DIPAHEHE RAP DOHOT KRISTUS
Psalmen 118:14-21
Epistel Minggu Paskah I 9 April 2023
Minggu Paskah I
Paskah artinya peringatan akan kebangkitan Yesus. Yesus telah mengalami kesengsaraan di kayu salib, mati dan dikuburkan kemudian bangkit pada hari yang ketiga (lihat Lukas 24:6-7).
TURPUK
Jahowa do pargogongku dohot endengku, jadi gabe hatuaonhu Ibana. Soara ni olopolop dohot hatuaon marsaringar di undungundung ni angka partigor: "Siamun ni Jahowa do sibahen hamonangan. Timbul situtu do siamun ni Jahowa, siamun ni Jahowa do sibahen hamonangan." Ndang tagamon mate ahu, sai na mangolu do ahu, asa hupajojor angka pambahen ni Jahowa. Nunga gogo tutu dipinsang Jahowa ahu, alai nda tung tu hamatean ahu dipasahat. Ungkap hamu ma di ahu angka bahal ni hatigoran, asa hubongoti angka i laho mamuji Jahowa. On do bahal ni Jahowa, bongotan ni angka partigor do i sogot. Mandok mauliate ma ahu di Ho, ala naung dialusi Ho ahu, jala manjadi hatuaonhu.
PATUJOLO
Selamat Paska ma di hita saluhutna. Sadari on tapatupa do pesta Paska, na marningot huhut marlas ni roha do hita ala naung hehe Tuhanta Jesus sian hamatean. Di bagas pesta Paska sadari on dienet do turpuk Epistel sian buku Psalmen 118:14-21 jala topik ni Epistel i ma "Dipahehe Rap dohot Kristus." Mansai las situtu do rohanta ala naung hehe Kristus sian hamatean i.
Hata haheheon di hata Junani didok anastasis, lapatanna hehe manang jongjong. Molo didok dipahehe sasahalak, hehe ma ibana sian hamatean jala halak na sarupa do tong na dipahehe i. Nang pe di turpuk on mangihut tu buku na di Padan na Robi na marhata Heber ndang dibahen hata haheheon, alai sasintongna adong do ajaran taringot tu haheheon on dipaboa disi. Di turpuk on dipataridahon parpsalmen do panurirangon taringot tu toruk ni roha dohot hamuliaon ni Tuhanta Jesus. PartinaonanNa dohot hatoguonNa sahat tu na manghamonangkon diri sian hamatean pe dibilangi parpsalmen do asa boi taihuthon i di bagasan unduk ni roha.
Di turpuk on pe dipangido parpsalmen do muse tu hita asa pasahathon diri tu habadiaon ni Jahowa. Ringkot do di hita manghangoluhon hamuliaon ni Jahowa marhite haroro ni angka na porsea tu bahal ni hatigoran. Didok di ayat 19 "ungkap hamu ma di ahu angka bahal ni hatigoran." Diondolhon do hatigoran tu bahal i, jadi ndang boi ro angka jolma na so tigor manang angka jolma na so porsea. Marhite naung hehe Tuhanta Jesus dipahehe do nang hita sian hamatean ala ni dosa i, rap ma hita ro tu jolo ni Debata laho patuduhon las ni rohanta. Tapabagas ma pangantusionta taringot tu Hata ni Debata on di hatorangan na mangihut.
HATORANGAN
1. Hasangapon ni Debata (ayat 14-16)
Molo tajaha pengalaman ni parpsalmen dipuji ibana do Jahowa marhite angka ende. Diendehon ibana do pambahenan ni Jahowa na songkal i. Dipuji parpsalmen do hadirion ni Jahowa songon Panggomgom ni saluhut manisia. Ndang adong na so ginomgoman ni huasoNa, tung luhut jolma do. Tarbarita do goar ni Jahowa na gabe Sipanggomgom di liat portibi on. Jala barita hasangapon do di goar ni Jahowa. Dipatimbul Jahowa do diriNa, asa tung ditanda, diboto jala dihatindanghon liat portibi on hamuliaonNa na mangatasi angka langit.
Disulingkit parpsalmen do angka jadijadian ni Jahowa. Diparatarata ibana pamerengna tu angka na tinompa ni Jahowa. Jahowa do sitompa langit dohot tano nang nasa isina. Tangan ni Jahowa sandiri do na pauliulihon angka jadijadian i. Gariada tangan ni Jahowa sandiri do na manggorga jolma i. Ibana do nang na mangullushon hosa hangoluan tu nasa jolma. Marhite tangan ni Jahowa do asa manjadi jolma i. Tung so tarpatudos do jolma i tu hadirion ni Jahowa na marmulia i.
Mansai denggan do molo tatailihon tu angka jadijadian ni Jahowa. Mansai mangurupi do i di haporseaonta molo taingot jala taparatarata di rohanta angka jadijadianNa i. Gabe paingothon hita do i, huhut manungguli pingkiran nang panjaloonta di balga ni huaso ni Jahowa. Laos i do patubuhon roha na ra laho manghatindanghon dohot mambaritahon goar ni Jahowa na mangatasi sude angka jadijadian ni Jahowa. Ala ni i ndang tama jolma i paburnang diri di adopan ni Jahowa.
2. Dipahehe Debata marhite Jesus Kristus (ayat 17-18)
Barita na Uli na binoan ni angka parbarita na uli i ma barita haluaon, barita hamubaon ni roha dohot barita taringot tu hangoluan si saleleng ni lelengna. Barita na Uli na binaritahon ni angka apostel i ma angka ulaon dohot huaso, songon i nang asi ni roha ni Jahowa di angka na niasianNa. Patar do saluhut angka pambahenan dohot haluaon na pinatupa ni Jahowa di bagasan hadirion ni Jesus Kristus. Didok di ayat 17 "Ndang tagamon mate ahu, sai na mangolu do ahu, asa hupajojor angka pambahenan ni Jahowa." Pajojorhon pambahenan ni Jahowa maol do tu halak Israel, suang songon i nang barita taringot tu hahehehon ni Tuhan Jesus, i ma barita na mansai maol tarjalo ni halak na so manghaporseai Jesus Kristus.
Torop do angka na bisuk laho mangalului hasintongan--sian angka na tuk di pingkiran ni jolma--taringot tu haheheon ni Jesus. Sahat tu sadari on pe torop dope na so porsea naung hehe Jesus sian angka na mate. Hahehehon ni Jesus Kristus ndada holan haheheon ni tondi (kebangkitan roh), alai haheheonNa dohot do haheheon ni pamatang (kebangkitan tubuh). Apostel Paulus mandok di 1 Korint 15 ayat 14 dohot ayat 17 "ai anggo so hehe Kristus sian angka na mate, rumar ma jamitanami, laos rumar ma nang haporseaonmuna. Alai anggo so dipahehe Kristus (i ma Jesus) i, magopo ma haporseaonmuna, jala tong dope hamu di bagasan dosamuna." Haheheon ni Jesus Kristus i ma hataridaan ni gogo dohot huaso ni Jahowa di bagasan Jesus Kristus. Ndang margogo be sibolis dohot hamatean i mangambat haluaon dohot hangoluan na pinatupa ni Jahowa. Sibolis dohot hamatean na jorbut na gabe upa tinuhor ni dosa ndang margogo maradophon huaso dohot gogo ni Jahowa marhite Jesus Kristus.
Nunga dipatau Ibana hita marhaporseaon, nunga diunsat sian hita ganggu ni roha. Ndang adong be taboto haluaon di hita manang sian ise na asing asa sahat hita tu haluaon. Nunga muba hadirionta dung haheheon ni Jesus sian na mate. Dipabiarbiar sibolis i do hita mandok, asa ibana tangihononta, ganup ari do hita diunjuni sibolis i asa tasoadahon panghophopion ni Jesus Tuhanta i.
Disi ma tarida habasaonNa dohot habasaron ni Debata, Sipalua hita. Ndada ala ni ulaonta natigor umbahen na dipalua hita, tung sian asi ni rohaNa do, marhitehite pandidion pangulahion tubu dohot marhitehite Tondi Parbadia na paimbaruhon i. Naung nilehonNa tu hita buas marhitehite Jesus Kristus Sipalua hita. Asa gabe tigor hita, binahen ni asi ni rohaNa, jala sitean hangoluan na pinarbagabagaNa, mangihuthon panghirimon i. Ai naung jumpang do di hita hatauon ni haporseaon, na andul umarga sian sere dohot angka arta na adong di portibi on. Asa marsihohot ma hita disi. Asa marsangap goar ni Tuhanta jala bahenonta i tau pujipujian di Ibana.
3. Mandok mauliate jala tapuji ma TUHAN (ayat 19-21)
Hata TUHAN marharoroan sian hata Heber sian hata Yah·weh - The LORD lapatanna Tuhan, na sangap, na marmulia. Hata on dihatahon tu sahalak na sangap, na marmulia. Somalna di angka raja, na mora, jala na sangap. TUHAN na nidok na dison i ma Tuhan sipujion jala hasahatan ni hata mauliate, i ma Jahowa, Debata ni Israel. HasangaponNa dohot hamuliaonNa manghuphupi sandok tano on, jala di huasoNa i do hasangaponNa dohot hamuliaonNa.
Jotjot do tapuji sasahalak ala denggan hata manang ulaonna. Tarlumobi ma tu Debata Jahowa, taronjar do rohanta laho mamuji Ibana. Uju taida na angka tinompaNa, tarida ma Ibana do pargogo na so hatudosan. Dilehon do anakNa laho manobus hita, i ma patuduhon holongNa na mansai balga. Molo tajaha di Psalmen 118, taboto ma na lomo do roha ni panurat buku Psalmen on mamuji Jahowa.
Angka na sangap di tano on, jala jolma na dipasangap di tano on, martingki do i saluhutna, jala mate do nasida molo dung jumpang ajalnasida. Molo mate do nasa jolma manang halak na sangap i, mago ma hasangapon na di dirina i, harajaon i pe ndang lohot be di dirina. Martingki be do luhut hasangapon ni angka jolma na di tano on, jala martingki be do harajaonna. Molo pe nuaeng gogo harajaonna jala sangap, alai di sada tingki mago do i sian dirina. Ala ni i tung tama do holan Jahowa Debatanta na patut sombaonta. Manongtong do hasangaponNa jala na so marhaujungan. Nang pe laho salpu langit dohot tano on, alai hasangapon dohot harajaon ni Jahowa tung na so jadi salpu manang marujung. Lapatanna asi ni rohaNa i pe manongtong do.
HAHONAAN
Diapuli Jahowa do bangso Israel suang songon i nang parpsalmen, diparrohahon do nasida ganup marsadasada. Didok di Bibelta i, "ai molo hamatean manggomgomi, binahen ni na sada ala ni pangalaosionna i" (Rom 5:17). Ala pinompar ni si Adam do hita, mardosa jala mate ma hita. Alai, molo tahaporseai pelean tobusan ni Jesus, dapotta ma asi ni roha ni Jahowa. Dipaboa do muse di Bibelta i, "Alai ganda pe dosa i, lam sumurung ma asi ni roha i. Asa songon na manggomgomi jolo dosa i mantat hamatean, songon i do nang asi ni roha i manggomgomi marhitehite hatigoran manghorhon hangoluan na salelenglelengna marhite sian Jesus Kristus Tuhanta i" (Rom 5:20-21).
Disesa Jahowa do dosanta. Mandok mauliate ma hita tu Jahowa ala disesa dosanta. Ingkon marhamubaon ma hita jala marsitutu asa unang be mangulahon dosa. Suang songon i ma tu hita saonari. Panurat buku Psalmen mandok, molo Debata, Ibana ma na "pasabam angka parroha bojok, jala dililiti angka bugangnasida (luka) i" (Psalmen 147:3). Tingki marsahit manang marsak, pos ma rohanta na sarihonon ni Jahowa do hita. Sihol do rohaNa laho mangapuli jala pamalumhon hansit ni rohanta. Nunga dilehon diriNa jala Dilehon do tu hita bisuk dohot gogo asa boi hita manaon angka hasusaan i. Amen. (kjb)
Posting Komentar