ULAHON MA HATIGORAN DOHOT HASINTONGAN
Hesekiel 45:9–17
TURPUK
Songon on do hata ni Tuhan Jahowa: Tung na torbang do hamu, ale angka induk ni Israel! Paholang hamu ma pangarupaon dohot hamagoan, jala ulahon hamu ma uhum dohot hatigoran! Pasohot hamu ma panosakmuna mangonjaronjar bangsongku sian partalianna, ninna Tuhan Jahowa! Ingkon masa di hamu timbangan na sintong dohot ampang na sintong dohot poting na sintong. Ianggo ampang dohot poting, ingkon dos tu tulukna, asa saparsampulu ni sada tuhukan do sada poting, jala saparsampulu tuhukan do sada ampang ingkon tuhukan do panuluhanna. Alai anggo sada mas, ingkon duapulu ringgit do. Duapulu mas dohot duapulu lima mas dohot sampulu lima mas ingkon sada tail di hamu. On do pelean tatingan siguguanmuna i: Saparonom ni sada ampang sian sada tuhukan dahanon, jala saparonom ni sada ampang sian sada tuhukan eme. Ia aturan ni miak, ingkon marpoting do boanonna, sada poting, pasampuluhon sian sada pingkul, asa sampulu poting gabe sada tuhukan, ai sampulu poting do tongon sada tuhukan. Jala sada anak ni birubiru sian duaratus birubiru sian tano ni Israel na tangkas di aek bahen pelean sipanganon, pelean situtungon dohot pelean hamauliateon, bahen pardengganan di nasida, ninna Tuhan Jahowa. Ingkon sandok bangso ni tano i margugu tu pelean tatingan i di induk ni Israel. Ingkon radotan ni induk i do antong angka pelean situtungon, pelean sipanganon dohot pelean siinumon di angka ari raya, di angka poltak ni bulan, di angka ari Sabbat pe ro di sandok ari raya bolon di pinompar ni Israel; ingkon ibana patupahon pelean pardosaon, pelean sipanganon, pelean situtungon dohot angka pelean hamauliateon bahen pardengganan di pinompar ni Israel.
Baca juga!
PATUJOLO
Hesekiel marlapatan "Debata na mampargogoi." Hesekiel i ma anak ni malim Busi, di tano ni halak Kasdim, na manghobasi di Jerusalem (ida Hesekiel 1:3). Uju na tarbuang Israel tu Babel dohot do panurirang Hesekiel tarbuang tu Babel rap dohot panurirang Daniel (ida Daniel 9:2).
Hatiha di Babel ditanda na torop i do Hesekiel sahalak jolma ni Debata na manurirangi (ida Hesekiel 14 dohot 28). Mangoli do si Hesekiel songon halak Jahudi na asing na di habuangan, jala maringanan martopihon batang aek Hebar (ida 1:1, 3:15-24, Psalmen 137:1). Jala dijalo ibana panjouon gabe panurirang hatiha di habuangan Babel di topi batang aek Hebar.
Buku Hesekiel on marisi 48 bindu jala adong mar 1273 ayat. Hurang lobi buku on digurithon hirahira taon 590-570 andorang Jesus di Jehuda dohot di Babel. Ondolan ni buku Hesekiel i ma: panguhuman jala hamuliaon ni Debata, rimas dohot holong ni Debata.
HATORANGAN
Adong pigapiga na boi sinagi sian turpuk ni jamitanta di minggu on, i ma:
1. Siteanon ni Angka Induk ni Israel (ayat 9)
Turpuk on dipasahat tu angka induk ni Israel. Induk na nidokna di son patoranghon huaso manang tohonan na adong di sahalak jolma laho mangatur angka na di toruna. Somalna, molo induk sai na denggan do dipatupa tu angka na di toruna. Alai sipata olo do ndang diulahon angka induk i marguru tu uhum na ingkon diula nasida. Olo do gabe holan dirina sandiri na disarihon, gabe ndang dipingkiri be patupa na denggan tu angka masyarakat na on ma na nidok na penyalahgunaan kekuasaan. Tu angka na si songon i do didok Debata, 'paholang ma angka ulaon si songon i.'
Baca juga!
Tohonan induk marharoroan sian Debata do. Ala marharoroan sian Debata ingkon denggan ma diula. Hape gabe asing do parulaonnasida na pataridahon parulaon dohot parange haportibion. Isarana pangarupaon dohot hamagoan. Boasa ma dipangke tohonan induk i gabe manosak mangonjaronjar angka bangso ni Debata sian partalianna. Di turpuk on dipaingot Debata paboa ingkon adong do hamubaon di angka ulaon ni angka induk na si songon i tu hasintongan, mangulahon uhum dohot hatigoran.
2. Pamasa ma angka na sintong (ayat 10-17)
Di turpuk na mangihut dipatorang taringot tu timbangan na sintong, ampang na sintong dohot poting na sintong di na pasahathon pelean tu Debata. Hatiha i, pasahathon pelean tu Debata dipamasa do marhite parpuluan. Taringot tu angka aturan manang songon dia i dipamasa diulahon malim ma i di bagas joro jala ingkon radotan ni angka induk ni Israel ma i. Ndada holan hepeng na gabe pelean na pinasahat ni halak Jahudi uju i di bagas joro. Dipasahat do eme, miak, anak ni birubiru, na gabe pelean situtungon dohot pelean hamaulitaeon dalan pardengganan di nasida tu Debata. Ingkon denggan do i dipatupa jala ingkon radotan ni induk do i. Molo peol do uhum i dipatupa angka induk, tontu na di toruna pe lam peol do.
Hinorhon ni i molo naeng masa hamubaon ingkon parjolo do masa sian ginjang dung i mangihut ma tu na di toru. Molo di ulaon bagas joro pe nunga ndang be sintong angka timbangan, ampang dohot poting. Timbangan, ampang dohot poting i ma ukuran ni halak Heber na jolo. Ukuran i dipangke ma tu miak manang eme, sada ampang manang poting dos ma i tu 36 liter. Jala adong muse do ukuran na asing, i ma mas, ringgit dohot tail. Di halak Heber na uju i sada mas i ma alat ukur timbangan, sada mas i ma mar 11,4 gram. Molo tail i ma alat ukur ringgit manang hepeng di halak Heber na uju i, dos ma argana tu dinar. Molo di zaman ni Jesus upa ni jolma parkarejo di bagasan sadari saleleng 100 ari i ma 100 bagian (mina). Sian i botoonta ma upa karejo sadari di sahalak i ma sada bagian (mina) manang dinar (ida Lukas 19:13).
Baca juga!
Nunga jotjot masa angka timbangan na so sintong hatiha i di Israel sahat tu angka timbangan pasahathon ragam ni pelean tu Debata di bagas joro i. I do umbahen na dipature Debata di turpuk on angka dalan pasahathon pelean ni bangso i di naung somal margabus bangso i di angka peleanna.
HAHONAAN
Goar ni Minggunta sadari on i ma Minggu Judika, na dienet sian Psalmen 43:1 na mandok luluhon au ale Jahowa. Hata on patoranghon uhum na sintong. Adong pandohan ni halak Batak na mandok, "Molo litok aek di toruan, tingkiron ma tu julu." Lapatan ni pandohan i patoranghon adong do ala ni angka na masa. Ala ni i molo dipature parsoalan sian mualna (penyebab utama) gabe tio ma saluhutna.
Aha ma penyebab utama? I ma ulaon partondion ni jolma. Molo nunga litok spritualitas ni jolma i, manghorhon ma i tu halitokon di sude parulaonna, mulai sian parrumatanggaon, pansarian ni ngolu si ganup ari, sahat tu angka parsaoran paralealeon, gok gabus. Dos do i songon molo hansitan ipon, olo do mangontak hansitna sahat tu simajujung jala olo gabe demam. Ndang na malum sahit i molo na tainum obat hansit ulu manang demam, alai holan tainum obat hansit ipon pintor malum do sude sahit i nang ulu manang demam.
Songon i ma nang di hita, molo nunga ture partondionta, nunga somal taulahon hatigoran dohot hasintongan di partondionta, manghorhon gabe sintong ma sude parulaonta si ganup ari. Amen. (ejs)
2 komentar