JAMITA MINGGU 30 JULI 2023
DEBATA NA MANDONGANI JALA NA MANGONDIHON
1 Musa 28:10-22
Minggu 8 Dung Trinitatis
TURPUK
Alai borhat do anggo si Jakob sian Beer-Seba laho tu Haran. Jadi tolhas ma ibana tu sada parbornginan, gabe marborngin ibana disi, ai nunga mate mata ni ari. Dung i dipambuat ma angka batu na disini bahen halang ni uluna, laos modom ibana disi. Dung i marnipi ma ibana, diida ma sada tangga, na pinagohon tu tano, tolhas ro di langit ia ujungna, jadi ida ma, sai marnaek mijur sian i angka surusuruan ni Debata. Jongjong di ginjangna anggo Jahowa, jala ninna do: "Ahu do Jahowa, Debata ni ompum si Abraham dohot Debata ni si Isak, ia tano pinodomanmon lehononHu ma tu ho dohot tu pinomparmu. Jala sobokhon orbuk ni tano on sogot torop ni pinomparmu, jala angka rarat ma hamu tu hasundutan dohot tu habinsaran dohot tu utara dohot tu dangsina, jala dapotan pasupasu sogot nasa marga na di tano on marhitehite ho do pinomparmi. Ida ma, sai dongananHu jala ramotanHu do ho manang tu dia pe ho mangalangka, jala togihononHu do ho mulak tu tano on; ai ndang tadinghononHu ho, nda jolo sahat Hubahen na Huparbaga i tu ho." Dung i tarsunggul ma si Jakob sian na modom i, jadi didok ma: "Inganan ni Jahowa do on hape, so pamotoanHu." Jadi mabiar ma ibana, ninna ma: "Na songkal situtu do inganan on, ndang tarbahen so on bagas ni Debata, jala baba pintu ni langit." Dung i hehe ma si Jakob sogot manogotna i, dibuat ma batu pinarhalanguluna i, jala dipajongjong bahen partinandaan, jala diusehon miak tu ginjangna. Dung i dibahen ma goar ni inganan i Bet-El (bagas ni Debata), Lus do goar ni huta i anggo na sai laon. Dung i marbagabaga ma si Jakob, ninna do: "Molo didongani jala diramoti Debata ahu di dalan na hudalani on, jala dilehon di ahu sagusagu sipanganon dohot ulos siporuloshononhon. Jala marsonangsonang ahu mulak ditogihon tu bagas ni damang, sai Jahowa ma Debatangku. Jala batu na hupajongjong on bahen partinandaan, i ma gabe bagas ni Debata, jala sude na nilehonMu tu ahu parsampuluonhu ma i tu Ho."
PATUJOLO
Ndang adong jolma dungkon ni Tuhan Jesus, na mangolu di bagasan na sun denggan, nang pe singkop di ibana hamoraon, hagabeon dohot hasangapon. Sude do adong hahurangan nang hasalaan ni jolma i. Jotjot do nasa jolma na mangulahon hasalaan gabe sai songon na dilelelele dihilala. Panghilalaan i gabe mambahen ganggu ni roha jala tubu ma di rohana biar, laos ala ni i marusaha ma asa paholang diri, asa unang dijujur angka hasalaanna.
Songon i ma na masa di si Jakob di turpuk ni Jamitanta di Minggu on. Disadari ibana do na sala ulaon na binahenna maradophon hahana si Esau, na manjalo pasupasu sihahaan ibana sian amana si Isak, tagan so mate dope amana i. Dung ampe pasupasu ni amana i tu si Jakob, tubu ma pangiburuon nang rimas di si Esau laos tubu ma tahi ni rohana naeng mamunu anggina i.
Tarboto do tahi ni si Esau i tu inana si Rebekka, naeng bunuon ni si Esau ma anggina si Jakob. Pintor dipaboa si Rebekka ma tu si Jakob tahi ni hahana i, jala didok asa lintun ma si Jakob tu huta ni ibotona, tulang ni si Jakob, i ma si Laban tu huta Padang-Aram (ida 1 Musa 28:2). Nang pe di bagasan biar ni roha si Jakob borhat jala diboto amana nang inana do huta parlintunanna, alai ndang dipaboa natuatuana i tu si Esau.
Di pardalanan mandapothon huta ni tulangna i si Jakob, nang pe dipaborhat natorasna, alai tong do di bagasan roha biar, marhagaleon, jala tontu ndang marhasonangan be di bagas rohana manadinghon hutana, manadinghon natorasna, laho mandapothon huta ni tulangna, na so hea dope didalani ibana. Sian pardalanan ni si Jakob on idaonta ma pandonganion nang pangondianon ni Debata di ibana. I do na naeng idaonta di turpuk ni Jamita on, paboa ndang na pasombuon ni Debata si Jakob di bagasan roha biar, hagogotan jala godoran. Dipatuduhon Debata do diriNa tu si Jakob, paboa Debata do na mandongani jala na mangondihon ibana.
HATORANGAN
Turpuk ni Jamita on pataridahon na manongtong do Debata marningot angka bangso nang huriaNa. Mamungka sian panompaon, nunga dibahen Debata angka padan sahat ro di haroro ni Tuhan Jesus tu portibi on, tongtong do dipatuduhon Debata holongNa. Saluhutna i paboahon na manongtong do Debata marningot angka na porsea di Ibana. Sian Padan na Robi tu Padan na Imbaru sahat ro di partingkian sinuaeng on pe, tongtong do Debata marningot angka huriaNa. Sian na so pamotoan dohot panagaman ni angka na porsea i do dibahen Debata dalan mangaramoti dohot mangondihon huriaNa.
I do na masa di si Jakob dung borhat ibana sian Beer-Seba laho tu Haran, dalanna lintun sian hutana (ayat 10). Marborngin ma ibana disi, ala nunga mate mata ni ari (ayat 11). Di na so pamotoanna, uju na tarpodom ibana, di na loja ibana, di bagasan roha biar, godoran, marningot angka na masa di ngoluna, marnipi ma ibana. Di nipina i diida ma sada tangga na timbo, sian tano tolhas ro di langit ujungna. Diida ibana muse angka surusuruan ni Debata marnaek mijur (ayat 12). Boi do dilapati tangga na niidana i songon, paboa na adong do ungkap dalan tu surgo sian portibi on. Pangantusion na asing muse pataridahon songon na nidok ni Hata ni Debata na tarsurat di Johannes 14:6, didok Tuhan Jesus: "Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu." Tangga mandapothon Ama i, i ma marhite Tuhanta Jesus. Angka surusuruan na marnaek mijur, manggombarhon na mangula do angka surusuruan ni Debata manghobasi di angka anak ni Debata di portibi on.
Di bagasan nipi ni si Jakob diida ibana jongjong Jahowa jala dipatandahon diriNa tu si Jakob (ayat 13). Parnidaan ni si Jakob di nipina i, paboa na ro i, i ma Debata, Debata ni ompuna si Abraham, Debata ni amana si Isak, laos huhut didok tu ibana tong do Debata ni si Jakob. Sian turpuk on dipatandahon Debata do hadirionNa, paboa na marhuaso situtu do Debata sian na robi sahat tu partingkian si nuaeng on, sahat ro di saleleng ni lelengna pe. Dipatuduhon Debata do diriNa tu si Jakob, asa pos rohana, asa dipatogu rohana, asa unang be di bagasan ganggu ni roha.
Uju dipatandahon Debata diriNa tu si Jakob, tarida ma paboa ditanda Debata do ibana, pomparan ni si Abraham dohot si Isak, pomparan naung dibagabagahon Debata asa pasupasuonNa sian mulana i. Gabe sada tudutudu ma i, paboa sian mulana jala di angka tingki na mangihut ndang tung dihalupahon Debata angka naung jinou jala pinillitNa sahat do nang tu angka pinomparna. Ndada holan na patandahon diri Debata disi, alai marhite i asa tung pos do roha ni si Jakob. Di bagasan nipi ni si Jakob pe dipasahat Debata do nang pasupasu, marhite angka pinompar, tano na pinodomanna i pe pasahaton ni Debata do tu sude pinompar ni si Jakob, nang nasa marga na di portibi on pe gabe tarpasupasu do marhitehite ibana nang pinomparna (ayat 13-14). Dipasahat Debata do padanNa, i ma pangaramotion dohot pangondianon na sian Debata, laos i do na gabe ojahan ni Jamita di hita di Minggu sadari on. Dipasahat Debata do muse padanNa tu si Jakob, paboa ndang na pasombuon ni Debata ibana songon i nang pomparanna, nda jolo pasahaton ni Debata sude angka bagabaga nang padan na pinasahat ni Debata tu si Jakob (ayat 15).
Dung sidung dipasahat Debata pasupasu nang bagabagaNa di bagasan nipi ni si Jakob, tarsunggul ma ibana. Dung tarsunggul ibana, dihilala ibana songon sude angka ganggu ni rohana na parjolo i gabe mago so pamotoan. Habiaranna i ndang be tu parsoalan na adong di ngoluna na parjolo, alai nunga be muba, gabe biar di hinasongkal ni inganan na pinodomanna i nama, ai inganan ni Jahowa do i. Didok ibana inganan i gabe songon bagas ni Debata jala baba pintu ni langit, ala i dope tingki na parjolo sahali di si Jakob pajumpang dohot Debata ni ompuna dohot Debata ni amana. Dung tarsunggul si Jakob pintor hehe ma ibana manogotna i patupahon batu partinandaan, laos dimiaki batu i, jala dibahen ma goar ni inganan i Bet-El lapatanna bagas ni Debata. Ndang be di bagasan ganggu ni roha si Jakob laho bongot tu huta ni tulangna, dung dijalo ibana pasupasu, padan dohot bagabaga na sian Debata (ayat 16-19).
Sasintongna humurang dope pangantusion ni si Jakob taringot tu pasupasu na sian Debata, andorang so dijalo ibana pasupasu ni Tuhan i. Sai hira holan mamingkiri hamoraon, hagabeon dohot hasangapon na di portibi on rupani pasupasu i, songon pasupasu naung jinalona sian amana, si Isak, hape sai tong ndang marna jumpang dope hasonangan, panghilalaan na lambok di roha nang tondina. Dung pe dijalo ibana pasupasu na sian Debata, padan dohot bagabaga ni Debata, gabe adong ma hatonangan di pingkiran nang tondina. Ala memang songon i do sasintongna, pasupasu na sian Debata i ndada holan di hinaringkot ni ngolu haportibion alai dohot do nang hinaringkot di partondion.
Dung adong hatonangan ni roha di si Jakob gabe tubu ma bagabaga nang sangkap na uli di ibana, jumadihon Debata ni si Abrahan dohot si Isak gabe Debatana. Dipelehon ibana ma dirina bahen panghobasion ni Debata di portibi on. Jala dibahen ibana ma sada bagabaga songon tanda mauliate ni rohana tu Debata marhite pelean saparsampulu sian nasa na nilehon ni Debata tu ibana bahen hasangapon di Debata. I ma songon paboa na dihaporseai rohana do Debata na mamasumasu nasa ngoluna (ayat 20-22).
HAHONAAN
Marhite turpuk ni Jamita di Minggunta sadari on dohot ojahan "Debata na Mandongani jala na Mangondihon" marsiajar do hita asa tongtong taingot di ngolunta.
1. Sai adong do dalan ni Debata mandongani jala mangondihon huriaNa.
Ganup jolma adong do hahurangan, nang hasalaanna, jala tontu do ganup na mangulahon hasalaan i gabe mabiar, ganggu jala diusahahon do asa lintun (melarikan diri) sian hasalaanna. Alai taingot ma songon pambahenan ni Debata na tu si Jakob, di turpuk ni Jamita on, di bagasan hagaleon dohot ganggu ni roha, ro do Debata mangalehon gogo tu ibana, di na so pamotoan nang panagamanna. Nang hita pe ingkon adong do pos ni roha, paboa adong do Debata na mandongani jala mangondihon hita di sude angka na hinabiaran ni rohanta. Tontu olo do ndang taantusi manang sadihari ro tingkina, manang di dia ingananna urupan ni Debata hita. Alai pos ma rohanta adong do Amanta, Tuhan Jesus inganan pangalualuanta di ragam ni parungkilon na masa di ngolunta.
2. Tarjou do hita asa gabe siihuthon Jesus na mamorsan silang.
Ragam do parungkilan nang sitaonon na marganti sorin manahopi ngolunta. Songon halak Kristen na pinillit jala jinou ni Tuhanta hita, ingkon antus do hita aha do lapatanna mangihuthon Jesus. Ingkon taihuthon jala tahangoluhon do ngolu na di bagasan holong. Manghaholongi Debata, manghaholongi dongan jolma dohot manghaholongi musu. Na mangihut, nasa siihuthon Jesus ingkon do mamorsan silang, lapatanna ingkon rade do hita mangadopi nasa parsoalan. Molo tung pe mansai dokdok angka sitaonon i, alai mardonganhon Jesus sai na boi do adopan jala bolusonta i saluhutna. Songon si Jakob di turpuk ni Jamita on, nang pe batu dibahen halang ni uluna (bantal) alai lambok do dihilala ibana molo dung jumpang dohot Tuhan i (bandingkan KJ No. 401 "Makin Dekat Tuhan" ayat 2, "Berbantal batu pun 'ku mau rebah, bagai musafir yang lunglai, lelah, asal di mimpiku dekat kepadaMu; makin dekat, Tuhan, kepadaMu). Na gabe sungkunsungkun di hita di partingkian sinuaeng on, boha do hita manghangoluhon panjouon ni Tuhan i di hita? Manang na gabe marbalik do hita sian Tuhan i? Gabe tapangke halang ni ulu na lambok alai sai hira na mamodomi batu tahilala. Taingot ma amang/inang, di bagasan Jesus adong do hagogoon, pangapulon, hahisaron, las ni roha dohot angka na asing. Hot ma hita manghaporseai Tuhanta Jesus Kristus.
3. Manongtong do Debata mangaramoti jala mangondihon huriaNa.
Pasupasu, padan nang bagabaga ni Debata tontu masa do di ngolu ni angka na manghaporseai Ibana. Songon si Jakob pomparan ni si Abraham dohot si Isak, nang hita pe, hot do pasupasu, padan nang bagabaga ni Debata. Nian di bagasan hasalaan do si Jakob na mambuat pasupasu na tu hahana hian sian amana. Sasintongna ingkon tu hahana si Esau do sahat pasupasu i. Alai ringkot do botoonta, di situasi na songon i pe, dipaloas Debata do i masa, ala ingkon sian si Jakob do angka pomparan na tarpasupasu gabe huriaNa. Dibahen i ndang paloason ni Debata na tarpillit jala na tarjou i mangadopi parungkilon sasadasa. Manongtong do Debata mandongani jala mangondihon huriaNa. Tabahen ma Debata di bagasan Tuhan Jesus gabe Tuhan di ngolunta, asa sahat hita tu Ama i jala dapotan tumpal hangoluan hita. Debata do na mandongani jala na mangondihon jolma na manghaposi Ibana, asa adong pos ni roha, hatoguan di ngoluna. Songon halak na porsea hita, jala naung ditobus Jesus sian nasa dosa, gabe sada hasurungan do i di hita paboa sai manongtong do Debata mandongani jala mangondihon hita. Tajaga jala tajamothon ma haluaon na pinasahatNa i. Jala hot ma pos ni roha di hita, sai diramoti Debata do hita, dipasupasu, didongani jala diondihon. Unang be adong na so porsea di pandonganion nang pasupasu ni Debata.
4. Ngolu na lam dumenggan diadopan ni Debata.
Sai adong do jolma na olo lupa di pambahenan ni Debata di ngoluna, uju na malua ibana sian ragam ni parungkilon, songon mara, parsahiton, habangkruton, turun jabatan dohot angka na asing. Jotjotan dope jolma i ro tu Debata uju mangadopi sitaonon, alai ia dung malua sian sitaonon i laos lupa do tu Debata. Marhite turpuk ni Jamita on, dipaingot do hita, asa molo dung tajalo pasupasu na sian Debata marhite pandonganion nang pangondianon di nasa ngolu nang ulaonta, ingkon mangolu ma hita di bagasan ngolu na lam dumenggan di adopan ni Debata. Songon na marningot hita di sude pambaenanNa na tu hita. Godang nuaeng on songon dalan di hita patupahon na dumenggan di adopan ni Tuhanta. Boi do i marhite na mamelehon diri mangulahon angka ulaon na ringkot di tongatonga ni keluarga, parsahutaon, punguan marga, tarlumobi ma ulaon di tongatonga ni huria songon gabe parhalado, ruas na ringgas marminggu, ruas na aktif mangihuthon ulaon ni huria, mangalehon gogo nang roha di pembangunan ni huria, pasahathon pelean sian parbue ni naniula, paboa na porsea hita Debata do na mangaramoti jala na mamasumasu nasa ulaonta. Songon si Jakob di turpuk ni Jamita on, dung jumpang ibana dohot Tuhan i marhite parnipion, lam tarida do perubahan di tongatonga ni ngoluna. Dihangoluhon ibana do ngolu na lam dumenggan di adopan ni Debata. Ngolu na lam dumenggan i, tarida ma i sian ulaon na diula di ngolu siapari. Tarimangi ma amang/inang, ulaon na denggan na taulahon di ngolunta on, asa idaon tama do di adopan ni Debata, manang ala adong do maksud tersembunyi di na taula i? Alusna, tarida do i di ngolu na lam dumenggan di adopan ni Debata, lumobi ma molo sian ias ni roha do diulahon. Amen. (ps)
1 komentar