Jamita Minggu 17 Maret 2024 Minggu Judika tarsurat di Jeremia 31 ayat 35-37 yang menuliskan tentang janji Tuhan kepada umat Israel bahwa kasih dan ketetapan ketetapan Tuhan tidak akan berubah terhadap bangsa-Nya. Tuhan berfirman bahwa keturunan Israel tidak akan berhenti menjadi bangsa di hadapan Tuhan. Sekalipun mereka telah berbalik dari Tuhan, namun Tuhan tidak akan menolak segala keturunan Israel. Mari kita memperdalam pemahaman kita terhadap nas khotbah ini. Sesuai dengan Almanak gereja kita, yang menjadi tema khotbah adalah "Ketetapan Tuhan Tidak Akan Berubah." Mari kita bahas bersama-sama.
Pendahuluan
Ia turpuk ni jamitanta on, digoari ma on songon sada padan na imbaru taringot tu bangso na pinillit Na i, bangso Israel. Hinorhon ni hatangkangon ni bangso i, na sai manimbil sian haporseaonnasida tu Jahowa Debata naung mamillit nasida, mambahennasida ingkon mendalani konsekuensi ni hasalaanna marhite mandalani uhum na pinatupa ni Jahowa ingkon sidalanonnasida. Laos tu si do tarjou si Jeremia, anak ni si Hilkia na sian Anatot, asa mamaritahon barita tu uhum na Ingkon masa tu bangso i ala ni hatangkangonna marroha dohot marpangalaho di adopan ni Jahowa Debata. Jala masa do panguhuman i, marhite hadadabu ni Juda dohot Jerusalem tu habuangan di Babel. Doshon songon panurirang Hosea na sai manghaholongi Jahowa Debata, dipangke do nang si Jeremia asa gabe sada utusan laho pasahathon hata ni Debata, pasahathon sangkap ni Debata na ingkon siulahononNa tu bangsoNa i.
Doshon songon panurirang Mika, na manurirangkon hasesega ni Joro ni Debata di Jerusalem; jala doshon songon panurirang Amos, na manulak nasa ulaon parugamaon ni bangso i na sai tong pasahathon pelean situtungon alai ndang marhamubaon ni roha. Songon i do tong barita na sahat jala na pinaboa ni si Jeremia tu bangso Israel, tanda na marnida do Jahowa di sude angka pangalahonasida na mambahen jut roha ni Debata, hape sai dibahen Debata na dumenggan tu bangso i, laos marbalos marhite pangalaho na hurang denggan. Alai adong sada panghirimon na pinasalat ni si Jeremia tu bangso i. porsea situtu do ibana, nang pe ro barita paruhuman tu bangso i, alai molo olo bangso i (Juda dohot Israel) paubahon rohana, tung paimbaruon ni Jahowa do muse roha nang pangalaho ni bangsoNa i. Laos i do na gabe songon sada jaminan na pinasahat di ayat 35-40, na ginoaran ma on bagian ni padan na imbaru, na pinasahat ni Debata muse tu bangso i, asa tandaonnasida holong ni roha ni Debata asa dipaluanasida sian side panguhumon i.
Pembahasan
Songon i do nang masa di tonga ni parngoluonta. Tung tangkas do denggan basa ni Jahowa manontong dipasahat tu hita. Alai jotjot do nang pangalaho na tapatuduhon sai mambahen jut roha ni Debata. Sian ganup parngoluonta na sai olo mangaulahon nasa na maralo tu adopan ni Jahowa, sasintongna na mangadop do hita di uhum na sian Debata. Lumobi ma di naung tinobus ni Debata hita sian dosa, marhite panghophopion ni Tuhan Jesus Kristus, hape sai ton, ndang ta auhon i, gariada tahe sai merasa hita gabe marlomolomo mangulahon dosa nang hajahaton. Sai adong hata di bagasan roha na mandok: "Ai nga ditobus dosangku, jala molo pe mardosa abu muse, nunga ditobus abu jala ndang pola boba be i. "Hinorhon ni i, gabe ndang margogo be hita laho paubahon roha. Hape sahali do Jesus tarsilang laho manesa dosa ni jolma. Sada nama na pinangido ni Tuhanta sian hita, asa marparange na tama hita, dalanta manghatindanghon Jahowa Debata marhite pangalahonta. Jala hot do i masa songon naung ni aturhon ni Debata ingkon songon i ulahononta.
Hot ma Tangihon Hata ni Debata (ayat 35)
Ndang adong hamubaon ni roha di jolma, molo so tangi rohana di Hata ni Debata. Ai Hata ni Debata do na gabe gogo di ganup tondi ni jolma asa marpangalaho na denggan hombar tu lomo ni roha ni Debata. I do na pinasahat ni si Jeremia di turpuk ta on, na mandok: "Songon on do Hata ni Jahowa." Sasintongna naeng dipaulak si Jeremia do bangso i tu dalan na hinalomohon ni Debata. Berarti saleleng on, ndang be nasida mardalan di Hata ni Debata, na mangarahon nasida tu pangalaho na sinangkapan ni Debata na ingkon ulahononnasida. Di ida Jahowa do panimbilan na binahen ni bangso i marhite pangalaho na lam dao sian Jahowa Debata. Alai, marhite Hata ni Debata na ro tu nasida marhite panurirang Jeremia, dipasahat do asi ni rohaNa tu bangso i, asa unang be lam bagas madabu tu hajahaton, alai asa dipalua sian i, jala mulak mangadop tu holong ni roha ni Debata.
Songon parro ni si Jeremia na pasahathon Hata ni Jahowa tu bangso i asa marhamubaon ni roha, songon i ma nang hata ni Jahowa ro mandapothon hita marhite turpuk jamitanta on. Asa, unang lam bagas hita manimbil sian na sinangkapan ni Jahowa na ingkon ulahononta. Asa unang lam sahat hita tu panguhuman naung adong di adopan ala ni dosanta. Dipaingot tu hita, asa ta lehon dirinta manangihon Hata ni Debata. Roha na sai olo manangihon Hata ni Debata, hot do i disangkapi Jahowa asa ulahononta di ngolunta. Ala ni i, unang mansohot nian salpu sadari so jolo ta tangihon Hata ni Debata, na manuntun hita tu dalan na sinangkapan ni rohana. Songon i Jahowa Debata nan a manontong hot di pangaturion Na tu hita asa sai tong hita on mandalani ngolunta hombar tu lomo ni rohaNa.
Debata do na Hot Mangatur Pardalanan ni Ngolunta Asa Sahat Hita tu Angka na Uli na Denggan Nuaeng nang Sogot (ayat 35)
Dung ditompa Debata langit dohot tano on, ndang dipasombu Ibana mardalan songon i nasa na tinompaNa i. Alai mansai denggan do diaturhon Ibana saluhutna asa mardalan songon na sinangkapan ni rohaNa. Jala ndang disangkapi Debata asa gabe sega songon i nasa na tinompaNa, alai asa mangulahon Hata ni Debata, manghatindanghon gogoNa naung manjadihon nasa na adong i. Songon pangaturNa mambahen mataniari gabe panondang arian, dohot angka bintang gabe panondang ni borngin. Na manggunsang angka laut, asa gabe marhasak nang galumbang. Songon i ma pangaturNa denggan, asa terjadi mekanisme kehidupan di angka jadijadian Na i.
Jala hot do pangaturhonon ni Jahowa songon na di ginjang ondeng. Gabe mangalehon tingki (waktu): arian dohot borngin; minggu dohot bulan, jala taon na marganti pastoring. Nunga songon i ganjang ni umur ni portibi on, alai ndang hea mansohot pardalanan ni partingkian sian pangaturhonon ni Jahowa. Songon galumbang di laut, na mambahen sada kehidupan di angka biota laut ndada na gabe pamatyhonsa. Songon i nang mohop ni mata ni ari, ndang gabe manutung angka na mangolu di tano on. Mansai denggan nang angka ombun dibahen Jahowa, laho mangondingi angka na mangolu (jolma) sian mohop ni mata ni ari. Alai, hinorhon ni pangalaho ni jolma na sai manontong mangulahon dosa, idama nunga marragam be nuaeng angka bencana na masa di portibi on. Eksploitasi alam besar-besaran gabe manghorhon banjir bandang. Efek penggunaan rumah kaca, dohot peretasan tambang alam gabe manghorhon pemanasan global. Penggantian lahan hutan gabe lahan pertanian manghorhon penurunan tanah dohot angka longsor. Sasintongna, dosa ni jolma i do na mambahen marragam angka bencana na gabe siadopan ni jolma di ngoluna.
Laos dipaingot ma hita asa olo hita mulak tu hahotion ni pangatur ni Jahowa di pardalanan ni ngolunta. Unang be nian sai dirajai hagiot ni roha be hita tu joloan on. Asa unang gabe adong di hita kehidupan menghalalkan segala cara demi kepuasan diri sendiri. Sasintongna molo sai taulahon do angka pangalaho na mandao sian pangaturion ni Jahowa, boi do i gabe berdampak buruk nang di parngoluan na taadopi tu joloan on. Idama godang ni jolma na mamaksa dirina asa gabe sahalak aparat Negara, maradu habis nang angka arta ni natorasna asa boi dapotna na sinangkapan ni rohana i. Hape tong ma ndang dapot. Habis ma sude, na sinangkapan ni roha ndang dapot, panimbilan ni pangalaho gabe terbuka lebar di adopan. Ujung na tong ma Tuhan i na gabe sala didok rohana. Songon i do nang dipaingot tu hita secara pribadi: "Hanya Tuhan yang tahu, ke mana kita harus melangkah supaya kita menjadi kesaksian atas kekuatan Tuhan." Ala ni i, denggan ma hita olo unduk diatru Tuhan i, asa tujuan hidup na sian Debata ma na saut di ngolunta tu joloan on. Molo olo hita diatur Tuhan i, songon pangaturNa di angka jadijadianNa, sai na sahat do hita tu angka na uli na denggan tu joloan ni ari on. I ma songon sada jaminan na pinasahat ni Jahowa tu bangso Israel na tangkang marroha; laos i do tong hot na gabe jaminan di hita nuaeng molo olo hita mulak di pangaturion ni Jahowa di hita di pardalanan ni ngolunta.
Hot do Debata di AturanNa: Israel na Gabe Bangso ni Debata (ayat 36)
Pamillition ni Jahowa di Israel asa gabe bangsoNa, manontong do i gabe aturan na hot ro di salelenglelengna. Tung pe songon i tangkang ni roha ni Israel di pangalahona maradophon Jahowa, tung so boi do i paubahon aturan naung tinotophonNa di pamillitionNa di Israel. Alai, on ma na gabe sada padan na imbaru na ro sian Jahowa Debata, di angka na olo mangihuthon padanNa i, marhite hamumulak na sian pangalaho na robi masuk ma ibana nang tu padan naung tinotophonNa i. Sasintongna termasuk ma padanNa on, songon tanda di hajongjongan ni Huria di padan na imbaru. Hinorhon ni hatangkangon ni Israel (Juda dohot Israel), gabe ungkap do sada kesempatan di angka bangso na asing asa ro mananda Jahowa Debata marhite asi ni rohaNa. Laos sada gombaran do on, di haungkapon ni Jahowa na pasahathon haluaon tu ganup bangso marhite Tuhanta Jesus naung tarsilang manobus dosa ni jolma.
Songon i ma sahat pamillition ni Debata nang tu hita asa gabe bangsoNa hita. Di bagasan parsaoranta di Tuhan Jesus Kristus, targoar ma hita on nuaeng gabe Kristen. Alai, gabe Kristen na sintong ma hita tahe, na mangauhon panghophopion ni Tuhan Jesus naung manesa dosanta. Na tarida sian parsaoran na denggan laho mamuii Tuhan di Huria i, nang di parsaoran dohot dongan jolma. Lumobi ma muse na mamarangehon parange na suman tanda naung dipalua hita sian dosanta. Hita ma na ginoaran Na bangso Israel, naung tarjou gabe bangso ai Debata naung ditobus dosana marhite Tuhan Jesus Kristus. Jala i do aturan na hot ro di salelenglelengna. Asa sian ganup halak Kristen, sorang ma muse angka pomparan na manghaholongi Debata, na mangajarhon haporseaon na denggan, na manghatindanghon panobusion ni Tuhan Jesus sahat tu sundut ni pomparanna. Dipaingot ma tu hita on, asa unang taparhaseang i. Denggan ma taingot naung gabe bangso ni Debata hita, asa hita pe hot ma mangolu di aturan naung tinotophon ni Tuhar Jahowa Debata di asi ni rohaNa naung sahat tu hita.
Kesimpulan dan Refleksi
Sahali nai, dipasahat nang tu hita ringkot ni na manangihon Hata ni Debata. On do pandok Na marhite HataNa: "Tung so basuhatan do asi ni roba ni Debata di angka jolma na olo manjanghon haluaon na sian Ibana. "Digombarhon songon langit na so hasuhatan jala songon tano di toru na so hadodoan. Digoari ma i "Misteri Ilahi." Jala hot do Debata di aturan Na taringot tu angka ise do lehononNa asi ni rohaNa i. Sasintongna, molo targoar do Israel na gabe bangso na pinillit ni Jahowa, tung so ala ni haulion ni bangso i ngon i, manang ala ni hapistaranna. Tung holan ala ni asi ni rohaNa do naung mamillit nasida sian bangso na asing. Songon i do nang tu hita, molo tung pe boi hita gabe targoar sada punguan parsaoran na mananda Debata marhite Tuhan Jesus Kristus, tung so ala ni na adong sian hita penilaian na denggan asa tau hita gabe bangso ni Debata. Tung ala ni asi ni rohaNa do. Sasintongna ingkon lam tama do hita mandok mauliate di Jahowa ala ni pamillitionNa tu hita, gabe targoar nang hita Israel marhite panobusion ni Tuhan Jesus. Ala ni i, hita pe gabe parsidohot mian di aturan ni Debata na mandok na hot do Ibana mamillit Israel na gabe bangsoNa. Antong, las ma rohanta, gabe dohot nang hita bangso ni Debata.
Jadi ala bangso ni Debata do hita, naeng ma unang tabatasi gogo ni Jahowa di ngolunta. Ai i do didok Tuhanta Jesus andorang so manaek Ibana tu banua ginjang, ai tongoson ni Damang i do sada sian Ibana na asing, asa mandongani pardalanan ni jolma na manjanghon haluaonNa i. I ma Tondi Parbadia. Laos i do tanda naung gabe tardok hita halak Kristen, naeng ma ngolunta on pe dirajai Tondi Parbadia, asa diramoti hita laho mangulahon angka ulaon na hombar tu lomo ni roha ni Debata. Sude ma tahe halak na mandok dirina Kristen, naeng ma digohi Tondi Parbadia. Ai Tondi parbadia na mian di roha ni jolma, mangajari jolma i asa marpangalaho na denggan na tau pasangaphon Debata Jahowa. Margogoihon ibana asa mangolu di bagasan habadiaon ni Debata, laos margogo manghatindanghon Jesus Do Debata naung manesa dosana, manobus, jala na pasahat hangoluan sogot di angka na porsea di Ibana. Laos marhite ngolu na ni rajaan ni Tondi Parbadia ma sahalak jolma margogo manghatindanghon hangoluan na so tardodo roha ni jolma. I do hahotion pangatur ni Debata di angka bangso na pinillit Na.
Songon goar ni Minggunta, Judika sadari on: "Luluhan ahu ale Jahowal Berilah keadilan kepadaku, ya Tuhan!" Laos marhite jamita on ma diluluhon Jahowa nang hita, laos dipaboa asa mulak ma hita mandapothon asi ni rohaNa di bagasan Tuhan Jesus Kristus. Unang pangasahon gogo ni pingkiranmu laho mangulahon nasa na hinalohon ni roham. Jala unang loas dirim lam mandao sian Tuhan i. Molo tung adong di ho hamoraon, unang loas i mangaliluhon ho sian Tuhanmu dohot sian dalan na sintong. Molo tung pogos pe, unang bahen i gabe sada alasan asa mangulahon hajahaton laos dao sian Tuhan i. Molo tung hipas pamatangmu, unang parhaseang i laos gabe sai mangulahon ulaon na manghorhon sahit. Manang molo pe di bagasan parsahiton, unang loas i gabe sada pangambat laho mandapothon Tuhan i. Sude situasi, sude kondisi, sude keadaan, naeng ma patauhon hita manghatindanghon gogo ni Debata. I do aturan na hot na binahen ni Jahowa. Jadi asa boi taulahon i, hot ma nang hita di aturan i: manjanghon haluaonNa, jala manjanghon Tondi parbadia na margogoihon hita mangulahon ulaon na hombar tu lomo ni rohaNa.
Posting Komentar