DIPAHEHE RAP DOHOT KRISTUS
Kolosse 3:1-4
Jamita Minggu Paskah I 9 April 2023
Minggu Paskah I
Paskah artinya peringatan akan kebangkitan Yesus. Yesus telah mengalami kesengsaraan di kayu salib, mati dan dikuburkan kemudian bangkit pada hari yang ketiga (lihat Lukas 24:6-7).
TURPUK
Asa molo naung rap hamu dipahehe dohot Kristus, jalahi hamu ma angka na di ginjang; ai disi do Kristus hundul di siamun ni Debata. Angka na di ginjang i ma parrohahon hamu, unang ma angka na di tano on! Ai nunga mate hamu, jala buni do ngolumuna raphon Kristus di bagasan Debata. Alai ia dung gabe patar sogot Kristus, hangoluanta i, disi ma gabe patar nang hamu raphon Ibana di bagasan hasangapon.
PATUJOLO
Selamat Paska ma dihita saluhutna! Hamu angka dongan na hinaholongan tarlumobi dohot na tinobus ni Tuhanta Jesus Kristus. Tapuji ma Tuhanta naung paloashon ngolunta marlas ni roha sahat tu sadari on. Tarlumobi ma di na manghalashon Pesta Hamonangan ni Tuhan Jesus Kristus i ma Pesta Paska. Tung tangkas do didok di Buku Ende nomor 96 "Haleluya, Haleluya, nunga hehe Jesus i. Haleluya, Haleluya, nunga hehe Jesus i." On do pos ni rohanta jala gabe impola ni haporseaon ni sude halak Kristen na adong di portibi on. Unang ganggu hita taringot tu haheheon ni Kristus Jesus i.
Dihatindanghon Apostel Paulus do di 1 Korint 15:14 dohot 17 "ai anggo so hehe Kristus sian angka na mate, rumar ma jamitanami, laos rumar ma nang haporseaonmuna. Alai anggo so dipahehe Kristus i, magopo ma haporseaonmuna, jala tong dope hamu di bagasan dosamuna." Asa ingkon halashononta do i marhite na mandok mauliate tu Jahowa ai taruli do hita di haluaon na so tarasam dohot tartuhor hita, holan ala ni basabasa dohot asi ni rohaNa tu hita jolma pardosa on. On ma las ni rohanta di naung sahat tu hita, huriaNa sadari on paborhathon hita anggiat sude mananda dohot manghatindanghon huaso dohot haheheonNa i.
HATORANGAN
Marojahan tu haheheon ni Tuhanta Jesus Kristus na tahalashon jala tapestahon sadari on, i do ojahan jala panghirimanta di na dohot hita siihuthon Jesus Kristus. Laos on do nang ojahan di haporseaon ni halak Kristen taringot tu haheheon ni angka donganta naung mate.
Haheheon ni Tuhan Jesus Kristus i ma hamonangan situtu, na so tarpingkiri jolma, na so haambatan ni portibi on huaso dohot sangkap ni Debata. Ndang holan turiturian sambing i, manang angka na ginorga ni angka na malo manang angka anganangan. Alai tutu situtu do i masa di portibi on, i do umbahen na longang situtu angka parompuan dohot sisean i, uju di buhabuha ijuk marnida na masa i. Ndang di tanoman i be Jesus, batu na mangalangkopi baba ni tanoman i nunga be magulang (ida Mateus 28:1-10; Markus 16:1-8; Lukas 24:1-12; Johannes 20:1-18). Maol do siat i tu rohanasida, atik pe tagan di panghobasion ni Tuhan Jesus nunga sai dilumbahon paboa na hehe do Ibana di ari patoluhon (ida Johannes 11:25-26; Markus 8:31; 9:31; 10:33-34) sahat tu na manaek tu banua ginjang paradehon inganan di angka na porsea di Ibana. Ringkot botoonta paboa haheheon i ndang ulaon na masa sian na kebetulan manang sada na masa tompu, alai sada ulaon naung diparade Tuhanta do i hombar tu sangkapNa.
Huria Kolosse i ma sada huta di Asia Kecil di sabola purba ni luat Epesus. Huta Epesus hatihai gabe sada ibu kota ni provinsi na adong di Asia Kecil. Di partingkian nuaeng on didok ma i luat Turki. Masuk tu gomgoman ni bangso Rom do i uju i. Mangihuthon sejarah, ndada Apostel Paulus na panjongjong huria on, alai nang pe songon i dipatuduhon ibana do pangurupionna laho pamajuhon huria i marhite na paborhathon angka donganna laho pauliulihon haporseaon ni huria i (ida Kolosse 1:7; 4:12-13).
Tongon uju di hurungan do si Paulus manongos surat on. Di pangkulingi ibana do ruas na adong di huria Kolosse dalan patubuhon, huhut patoguhon haporseaon ni huria i mangadopi sumbia ni angka hamaolon dohot galumbang na mangontak na naeng mangkaromhon haporseaon ni huria i. Nang pe songon i tong do ndang lupa si Paulus marningot las ni roha ni huria i, ala marparbue do haporseaonnasida jala mangerbang do huria songon Pamatang ni Kristus (ida Kolosse 1:3-4), atik pe mansai gogo ro angka pangajarion na so ture na naeng manegai haporseaon ni huria i, asa manadinghon haporseaonnasida. Di angka pangunjunan si songon i ma diarahon si Paulus huria Kolosse asa tangkas marurat jala togu marhaporseaon tu Jesus Kristus huhut jamot. Jaga di sude angka na naeng mangagohon na porsea i (ida Kolosse 2:7–8).
Marhite turpuk ni jamita on di paingot si Paulus huria Kolosse songon i nang hita halak Kristen lumobi ma angka naung mananda haheheon ni Jesus Kristus marhite topik ni Minggunta sadari on, i ma "Dipahehe Rap dohot Kristus" asa:
1. Manjalahi na di ginjang i (ayat 1-2).
Aha do na nidok ni Apostel Paulus di son manjalahi na di ginjang i? Boasa ingkon na di ginjang? Ai ndang ringkot be huroha di hita na di tano on? Hape nuaeng mangolu di tano on dope hita. Molo dipangido hita asa manjalahi na di ginjang, lapatanna mangula ulaon na tau lomo ni roha ni Debata do. Tapasaut ma sangkap ni Debata marhite ngolu dohot ulaonta (ida Mateus 6:33). Baliksa angka na di tano on i ma angka ulaon hagiot ni portibi, na maralo tu ulaon ni Debata. Asa molo didok angka na di ginjang i ma jalahi hamu, marlapatan do i asa pangkeonta angka na di tano on, manang na adong di hita laho pasauthon sangkap lomo ni roha ni Debata. Unang tapangke na adong di hita laho pasombu tagas, sangkapsangkap dohot hagiot ni portibi on. Nunga ditobus Tuhanta hita, dipalua sian dosa dohot huaso ni sibolis, lumobi ma sian uhum hamatean. Ala ni i ndang be sai mangoloi portibi on be hita. Ingkon tu Tuhanta Jesus i nama, na maringanan di banua ginjang, di siamun ni Debata.
2. Taparangehon ma parange na imbaru (ayat 3).
Ambolong do luhut angka jolma na buruk rap dohot parulaonna na roa i. Ingkon solukhononta do ngolu na imbaru, songon nidok ni Apostel Paulus di 2 Korint 5:17 na mandok, "asa molo di bagasan Kristus halak, na tinompa na imbaru ma i. Salpu ma angka pangalaho na sai laon, gabe imbaru ma. Angka pangalaho na robi i ndang sai paianon be. Unang be sai mangadop tu daging, molo sai marparange tu daging hita gabe mate ma. Alai molo tatadinghon do ulaon hagiot ni daging marhite tondi, mangolu ma hita (ida Rom 6:6; 8:12-13; Epesus 4:22-24). Tabolongkon ma muse rimas, muruk, hajahaton, panginsahion dohot hata barangsi ro di pangalaho na marsigabusan (ayat 5-8; Rom 6:2).
Baca juga!
3. Na mardalan do hita di portibi on alai huhut paimahon hasangaponNa (ayat 4).
Nunga mangolu hita nuaeng di bagasan haheheon ni Tuhanta Jesus Kristus. Taparhatopot do naung mate, hehe jala manaek Tuhanta Jesus Kristus tu banua ginjang jala hundul di siamun ni Debata Ama. Tahaporseai do naung mate do hita di bagasan hamateanNa i, jala hehe di bagasan haheheonNa i. Jala huhut dipanaek marhite hananaekNa i. Ala ni i, siingoton ni rohanta na gabe kontrol ni ngolunta on holan sian banua ginjang do, i ma Jesus naung hehe i. Molo manaek Tuhanta Jesus tu banua ginjang, ndada ditadingkon boti hita di hasiangan on. Alai na mandok naung humusor do Tuhanta Jesus sian hajolmaonNa mulak tu hamuliaonNa.
HAHONAAN
Ala naung ditobus holong ni Tuhanta do hita sian gomgoman ni dosa dohot sibolis lumobi ma sian hamatean i, jala mian di portibi on dope hita. Na di bagasan pardalanan do hita nuaeng manopot surgo i, inganan na pinarade ni Tuhanta Jesus, i ma hasonangan si saleleng ni lelengna. Tusi do mata ni haporseaon dohot partondionta dijou jala diarahon tu saluhut na porsea i. So tung lilian, lalap hita di angka hinauli ni portibi on, sotung tading hita hinorhon ni angka hisaphisap dohot pangunjunan na ro sian portibi on. Ingkon hamonanghononta do i sude marhite na lam pahibulhon ngolu dohot parsaoran rap dohot Tuhan i.
Dilehon Tuhanta do padan tu angka na porsea, na ingkon monang do hita, ai Tuhanta Jesus Kristus i pe si parmonang do. Taingot ma, na ingkon sude do hita mamolus hamatean, alai ndang hamatean ujung ni ngolu ni halak Kristen, angka na porsea. Adong do haheheon dohot haluaon di angka na manghangoluhon hamamate dohot haheheon ni Tuhanta Jesus. Taingot ma Debata do haroroan jala marhapatean tu Ibana do sude jolma nang ngolunta on. Taeahi ma i rap dohot Tuhanta. Amen. (kjb)
2 komentar
Tabe sian hami ruasni huriani Tuhanta HKI SIONGGANG TENGAH RESORT PATANE PORSEA DAERAH III TOBASA,nang dohot sian hami saluhut parhalado ni hurianta.Debatama mangaramoti.