Jamita Minggu 10 Maret 2024 Minggu Letare tarsurat di Evangelium Johannes 3 ayat 22-30 na manurathon taringot panghatindanghonon ni si Johannes Pandidi di Tuhan Jesus. Uju i mandidi si Johannes di Enon, mardonokhon huta Salem. Dihatindangkon angka sisean ni si Johannes, Jesus i na nididi ni si Johannes gabe I do nuaeng mandidihon angka halak, jala gabe torop halak mandapothon Ibana. Arop roha ni angka sisean i, asa dipature ma nian parsoalan i. Alai dihatindangkon si Johannes do, paboa dirina sandiri ndang na Kristus i, alai na sinuru i do Ibana gabe patujolo ni Kristus. Jala las do roha ni si Johannes molo lam ganda Kristus i, nang pe lam moru ibana. Tapabagas ma pangantusionta taringot tu turpuk ni Jamita on. Hombar tu Almanak ni hurianta dibahen ma ojahanna "Patut Nian Jesus Lam Ganda, Lam Moru ma Anggo Ahu." Tapamanat ma hatoranganna.
Pendahuluan
Evangelium Johannes pabotohon ulaon panghobasion ni Jesus di luat Judea dohot Jerusalem. Tujuan ni Evangelium Johannes on digurithon di Johannes 20:31 "Alai umbahen na sinurat angka on, asa porsea hamu, Jesus do Kristus, Anak ni Debata; jala asa hamu angka na porsea i dapotan hangoluan marhitehite GoarNa."
Luat Judea i ma sada inganan na marpusathon di Jerusalem. Maol do Jesus padarathon Barita na Uli di luat Jerusalem (ai ditulak do Jesus, ida di Johannes 2:18, 23-25). Alai nang pe ditulak, diuduti Jesus do pardalananNa mamaritahon Barita na Uli tu luat Judea, huta na metmet i. Nang pe ditulak Barita na Uli na binoan ni Jesus, ndang mansadi Ibana mangula jala mamaritahon Barita na Uli. Togu do Jesus mangadopi angka na masa uju i.
Hinorhon ni Barita na Uli na pinasahat ni Jesus i, gabe torop do halak na porsea. Alai di angka na porsea i, masa do angka pangantusion na marasing taringot tu Barita na Uli. Alai nang pe songon i, molo tung pe adong pangantusion na marasing, hal na biasa do i sasintongna. Songon i ma nang pangantusion na marasing di angka halak na mangihuthon Jesus nang si Johannes pandidi. I do umbahen na adong partontangan di angka halak na mangihuthon jala nang di halak na diihuthon. Tapaihutihut ma hatorangan ni turpuk ni Jamita on.
Pembahasan
Tutu situtu do Barita na Uli na pinasahat ni Jesus, nang pe godang na so porsea jala na so manjangkon haroroNa i. Na rumingkot botoonta, molo ndang dijangkon Jesus di ngoluna, ndada Jesus na so jinangkonna disi, alai Debata na marsuru Anak i do. Dung sahat Jesus rap angka siseanna di tano Judea, Marbarita na Uli ma nasida huhut patupahon angka pandidion tu angka na ro pasahathon dirina ganup asa dididi. Sasintongna ndada Jesus na patupahon manang na mangulahon pandidion i, alai angka siseanNa do (ida Johannes 4:2). Alai na gabe ulaon ni Jesus ma pandidion i. Jala i do na gabe impola ni Jamita ni si Johannes pandidi, di na didok "Soara ni na manjoujou di halongonan: Pature hamu ma dalan di Tuhan i; pahornop hamu ma sidalananna i" (ida Markus 1:3). Pandohan on pabotohon ndada gabe ginjang ni roha ulaon dohot panghobasion ni si Johannes, tung haserepon do. Jala dihatindanghon ibana sandiri do di Jamitana mandok "Na ro ma sian pudingku na gumogo sian ahu; na hurang tama do ahu paunduk ahu mangkarhari tali ni sipatuNa" (ida Markus 1:7).
Saluhut na nidokna i, patubuhon pos ni roha, jala tau tiruan na denggan do. Patut ma hape marsitaonon ibana, pola sahat tu bagasan hurungan binahen ni angka halak na gogo, jala sae holan na martontang i do angka sisean ni si Johannes pandidi maralohon halak Jahudi ala ni parburion i (ayat 25). Angka na ro mandapothon si Johannes pandidi i mandok: "Gurunami halak I, na ro tu jolom, di ipar ni aek Jordan, na hinatindangkonmi, i do mandidihon nuaeng, gabe saluhut halak ro mandapothon Ibana (ayat 26). Ndang nanggo sada sian nasida na mandok goar ni Jesus, alai didoknasida do Jesus i: "halak". Sai hira na laho patubuhon parbolatan do ganup na ro mandapothon si Johannes pandidi i. Naeng nian di roha ni nasida, asa hasogohonon ni si Johannes ma Jesus.
Hape balik do alus ni si Johannes marlohon na nidoknasida i. Ndang dapot songon na pinangido ni roha ni nasida i. Balik do alus ni si Johannes jala ndang hombar tu panghirimon ni nasida pandohan ni si Johannes na mandok di hatana: "Ndang tarbuat jolma manang aha, anggo so dilehon tu ibana sian banua ginjang" (ayat 27). Mansai togu do hajolmaon dohot haporseaon ni si Johannes maradophon Jesus. Ndang marhagangguon ibana laho mandok di dirina: "Ndada ahu Kristus i; na sinuru do ahu patujoloNa" (ayat 28).
Dihatindangkon si Johannes do hadirion dohot panghaholongina di Jesus, jala ndang mabiar manang tahutan ibana manghatindangkon hadirion ni Jesus di jolo ni na ro mandapothon ibana. Ndada songon angka na ro laho mamolamola i haporseaon ni si Johannes, ai tung apala elat do, jala sai dirimpu nasida do si Johannes Mesias i. Sai dipapujipuji nasida do si Johannes jala sai dirimpunasida do si Johannes mesias i, alai nang pe songon i ndang na gabe ganggu ibana di panghatindanghononna di Jesus. Didok si Johannes, ia ibana holan sitostas dalan ni sipalua i do. Asa i do umbahen na adong tudosan: Pangoli i ma: Tuhan Jesus, jala oroan na nidokna i ma: hita nang angka pangisi ni Huria-Na (ayat 29). Sian pandohan on, las ni roha nama nian bahenonta laho manjangkon Jesus i, ndada ungutungut. Sandok sian panghatindanghonon na adong di Evangelium Johannes on, pabotohon: Ia Jesus i patut ma lam ganda; lam moru ma anggo ahu (ayat 30).
Haporseaon si songon i ma nian na mansai ringkot gabe ojahan di ngolunta jala ingkon tasuanhon do i di bagasan rohanta be. Lumobi ma di hita parhalado ni Tuhan i, unang nian songon na patimbo Kristus i hita alai di bagasan dirinta pe sai tapatimbo do dirinta sandiri. Molo na hibul do rohanta pasangaphon Tuhan i jala ndang pasangap diri sandiri, gabe malua ma hita sian roha late maradophon angka donganta, lumobi ma maradophon angka dongan na umdenggan sian hita.
Kesimpulan dan Refleksi
Sian hatorangan ni turpuk ni Jamita sadari on, na ringkot sipahusorhusoronta i ma:
1. Tahaporseai ma Hata ni Debata di tongatonha ni ngolunta, asa mangolu jala marlas ni roha hita na ro tu adopanNa. Unang songon angka halak na asing na manjua Hata ni Debata. Molo dijua Hata ni Debata di ngoluna, na manjua Tuhan i do i.
2. Unang be sai tahasomalhon marroha hosom, teal, elat dohot late. Lumobi ma di hita angka naung hot marhaporseaon di Jesus Tuhanta. Alai ingkon serep do rohanta, songon roha ni si Johannes Pandidi na so mambuat sangap di dirina, alai di roha nang ngoluna holan pasangaphon Tuhan i do.
3. Dihirim do sian hita angka na porsea asa diulahon ma ganup nasa na tolap ni gogo nang pambahenanta laho mamuji jala pasangap goar ni Tuhanta. Jala unang ma nian adong di hita na mandok Jesus na gabe Tuhan nang sipalua di hita, alai mabiar jala humordit hita laho manghatindanghon goar ni Tuhan i di tongatonga ni ngolunta. Tahajongjonghonma hatigoran nang hasintongan ni hataNa di tongatonga ni ngolunta.
4. Sahat ma taula nasa tohonanta. Tatiru ma songon si Johannes pandiri na sahat do diula tohonanna sahat di ujung ni ngoluna. Togu do diula ibana tohonanna i ndang muba ibana di tohonan na pinasahat ni Debata tu ibana, ndang olo ibana madabu gabe mambuat sangap di diri, alai dirajumi ibana do holan Tuhan i do sipasangaponna marhitehite panghobasionna. Nang pe sai dipapujipuji angka siseanna ibana. Alai ndang olo ibana mambuat sangap di diri, nang pe boi do sasintongna. Nang di hita pe ingkon sahat ma taula tohonanta, unang gabe muba manang gabe manimbil hita sian tohonanta ala ni angka tantangan dohot angka na asing. Jala taingot ma, molo sahat taula tohonanta, na pasangap Tuhan i ma hita disi. Songon ojahan ni Jamitanta sadari on, mandok "Patut nian Jesus Lam Ganda, Lam Moru ma Anggo Ahu." Anggiat ma marhite ngolu nang panghobasionta lam marsangap goar ni Tuhanta. Amen.
Posting Komentar