ULAHON MA HATIGORAN DOHOT HASINTONGAN
Ulaon Ni Apostel 6:1–7
TURPUK
PATUJOLO
HATORANGAN
Somal do molo otik dope bilangan ni sada punguan, otik ma angka parsalisian. Alai molo lam torop do bilangan ni punguan i, lam balga ma angka dalan na boi mambahen parsalisian. Songon i ma na masa di pardalanan ni huria di mulana i. Dung lam martamba torop ni bilangan ni sisean i gabe masa ma parmungutmungutan sian halak Junani dompak halak Heber. Ala dihilalanasida nunga be moru panogunoguon tu huria i. Lumobi ma tu angka parompuan na mabalu sian halak Junani.
Baca juga!
Hata marmungutmungut di turpuk on lapatanna paboa sikap ni nasida na sai di bagasan ungutungut. Hata ungutungut dison ndada na mandok pambahenan na gabe paroaroahon jolma. Alai ungutungutnasida i dalan paboa na adong di rohanasida sian ruas ni huria tu angka uluanna. Diida nasida ndang be denggan tarpatupa panghobasion di na paturehon angka asiasi tu huria.
Sahat ma barita i tu apostel na sampulu dua i. Diparia angka apostel i ma sandok huria i, mandok "Ndang denggan hupapudi hami hata ni Debata, laho paturehon angka asiasi." Ndang na gabe membela diri angka apostel i, diakui nasida do hahuranganna, i ma na hurang panghobasionnasida di na patupahon angka asiasi, lumobi ma di na tartading angka parompuan na mabalu di pangurupion ariari. Sada sikap na denggan do na pinatudu ni apostel di turpuk on. Sebagai pemimpin ndang pola maila angka uluan molo tung adong na hurang singkop di panghobasionna. Ndang na pola mangorui sangap ni uluan i, gariada lam manamba sangap do i songon na niula ni angka apostel di turpuk on.
Parsiajaran na arga na pinatudu ni apostel di turpuk on, dipataridahon do, sebagai uluan manang pimpinan ni huria ingkon boi do gabe siboan solusi di tonga ni masalah. Di na patupa solusi pe apostel i ndang na holan mangasahon pamingkirionna manang guru dok ni uluan i, alai diparia do sandok ruas i, berusaha mencari solusi bersama. Digora, dipapungu apostel i do sandok huria i, rap marrapot, patupa dos ni roha. Sian on botoonta di na patupahon solusi na denggan di tongatonga ni huria i ingkon do di bagas musyawarah, kebersamaan. Ndada marguru tu hata ni sasahalak.
Baca juga!
Tutu do na hurang panghobasion ni angka apostel i di na paturehon angka asiasi, lumobi ma di angka parompuan na mabalu di pangurupion ariari. Ndang na ala lemba nasida di panghobasionna manang dipapudi nasida hata ni Debata, alai ala na lam manamba do torop ni sisean i. Tontu di na martamba, lam torop angka sisean i, lam godang ma tutu na laho sihobasan, gabe ndang tolap nasida be patupa asiasi, ai nasida do tong na patupahon ulaon martangiang dohot marjamita. Dalan laho memaksimalkan pelayanan didok angka apostel i ma asa didiori sian tongatonga ni huria i pitu halak na laho patupahon ulaon asiasi. Molo di partingkian saonari didok ma i ulaon Diakonia.
Dipangido angka apostel i taringot tu na pitu halak i asa halak na denggan baritana, angka na gok Tondi, jala na pantas marroha (ayat 3). Marhite on boi ma antusanta angka parhobas ni huria ingkon songon na nidok ni apostel i ma. Angka parhobas ni huria ingkon do lulus seleksi. Ndang na mandok ingkon sempurna, alai marguru tu hata ni Debata do, marguru tu pandonganion ni Debata di bagasan Tondi. Didok muse na pantas marroha, paboa angka na olo manghobasi di tongatonga ni huria i, ingkon pantas do marroha, ndang marguru tu rohana, marguru tu roha ni Debata do marhite hataNa.
Baca juga!
Di hatorangan na mangihut, diondolhon angka apostel i do, marhite na dipajongjong na pitu halak i gabe parhobas ni huria na patupa asiasi, gabe lam spesifik ma angka pembagian tugas di tongatonga ni huria. Ndang be dohot angka apostel i patupa ulaon asiasi na secara praktis, ulaon ni angka Diaken (baoa) manang Diakones (parompuan) ma i. Angka apostel nunga be boi nasida fokus di ulaon tangiang dohot marjamita. Nang pe songon i ndang na naeng memisahkan tugas ni parhuriaon, nang pe marasing peran manang ulaon na dihobasi, alai sada do tujuanna, laho pahembangkon ulaon huria jala pasangap goar ni Debata do huhut asa denggan sude mardalan angka pelayanan di tongatonga ni huria i.
Di bagasan kebersamaan do dipatupa angka apostel i dalan laho pasaehon masalah na adong di tongatonga ni huria i, hinorhon ni i gabe lomo ma roha ni na sahuria i. Laos dipillit ma pitu halak na laho gabe parhalado i ma: Stepanus, Pilippus, Prokorus, Nikanor, Timon, Parmenas dohot si Nikolaus. Dipajongjong ma nasida tujolo ni angka apostel i, ditangiangkon jala diampehon angka apostel i ma tanganna tu nasida. Ala sian sada ni roha do ulaon i dipatupa, gabe manghorhon tu hamajuon ma i jala gabe dalan tu hararat ni Barita na Uli, lam torop ma angka na porsea.
HAHONAAN
Goar ni mingguta sadari on i ma Minggu Judika, na dienet sian Psalmen 43:1a na mandok luluhon ahu, ale Debata (Latin: Judica me, Deus). Sian hatorangan ni turpuk jamita, boi ma antusanta, molo mago manang humurang denggan ni panghobasion di sada punguan manang huria, gabe manghorhon parmungutmungutan manang parsalisian ingkon denggan do dipasahat jala diselesaikan marhite kebersamaan dohot sada ni roha, unang marguru tu lomo manang guru dok ni sasahalak.
Sude do jolma adong hahuranganna manang hasilapanna, di angka pambahenan nang panghobasion pe, apostel i pe tong do ndang boi sempurna. Sugari adong pe angka na humurang, ingkon denggan ma dilulului dalan pasingkophon angka na humurang i. Ingkon patujoloon do dos ni roha, unang ma adong keegoisan di sada punguan manang huria. I do tandana hita halak na porsea.
Angka hatotapan na gabe dalan paulihon na hurang di tonga ni punguan manang huria, ingkon do mamboan tu hadengganan jala marguru tu hasintongan dohot hatigoran jala manghorhon tu hadengganan ni saluhut. Molo songon i do dipatupa, porsea ma hita sai na mamboan tu na denggan do i, tu hamajuon. Molo di huria gabe lam tamba ma tutu angka bilangan ni na porsea. I do na gabe ojahan ni jamita di Minggunta sadari on, na mandok "Ulahon ma Hatigoran dohot Hasintongan." Ditogihon do hita asa mangulahon hatigoran dohot hasintongan jala sian hatorangam ni turpuk jamita on, marguru tu na binahen ni angka apostel, sai na mamboan tu hadengganan do molo tung olo hita mangula hatigoran dohot hasintongan. Jala pos rohanta molo songon i do na tapatupa di tonga ni sada punguan manang huria, sai na mamboan tu hamajuon do i, hamajuon di punguan nang di huria. Amen. (ejs)
Posting Komentar