HOSIANNA MA DI GINJANG NI GINJANGAN
Jesaya 50:4-9a
Epistel Minggu 2 April 2023
Minggu Palmarum
Palmarum lapatanna pesta palma (maremare) (ida Mateus 21:1-11).
TURPUK
Nunga dilehon Tuhan Jahowa tu ahu dila sisean, asa huboto pasabam roha ni na loja marhite sian hata i. Sai disungguli do ahu ganup sogot, dipatinggil pinggolhu marbinege, songon sisean. Nunga dibungka Tuhan Jahowa pinggolhu, jala ndang manjengkeljengkel ahu, ndang sumurut ahu tu pudi. Hutarehon do balik tanggurungku tu halak na mangalinsingi ahu dohot hurumhu tu halak na mamastapi, ndang hutabunihon bohingku maradophon haurahon dohot tijur. Alai Tuhan Jahowa do mangurupi ahu, dibahen i ndang tarurak ahu; ala ni hubahen do bohingku songon batu ping; ai huboto hian na so tagamon tarurak ahu. Jonok do ibana na mamintori Ahu; ise naeng maruhum dohot ahu? Antong marluhut ma hita, ise suhut alongku maruhum? Dipajonok ma tu ahu. Ida ma, sai urupan ni Tuhan Jahowa do ahu, tung ise ma na tuk manorui ahu?
PATUJOLO
Ragam do angka na masa di bagasan ngolunta on, boi do masa angka si las ni roha jala boi do masa angka parungkilon. Sipata tubu do angka ragam ni tekanan di ngolunta on na manguji haporseaonta tu Tuhan i. Ala ni i ringkot do hita marpangantusion na imbaru laho mangadopi angka ragam ni sipangambati dohot angka ragam ni parsoalan. Asa boi hita mangadopi ragam ni parsoalan i di bagasan hadameon songon tema ni jamitanta di Minggu on na mandok, “Hosianna Ma di Ginjang ni Ginjangan.”
Baca juga!
HATORANGAN
1. Dila sisean laho pasabam roha ni na loja (ayat 4-6)
Dipaingot Debata do bangso Israel na sai holsoan jala manalahon Debata ala ni angka parungkilon na niadopan nasida uju tarbuang tu Babel. Diuhum Debata do nasida ala ndang olo mangoloi HataNa asa songon naposo ni Debata nasida na disuru laho mangulahon lomo ni roha ni Debata. Ndang marsitutu nasida gabe naposo ni Debata. Marasing do nasida i maradophon naposo ni Debata na didok di turpuk on. Di turpuk on dipatorang do naposo ni Debata na olo gabe sisean na mangoloi Debata. Ganup ari do ibana marguru tu Debata. Ditailihon do parbinegeanna laho tumangihon sude angka pangajarion na sian Debata (ayat 5).
Di na laho mangulahon panjouonna, dipaunduk do dirina gabe sisean ni Tuhan. Didok di ayat opat, 'nunga dilehon Tuhan Jahowa tu ahu dila sisean ... ' pandohan 'dila' di son boi do dilapati songon "hata" manang "parbinotoan laho manghatai." Dilehon Tuhan Jahowa "dila sisean" lapatanna diajari Debata laho manghatahon aha naung binegena sian Tuhan i. Gabe boi ma pasabam roha ni na loja marhite sian hata i. Pasabam roha ni angka na gale dohot tu angka jolma na di bagasan sitaonon.
Alai umbagas sian i dope lapatanna. Angka hata ni naposo ni Debata ingkon pasahathon jala mamaritahon hata ni Debata paboa na marpamuati do roha ni Tuhan i jala paluahon. I do na pinangido ni Tuhan i sian angka naposoNa. Ganup ngolu ni naposo ni Tuhan i ingkon rade do laho manorushon hata ni Debata naung binegena. Rade lapatanna tongtong togu jala satia nang pe ditulak halak na asing Barita na Uli i (ayat 6).
Tardok do Jesus na gabe Naposo ni Debata na tutu. Na hibul mangoloi Ama i. Hombar tu si, pandohan 'dila sisean' lapatanna Mesias ingkon do manghatai songon naung manjalo Hata ni Debata laho mangalehon gogo tu angka jolma na gale ala ni dosa i. Ndang na mansohot dila sisean i laho manghatahon Hata ni Debata asa dipargogoi angka roha na gale jala dipasabam angka roha na gale i.
Baca juga!
Didok muse 'ganup sogot,' hata on pataridahon parsaoran na manongtong dohot Ama i. Uju na ditulak angka jolma na hinobasanNa pe Ibana jala sai direhei manongtong do Ibana mangulahon angka ulaonNa, na ro sian Ama i.
2. Sai na urupan ni Jahowa do ahu (ayat 7-9a)
Di ayat 7 dohot 9 adong do didok hata 'mangurupi.' Pandohan on i ma hata siulaon (kata kerja). Didok 'mangurupi' paboa i ma pambahenan ni Debata. Di tongatonga ni angka parungkilon, somalna sai dipasahat do tangiang mangido pangurupion sian Debata. Di turpuk on di bagasan pos ni roha do didok, 'sai na urupan ni Tuhan Jahowa do ahu' jala di bagasan pos ni roha do ibana paimahon haroro ni pangurupion na sian Tuhan i.
Baca juga!
Di na manaon angka parungkilon dohot angka pangalelean angka naposo ni Debata ndang porlu mabiar jala gabe maila laho manghatahon na sintong. Ai taboto do Hata ni Debata, hasintongan ni Debata, i do pinasahat ni naposo ni Debata. Jangan pernah ragu untuk menyatakan kebenaran Allah. Dihaporaeai ibana do sai na donganan ni Debata do ibana jala sai na paluaonNa do ibana jala papataronNa do hasintonganNa i.
HAHONAAN
Marhite turpuk epistel di Minggu Palmarum on boi do idaonta songon dia Tuhan Jesus naung pataridahon tu hita, i ma bagabaga ni panurirang Jesaya, ndang holan hatahata, manang holan na tarsurat, manang panghirimon na so tutu. Digohi do sudena i di bagasan Jesus Kristus Tuhanta i na mamboan haluaon tu ganup jolma na porsea.
Songon bangso na porsea tu Jesus ingkon tahamauliatehon do pangurupion dohot haluaon i di bagasan ngolunta. Ala ni i tung na so jadi be hita mabiar manang ganggu haporseaonta. Molo pe ro angka ragam ni parungkilon di bagasan ngolunta.
Taingot ma sai na donganan ni Tuhan i do hita marhite tondi naung dilehon tu hita, i ma tondi hagogoon laho mangalugahon ngolunta on sian ragam galumbang ni parungkilon na masa di ngolunta. Amen. (is)
Posting Komentar