Jamita Minggu 1 September 2024 Minggu Pasampuluopathon Dung Trinitatis tarsurat di buku 5 Musa 4 ayat 1 - 2 dohot 6 - 9. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Mangaradoti Huhut Mangulahon Nasa Uhum ni Jahowa Debata." Rap ma hita mangihuthon hatoranganna.
Pendahuluan
Buku Musa na palimahon on i ma sada sian buku ni si Musa na lima i. Buku Musa na parjolo manghatindanghon taringot tu mula ni nasa na adong. Di hata na asing didok Genesis (Kejadian). Buku na paduahon mamaritahon pamilliton ni Jahowa di bangso Israel bahen haluaon ni saluhut bangso. Dipaboa do disi taringot tu panjouon ni Debata tu bangso i, laos diparuar do nasida sian tano parhatobanan Misir, laho mian di tano naung binagabagahon ni Debata, i ma tano habaoran ni susu dohot situak ni loba, i ma tano Kanaan (ida 2 Musa 3:8). I do umbahen na digoari buku i Exodus (Keluaran). Buku Musa na patoluhon manggurithon angka aturan hamalimon dohot angka na marpardomuan tusi. Di hata Latin didok ma Leviticus (Imamat). Na mangihut Buku Musa na paopathon, i ma na mamilangi angka bangso Israel na masuk tu tano Kanaan, hombar tu marganasida be. Laos disi do dihatai angka inganannasida hombar tu margana be, na gabe dietong partalianna. Di hata Latin didok ma Buku Musa na paopathon on Nummeri (Bilangan).
Molo tajaha buku Musa na palimahon, boi do taida disi angka Jamita ni si Musa uju maisolat dope bangso i di halongonan Sinai. Dijamitahon si Musa do di hatana angka pambahenan ni Jahowa tu bangso Israel uju di parhorsihan nasida. Godang situtu do angka denggan basa ni Jahowa naung jinalo ni bangso i, uju ruar nasida sian tano parhatobanan Misir. Sipata gabe mangadopi angka na porsuk do bangso i di angka pardalananna molo mandao nasida sian Jahowa, alai boi malua muse hinorhon ni asi ni roha ni Jahowa, molo mulak nasida tumangihon Hata ni Debata.
Hata ni Jahowa i ma na gabe uhum, patik dohot angka aturan na ingkon tangihonon ni bangsoNa, asa martua jala malua nasida. Asa dipillit pe nasida, asa mangoloi jala unduk do tu Jahowa. Songon impola ni buku Musa na palimahon on i ma "Shema Yisrael!" sian hata Heber, lapatanna tangihon ma ale Israel! Sasada Jahowa do Debatanta (ida 5 Musa 6:4-9). Ingkon haholonganmu do Jahowa sian nasa roham, sian nasa pingkiranmu nang sian nasa gogom.
Pembahasan
Tangihon ma Aturan dohot Uhum ni Debata (ayat 1-2)
Didok di ayat 1 "Nuaeng pe, ale Israel, sai tangihon ma aturan dohot uhum, ... " hata on patuduhon naung dipatorang jala dipajojor si Musa do angka pambahenan ni Jahowa tu bangso i. Ala ni i ingkon udutan nasida ma mamarangehon pangalaho na tangi. Manangihon aturan dohot uhum, i do na dipangido sian bangso Israel. Tangkas do dipaingot asa manongtong nian angka aturan dohot uhum ni Jahowa i di ngolunasida. Hata "Aturan," molo di hata Heber didok ma i "ha·ḥuq·qîm" lapatanna the statutes, haputusan, angka haputusan naung ditotophon asa dioloi. Dipangido tu bangso Israel asa ditangihon nasida angka uhum dohot aturan naung dipabotohon si Musa tu nasida, angka naung dipodahon asa bahenon nasida. Molo ditangihon jala diulahon nasida i, gabe mangolu ma nasida jala tarbahen nasida ma masuk tu tano siteanon nasida na nilehon ni Debata.
Di ayat 2 didok "Ndang jadi ambaanmuna tu hata naung hutonahon i tu hamu, jala ndang jadi oruanmuna sian i, ... ." Hata on manonahon tu bangso i asa angka aturan nang uhum ni Debata naung dipasahat si Musa i, ingkon tung holan i do ditangihon jala diulahon, ndang jadi ambaan manang oruan. Sian hata ni si Musa on na manonahon Hata ni Debata tu bangso i, diboto ibana do bangko ni hajolmaon na sai olo mangambai manang mangorui Hata ni Debata. Songon na masa di hajolmaon, na olo manambanambai hombar tu pangantusionna. Ala ni penafsiran na hurang tepat manang manambai sian pangantusionna olo do gabe ndang hombar tu maksud awal manang maksud na sasintongna sian Hata ni Tuhan i. Manang baliksa, ala ni sifat ni hajolmaon na olo terlalu menyederhanakan, menganggap sepele, di angka aturan, lumobi ma di Hata ni Debata, isarana menganggap aturan na asing lobi ringkot diulahon jala na asing hurang ringkot manang ndang diulahon. Molo adong aturan na borat antar songon na dipasiding ma jala angka aturan na mura diulahon sai i ma didok jala diulahon. Alai ndang songon i na dipangido di turpuk ni Jamita on, ingkon do ditangihon, dipamanat, jala diulahon hombar tu aturanna, ndang ditambatambai manang diorui. Ingkon hombar tu Hata ni Debata na sasintongna i do na dilapati jala diulahon.
Radoti jala Ulahon ma Patik ni Jahowa (ayat 6-7)
Dipangido do tu bangso i asa "mangaradoti jala mangulahon patik manang uhum ni Jahowa" (ayat 6). I do na gabe hapistaran dohot hapantason di nasida maradophon angka bangso na asing. Patik i, siradotan jala ulahonon do i, manang siulahonon jala diradoti, on ma na patuduhon hasintongan ni uhum i. Diulahon ma i huhut dirimangi. Baliksa, dung dirimangi diulahon ma muse. Ingkon sada do pambahenan dohot pangantusion manang pangarimangion di Hata ni Debata. Di hata na asing didok ma i praktik.
Panghorhon ni pangarimangion nang pambahenan di Patik i patut do lam tang, lam matoras Patik i di ngolu ni bangso i, jala gabe alus do Patik manang parange di sandok ngolu si ganup ari. Laos ala ni pangalaho si songon i ma (hombar tu Patik ni Debata) gabe tau pujian ma nasida di angka bangso na humaliang. Jala tardok bangso na pistar jala na pantas marroha do bangso Israel, bangso na bolon. Lumobi ma di angka padan ni Debata di bangso i, na tongtong do ramotanNa nasida, lam sumurung ma Bangso Israel maradophon angka bangso sileban. Molo diulahon jala diparangehon nasida do Patik ni Debata, molo tung joujou nasida tu Jahowa Debata sai tangihononNa do. Ndang pola disuhat manang digotap Debata asi ni rohaNa tu bangso i molo joujou nasida (ayat 7).
Pabotohon Patik ni Jahowa tu Sundut na Mangihut (ayat 8-9)
Diulahi muse pasahathon hasurungan ni Bangso Israel maradophon bangso na asing, ala tigor ni angka uhum dohot Patik ni Jahowa (ayat 8). Dipasahat do hinaarga ni patik i, ala ni i tung so patut do tadinghonon manang lupahonon nasida.
Didok di ayat 9 " ... unang tallus sian roham saleleng ho mangolu." Ndada holan dipaingot asa mangaradoti dohot mangulahon Patik ni Debata, alai ingkon do hot Patik i di roha saleleng mangolu. Diuduti muse marhite hata "ingkon pabotohononmu do tu angka anakmu dohot pahompum." Ingkon pabotohonon do angka Patik i tu angka anak dohot angka pinompar. Lapatanna ingkon ajarhonon do Patik i tu angka sundut na mangihut. Dison ma tangkas, paboa na manongtong do Patik ni Jahowa. Ndang holan di angka sundut si saonari, alai ingkon udutan do muse tu angka sundut na mangihut. Asa nasida pe ditangihon jala diradoti Patik ni Debata, asa mangolu hombar tu Patik ni Debata.
Kesimpulan dan Refleksi
Di angka partingkian si saonari, lam maol do mangalului huhut mamilangi hasintongan. Lam lumlam do berengon angka pangalaho di angka sundut na parpudi on. Lam maol do mandok huhut manirang na sintong sian na so sintong manang na sala. Tarimangi ma, mangolu dope ulaning Patik manang Uhum ni Jahowa Debata di ngolunta?
Isarana, di pardongansaripeon. Nunga be masa di angka ari na parpudi on, na dipasupasu huria na deba na mardongan saripe baoa tu baoa, boruboru tu boruboru dohot na asing. Uhum dia do ulaning dipamasa dison. Jala godang nari dope nuaeng angka na masa na maralo tu Patik ni Debata. Ai lam tu egoisna nama angka jolma, jala holan lomona dohot hasonanganna nama diihuthon. Ditundalhon do uhum dohot Patik ni Debata, asal ma saut lomo ni rohana atik pe maralo i tu Patik ni Debata.
Marhite turpuk ni Jamita on dipaingot do hita asa mulak tu patik ni Jahowa jala taradoti nang pe sipata maralo i tu parrohaon ni zaman on. Ingkon tonahononta do i tu angka ianakhonta, ai manongtong do Patik ni Jahowa, songon holong ni Kristus na sai tongtong marorot hita marhite Uhum / Patik jala holong satia naung disahaphon Tondi i tu ganup hita. Amen.
Posting Komentar