangan do i holan mandok, hape ndang diparhatutu rohana nang ngoluna ro maniop Jesus.
Baca juga!
Songon dia do huroha hataridaan ni na mananda Jesus? Sae do holan mandok porsea alai ndang bulus mangihuthon? Uju dapotan asiasi songon i ma las ni rohana, alai uju ndang jumpang na di rohana gabe mandao. Gabe laos diuhumi muse Jesus. Pandohan ni Jesus mandok diriNa Anak ni Jolma asa mura do jolma i menyesuaikan diri, unang sai adong ganggu ni roha. Hape lam dipatutoru Jesus diriNa gabe jolma asa malua jolma angka pardosa, hape gabe jolma i do na lam mandao. Laos on ma dalan dibahen halak Jahudi dohot Parise mansoadahon Jesus. Ndang tarjalonasida hadirion ni Sipalua i ro marhite toruk ni roha.
Jesus, i ma Anak ni Jolma, alai na badia do Ibana naung mangojakhon landasan ni portibi on huhut gabe panguhum ni portibi on. Bahkan uhumanNa do saluhut angka raja dohot angka uluan ni portibi on. Si soada do halak Jahudi dohot Parise, pola sahat tu naeng manguhumi Jesus. Hape nasida do siuhuman ni Jesus. Laos ro Ibana laho paluahon angka na gale, na marsahit. Sian toruk ni roha dohot holong do Ibana mandapothon na mapitung i, gok asi ni roha. Ganup na manghilala dosana, angka na magopu, taruli do i, dapotan joujou ni Jesus na ro tu Ibana. Baliksa sai na uhumanNa do angka na so olo ro i, hinorhon ni ginjang ni roha na gabe musu ni angka na porsea, na so olo muba.
Hamubaon ni roha ni na mapitung i hian do mamboan hamamalum di ibana jala dapotan las ni roha. Boi ibana jumpang dohot raja ni Hamalumon i. Hamubaon ni pingkiran, cara pandang, pintor dihaporseai ibana do Jesus, gabe siihuthon Jesus ibana. Nang pe mapitung hian ibana, alai molo rohana i marnida do di Jesus. Ndada holan simalolongna dipamalum alai dohot do rohana dipangolu.
Roha na marnida i ma haimbaruon na umbalga jala na tutu. Porsea do ibana di Anak ni Jolma i, i ma Sipalua. Gabe sada sipaingot ma i di hita, ai torop dope jolma, marnida do nian simalolong ni pamatangna alai rohana ndang mangolu. Mansai maol do roha na songon i. Naeng idaonna jala naeng malum, naeng paluaon alai ndang diungkap rohana jala ndang hibul dilehon rohana tu Jesus. Ndang dilului rohana haluaonna.
Tu angka halak na magopu, na mago, na mapitung do ro Jesus i. Sian on taida na so dapot ni halak Parise dohot Jahudi marnida holong ni Jesus i. Ndang diboto nasida na ro Jesus tu angka na lilu, di angka na masihol jumpang dohot Ibana. Dilehon Jesus do tu angka na porsea di Ibana roha na marnida jala na mangaku di angka dosana na sai laon. Pandohan dosa dison adong do hadomuanna dohot na mapitung, lumobi ma di na mapitung parnidaan ni partondion. Holan Jesus do na tuk pamalumhon simalolong, ndada holan simalolong di daging, alai sahat tu na umbalga sian i, i ma pamalumhon simalolong ni partondion, i ma roha na magopu na sai laon. Gabe marnida do angka na mapitung, na manjangkon jala mangharingkothon haroro ni Jesus.
Sipata olo do jumpang hita dongan na so barani marsaor dohot donganna jolma ala ni perbedaan status sosial, ekonomi, kedudukan bahkan jabatan. Adong muse ma i hinorhon ni perbedaan agama dohot marga, gabe so sarombang jala ndang saulaon. Molo songon i do, nunga maol be tubu las ni roha di angka punguan na si songon i. Hape dia ma? Uju na dipingkiri nasida do perbedaan status i, gabe tarsirang ma nasida sian holong ni Jesus, gabe mardosa ma nasida, ai ndang marroha. Ndang marnida simalolong ni partondionna nang pe marnida simalolong pardagingonna. Lapatanna di si ndang adong be holong molo so adong roha. Ai mapitung do tutu panghilalaanna, ndang disadari sasintongna Jesus do na ringkot di ngoluna. Ala pingkiran di angka perbedaan naung didok i gabe maila ma ibana pajumpang dohot Jesus ala umbiar mida angka pengaruh ni angka raja dohot angka petinggi manang na jagar idaon di portibi on.
Sahat tu partingkian si nuaeng torop dope na mangambati donganna asa ro tu Jesus, marhite sian angka panghataion dohot pambahenan pe, gabe mangambati tu haluaon. On ma na nidokna "buta rohani" ndang tolapna marnida hamuliaon ni Kristus i. Ndang boi diantusi dalan hasintongan jala na badia, ala holan mangasahon pingkiranna dibahen mananda haluaon i. Godang angka pangalaosion, roha holan mamingkir tu diri dohot angka pamingkirion na sai mamboan hasintongan di diri. Ndang ditanda paboa na Tuhan i do tinuju ni ngolu ni jolma i. Sai dipajolo do dirina dohot pamingkirionna dibahen mangantusi Jesus. Ujungna sai manontong ma ibana mian di bagasan dosa. Sotung ma hita holan na mangarajumi na marlaok dosa hita, alai ndang tatanda hadirionta na gale, ndang taantusi aha na ringkot tu haluaon, ala sai marguru tu dirinta hita. Gabe sai tading ma hita di hagigion ala ni dosa.
Ingkon tapauba do pola pikirta. Ndang marguru tu lomonta, alai tapingkiri ma, talumba ma aha na hinalomohon ni Tuhan i. Songon sada gombaran asa tarimangi nidok ni Buku Ende 182 ayat 3 na mandok " ... Kristen au, hape hutondong, dalan hamagoan i." Godang dope halak Kristen songon i, mangaku halak Kristen alai ndang adong hamubaon di bagasan ngoluna. Humansit dope angka halak si songon i, nga mapitung simalolong ni dagingna laos mapitung muse do simalolong ni rohana.
Taingot ma tongtong, "angka na mariluilu laho manabur, marolopolop do sogot laho manggotil. Mardalandalan pe ibana huhut tangis pausungusung boni sisaburhononhon, ro do ibana sogot marolopolop mangusung angka tibalanna" (ida Psalmen 126:5-6).
Boi do tapatudos tu hamamalum na hinilala ni sahalak ina songon na di Buku Ende 431 didok, "Adong najolo sada ina na ro tu Jesus i, dijama rambu ni ulosna, tung pintor malum i. Gomos ma tangkup Ibana, gomos haposi i, malua dohot tondimi dibahen Jesus i. Barani ho sai ro jumonok tu Jesus Tuhanmi. Paboa ma sude na hansit, sudena sahitmi." I ma cara pandang na tutu. Diihot marhite pamingkirion hamubaon, mananda Jesus dohot sintong, pintor dihalaputi. Gabe malum ma tutu.
HAHONAAN
Antong aha ma na boi sipahusorhusoron di bagas rohanta marhite jamita di Minggu Letare on:
Naparjolo, sai unang ma adong sian hita songon horong ni halak Parise dohot Jahudi i, na gabe sipangambati di haroro ni jolma laho mananda Jesus. Unang ma gabe mangarehei dongan molo lam ringgas mandohoti ulaon partondion. Ai na lumea sian na lea do jolma si songon i. Dihasiholi do haluaon jala didapothon Jesus alai ndang sonang rohana molo ro rap dohot nasida (halak na berbeda status dohot dirina). Sikap na si songon i ndang manghorhon hamamalum. Ro pe haluaon i holan tu angka na ro tu Jesus sian roha na magopu do, halak na magopu huhut mangarajumi hagaleonna. Jala ingkon tau ibana di haluaon jala dirajumi do ndang adong haluaon dapotsa sian na asing so holan di bagasan Jesus.
Napaduahon, songon dia do sikapta songon halak na porsea molo taida sai adong dope dongan na dikucilkan ala perbedaan status? Adong do pandohan na mandok, "Tidak ada penyakit yang lebih berbahaya dari kesombongan dengan menutup telinga, sehingga tidak mendengar mereka yang memperingatkan kita demi kebaikan. Padahal Allah sering secara sengaja memilih orang-orang yang hina dan tidak berharga untuk mengajar dan memperingatkan kita, dengan tujuan untuk menundukkan kesombongan kita."
Nian adong do logisna, boha ma bahenon padomuhon na berbeda status. Lumobi ma, tung boha ma tarbahen hita mambege poda manang sipaingot nang parguruan sian na tumoru sian hita. Tung na maol situtu do i. Alai dipatuduhon Jesus do tu hita tanda ni holongNa. Ndang diihoti status manang level Ibana. Sandok tu angka na magopu, na ro tu ibana sai na paluaonna do. Unang ma hita songon halak Parise na sai mandok tu donganna na tumoru, na sai monang di pandohan hape ndang tarida di tanda ni holongna. Torop do halak na sai monang di partontangan (perdebatan) alai ndang monang di na patuduhon tanda ni holongna.
Ala ni i, asa marlas ni roha hita angka na porsea, tapagomos ma haporseaonta tu Jesus. Tumangkas ma tatanda ibana haluaon i. Unang be sai mangida halak tumoru sian hita, alai tabahen ma dirinta gabe siboan haluaon tu angka donganta songon Jesus. Asa boi rap marlas ni roha songon goar ni minggunta sadari on, i ma Minggu Letare na mandok marlas ni roha ma hamu. Amen. (sa)
Bahan Jamita ini dapat diunduh dengan meng-klik link di bawah ini!
Posting Komentar