Jamita Minggu 25 Februari 2024 Minggu Reminiscere tarsurat di buku Rom 4 ayat 18-25 na manurathon paboa dirajumi Debata do haporseaon i gabe hatigoran. Manang ise na porsea di Debata sai na patupaon ni Debata do angka bagabaga naung pinasahatNa. Taringot tu haporseaon na togu dibahen Apostel Paulus ma si Abraham gabe sada partudosan. Didok, nang pe so adong dalanna, manang ndang tuk sian pingkiran ni hajolmaon na boi mambahen ibana porsea di na didok Debata na ingkon torop do pinomparna, hape ibana nunga matua songon i nang si Sarah, alai nang pe songon i ndang olo moru haporseaon ni si Abraham. Tongtong do porsea ibana di bagabaga naung pinasahat ni Tuhan i. Gabe dirajumi Debata ma haporseaonna i gabe hatigoran. Jala sahat do bagabaga ni Debata na tu ibana. Songon i do nang hita, asa togu ma nian hita marhaporseaon. Ai dirajumi Debata do haporseaon i gabe hatigoran. Hombar tu Almanak ni hurianta dibahen ma ojahanna "Dirajum Debata do Haporseaon i Gabe Hatigoran." Tapamanat ma hatoranganna.
Pendahuluan
Goar ni Minggunta sadari on i ma Minggu Reminiscere. Reminiscere lapatanna, "Sai ingot ma, ale Jahowa, angka denggan ni basaM dohot asi ni rohaM ... " (ida Psalmen 25:6). Ojahan ni Jamita Minggu 25 Februari 2024 na naeng sipahusorhusoronta i ma "Dirajum Debata do Haporseaon i Gabe Hatigoran." Mansai ringkot do tapahusorhusor jamita on, ai ganup na porsea dirajumi Debata do haporseaonna i gabe hatigoran. Si Abraham dirajumi Debata do gabe ompu ni halak na porsea, ala ni togu ni haporseaonna tu Debata nang pe mangadopi hamaolon ibana jala songon na so adong be dalan di angka na hinirim ni rohana di pardalanan ni ngolu na borat jala gok partontangan na niadopanna. Dipatorang Apostel Paulus do songon dia pardalanan ni haporseaon ni si Abraham sahat tu na dirajum Debata haporseaonna i gabe hatigoran. Na gabe sungkunsungkun di hita, songon dia do asa dirajumi Debata haporseaonta i gabe hatigoran? Sian turpuk ni jamita on dilehon do pigapiga parsiajaran asa boi dirajumi Debata haporseaonta i gabe hatigoran.
Pembahasan
Tongtong Manghirim tu Debata (ayat 18a)
Di ayat 18a didok apostel Paulus, "Maralohon nasa panghirimon do haporseaonna na manghirim i." Sian ayat on, naeng pabotoon ni Apostel Paulus ia si Abraham ndang adong sipangasahononna. Ndang adong na boi sipangasahonon ni si Abraham asa gabe tigor ibana di adopan ni Debata, jala ndang adong dalanna asa manghirim ibana di angka hagaleon nang hajolmaonna. Alai hinorhon ni haporseaonna i gabe togu do panghirimonna tu Debata jala disalpuhon nasa haporsuhon na niadopanna. Manghirim do si Abraham di Debata nang pe tung songon na maol na niadopanna jala songon na so adong dalanna manghirim ibana. Haporseaon na togu tu Debata boi do manalpuhon jala patolhashon halak na porsea i sian angka na masa na so tolapna jala sian angka na so tarpingkiran ni jolma i, ai pargogo jala na marhuaso do Debata, tung so hasuhatan jala boi manaluhon nasa na di roha nang dipingkiran ni jolma na tarbatas.
Tongtong Porsea di Debata (ayat 18b)
Aha do na dihaporseai si Abraham? Di ayat 18b didok, " ... asa gabe ama ni torop bangso ibana, hombar tu hata i: "Songon i ma sogot pomparanmu." Hinorhon ni haporseaon ni si Abraham na togu do umbahen targoar ibana ama ni torop bangso. Haporseaon ni si Abraham ndada holan asa mambuat di diri ibana manang asa dapotan, ai di na porsea i ibana ingkon pasahatonna do anakna na hinaholonganna i, i ma si Isak. Alai nang pe songon i, tongtong do ibana porsea di Debata.
Togu Marhaporseaon nang pe Gale Pamatangta (ayat 19)
Di ayat 18 didok si Abraham sai tongtong do manghirim, di ayat 19 dipatangkas muse tongtong ibana manghirim nang pe sasintongna sian pingkiran ni hajolmaon ndang tagamon be patut ibana marpanghirimon. Didok do "Ndang na olo gale haporseaonna i paidaida pamatangna na hira so marngolu be ai nunga saratus taon ne umurna, nang paidaida si sara naung saep ladang i." Boi do taida turiturianna di 1 Musa 17:16-22. Dibagabagahon Debata do na ingkon lehonon ni Debata do anak tu si Abraham sian si sara (ida 1 Musa 17:17-18) mengkel do si Abraham mambege hata ni Debata na tu ibana, huhut didok di bagasan rohana "Tung tubuan anak ma jolma si saratus taon jala manubuhon ma tagamon si Sarah naung marumur sia pulu taon? (ida 1 Musa 17:15-17). Alai bagabaga ni Debata dipasahat di ayat 19 dohot ayat 21, dipahot Debata do padanNa tu si Abraham na ingkon tubuan anak si Sarah, i ma si Isak. Jotjot do masa songon i di ngolu ni halak Kristen. Ndang porsea di hata ni Debata ia so jolo masa manang patar diida di jolona.
Tongtong Marhaporseaon na Togu, Unang Ganggu di Bagabaga ni Debata (ayat 20)
Haporseaon i do na margogoihon hita asa margogo mangadopi angka hamaolon. Halak na so olo ganggu haporseaonna nang pe mangadopi angka hamaolon, jaloonna do huaso hagogoon na sian Debata jala lam margogo do ibana pasangaphon Debata. I do na taida sian hadirion ni si Abaraham, didok "Ndang olo ganggu rohana jala ndang ditadinghon haporseaonna di bagabaga ni Debata, lam tu toguna do haporseaonna jala diparsangapi ibana do Debata." Ai di bagasan hagaleonta i do dilehon hagogoon, songon na masa di Apostel Paulus di na sahat tu tolu hali ibana mangido tu Tuhan i asa malum nian sian sahitna. Alai dialusi Tuhan i do ibana mandok, "Tuk ma asi ni rohangku di ho; ai di bagasan hagaleon do sun timbul hagogoon" (ida 2 Korint 12:9). Alus ni Apostel Paulus pe tong do pataridahon haporseaon na togu, ai didok ibana do "Dibahen i sonang do huhilala di bagasan angka hagaleonhu, asa songgop tu ahu hagogoon ni Kristus," ndang gabe ganggu Apostel Paulus di pandonganion ni Debata uju jumpang hamaolon, alai lam dihaporseai ibana do pandonganion ni Debata jala lam margogo ma ibana pasangaphon Debata.
Marpos ni Roha Paboa Margogo do Debata Patupahon na PinarbagaNa (ayat 21-25)
Di ayat 21 didok "Ai pos situtu do rohana; tuk do gogo ni Debata patupahon na pinarbagabagaNa i." Hata pos ni roha marlapatan berkeyakinan penuh, teguh. Dipasangap si Abraham Debata marhite haporseaon na gok, na togu, paboa sai na tuk do Debata patupahon angka bagabagaNa. Dipasangap si Abraham Debata ala porsea ibana, na marhuaso do Debata patupahonsa. Marhite turpuk on naeng pasahaton ni Apostel Paulus taringot tu hasadaan ni haporseaon dohot na pasangaphon Debata nang huasoNa. Basabasa ni Tuhan i do haporseaon i, na margogoihon angka na porsea jala na pinillit ni Debata asa mamuji Debata jala lam margogo marhaporseaon di bagasan huaso ni Debata. Haporseaon tu Debata nampuna huaso dohot hagogoon, i ma haporseaon na togu jala hibul pasahathon diri tu sangkap dohot lomo ni roha ni Debata. Ala ni i do umbahen na dirajumi Debata haporseaon ni si Abraham gabe hatigoran (ida Rom 4:22). Hita pe boi do gabe parsidohot manghamonanghon haporsean songon si Abraham asal ma olo hita hibul porsea tu Debata, ndada gabe manghaposi manang porsea tu jolma, lumobi ma tu dirinta sandiri, ala ndang manongtong margogo jala marhuaso jolma i.
Kesimpulan dan Refleksi
Songon dia do hita mangadopi angka hamaolon na masa di ngolunta? Jotjot do tubu sungkunsungkun mandok: "Boasa tung paloason ni Debata angka hamaolon on, hape sai porsea jala sai martangiangi do ahu tu Debata?" Olo do gabe gale haporseaonta jala mandao hita sian Debata. Ai maol do masuk tu roha ni halak na deba na mangadopi hamaolon, molo didok pe, rade do Debata mangurupi jala paluahon sian hamaolon i, lumobi ma molo didok asa pasangap Debata. Molo dipatudos taringot tu haporseaon, tung dao dope hita maradophon si Abraham. Haporseaon ni si Abraham ndada holan asa manjalo manang asa dapotan ibana. Haporseaon na togu ndada holan asa mangido tu Tuhan i, ndang gabe marguru tu lomo ni roha ni jolma, alai molo togu haporseaonta ingkon olo do hita pasahat nasa na adong di hita laho pasangaphon Tuhan i. Molo didok haporseaon na hibul, na olo pasahathon diri tu Debata, tagamon do rugi hita disi? Alusna, daong. Ai ndang ringkot i, na adong di hita i sasintongna di Debata, ai tarpatupa Tuhan i do na so tarpingkiran ni angka jolma, lapatanna disi, haporseaon i do na niida ni Tuhanta, molo lam togu haporseaonta, tontu nasa na adong di hita sai na olo do hita pasahathon i tu Debata molo sugari dipangido Debata i sian hita. I do dalanta laho pasangaphon Tuhan i.
Ringkot botoonta, songon siihuthon Jesus hita, sai adong do na masa di ngolunta on sian na so panagamanta jala adong muse do na ingkon si tuhukonta, ingkon tasoadahon do dirinta jala ingkon porsanonta do silang i (ida Mateus 16:24). Tontu borat do i molo nipingkirpingkiran, alai ndang pola mabiar hita disi manang gabe mandao hita sian Tuhan i, adong do Tuhanta Jesus Kristus na rade mandongani, margogoihon huhut paluahon hita sian angka na borat nang hamaolon na tabolus. Tarajumi ma di bagasan dirinta be, tasulingkit ma haporseaonta atik naung marhamonangan do haporseaonta i rap dohot Tuhan i. Ala ni i tongtong ma hita mangulahon nasa haporseaonta i di tongatonga ni ngolunta siapari jala togu ma hita marhaporseaon di adopan ni Tuhan i, asa nasa na niula ni haporseaonta i dirajumi Debata gabe hatigoran di hita. Amen.
Posting Komentar