Jamita Partangiangan Epistel Minggu 15 September 2024 Minggu Pasampuluonomhon Dung Trinitatis tarsurat di buku Lukas 9 ayat 22 - 27. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Nunga Dipadenggan Jahowa UhumNa tu Hita." Rap ma hita mangihuthon hatoranganna.
Pendahuluan
Evangelium Lukas masuk do tu golongan Injil Sinoptik rap dohot Evangelium Mateus dohot Markus. Injil Sinoptik membahas songon dia do kehidupan dohot panghobasion ni Jesus Kristus. Gabe sahalak Kristen tontu ndang na mura, ala olo do godang sitaonon na ingkon adopan. Molo naung tapillit asa porsea jala mangihuthon Jesus, ingkon barani do hita mansoadahon diri jala mamorsan silang. Alai godang do tabereng di parngoluon ni Halak Kristen nuaeng on, na bertindak ndang sesuai tu pangidoan ni Debata. Nunga godang Halak Kristen na bertindak mangihuthon hadagingon, haportibion jala mangulahon angka na maralo tu Patik ni Debata. I do na mambahen gabe godang parsalisian na mambahen lam sumurut haporseaonta.
Pembahasan
Ayat 22-23
Di ayat 22 didok " ... Ia Anak ni jolma i, ingkon godang do taononna, bolongkonon ni angka panungganei, sintua ni malim dohot sibotosurat do Ibana, dung i pusaon do, jala mulak mangolu do di ari patoluhon." Sian ayat i adong du hata na boi tabahen gabe parsiajaran di hita, i ma hata "ingkon" dohot hata "godang." On ma na ingkon adopan ni halak na mangihuthon Jesus. Sitaonon na niadopan Jesus ndang na otik, alai tung mansai godang do, nunga diboto Jesus na laho ditulak angka Panungganei, Sintua ni Malim dohot angka Siboto Surat Ibana.
Diuduti muse di ayat 23 didok disi, "Ia adong na naeng mangihuthon Ahu, disoadahon ma dirina, dituhuk ma ariari hau pinarsilang na tu ibana, laho mangihuthon Ahu." Halak na mangihuthon Jesus di ngoluNa ingkon disoadahon do dirina. Mansoadahon diri boi do dilapati songon komitmen manandinghon angka kenyamanan, na uli na denggan jala angka na sai diparsinta songon angka hagabeon, angka hasangapon di angka parkarejoan, jala angka na mambahen tabo panghilalaan ni hajolmaon marhite angka sinadongan di portibi. Disoadahon ma i molo naeng ihutonononna do Jesus. Lapatanna disi ndang na naeng mandok asa ndang ringkot mulaulaon jala laos pinasombu diri gabe ndang mangharingkothon angka na ringkot laho bohal di ngolu siapari, daong. Alai asa unang ma nian ala ni na sai tahophop angka ulaonta manang angka na adong di hita, gabe tasoadahon Tuhan i.
Sipata olo do gabe lalap angka jolma, ai gabe rumingkot do angka parkarejoanna, artana, hasangapon dohot angka na asing marimbanghon mangalehon tingki tu Tuhan i. Baliksa, olo do tutu gabe humolong roha ni na deba di artana manang di parkarejoanna, marimbanghon Tuhan i, ujungna gabe sai dipatupa ma segala cara (menghalalkan segala cara), asal ma dapot na sininta ni rohana, atik pe maralo do dalan manang carana maradophon na hinalomohon ni Debata. I do na masa na taadopi di partingkian si saonari on, torop do halak na alang rohana manadinghon angka haportibion molo mangihuthon Jesus.
Sian turpuk ni Jamita on dipasahat tu hita paboa, mansoadahon diri hal na mutlak do i manang na ingkon ulahonon ni sude angka na mangihuthon Jesus. Ai marhite na mansoadahon diri i dohot na marmorsan silang i do asa tarbahen hita marserep ni roha, jala boi jaloonta angka parsiajaran na nilehon ni Tuhan i tu hita.
Gabe siihuthon Jesus pe porlu do adong integritas di bagasan dirinta. Integritas lapatanna saurdot panghataion dohot pangulahonon. Molo di haporseaon boi dohonon saurdot aha na hinaporseaan dohot pambahenan manang pangulahonon. Lapatanna disi asa ulahonon do haporseaon i, ndang boi holan parbinotoan sambing, alai ingkon diulahon di ngolu si ganup ari. Unang ma adong nian na berpurapura, jala di haporseaonta i pe ingkon togu do tatiop unang golom riaria.
Alai ingkon antusanta do tutu, molo ndang sian ias ni roha hita laho mangihuthon Jesus, tontu maol do mansoadahon diri. Naeng ma nian bulus rohanta mangihuthon Tuhanta Jesus, ingkon tarajumi do, Jesus i pe ditadinghon do hasangaponNa humophop hita jolma pardosa. I ma na gabe gogo di hita asa tarbahen hita mansoadahon diri, songon na pinatupa ni Tuhanta Jesus. Gabe ndang diihotihot angka haportibion i be hita manang angka ngolu pardagingon, molo di angka istilah si nuaeng didok ma i, ruar sian zona nyaman.
Ayat 24-25
Tutu ingkon adopanta do angka siatonon dohot parungkilon, di ayat 24 pola didok " ... alai na agoan hosa ala ni Ahu, i do na pangoluhonsa." Torop do jolma na mabiar agoan hosana. Tung sude do halak sai dijaga asa unang mago hosana. Alai manang ise na naeng mangihuthon Jesus, ingkon olo do ibana agoan hosana. Datung na mandok asa neangneang hita di hosa i, daong. Alai asa molo taihuthon Jesus ingkon marsitutu do hita, molo pe jumpa hasusaan jala molo pe laos ala ni haporseaonta i maradophon Jesus ingkon mago hosanta, alai sai na mangolu do hita bahenonNa.
I do sipata olo do angka jolma neang mandok mangihuthon Jesus alai molo jumpa hamaolon dohot tantangan na borat, olo gabe manimbil, laos ditadingkon do Tuhan i, ditadingkon haporseaonna, ummarga dirina dibahen sian Tuhan i. Hape gabe hamagoan do i. Molo naeng mangolu hita di bagasan Ibana, tapasahat ma hibul ngolunta, molo diadophon rura ni hamatean pe hita, na mangolu do hita molo tapasahat dirinta tu Tuhan i. Baliksa, molo holan na adong di portibi on do talumba, taomo, molo mago hosanta, laos mago songon i do. Alai molo tapasahat do dirinta tu Jesus, nang pe agoan hosa hita, sai na mangolu do.
Ayat 26-27
Di ayat 26 diuduti muse mandok, manang ise na maila ala ni Jesus jala ala ni angka HataNa, pailaon ni Anak ni Jolma i do ibana sogot molo ro Ibana di bagasan hasangapon na di Ibana dohot na di Ama i raphon angka surusuruan na badia. Sian na nidok ni Jesus on, tangkas do diboto Ibana paboa sai na adong do na maila manghatindanghon Jesus.
Molo sahalak maila manghatindanghon sesuatu boi do ragam sidalianna. Jala molo ndang dihatindanghon sasahalak, tontu na so diakui do halak i. Ala ni i molo so dihatindanghon haporseaonna tu Jesus ala maila rupani, tontu na so mangakui Jesus do i. Lumobi ma molo pola sampe maila.
Molo maila somalna dianggap ala na so patut do i, lumobi ma hatiha i ala godang do na mangaleai Jesus, tontu na mangihuthon Ibana pe hona leai do. I do umbahen di na deba pe gabe maila manghatindanghon haporseaonna maradophon Jesus. Dipaingot hita amang/inang asa unang maila hita di haporseaonta i, unang maila hita manghatindanghon Jesus di ngolunta.
Molo pe ala ni panghatindanghononta i olo gabe hona lea hita. Alai di adopan ni jolma do hita lea, molo tahatindanghon do haporseaonta i tu Jesus, gabe las ni roha do hita di adopanNa. Tu aha ma sangap hita di portibi on ala ni na tasoadahon haporseaonta i maradophon Jesus hape gabe lea hita di adopanNa, gabe dipaila hita haduan molo ro muse Ibana di hasangaponNa i.
Tontu sai na adong do na mambahen hita asa mandao sian Tuhanta, lumobi ma na mangelaela hita asa gabe maila hita manghatindanghon Jesus di ngolunta, boi do ala na minoritas hita, manang ala ni angka hubungan sosial, parkarejoan dohot na asing. Alai nang pe songon i, unang ma gabe maila hita manghatindanghon Tuhan i di ngolunta. Pos ma rohanta, ndang diloas Tuhan i angka na porsea di Ibana gabe mago. Na ingkon pauluaonNa do hita huhut diparmudumudu di bagasan golunta.
Nang pe godang sitaonon na taadopi, porsea ma hita, manang ise na olo marmorsan silang, i do nampuna hangoluan na sian Debata. Unang mabiar hita laho mansoadahon dirinta sian angka na adong di portibi on, sian angka na so olo mangihuthon Jesus. Ai manang ise na olo marmorsan silang i di bagas goluna, na olo mangadopi sitaonon ala ni haporseonna, ibana do nampuna jambar hangoluan na sian Debata.
Kesimpulan dan Refleksi
Sude do hita mabiar mangadopi hamatean, ido umbahen selalu hita berusaha menjaga kesehatan ni dirinta. Molo hita renunghon Evangelium Lukas bindu 9: 22-27, jala taboan ngolu hadagionta. mungkin dang olo hita mate alani donganta. Alai molo sahalak na porsea do hita, ingkon do sungkunonta dirinta sandiri: dalanna songon dia do na ingkon ta pillit? Olo do hita mansoadahon diri, mamorsan silang dohot mangihuthon Ibana? Manang poribion do na ta ihuthon. Ingkon do pilliton na na terbaik jala mardongan habisuhon. Olo do hita manaon angka parungkilon, sitaonon asa dapotan pasu-pasu na lobi ummarga hita sian debata? Mengenal Kristus lebih dalam lagi, dan menikmati kemuliaan yang Tuhan janjikan. Pilihan kita dalam hal ini akan menentukan kehidupan kita. Tetapi orang percaya akan tetap mengikut Yesus walaupun harus ikut menderita seoerti Yesus yang juga menderita. Amen.
Posting Komentar