Jamita Minggu 15 September 2024 Minggu Pasampuluonomhon Dung Trinitatis tarsurat di buku Psalmen 116 ayat 1 - 9. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Nunga Dipadenggan Jahowa UhumNa tu Hita." Rap ma hita mangihuthon hatoranganna.
Pendahuluan
Di partingkian si nuaeng on jotjot do jolma marsak jala olo sipata ndang boi tarpodom bornginna i. Nian molo piningkiran songon na asing do i, ndang boi tarpodom hape nunga pola loja di angka parkarejoan parsadarian. Alai tarjalo roha do i, ai godang do jolma na gabe maol modom ala ni angka ponjot ni pingkiran ala ni godang ni sitaonon na borat di ngoluna. Molo tarajumi godang do tutu angka parsoalan manang parungkilon na taadopi. Nang pe nunga tung maju zaman jala lam martamba angka parbinotoan ni angka jolma, alai sipata tung so boi do salpu sitaonon i mamangke angka hamajuon i.
Olo do muse ala ni borat ni sitaonon i gabe sai dirimpu halak na so didongani Tuhan i ibana di ngoluna. Sai dirimpu na mandao Tuhan i. Hape tongtong do Tuhan i mandongani ngolu ni angka na porsea di Ibana. Sai dimatahon Tuhan i do parsorion ni angka jolma na tinompaNa.
Jotjot ala ni dosa ni jolma i umbahen songon na dao dihilala Tuhan i. Sian mulana pe nunga tung mardosa jolma i, jala sahat tu tingki on do panghorhonna. Alai nang pe songon i manongtong do asi ni rohaNa. Sai dihalomohon Tuhan i do asa malua angka na tinompaNa i sian sude dosana. Debata do na paluahon angka jolma i sian angka parsoalan na masa di ngoluna. Jala haluaon na pinatupaNa i, sahat do tu bonana, i ma asa malua sian dosa na niula ni angka jolma.
Psalmen 119 on marisihon angka tangiang pangidoan tu Debata asa dipalua parpsalmen sian gomgoman ni hamatean. Sian panghatindanghonon ni parpsalmen di turpuk on, dihilala ibana do, songon na so margogo be ibana paluahon dirina. Dihatindanghon ibana do aha na hinilalana, didok nunga pola dihaliangi angka rante ni hamatean ibana jala nunga pola mangonai tu ibana hagogotan ni banua toru, mangonai nang hagogotan dohot pardangolan.
Pembahasan
Di bagasan sitaonon na niadopan ni parpsalmen martangiang do ibana mangido pangurupion sian Debata. Parpsalmen mandok mauliate tu Debata ala naung dipalua ibana sian rante ni hamaten, angka hagogotan ni banua toru dohot pardangolan. Ojahan ni Psalmen 116 on i ma "Parningotan di Haluaon Naung songgop." Na parjolo na boi taida sian turpuk on i ma panghatindanghonon dohot haporsean tu Debata. Dihatindanghon parpsalmen do denggan ni parsaoranna dohot Debata. Porsea do ibana paboa Debata do na manjagai nasa parngoluanna, jala Debata do na tuk paluahon ibana sian angka rante ni hamatean i.
Adong tolu alana asa parpsalmen manghatindanghon joujouna di goar ni Debata. Na parjolo, ala naung ditangihon Jahowa ibana, dihatindanghon ibana "nunga diapaeleng pinggolNa tu ahu" (ayat 1 dohot 2). Na paduahon, ala naung dipalua Jahowa ibana sian rante ni hamatean (ayat 3). Na patoluhon, malua ibana ala dipajoujou goar ni Debata (ayat 4), parasi roha do Jahowa jala na bonar.
Hinorhon ni naung nihilala na i di pandonganion ni Debata gabe marlas ni roha ma ibana jala mandok mauliate tu Debata. Di ayat na palimahon dihatindanghon ibana do songon dia holong ni Tuhan i. Di ayat na paonomhon dihatindanghon ibana muse angka pambahenan ni Debata di ngoluna. Sian na dua naung nihilala na i (ayat 5 dohot 6) dihatindanghon ibana asa mulak tondina tu paradiananna i, ai denggn do uhum ni Jahowa, unang pola holsoan, Debata do na mangurupi ibana (ayat 7).
Di ayat 3-6, dipatuduhon do pardangolan ni parpsalmen jala songon na so adong be dalan asa malua sian parungkilonna. Holan sada do dalan na boi diulahon ibana, i ma martangiang mangido pangurupion sian Jahowa. Parasi roha jala na bonar do Jahowa, dialusi do angka tangiang ni na porsea di tingki halehetanna. Ndang diloas hita angka na niasianNa mamolus na masa i marhaporsukon, manang mangolu di bagasan na dangol na so taradopan hita. Alai sai na urupanNa do hita di angka parngoluonta.
Saonari na gabe sungkunsungkun di hita, tu ise do hita manjalo pangurupion molo ro sidangolon tu hita? Jotjot do hita manadinghon Debata, jala sai tapangasahon do haportibion na so boi manalpuhon angka na dangol na di hita. Jotjot tadok na so diurupi Debata hita, hape hita do na sai mandao sian Tuhan i, ndang tajalo pangurupion sian Ibana. Alai baliksa do na taulahon, tauhumi do Debata, jala tajongkali do huasoNa di bagasan parngoluonta.
Na mangihut, na boi taida sian turpuk Psalmen bindu 116 on i ma pangurupion ni Debata dohot alus ni parpsalmen. Tung dihilala parpsalmen do pangurupion ni Debata di na so margogo ibana, dipalua Debata do ibana sian haporsukon i. Boi malua parpsalmen sian pardangolanna ndang na ala ni hagogoonna, manang hapistaranna, daong. Alai marhite huaso ni Jahowa do, di na mangido ibana di pangurupion na sian Jahowa Debata, jala ditangihon Debata do joujouna. Sai dimatahon Tuhan i do ngolu ni angka jolma i.
Nang pe naung madabu jolma i tu dosa mamungka sian si Adam dohot si Hawa jala sahat tu jolma nuaeng do panghorhon ni dosa i, alai sai dimatahon Tuhan i do ngolu ni angka jolma. Diida Tuhan i do angka haporsukon na niadopan ni angka jolma i ala ni angka dosana. Marhite holongNa na balga i, sai dihasiholi do asa malua jolma i sian angka pardangolanna. Balga ni holong ni Tuhan i dipasahat do sahat tu na paluahon jolma sian dosa. Ala ni i, mulak ma hita tu Debata, ai nunga denggan uhum ni Jahowa tu hita angka naung tinompaNa. Unang be mabiar hita pajonokhon diri tu Jahowa, ai Parasiroha jała na Bonar do Ibana.
Kesimpulan dan Refleksi
Manang sadihari pe sai na olo do ro na so hinalomohon ni roha masa di ngolunta, songon naung didok di pamuhai ni hatorangan ni Jamita on, paboa ngolu ni jolma jotjot do disonggopi ragam ni angka parsoalan. Alai marhite Psalmen on, dipaingot hita asa songon dia ma hita mangadopi angka parsoalan na adong i songon halak naung pinalua ni Debata hita. Ingkon adong do pangarimangion di bagasan dirinta paboa na pinalua ni Debata do hita, hinorhon ni i, manang aha pe parsoalan na masa, mangasahon gogo ni Tuhanta, tung uli do sude di ujungna bahenon ni Tuhan i. Angka na uli do pasahaton ni Tuhan i di ngolunta.
Ala ni i, molo naung tarajumi do naung dipalua Tuhan i hita, ndang gabe songon halak na sai mabiar be hita manang songon halak na so diboto sian dia pangurupionna. Tapatogu ma rohanta, unang hita mabiar, sai na paluaon ni Tuhan i do hita.
Sian Psalmen on, marsiajar hita songon dia naung pinatudu ni parpsalmen sian parngoluonna na mangadopi na dangol na tung mansai borat, marhite na dihatindanghon ibana mandok nunga pola dihaliangi angka rante ni hamatean ibana, jala mangonai angka hagogotan ni banua toru, mangonai nang hagogotan dohot pardangolan (ayat 3), alai mangasahon gogo na sian Tuhanta, tarbahen ibana do malua sian pardangolan na niadopanna i. Nang hita pe naeng ma songon parpsalmen i hita di ngolunta, asa manang aha pe na masa di ngolunta, gabe margogo ma hita mandalani saluhutna. Amen.
Posting Komentar