DIPAHEHE DEBATA NAPOSONA LAHO MAMASUMASU
Job 19:25-27
Epistel Paskah II Senin 10 April 2023
Paskah II
Paskah artinya peringatan akan kebangkitan Yesus. Yesus telah mengalami kesengsaraan di kayu salib, mati dan dikuburkan kemudian bangkit pada hari yang ketiga (lihat Lukas 24:6-7).
TURPUK
Ai tangkas do huboto mangolu do Sipangolu ahu, jala Ibana parpudi jongjong di atas orbuk. Jala ia dung malangke hulinghulinghon, jala malua ahu sian sibukhon, idaonhu ma Debata. Ahu sandiri ma tutu marnida Ibana gabe hatuaonhu, apala matangkon marnida Ibana, jala ndada anggo sileban; pola tung suda piangku dibahen sihol ni rohangku di bagasan.
PATUJOLO
Alai ndang na pola tangkas binoto ise na manurathon buku on. Marisihon angka hatahata na denggan jala na mansai uli do buku Job on, ala mansai uli jala une do angka poda na adong di buku i.
Buku on digoari Job hombar tu ngolu ni si Job na digurithon di buku on. Si Job i ma sahalak uluan di sada bagas, sahalak na mamora jala biar mida Jahowa. Marianakhon pitu halak baoa jala tolu boru, jala torop do nang pinahanna. Adong ma mar pitu ribu birubiruna jala tolu ribu untona, jala lima ratus pasang horbona, jala lima ratus halodena boruboru, angkup ni i mansai torop do nang naposona. Sumangap do ibana sian saluhut halak na di habinsaran (ida Job 1:3). Alai tompu do masa pangunjunan tu ibana, sude na adong di ibana huhut angka na hinaholonganna pe mago do luhut.
Di pamuhai ni buku on dihatahon do songon dia parngoluan ni si Job, sahalak na burju jala marnampuna di arta hamoraon. Tangkas do dipajojor Debata songon dia burju ni si Job, pola didok, "ai ndang adong baoa tudoshon ibana marroha di tano i, daulatna, tigorna, biarna mida Debata, jala dipadao rohana sian hajahaton (ida Job 1:8). Alai dialusi sibolis i do mandok molo tung burju pe si Job, na marpambuat do ibana di si, ala na dilehon Debata do pasupasu di ibana, angka ninna. Dung i dipaloas Debata ma sibolis i laho mangunjuni si Job. Gabe dipamasa sibolis i ma angka na so denggan tu parngoluon ni si Job, mate ma angka ianakhonna, mago nang artana, jala masa muse sahit tu pamatangna. Nang pe masa luhutna i di ngoluna alai sai marlambas ni roha do anggo si Job mangihuthon Debata jala ndang gabe marrimas ibana mida Debata.
Angka na masa di ngolu ni si Job i ndang gabe mambahen mandele jala laos mago haporseaonna tu Debata. Alai satia do ibana mangihuthon Debata. Marsihohot do ibana manghaporseai Debata. Dipangido ibana do asa anggiat nian tung malua ibana sian pardangolanna i.
HATORANGAN
Di bindu 19 digurithon do songon dia alus ni si Job maradophon si Bildad uju na ro ibana paduahalihon mangonai hata tu si Job. Ditariashon ibana do paboa halak parjahat do si Job, ala ni i sai dapotan hamagoan do halak parjahat (ida bindu 18). Alai ndang tarjalo roha ni si Job hadirionna songon halak parjahat manang halak pardosa songon angka naung nidok ni si Bildad tu ibana (ida Job 19:3-4).
Dipajojor si Job do ise ibana sasintongna, ndang songon angka na nidok ni si Bildad i, ndang na ala ni halak na jat si Job, alai ala na bonar do ibana di adopan ni Debata. Hot do haporseaon ni si Job tu Debata jala ndang manarita ibana dompak Debata nang pe masa pangunjunan tu ibana, mate sude angka pinahanna, songon i nang angka ianakhonna jala ditadingkon dongan saripena ibana.
Marhite turpuk Epistel on, dihatindangkon si Job do haporseaonna tu Debata. Hot do ibana marhaporseaon tu Debata, jala angka on ma na hinatindangkonna:
1. Na mangolu do Sipalua ahu jala na ingkon hehe do Ibana sian atas ni angka orbuk ni tano (ayat 25).
Di hamamasa ni parungkilonna, marsihohot do si Job di bagasan haporseaon tu Debata, pos do rohana sai na paujungon ni Debata do parsorionna i jala patimbulon ni Debata do ibana (ida Job 13:15; 14:14-15). Dihaporseai si Job do Debata na gabe Sipalua. Somalna, sahalak Sipalua dihaporseai do songon sada aleale na gok holong, na sai ro mangurupi jala mangalinggomi, na sai mangurupi uju masa hagogotan (ida 3 Musa 25:25; 5 Musa 25:5-10; Rut 1:4; ida 1 Musa 48:16; 2 Musa 6:5; Jesaya 43:1; Hosea 13:14) jala manogunogu alealena na di bagasan haporsuhon.
Panindangion ni si Job, marhadomuan do tu bagabaga taringot tu Jesus Kristus si Palua i, na naeng ro tu portibi on laho paluahon angka na porsea di Ibana sian dosa dohot hamatean (ida Rom 3:24; Galatia 3:13; 4:5; Epesus 1:7; Titus 2:14), paluahon sian hamagoan nang hamatean (ida Heber 2:14-15; Rom 8:23), mamboan haluaon na manontong (ida Johannes 3:16; Rom 6:23), paluahon sian hamatean binahen ni dosa (1 Tessalonik 1:10) jala mamboan hatigoran (ida Pangungkapon 19:11-21; 20:1-6).
2. Idaonhu do Debata nang pe malangke hulinghulinghu (ayat 26).
Dihaposi si Job do haporseaonnna tu Debata, molo tung pe malangke hulinghulingna, alai sai na hehe do muse pamatangna jala idaonna Debata sipalua naung hehe. Di turpuk on adong do bagabaga ni Debata taringot haroro ni Kristus di angka ari parpudi, haheheon ni angka na mate jala dilehon habonaron tu sude halak na satia mangihuthon Debata.
Porsea do si Job molo tung mate pe ibana, sai na idaonna do Debata. Pos rohana ala saleleng ngoluna ndang hea ibana mangulahon dosa jala ndang olo ibana manarita dompak Debata (ida Job 1:22). Molo di Padan na Imbaru haheheon ni halak na mate i ma angka halak na porsea tu Tuhan Jesus Kristus na gabe Tuhan jala Sipalua Jolma.
3. Ahu sandiri matangku marnida (ayat 27).
Sihol ni roha ni si Job, asa marnida Debata Sipalua, na mangatasi angka sihol ni roha di angka na asing mansai tangkas do tarida di buku on. Dihasiholi si Job do jumpangna sada tingki, di na boi ibana marnida bohi ni Debata na manobus manisia. Songon halak na porsea di Padan na Imbaru na manghasiholi haroro ni Sipalua (ida 1 Korint 1:7; 2 Timoteus 4:8) jala ari hagogok ni uju marhadirion joro ni Debata di tongatonga ni angka jolma, na maringanan ma Ibana di tongatonganasida, jala nasida ma bangsona, jala Debata sandiri saor tu nasida (ida Pangungkapon 21:3) jala idaonnasida do Bohina (ida Pangungkapon 22:4).
HAHONAAN
Saleleng mangolu jolma di hasiangan on, angka parungkilon ni parngoluan, na borat nang na neang, sai na adopanta do. Alai boha do hita mangadopi saluhutna angka parungkilon ni ngolu na taadopi, jala songon dia do hatoguon ni haporseaonta tu Tuhan Debata. Tung sarupa do ulaning hita songon si Job?
Molo tapaihutihut buku ni si Job, tung dapotonta ma na so hea ibana manarita dompak Debata di angka sude parungkilon (hamagoan arta nang ianakhon jala di na hona panahit ibana) na masa di ngoluna. Ndang gabe mandele ibana manang mambuat dalan na maralo tu lomo ni roha ni Debata asa malua, nang pe mansai dokdok do na niadopanna. Baliksa, angka parungkilon na niadopanna i mambahen lam tu gogona do haporseaonna, lam dipajonok do dirina tu Tuhan i, jala dipasahat ibana do dirina tu Debata. Mangolu nang mate pe ibana, Debata do nampuna ibana (ida Job 1:21).
Marhite turpuk Epistel Job 19:25-27 on dohot ojahan "Dipahehe Debata NaposoNa Laho Mamasumasu", hita angka halak na porsea tu Tuhanta Jesus Kristus nunga be dipahehe jala dipangolu muse haporseaonta sian angka hamatean binahen ni dosa, jala gabe halak na dapotan pasupasu sian Tuhan i do hita. Asa mangolu di bagasan ngolu na imbaru na di bagasan Kristus jala gabe sinondang nang pasupasu tu angka dongan jolma. Songon parngoluon ni si Job di ujungna i diramoti Debata do ibana, ala haburjuonna mangihuthon Debata, hatoguonna jala haporseaonna tu Debata (ida Job 42:12-17).
Sai anggiat ma di pesta parningotan paduahon di haheheon ni Jesus on, sai lam diramoti Tuhan i ma hita laho mangadopi angka parungkilon di bagasan parngoluonta si ganup ari. Amen. (em)
Posting Komentar