Jamita Partangiangan Epistel Minggu 8 September 2024 Minggu Pasampululimahon Dung Trinitatis tarsurat di buku Psalmen 125 ayat 1 - 5. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epitel) "Jesus Patupa Hadengganon di Angka na Humurang." Rap ma hita mangihuthon hatoranganna.
Pendahuluan
Ende pos ni roha tu Jahowa do Buku Psalmen, turpuk ni Epistel on. I ma pos ni roha ni parpsalmen paboa Jahowa do na manjagai Israel sian angka huaso hageduhon. Saurdot do pandohan ni turpuk on tu pandohan ni parpsalmen di bindu parjolo taringot tu manirang parjahat sian angka na tigor marroha. Mansai tangkas do disirang na dua i, tung soada pardomuanna. Dipatudu do di bindu parjolo pangalaho na jat na marimbar sian angka na tigor roha. Di ujung ni ngoluna pe asing pe do pardalanna.
Mangolu do Israel di tongatonga ni angka jolma na geduk marroha (parjahat). Tubu do lomos di roha ni parpsalmen so tung ditait parjahat i roha ni angka sisangunjur marroha tu hageduhon. Tutu marsaor do luhut hajolmaon di ihotihot ni sosialna. Ndang tarbahen so masa angka na marsibetabetaan, marsirarian, saling mempengaruhi dohot na asing. Sipata olo do gabe tarela angka na tigor marroha tu dalan na bengkok manang na jat. Alai molo Israel, Jahowa do na manjagai nasida asa unang manimbil tu dalan ni angka parjahat.
Pembahasan
Jahowa do Humaliang BangsoNa (ayat 1-2)
'Ende hananangkok' tudutudu do i di ombas dia Psalmen on diendehon. Ende hananangkok somalna dipatubegehon uju pungu bangso i di bagas joro ni Debata na di Jerusalem. Sahalak Israel ingkon sai hasiholan ni rohana do mulak tu Jerusalem sian tano parserahanna. Jala ingkon masukannasida do bagas joro i, lumobi ma uju di ari rea. On ma na nidokna tingki hananangkok. Mulak tu sambulo. Manang molo di hata Indonesia didok ziarah. Di tingki si songon i ma Psalmen 125 on dipangiar di bagasjoro i. "Angka na marhaposan tu Jahowa" dipatudos tu dolok Sion, dolok na so tagamon humordit manang dia pe na masa. Pasingkatsoring pe angka na masa, salpu angka taon, marganti zaman alai molo bangso Israel ingkon hot do tongtong gabe bangso ni Jahowa.
Di ayat 2 digombarhon do disi paboa 'angka dolok' do ia humaliang Jerusalem. Haporseaon ni Israel mandok ingkon hehe do Jahowa nangkok tu sada dolok na margoar Sion. Sian i ma Ibana, rap dohot bangso na pinilitNa i mangarajai luhut portibi on. Dame jala hot do harajaonNa i disi ai diondingi 'angka dolok' humaliang do nasida. Songon i ma gombaran ni Israel marhahotan ala gogo ni Jahowa humaliangna, laho mangondihon bangso i sian tahi ni angka parroha na geduk.
Ndang Tong Mandondon Tungkot ni Hajahaton (ayat 3)
Hata 'mandondon' sada tudutudu do i tu partontangan manang paraloan ni bangso Israel maradophon angka bangso na leban. Uju mamasuhi tano Kanaan nasida, saut do disagihon tano i gabe inganan parmianannasida, ganup mangihuthon horong ni margana be. Alai ndada na masuk boti Israel tu luat i. Nunga maringan hian disi angka halak si leban naung jumolo maringan disi. Sipata marporang do nasida maradophon angka i sude. Jala jotjot do talu Bangso Israel (angka marga i) tu pangisi ni luat i. Pigapiga hali talu do Israel maradophon angka alona gabe pangoloi do nasida secara politis. Molo masa partaonan si songon i, tu Jahowa do Israel mangalualu. Sai dipalua Jahowa do bangso i marhite angka Panguhum. Molo dung undur halak Palistin sian tonga nasida, on pe dihaposi roha ni bangso i do paboa ala pangaramotion ni Jahowa do na pasiding hageduhon sian bangso Israel. Ai tubu do pamingkirion di diri ni sahalak Israel molo rap nasida dohot halak Palistin na geduk i, so tung maon gabe terpengaruh angka sundut na tigor marroha.
Debata do Sipasonggop Dame tu Israel (ayat 4-5)
Sada pangidoan sian par psalmen asa jongjong Jahowa manguhum angka na manimbil sian dalan hatigoran. Baliksa asa 'dibahen na denggan' tu agka na denggan roha dohot tu angka 'sisangunjur marroha.' Tutu adong do pangantusion di halak Israel paboa sai tarpasupasu do angka na burju marroha, alai baliksa hona bura ma angka na geduk marroha. Bura dohot pasupasu i ma dua pangalaho na tung mansai tangkas disirang disi. Lumobi muse tubu do sada houm di parugamaonnasida na digoar Deuteronomi. Pangajarion ni houm i, molo niula angka na denggan ro ma pasupasu, alai molo angka na roa do diula ro ma bura.
Marningot i parpsalmen mangido asa hehe nian Jahowa mamasumasu Israel, naung dietong gabe bangso na tarpillit laho patupa lomo ni roha ni Jahowa (i ma angka na denggan). Baliksa jongjong do Debata mandabu uhum (bura) di angka na manimbil dalanna sian Jahowa. I do dalanna asa sai manongtong 'hadameon' songgop tu Israel.
Kesimpulan dan Refleksi
Di angka ari na parpudi on nunga tung lam timbo parbinotoan ni jolma. Sipata parbinotoan i gabe mansoadahon angka nilai na adong sian na parjolo i na dietong denggan. Angkup ni i nunga lam maol pajongjong ruhut hatigoran. Dang marimbar be sipata dalan na tigor sian dalan na manimbil, na denggan sian na roa, na sintong sian na sala. Managihuthon turpuk on nunga ingkon tangkasan ngolu huria si saonari. Boi dope manang olo dope hita manirang na denggan sian na jat i? Molo dung tubu roha si songon i gabe tangkas ma pos ni rohanta maimaima angka na denggan sian Jahowa Debata naung papatar diriNa marhite Jesus Kristus mual ni nasa hadengganon i. Amen.
Posting Komentar