JAMITA MINGGU 2 JULI 2023
MANGOLU DI BAGASAN HATIGORAN DOHOT ASI NI ROHA NI DEBATA
Psalmen 89:15-18
Minggu 4 Dung Trinitatis
TURPUK
Hatigoran dohot uhum do ojahan ni habangsaMi, asi ni roha dohot hasintongan patujolo ni bohiM. Martua ma bangso na umboto olopolop. Angka na marpangalaho di bagasan hatiuron ni bohiM, ale Jahowa. Sai marolopolop do nasida manipat ari marhitehite goarMu, jala timbul do nasida hinorhon ni hatigoranMu. Ai Ho do saudara ni hagogoonnasida, jala hinorhon ni habasaonMi do manuarang tanduknami.
PATUJOLO
Hagogoon dohot hasatiaon ni Debata ndang boi dipatudos tu hagogoon dohot hasatiaon ni angka jolma manang panggomgomi manang angka debata na di tano on. Ndang adong surusuruan manang na marhuaso di liat portibi on na boi dipatudos tu Debata. Nampuna tangan songon Debata, manang nampuna soara na boi manghutur songon Ibana. Hasatiaon dohot hatigoran ni Debata tarida do i di harajaonNa, marhite angka surusuruan na manghobasi di Ibana dohot na mamujimuji goarNa jala na rade mangulahon angka na sinuru ni Debata di bagasan haunduhon.
Jotjot do jolma mangose hatana sandiri, jala godang do na so boi tiopon hata ni jolma, huhut ndang boi jolma manjaga angka hata na ro tu ibana. Alai asing do molo Debata, tung mansai gogo do hata ni Debata jala satia do Ibana di angka naung hinatahonNa. Tung talup do Debata mangulahon agia aha, ndang adong na so tarpatupa Debata, ndang hea Debata mangose angka uhum dohot hatigoranNa.
HATORANGAN
Di turpuk ni Jamita on dihatindangkon Parpsalmen (Raja David) do holong satia dohot padan ni Debata di ngoluna nang tu angka pinomparna. Na ingkon togu do pajongjongon ni Debata harajaonna saleleng ni lelengna (patudos 2 Samuel 7:8-16). Nunga sian na robi Debata pasahathon padanNa jala nunga mamolus angka na masa nang angka partingkian, alai ndang hea lupa Debata di padanNa.
Nang pe molo diida di pardalanan ni Bangso Israel songon na so dipatupa Debata do padanNa i. Boi do taida songon hadadabu ni Jerusalem jala di na so gabe panggomgomi be pinompar ni si David. Alai saluhutna i ndang gabe mansoadahon padan ni Debata tu angka tingki na naeng ro. Tongtong do satia Debata di angka padanNa jala di ujungna i dipatuduhon do i marhite hatutubu ni Sipalua na sian pinompar ni si David.
Ojahan ni haporseaonta di padan satia ni Debata, i ma Ibana do na marhuaso di sandok portibi on. Ibana do nampuna langit dohot tano on, jala Ibana do na mangarajai dohot mangaturhon saluhut pardalanan ni ngolu ni jolma. Habonaran, hasintongan, holong dohot hasatiaonNa, i ma songon dalan ni Debata mangaramoti asa unang lam sega portibi on naung adong di hagolapan dohot dosa. Marhite i ma togu do ditiop parpsalmen haporseaonna di hasatiaon ni padan ni Debata.
Pardalanan ni ngolu ni hakristenon sahat tu partingkian si saonari, songon sada hataridaan do i di pangaramotion ni padan ni Debata. Haluaon na dipatupa Debata marhite Jesus Kristus i ma pambahenan na so boi dihalupahon, disi do dipatuduhon Debata holong ni rohaNa tu jolma na di hasiangan on. Jadi ndang adong be sidalianta ndang porsea di hasatiaon ni Debata. Ala nunga patar dipatuduhon Debata holongNa na balga i jala ndang olo Debata mangose padanNa.
Na gabe sungkunsungkun di hita, dia ma siulahononta nuaeng? I ma porsea jala pasahathon sude panghirimonta tu holong dohot hasatiaon ni Debata.
Adong do pigapiga na boi taparsiajari sian turpuk ni Jamita on, i ma:
1. Hadirion ni Debata na bonar di angka dalanNa jala na basa di angka pambahenanNa (ayat 15). Dipalua Debata do jolma sian dosa hombar tu sangkap ni rohaNa. Jala Debata, partigor do, na manguhumi jolma na mardosa, na so olo paubahon rohana manadinghon dosa. Nang pe songon i parasi roha godang do Debata, ndang dihalomohon rohaNa jolma na mardosa i mago di bagasan hadosaonna jala hot diparuhuman. Dipataridahon Debata do denggan basaNa i marhite Jesus Kristus na pasingkophon hatigoran dohot holong ni roha ni Debata tu saluhut jolma.
2. Hatigoran dohot holong ni roha ni Debata mambahen jolma gabe martua, marlas ni roha jala marolopolop ala mangolu nasida di bagasan hatiuron na sian Debata (ayat 16). Hatigoran i mangajari jolma asa jaga di angka ngolu sidalananna jala asa togu di angka naung dihaporseai di ngoluna. Lapatanna, hatigoran i gabe ojahan do i di angka jolma asa tung ditanda dia do ulaon na hombar tu lomo ni roha ni Debata dohot na so hinalomohon ni Debata asa ulahononna.
Holong ni roha i mangajari jolma asa manat di angka pambahenanna. Lapatanna holong ni roha i gabe ojahan do i di jolma laho manghatindanghon manang patuduhon holong ni roha ni Debata naung jinalona, marhite angka ulaon na uli na denggan siganup ari (ayat 17). Ala nunga parjolo Debata patuduhon holong ni rohaNa, i do sitiruon ni jolma asa patuduhononna muse tu angka na di humaliangna.
3. Hatigoran dohot holong ni roha ni Debata mangalehon hagogoon dohot hamonangan tu angka jolma na porsea di Ibana. Hamonangan i dipatangkas marhite hata "manuarang tanduknami" (ayat 18) di hata Indonesia didok "tanduk kami meninggi," lapatanna songon na adong ro marlompit ganda semangat dohot hagogoon tu nasida. Semangat na mambahen gabe mulak margogo jala di bagasan pos ni roha laho mangadopi angka na masa di ngoluna marhite pangaramotion dohot pangurupion ni Debata na so tartaluhon ni agia aha manang ise pe.
Ala ni i jolma na maniop hatigoran dohot holong ni roha ni Debata ingkon margogo ma jala ndang mabiar be laho mangadopi angka na masa. Las ni roha arsak pe bolusonna do i mardonganhon Debata. Sai dipeop do di bagas ngoluna songon Hata ni Jesus na mandok: "DongananHu do hamu rasirasa ro ajal ni hasiangan on" (ida Mateus 28:20). I do songon padan hasatiaon ni Debata tu angka jolma na manghaporseai Ibana.
HAHONAAN
Marhite turpuk ni Jamita on, dipaingot do hita songon dia panindangion ni Parpsalmen taringot tu "Hatigoran dohot Asi ni Roha ni Debata." Dihatindanghon Parpsalmen do do paboa na so hasuhatan hatigoran dohot hasatiaon ni Debata ndang mardia imbar maradophon angka hagogoon dia pe na adong di portibi on. Ndang adong na boi mangimbari hamuliaon ni Debata.
Hata panindangion ni raja David di turpuk ni Jamita on gabe sada sipeopon ma i di rohanta laho manghatindanghon hatimbulon dohot hasangapon ni Debata na sun badia i. Dipaingot do hita asa tung biar mida Debata jala unduk ma hita tu Ibana. Holan sasada Ibana do nampuna hatigoran dohot hasatiaon na sun timbul di sandok liat portibi on dohot di harajaon banua ginjang. Sai dipargogoi Tuhanta ma hita asa mangolu di bagasan hatigoran dohot asi ni rohaNa. Amen. (ems)
Posting Komentar