JAMITA MINGGU 23 JULI 2023
MARHAPORSEAON JALA MAGODANG DI BAGASAN TUHAN
Mateus 13:31-35
Minggu 7 Dung Trinitatis
TURPUK
Dung i didok ma umpama na asing tu nasida: "Tudos do harajaon banua ginjang i tu batu ni siarum na binuat ni sada halak laho manaburhon tu porlakna. I do sada na ummetmet sian nasa ragam ni boni; alai dung tubu, gabe umbalga do i sian nasa ingkau rata, pola hira hau do, jala ro do angka pidong na martongatonga langit marasar tu rantingna." Dung i umpama na asing muse dihatahon tu natorop: "Tudos do harajaon banua ginjang i tu itak naung niasoman na binuat ni sahalak inaina laho pasaorhon tu itak tolu ampang, paima asom saluhutna." Saluhutna i dihatahon Jesus marhite sian umpama tu natorop; ndang na manghatai Ibana tu nasida anggo so marhite sian umpama, asa jumpang hinatahon ni panurirang i na mandok: "Huungkap pe pamanganHu manghatahon umpama, Hurungkari pe na buni sian mula ni portibi on."
PATUJOLO
Ondolan ni Evangelium Mateus i ma: "Jesus do Sipalua, Anak ni Debata na mangolu" (ida Mateus 16:16). Di Evangelium Mateus on ndang adong tangkas disurathon ise na manurathon, alai hombar tu angka pandapot ni angka uluan ni huria na parjolo na mangolu hirahira di taon 130 dung Kristus, dihaporseai do, si Mateus ma na manurathon buku on, sahalak sian sampulu dua sisean ni Jesus. Mateus i ma sahalak Lepi na di mulana i, sahalak sijalobeo do ibana (ida Mateus 9:9-10, 10:3, Lukas 5:27).
Di mulana i Buku Mateus on disurathon do tu halak Jahudi na porsea tu Jesus, i do alana di buku on dipatuduhon keterkaitan ni Jesus dohot Padan na Robi songon tarombo ni Jesus (ida Mateus 1:1-17). Jesus do Anak ni si Daud na dibagabagahon di Padan na Robi (Mateus 1:1, 9:27, 12:23, 15:22, 20:30-31, 21:9). Holan buku Mateus on do na mamangke istilah harajon banua ginjang, i ma songon istilah khas ni hajahudion.
HATORANGAN
1. Harajaon Banua Ginjang Tudos tu Batu ni Siarum (ayat 31-32).
Di bagasan turpuk ni Jamita on dipatorang Jesus do, harajaon banua ginjang i tudos do i songon batu siarum na dibuat sahalak lao manuburhon boni i di porlakna. Batu ni siarum molo di hata Indonesia didok ma i biji sesawi. Molo di halak Jahudi, batu ni siarum on boni na gumelleng ma i sian boni ni angka suansuanan. Alai nang pe metmet batu ni siarum i, molo disuan jala tubu, laos i do na umbalga sian angka suansuanan ingkau rata, hira hau na boi gabe parasaran ni angka pidong.
Baca juga: Epistel Minggu 23 Juli 2023 - Psalmen 86:1-11.Sian umpama na nidok ni Jesus i, boi ma antusanta asa unang leas rohanta tu angka na halak metmet. Asa sipata, molo metmet pe jolma i, alai molo mangolu do ibana di bagasan hasintongan ni Debata, ingkon umbalga jala sumurung do i sian nasa jolma na asing. Dos do i songon Jesus, na metmet do nian Ibana molo niida sian parekonomian hombar tu parnidaan ni jolma. Ala sian keluarga ni tukang do (tukang kayu) Jesus (Mateus 13:55-58). Molo niida sian status sosial mansai metmet do Jesus, ala ro sian huta Nasaret do Ibana. I ma songon huta na gelleng (ida Johannes 1:46) jala molo di pangantusion ni halak Jahudi huta ni angka na so mananda Debata ma i, ndang songon huta Jerusalem na balga jala na sangap i.
Alai ala na ro sian Debata do Jesus, gabe umbalga jala sumangap do Jesus sian Jerusalem. Suang songon i do tong Hata ni Tuhan i, mansai metmet do nian Hata ni Tuhan i molo diida sian angka jolma na pararathonsa. Alai di dia dibege jala dipeop Hata ni Tuhan i, gok do huasona laho paluahon jala pauliulihon ngolu ni jolma. Jadi na gabe hasurunganta di ngolunta on ndada sian hadirion ni hajolmaonta, alai ingkon tarida ma sian haoloonta manangihon jala mangulahon Hata ni Tuhan i.
2. Harajoan Banua Ginjang Tudos tu Itak Naung Niasoman (ayat 33).
Dipatudos Jesus muse Harajaon Banua Ginjang i songon itak naung niasoman. Molo di hata Indonesia didok ragi yang diambil dan diadukkan ke dalam tepung terigu tiga sukat sampai khamir. Di ayat on adong didok dua bahan baku, i ma ragi dan tepung terigu. Molo sian godangna, otik do ragi i marimbanghon tepung terigu, alai boi do ragi i mangasomi itak i sahat tolu ampang, jala asom ma saluhutna, binahen ni ragi na saotik i.
Molo talapati umpama na nidok ni Jesus i, boi ma antusanta molo di adopan ni Debata ndada kuantitas (godangna) na gabe tolak ukur alai kualitas do (denggan do manang ndang, berfungsi do dohot denggan manang ndang). Nang pe sian jumlah otik, alai molo dengan do kualitasna, i do na tama laho manggohi saluhutna. Kualitas na dimaksud secara teologis i ma haporseaon dohot parsaoran ni jolma i tu Debata. Lapatanna, tung metmet pe jolma i sian hadirion ni hajolmaon, alai molo mangolu do ibana di bagasan haporseaon dohot parsaoran na tama dohot Debata, angka jolma si songon i do na sahat tu hadengganan sian jolma na tardok sangap jala na mamora di haportibion.
Tontu diarahon do hita asa manangkasi dirinta be. Standar dia do na tapangke laho mangalapati ngolunta on? Standar ni Debata do manang standar ni jolma. Molo standar ni jolma, diida ma i sian angka na targoar sangap, mamora dohot angka na dapot hagabeon. Alai molo standar ni Debata do, diida ma i sian angka halak na metmet di haportibion alai asa tu hasurungan do ngoluna molo dihangoluhon Hata ni Debata. Molo so di bagasan Tuhan i ngolunta, angka na sangap di mulana i olo do gabe marujung tu angka haporsuhon. Alai molo di bagasan Tuhan i do hita, nang pe di mulana i metmet hadirionta, alai di ujungna ingkon di bagasan hasangapon do.
3. Pangajarion ni Jesus Marhitehite Umpama (ayat 34-35).
Di turpuk ni Jamita on saluhut na hinatahon ni Jesus dipasahat do i marhitehite umpama. Lapatanna, ndada situlluk mata ni horbo Jesus pasahathon pangajarionNa. Dipasahat Jesus pe songon i asa adong do dialog. Di sisi na asing dipangke Jesus pe umpama di pangajarionNa asa mura do ditangkup jala diingot angka na umbegesa. Dipasahat marhite umpama, asa tong do dohot angka na umbegesa i mamingkiri jala pahusorhusorhon umpama i di bagasan rohana. Ingkon lam tertarik do angka na umbegesa laho mangantusi.
Asing ni i, pangajarion marhite umpama mambahen gabe ndang pamurahu, pintor hatop boi diantusi. Umpama i boi do patuduhon paboa na mansai arga jala buni do pangantusion taringot tu Hata ni Debata. Ingkon diparade jolma do dirina, roha nang pingkiranna laho pahusorhusorhonsa asa tarantusi nasida. Umpama i dipangke Jesus asa songon na manutup angka celah sian pangunjunan ni sibolis marhitehite angka parjahat na di humaliang, na naeng mangalului hasalaan, huhut papeolhon pangantusion na sintong sian pangajarion i.
HAHONAAN
Hombar tu ondolan Jamitanta di Minggu sadari on, i ma "Marhaporseaon jala Magodang di Bagasan Tuhan," marhite turpuk on diarahon do hita asa unang mabiar manang tahuton laho manghatahon manang manghatindanghon hasintongan ni Hata ni Debata ala tarajumi hametmeton ni hadirionta di parngoluan molo diida sian hajolmaom. Gariada di hametmetonta i ma ingkon lam tapasolhot dirinta tu Debata, asa gabe halongangan hita di humaliangta.
Asing ni i, asa unang ma nian leas rohanta tu angka halak na metmet. Ingkon manat do hita, ai sipata olo do dipangke Debata angka halak na metmet sian hajolmaon laho patuduhon hagogoon dohot huasoNa. Tontu hametmeton ni ngolunta i ingkon taarahon do asa magodang di bagasan haporseaon tu Debata. Ai i do dalan asa idaonta angka na denggan tu joloan ni ari. Mamungka sadari on unang be hita umbege hata ni jolma ala ni hamoraonna, ala ni na marpangkat ibana. Alai tabege ma hata ni jolma ala ni hasintongan ni panghataion i, nang pe halak na metmet ibana. Amen. (ejs)
Posting Komentar