Jamita Partangiangan Epistel Minggu 22 September 2024 Minggu Pasampulupituhon Dung Trinitatis tarsurat di buku Jeremia 11 ayat 18 - 20. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Pajonok Hamu ma Dirimu tu Debata." Rap ma hita mangihuthon hatoranganna.
Pendahuluan
Jeremia i ma anak ni malim Hilkia di Anator di luat Benjamin (1:1). Jeremia dipabangkit di masa ni si Joyakim, anak ni si Josia, raja sian Juda sahat ro di ujung ni pasampulusadataonhon hinarajahon ni si Sedekia, anak ni si Josia, raja ni Juda, sahat ro di habuangan ni Jerusalem palimabulanhon (1:3). Sada halongangan na di patupa Debata tu si Jeremia i ma tagan so dijadihon di bortian nunga ditanda Debata ibana, jala nunga diparbadiai Debata si Jerernia, huhut dipabangkit Debata ibana gabe panurirang tu angka bangso (patudos 1:5). Disoarahon Debata do tu si Jeremia, asa unang mabiar maradophon manang ise, siala didok Ahu donganmu, paluahon ho (patudos 1:8). Hupabangkit ho laho mangurati dohot maniaphon, mangago dohot mangalaho, paulihon dohot manuan, i ma padan ni Debata tu si Jeremia (patudos 1:10).
Gabe sada panurirang na pinillit ni Debata di bagasan haposoonna. Marragam do angka hamaolon dohot hasusaan na diadopi ni panurirang Jeremia na laho marmudumudu bangso na pinasahat ni Debata tu ibana. I ma, boi do taida di bagasan turpuk ni Epistel on. Di na adong sangkap ni halak Anatot naeng mamunu ibana di siala na sai dipatuduhon panurirang Jeremia do angka pangalaho ni bangso Yehuda na so manjalo jala mangulahon hata ni Debata jala sai laho do bangso i manomba sileban.
Pembahasan
1. Diramoti Debata do Pardalanan ni NaposoNa
Ra jotjot jala ndang asing hita umbege pandohan na mandok "sisogo do jolma na mandok na sintong. " Di bagasan portibi on godang do na so manghalomohon hasintongan. Ala ni i do gabe torop halak na sumurut jala mabiar mandok na sintong, sotung gabe dihasogohon na torop i ibana. Sebagai jolma na porsea tu Debata ingkon tontong barani do manghatahon hasintongan manang songon dia pe situasi dohot kondisi na diadopi. Unang marnida bohi lao pajonjonghon hasintongan.
Di bagasan turpuk on Panurirang Jeremia disuru Debata ibana pasahathon angka uhum dohot angka na naeng bahenon ni Debata tu nasida, alai ndang ditangihon jala ndang dihangoluhon bangso Jehuda hata ni Debata dohot padan ni Debata, Bangso Jehuda marulakulak ndang satia tu Debata jala laos gabe dipabalik do parngoluannasida laho manomba angka debata sileban, hape nunga sai marulakulak panurirang Jeremia pasahathon tu bangso i aha do sangkap ni Debata na naeng sibahenon ni Debata tu nasida.
Tontu di bagasan parngoluan ni angka halak na porsea manghatahon hasintongan dohot hatigoran ni Debata sai adong do konsekuensi na naeng adopanta, di bagasan turpuk on Jahowa do na langsung pabotohon tu Panurirang Jeremia di na adong sangkap ni bangso Jehuda na laho mamunu ibana. Ala dipasahat Panurirang Jeremia hata dohot uhum ni Debata tu bangso i (1-10), jala sahat na hona uhum bangso i ala ndang tarjalo nasida, laos gabe adong sangkap ni bangso i laho mamunu Panurirang Jeremia. Molo rap sian sangkap ni bangso Jehuda na naeng mamunu Panurirang Jeremia i ma sada pambahenan na memberontak manang ndang sipangoloi di angka na dipasahat tu nasida.
Jotjot do di bagasan parngoluon on hita angka jolma mabiar pasahathon manang mangulahon hasintongan ala ni na mabiar hita tu angka jolma na taanggap na lobi jago manang lobi timbo angka pangkatna, gabe mabiar hita mandok angka na binahenna na sala manang angka na so dihalomohon ni Debata. Alai marhite turpuk on taida ma panurirang Jeremia mangulahon angka hasintongan na pinasahat ni Debata tu Ibana. Nunga diida si Jeremia parngoluon dohot ugamo ni bangso Jehuda naung maralo tu adopan ni Debata, i do umbahen dipasahat si Jeremia tu Debata aha na masa di tongatonga ni bangso i.
2. Marhaporseaon tu Debata.
Di bagasan situasi na borat i digombarhon panurirang Jeremia do parngoluonna songon birubiru na naeng diboan tu pamotongan. Ndang margogo mangalo, jala marsuara pe ndang adong be gunana, jala ndang holan songon birubiru, digombarhon do tong ibana songon hau rap dohot parbuena. Alai marhite sian na diadopi panurirang Jeremia dipasahat ibana do parngoluanna tu Debata, di siala pos ni roha jala haporseaon na tiniop ni Panurirang Jeremia. Sude angka na masa i holan Debata do na dihaporseai. Ndang ganggu rohana molo pe mansai balga ancaman na ro tu ngoluna. Ndada dihabiari ibana ancaman i, jala pos rohana di Hata ni Debata, i do umbahen didok panurirang Jeremia "alai paruhuman na tigor do anggo Ho, ale Jahowa Zebaot, Ho do siuji piapia dohot roha. Sai na idaonhu do partubolanMu tu nasida, ai tu Ho hugiling parbadaanhu." On ma sada pangaratapion ni panurirang Jeremia tu Debata. Ala diboto Panurirang Jeremia do, holan Debata do na umboto paluahon naposoNa, sai marsigantung jala mangasahon gogo na sian Debata do ibana, huhut paimahon keputusan na denggan laho paluahon sude angka ancaman na diadopi ibana.
Antong boha do asa mampu hita bertahan mangadopi angka na masa di bagasan mamaritahon hatigoran dohot hasintongan ni Debata tu angka saluhut jolma di humaliangta? Marhite pardalanan ni panurirang Jeremia ma hita marsiajar sian lan angka ragam ni sitaonon na dialami ibana na laho mamaritahon Hata ni Debata di tongatonga ni bangso Jehuda. Alai di bagasan angka sitaonon na diadopi ibana tetap do ibana pasauthon jala mangulahon angka naung disuru ni Debata di bagasan ngoluna. Mamaritahon Hata ni Debata tontu mansai godang do tantangan na lao sidalananta, molo taulahon Hata ni Debata di bagasan hasintongan, kejujuran dohot di bagasan hatigoran di tongatonga ni parngoluonta, pasti jagaon ni Debata do hita.
Taingot ma, tapasahat ma di bagasan tangiang tu Debata angka holso ni rohanta naung tahilala ala pasauthon hasintongan dohot hatigoran ni Debata. Ala ingkon tarajumi do ia angka parngoluan ni jolma adong do keterbatasan, alai unang gabe keterbatasan i na mambahen hita mabiar, ndang dipasombu Debata hita mangadopi angka parungkilon ala ni mampartahanhon Hata ni Debata di bagasan portibi on.
Kesimpulan dan Refleksi
Marhite Hata ni Debata, disosoi do hita jala dijou do hita na gabe halak Kristen laho manghatindanghon hatigoran dohot hasintongan. Di bagasan parngoluon di partingkian si nuaeng on nunga sumurut angka jolma na olo manghatindanghon hatigoran dohot hasintongan, ala ni i unang mabiar hita laho mamaritahon Hata ni Debata dohot hasintongan di bagasan parngoluonta. Haporseaon tu Debata i do na mambahen asa boi hita gabe marbisuk huhut margoigoihon laho mangulahon i. Tontu marragam do na ingkon taadopi di bagasan parngoluonta laho mamaritahon i, alai marhite topik ni minggunta i ma "Pajonok Hamu ma Dirimu tu Debata," dilehon Debata ma di hita habisuhon asa marpantas ni roha hita laho mamboto manirang angka na sintong dohot na so sintong. Asa tau hita mangulahon dohot mamaritahon Hata ni Debata. Amen.
Posting Komentar