HOSIANNA MA DI GINJANG NI GINJANGAN
Markus 11:1-11
Minggu Palmarum
Palmarum lapatanna pesta palma (maremare) (ida Mateus 21:1-11).
TURPUK
Dung i di na lam jonok nasida tu huta Jerusalem, tu Betpage dohot Betania, na di lambung ni dolok Jetun, disuru Jesus ma siseanna dua halak. Didok ma tu nasida: Laho ma hamu tu sosor na di jolomuna an; jadi disi bongot hamu tusi, dapot hamu ma tambat disi sada anak ni halode, na so dung dope hinundulan; harhari jala togu hamu ma i tuson! Jadi molo tung adong na mandok tu hamu: Na marhua do hamu?, dok hamu ma: Na ringkot do i di Tuhan i; jala tibu do pasuangonna i tuson. Borhat do nasida jala dapotsa do anak ni halode i, tambat dingkan harbangan di alaman i, jadi ditanggali nasida ma. Dung i adong ma halak na jongjong disi na mandok tu nasida: Na marhua do hamu na mananggali anak ni halode i? Jadi didok ma songon na tinonahon ni Jesus tu nasida, gabe dipasombu ma. Ditogu nasida ma anak ni halode i tu Jesus, diampehon ma ulosnasida tu atasna jadi marsihundul ma Jesus disi. Jala torop do halak angka na pahembangkon ulosnasida tu dalan i; na deba manalliki angka bulung rata sian ladang i, laho mangamparhon tu dalan i. Ia angka na di jolo nang angka na mangihut sian pudi, sai manjoujouhon do: Hosianna! Pinuji ma na ro marhitehite Goar ni Tuhan i! Pinuji ma harajaon ni amanta Daud na naeng ro! Hosianna ma di ginjang ni ginjangan! Jadi bongot ma Jesus tu huta Jerusalem sahat tu bagas joro i. Jala dung tangkas dibereng sude, ruar ma Ibana muse, laho tu huta Betania rap dohot na sampuludua i, ala naung bot ari situtu.
PATUJOLO
Somalna do molo ro sahalak raja manang panggomgomi di sada bangso, molo di hita nuaeng didok ma i presiden. Molo ro sahalak presiden tu sada luat, pintor dipatupa do ragam ulaon, na pinatupa ni angka kepala daerah dohot angka pangisi ni luat i dalan manomunomu presiden na naeng ro i. Adong ma i marhite tortor manang tari-tarian budaya na adong di luat i dohot angka na asing. Sai dipatupa do i laho manomunomu presiden manang angka kepala pemerintahan na asing pe.
Di turpuk on pe boi do idaonta paboa na adong do marragam pinatupa ni angka jolma laho manomunomu haroro ni Jesus tu luat Jerusalem. Ditomutomu nasida Jesus songon sahalak raja. Hatiha i, hirim do roha ni halak Israel di haroro ni sahalak raja na boi paluahon nasida sian angka parungkilon manang penindasan na niae ni nasida. Jala dirajumi nasida do paboa Jesus ma raja na boi paluahon nasida.
Baca juga!
Diparhatutu rohanasida do angka pangajarion ni Jesus mansai longang situtu. Diparhatutu nasida do na boi patupaon ni Jesus angka halongangan. Di turpuk on boi do idaonta las ni roha ni angka na torop i manomunomu haroro ni Jesus. Alai aha na hinirim ni bangso i ndang hombar tu haroro ni Jesus tu portibi on. Sai dirimpu nasida do na laho gabe raja (secara politis) Jesus, na manggomgomi jala manguluhon nasida. Hape marasing do harajaon ni Jesus, ndang songon harajaon ni angka raja na di portibi on. Jesus i ma raja na mangatasi saluhut raja, harajaonNa mangatasi saluhut tano on.
HATORANGAN
Dung lam jonok Jesus dohot angka siseanNa di Jerusalem, disuru Jesus ma dua halak siseanNa i laho tu sosor na di jolonasida jala dapot nasida ma sada anak ni halode na so dung dope hinundulan. Hatiha i halode dipangke do gabe dalan tu luat manang inganan na asing. Diulahon siseanNa i ma hombar tu na nidok ni Jesus. Diboan nasida ma halode i tu Jesus. Jala diampehon nasida ma ulosnasida tu atas ni halode i jadi marsihundulma Jesus disi. Songon sahalak raja ndang hoda dipangke Jesus, alai halode do. On ma hagogok ni panurirangon ni panurirang Sakaria (ida Sakaria 9:9).
Asing ni halode, hoda pe jotjot dipangke uju i. Molo hoda manggombarhon hagogoon dohot huaso, lumobi ma di na laho marporang (ida Jesaya 31:1 dohot 1 Rajaraja 4:26). Alai Tuhan Jesus halode do dipillit pangkeonNa. Ndang na holan asa manggohi angka naung pinasahat ni angka panurirang di Padan na Robi. Marhite i dipataridahon Jesus paboa Ibana do Mesias i.
Baca juga!
Alai ndang Mesias hombar tu na di roha ni halak Israel, na arop rohanasida adong ma raja na paluahon nasida sian bangso Rom. Arop rohanasida adong ma na gabe raja secara politis di tongatonga nasida. Hape ndang na i umbahen na ro Jesus tu portibi on. Haroro ni Jesus ndang na laho manggomgomi bangso i jala manguluhon Israel mangalo bangso na asing jala mangalele bangso na manjaja nasida. Alai ro pe Ibana tu portibi on laho mangalehon haluaon do tu angka jolma jala padamehon nasa jolma dohot Debata.
Adong do pigapiga halak na malo taringot tu parsiajaran Teologi na mandok di halak Israel somal do mamangke angka bulung rata sian ladang (daun palem) di bagas joro ni Debata uju mamestahom ari raya parlapelapean. Diparade nasida ma i sian bagasnasida be. Uju na pajumpang nasida dohot Jesus, dipangke nasida ma i dalan manomunomu haroro ni Jesus. Dipatupa nasida songon i, gabe i ma songon sada tanda pasangap halak na monang manang manomunomu sialo musu na mulak sian parporangan.
Baca juga!
Torop do halak na pahembanghon ulosnasida di dalan na naeng si boluson ni Jesus. Ditomutomu angka na torop i do haroro ni Jesus songon sahalak raja na mulak mamboan hamonangan. Alai lobi sian i do haroro ni Jesus. Mamboan barita las ni roha do Jesus ro tu portibi on, jala paluahon jolma lobi sian na paluahon bangso Israel sian angka panjajaon. Ndang holan paluahon bangso Israel umbahen na ro Jesus, alai dohot do paluahon angka jolma sian gomgoman ni dosa.
Di na pasauthon i, na ingkon mate do Ibana di hau pinarsilang i. Ingkon hansit do aeonNa humophop nasa jolma i. Boi do tarimangi songon dia lungun ni roha ni Jesus di panomunomuon ni angka bangso i na mansai ribur, hape ndang diantusi nasida, aha na hinirim nasida i marbalik do sian dalan ni Debata. Na ingkon mate do Jesus di hau pinarsilang i.
HAHONAAN
Marhite turpuk on boi do idaonta songon dia balga ni holong ni Debata tu hita angka na tinompaNa. Dipatutoru Debata do diriNa jala dilehon AnakNa na sasada i laho manobus hita angka pardosa sian hamatean. Ai na mate do hita ala ni angka dosanta. Ala ni dosanta i gabe mate ma hubunganta tu Debata na manompa hita jala na mangalehon hangoluan di hita.
Alai ala ni balga ni holong ni Debata tu hita, i do umbahen na tarsilang Jesus humophop hita. Ala ni i ingkon mandok mauliate do hita tu Debata ala ni holong ni rohaNa i. Ditongos do AnakNa na sasada i laho manobus hita. On pe las ma rohanta, tadok ma “Hosianna Ma di Ginjang ni Ginjangan.” Ai nunga ro Jesus i mardongan asi dohot holong ni roha, na mamboan hadameon tu hita. Nunga ro Ibana laho paluahon hita, marhite na tarsilang Ibana.
Nunga ro Ibana mamboan hamonangan ni partondionta. Ndang marhuaso be angka hajahaton, ai nunga ro Jesus laho panjongjonghon harajonNa tu portibi on. Ala ni i songon dalanta mandok mauliate di holong ni roha ni Debata naung tajalo di ngolunta, naeng ma nian mangolu hita di bagasan hatigoran jala taulahon ma hataNa. Amen.
Posting Komentar