EPISTEL MINGGU 2 JULI 2023
MANGOLU DI BAGASAN HATIGORAN DOHOT ASI NI ROHA NI DEBATA
Mateus 10:40-42
Minggu 4 Dung Trinitatis
TURPUK
Na manjangkon hamu, Ahu do jinangkonna: Jala na manjangkon Ahu, na marsuru Ahu do jinangkonna disi. Na manjangkon panurirang ala targoar panurirang, dapotan upa ni panurirang; na manjangkon partigor ala targoar partigor, dapotan upa ni partigor. Na painumhon aek tabar santahu tu sahalak sian angka na metmet on ala targoar siseanHu ibana: Situtu do na Hudok on tu hamu, ndang na mago upana.
PATUJOLO
Tontu hea do hita manjangkon (menyambut) angka halak, isarana tamu, halak na penting manang keluarga na ro sian huta jala ingkon denggan do tatamue nasida. Ai tahaporseai do molo denggan tatamue angka dongan jolma na ro tu bagasta, mangihut do godang pasupasu na ro tu hita. Songon i do na nimaksud ni Jesus songon tanda manang bukti na manjangkon Ibana marhitehite parbaritaon na uli.
Di na marmabarita na uli ingkon tapatupa do angka na denggan, patuduhon serep ni roha laho mangihuthon Ibana. Andorang ayat di turpuk ni Epistel on tangkas do dipatuduhon Jesus, parulan ni angka jolma na so olo mangihuthon Ibana sian serep ni roha. I ma angka halak na humolong rohana di natorasna, ianakhonna, hosana jala ndang olo mamorsan silang na tu ibana. Angka halak si songon i ndang tama i di adopan ni Jesus, ai ndang patupahon na denggan i di Ibana.
HATORANGAN
Na nidok ni Jesus di turpuk Epistel on on gabe hata apulapul dohot hata togartogar do tu angka sisean dohot halak na porsea tingki i di angka na naeng marbarita na uli. Ala diboto Jesus do, ndang sude jolma na olo manjalo dohot manangihon Barita na Uli. Sai adong do angka na manulak hata i. Alai dipodahon Jesus ma, asa unang mabiar nasida laho marbarita na uli.
Adong do sada hasomalan di halak Jahudi, i ma manjangkon dohot patupahon na denggan tu angka jolma na ro tu bagasnasida. Ala ni i ndang pola ganggu rohanasida laho mangulahon ulaon panghobasionna di na marbarita na uli tu angka jolma. Barita nauli, ndang holan sebatas hata/kalimat sijahaon. Alai ingkon tangkas dipatuduhon marhite angka pambahenan dohot parulaan siganup ari. Alani ma ndang cukup holan tadok. “huithon Jesus” manang “hujalo barita nauli i” molo ndang adong hataridaan na dingolunta, gabus do i. Ai manjangkon na dimaksud Jesus dison, sasintongna ndang holan persoalan manjalo. Alai ingkon mangulahon dohot manghangoluhon barita nauli i ima ibana, Jesus Kristus. Sian on tangkas tasadari angka jolma na porsea ima na sinuruni Debata manang “Duta Kristus” diportibion. Nasida ma representasi ni Debata laho patandahon dohot manghatindanghon huaso ni Debata. Ai marhite sikap nasida ma nasa na adong diportibion boi mananda jala porsea tu Debata. Molo Jesus ro tu angka halak na porsea, dohot do disi ro Debata ala nunga sada Jesus dohot Debata, asa manang ise na manjangkon Jesus dohot do ibana manjangkon Debata. On ma lasni rohanta, ndang marisuang be ngolunta ala nunga muba statusta marhite pengorbananni Jesus. Status ima na manosoi hita dibagasan hasatiaon dohot haserepon mangihuthon Ibana marbarita nauli. Hasatiaon dohot haserepon i ingkon sian haporseaon na polin maniop pangaramotionni Debata dingolunta. Alani sikap ni ngolunta ingkon gabe sitindangi jala sitiruon.
Sikap gabe sitindangi dohot sitiruon i ndang holan adong dihalak na porsea na marbarita nauli, alai ingkon dohot do adong dihalak na porsea na manjangkon barita nauli i. Ai angka na manjangkon barita nauli i ingkon dapotna do upa sian i. Songon dia rohana dohot responna manjangkon barita nauli i songoni ma upa dapotna, gabe ndang marisuang manang aha naniulana dibagasan Debata. Molo olo hita mangurupi angka ulaon pangkobasion parbaritaon nauli tutu dapotta ma upa sian ulaonta i. Dison tangkas dipatuduhon Jesus bentuk panjangkonon na denggan dibarita nauli ima songon na painumhon aek tabar santahu tu sahalak na metmet. “Sahalak na metmet” dison patuduhon angka dongan na tarpasiding, tartading dohot hurangan. Haradeon dohot panamueon marhite haserepon ima sada na umpenting dina marbarita nauli jala boi mulaionta marhite na rade manamue angka dongan na tarpasiding, tartading dohot hurangan. Lapatanna dina naeng manjangkon Jesus manang mangurupi ulaon parbarita naulion, ingkon tamulai ma sian na mangulahon angka ulaon na denggan tu angka dongan na metmet dihumaliangta. Ingkon tapaserep ma rohanta laho mangurupi dohot manghaholongi angka donganta na gale, ai ido bukti naung tajangkon, tajalo jala tahangoluhon barita nauli i ima Jesus Kristus i dingolunta. Debata ndang hea marutang tu manang ise jolma diportibion. Jala hita ndang boi menandingi/manaluhon Debata taringot tu silehonlehon. Ndang hea Debata mambahen gabe rugi/hurangan jolma na olo marsilehonlehon dohot manghaholongi donganna. Ai molo adong kesempatan di hita laho mangalehon santahu aek tu donganta, sarupa na mangalehon tu Debata do i. Molo tahaholongi donganta, sarupa na manghaholongi Debata do hita disi. Molo tabahen na denggan tu donganta, sarupa na mambahen tu Debata do i. Molo tabahen marlasni roha donganta, sarupa na mambahen lasni rohani Debata do i. Alai ingkon hombar tu lomoni rohani Debata jala ingkon marhite hataNa na badia i, unang gabe manimbil. Ngolu na marhaporseaon ndang songon na marnipi, alai ingkon tarida dingolu siganup ari. Sikap dohot karakterta songon halak na porsea ingkon berdampak parohon dame dohot haulion tu angka dongan, ima ngolu na gabe sitindangi. Alani tabahen ma panghataionta dohot pambahenanta gabe sitindangi dihuaso ni Debata tu portibion. Unang ma portibion sai holan na mambege angka hata, alai ingkon dohot do marnida marhite panbahenanta. Manang aha pe potensi dohot pasupasu na dibasabasahon Debata tu hita, ingkon tapangke ma i laho mangurupi angka ulaon pangkobasion ni Debata diportibion. Amen. (ems)
Posting Komentar