JAMITA MINGGU 4 JUNI 2023
DEBATA SITOLUSADA SITOMPA SALUHUT
1 Musa 1:1-2 dohot 26-28
Minggu Trinitatis
TURPUK
Di mula ni mulana ditompa Debata langit dohot tano on. Dung i tarulang ma tano i gabe halongonan jala holom di atas lung i, dung i mangareapreap ma Tondi ni Debata di atas ni angka aek. Dung i manghuling muse ma Debata: "Tole ma, Tatompa ma jolma, tumiru rupanTa, tudos tu pangalahonTa, asa dirajai dengke angka na di laut, dohot pidong angka na martongatonga langit, dohot angka dorbia, ro di sandok tano on nang sude gulokgulok, angka na manjirir di atas tano on." Jadi ditompa Debata ma jolma i tumiru rupaNa, rupaNa ditiruanhon Debata laho manompa ibana, baoa dohot boruboru nasida ditompa. Dung i dipasupasu Debata ma nasida, ninna Debata ma tu nasida: "Marpinompari ma hamu, asa sopar hamu, jala gohi hamu sandok tano on, jala patunduk hamu; jala raja i hamu dengke angka na di laut dohot pidong angka na martongatonga langit ro di sude binatang, angka na manjirir di atas tano on."
PATUJOLO
Minggu Trinitatis, i ma Minggu Hasitolusadaon ni Debata na laho paingothon hita di sangkap ni Debata taringot tu haluaon na pinatupaNa. Trinitatis didok ma di hata Latin "tres personae, una subtantia" tiga pribadi, satu hakikat atau substansi, i ma Debata. Tangkas do na pinatupa ni Debata i di ngolu ni jolma paboa Debata Ama marsangkap laho paluahon jolma manisia sian dosa, laos dipatulus ma sangkapNa i marhitehite haroro ni Anak ni Debata, i ma Jesus Kristus na ro tu portibi on mamboan haluaon, dame nang hangoluan.
Didok Jesus, Ibana do dalan dohot hasintongan dohot hangoluan jala ndang adong na sahat tu Ama i, molo so marhite Ibana (patudos Johannes 14:6). Jala Tondi ni Debata i ma Tondi Parbadia na mangarahon roha dohot pingkiran ni jolma i asa manongtong marhaporseaon tu Ibana. Ala Ibana do dalan, hasintongan dohot hangoluan. I ma gombaran ni Minggu Trinitatis na naeng paboahon sangkap na mansai uli jala denggan marhitehite ulaon ni Debata Sitolusada i.
HATORANGAN
Buku Musa na parjolo i ma buku na parjolo sian sude isi na adong di Bibel. Jala didok do buku on Buku Tora na marisihon taringot tu panompaon ni langit dohot tano dohot nasa isina, i ma na pinatupa ni Debata. Ayat na parjolo di buku Musa na parjolo on do na gabe panindangion ni bangso Israel dohot haporseaon ni nasida paboa adong do disurathon mula ni nasa na adong. Sian hatorangan ni ayat na parjolo on, i ma parbinotoan taringot tu pambahenan ni Debata na mansai balga jala halongangan situtu patupahon panompaon na so tarpingkiran ni hajolmaon lumobi ma molo dipatudos tu angka teknologi di hamajuon na adong di portibi on. Dipatupa Debata do panompaon i marhitehite huaso na adong di Ibana, ai Debata na marhuaso jala marmulia do Debata. Tarida do huaso ni Debata di uju na ditompa Ibana langit dohot tano dohot laut dohot nasa isina songon i do nang ulaon ni Tondi i di bagasan panompaon i.
Buku Musa na parjolo on disurathon Panurirang Musa marhata Heber, uju di pardalanan nasida mandapothon tano Kanaan, tano naung niuarihon ni Debata di bangsoNa. Ruar nasida sian tano Misir, sian tano parhatobanan i. Sian ayat na parjolo di turpuk on, dilehon do pangantusion na mansai bagas tu hita taringot tu panompaon na pinatupa ni Debata di tingki na parjolo, i ma panompaon ni langit dohot tano on andorang so ditompa Debata jolma i tumiru rupaNa, tudos tu pangalahoNa.
Debata sitompa saluhut. Boi do antusanta dison, ia manompa na nidokna dison lapatanna mambahen manang patupahon sian na so adong hian gabe adong. Di hata Latin didok ma "creatio ex nihilo" lapatanna penciptaan dari ketiadaan. Holan tu Debata do didok hata on, ala Debata patupahon, manompa saluhut sian na so adong (dari ketiadaan atau kekosongan). Di mula ni mulana ditompa Debata langit dohot tano on (1 Musa 1:1). Andorang so dipatupa Debata i, ndang adong dope agia aha. Ndang ditompa Debata langit dohot tano on marhite na asing alai sian na so adong do.
Nang pe ndang pintor tangkas disurathon di Bibel hata si songon i, na mandok ditompa Debata langit dohot tano dohot laut dohot nasa isina sian na so adong, alai boi do i talapati marhite angka ayat naung didok i Bibelta i. Songon na didok di Heber 11:3 "hinorhon ni haporseaon do taantusi, naung marhitehite pandok ni Debata dipaojak angka hasiangan, asa sian na so tarida manjadi na tarida i." Lapatanna disi paboa manjadi pe angka langit dohot tano dohot laut dohot nasa isina marhite sian Hata ni Debata do ndang na dipatupa sian angka naung adong hian.
Di partingkian si nuaeng on boi do taida angka benda manang peralatan na pinatutomu ni angka halak na pistar, halak na malo. Nang pe mansai malo angka jolma i, alai angka naung tinomuhon ni nasida marhite angka naung adong hian do. Ringkot do di nasida angka bahan baku asa boi patupahon angka na naeng patupaon nasida. I do asa godang angka ulaon na mangalului angka material sian portibi on. Ba molo maol dapot bahan baku i, angka barang naung jinadihon nasida i pe lam arga ma. Alai ndang songon i anggo Debata, ndang tarbatas di angka bahan baku Ibana jumadihon nasa na adong.
Boi dohonon molo jolma i na patutomuhon do ndang na manompa. Atik pe adong angka halak na pistar ndang gabe na manompa nasida didok alai na patutomuhon do. Ala memang sian na adong hian do jolma i mambahen angka na ringkot hombar tu hapistaranna. Alai anggo panompaon ni Debata, di hata Heber dipangke hata "bā·rā" lapatanna created-menciptakan-manompa. Holan tu Debata do dipangke hata on. On ma na pataridahon holan Debata do na tuk patupahonsa, jala ndang adong na manompa tudos songon na pinatupa ni Debata.
Dung i di ayat na paduahon dipaboahon do tu hita songon dia do kondisi manang situasi ni langit dohot tano naung ditompa Debata. Ditangkasi do, paboa tarulang ma tano i, gabe halongonan jala holom di atas lung i, dung i mangareapreap ma Tondi ni Debata di atas ni angka aek. Tumangkas dope antusanta di hata Indonesia, didok "bumi belum berbentuk dan kosong; gelap gulita menutupi samudera raya, dan Roh Allah melayang-layang di atas permukaan air." Situasi na so ture dope sasintongna. Alai nang pe songon i situasi ni tano on, boi do diaturhon Debata gabe uli saluhutna marhitehite na itompa muse angka isi ni tano on, gabe uli ma idaon sahat tu nuaeng on. Umbahen i do gabe sada panindangion na mangolu ma on, i ma panompaon ni Debata di ngolu ni angka na porsea. Sangkap ni Debata do i na pinasahatNa tu hita, i ma haluaon dohot hasonangan i. Panompaon ni Debata tahaporseai do i ndang ala ni kebetulan manang holan secara alamiah umbahen na adong sahat tu partingkian si nuaeng on. Alai tangkas do haporseaonta mandok, paboa adong pe tano dohot langit dohot nasa isina, ala ditompa Debata do i. Andorang ditompa Debata jolma manisia, jumolo do diparade sude nasa na ringkot di parngoluon ni jolma i, tarida do kekhususan ni jolma i maradophon jadijadian na asing.
Disurathon di ayat 26-27 paboa ditompa Debata jolma i di ari paonomhon, tumiru rupaNa, tudos tu pangalahoNa, baoa dohot boruboru do ditompa Debata. Mansai arga do jolma i ditompa Debata, tumiru rupa dohot pangalahoNa sandiri. Aha do lapatanna jolma i asa ditompa tumiru rupa dohot pangalaho ni Debata? Alusna secara sederhana boi dohononta asa gabe sorminan do manang gombaran ni Debata jolma i di parngoluonna laho patuduhon holong, hamuliaon dohot habadiaon ni Debata huhut mangulahon hasintongan ni Debata. Molo secara fisik ndang boi dohononta sarupa Debata dohot jolma, ala dang hea dope taida songon dia do bohi ni Debata. Boi do taida songon na didok di Johannes 1:18 "tidak seorang pun yang pernah melihat Allah; tetapi Anak Tunggal Allah, yang ada di pangkuan Bapa, Dialah yang menyatakan-Nya." Ndang dung adong na marnida Debata. Alai didok tumiru rupa jala tudos tu pangalaho ni Debata asa tumiru Debata ma nian pangalaho ni jolma i secara kualitas. Sumurung ma nian pangalaho ni jolma i sian sude angka jadijadian ni Debata na asing i, ala tangkas mansai uli do ditompa Debata jolma i, laos adong do muse dipasahat huaso tu jolma i, dung dipasupasu Ibana.
Baca juga!
Huaso na pinasahat ni Debata tu jolma i, didok di ayat 28, "marpinompari ma hamu, asa sopar hamu, jala gohi hamu sandok tano on, jala patunduk hamu; jala raja i hamu dengke angka na di laut dohot pidong angka na martongatonga langit ro di sude binatang, angka na manjirir di atas tano on." Alai didok Debata pe songon i, ndang na mandok asa boi gabe lomolomo ni jolma tu angka jadijadian na asing na tinompa ni Debata, alai na nidokNa disi, i ma asa boi do jolma i bertanggungjawab laho mangaradoti angka jadijadian na asing na tinompa ni Debata di portibi on.
HAHONAAN
Marhite turpuk ni Jamita on, naeng ma tangkas pangantusion halak Kristen taringot tu panompaon na pinatupa ni Debata. Ibana do manompa langit dohot tano dohot nasa isina, jala ditompa Debata do i saluhutna marhitehite huaso na adong di Ibana. Naeng ma bagas pangantusion di hita taringot tu turpuk Jamita on asa mangolu haporseaon dohot haunduhon ni roha laho marsomba huhut pasangaphon Debata di ngolunta.
Molo mangasahon logika manang parbinotoan do laho mangalapati turpuk ni Jamita on, ndang tolap hita i, ala on ma na ginoaranna Debata na transenden, i ma na so boi dijangkau dohot pingkiran ni hajolmaon na mansai terbatas. Alai naeng ma nian hita mangalapati panompaon ni Debata di bagasan haporseaon na mangolu ala naung adong do Debata andorang so adong dope portibi on. Ala ni i ngolunta on pe ingkon mamuji pasangaphon Debata ma. Marhite tema ni Minggu di Minggu Trinitatis on na mandok "Debata Sitolusada Sitompa Saluhut," anggiat ma asa lam hot haporseaonta di Debata jala tapangke ma sude pasupasu na adong di hita bahen hasangaponNa jala mangulahon angka ulaon na hombar tu lomo ni rohaNa. Amen. (as)
Posting Komentar