Jamita Minggu 8 September 2024 Minggu Pasampululimahon Dung Trinitatis tarsurat di buku Markus 7 ayat 24 - 37. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Jesus Patupa Hadengganon di Angka na Humurang." Rap ma hita mangihuthon hatoranganna.
Pendahuluan
Evangelium Markus i ma Evangelium naung jumolo ditanda angka huria na parjolo i, andorang so digurithon dope Evangelium na tolu, na mangihut muse. Tutu Evangelium Mateus do buku na parjolo dipajojor ni Padan na Imbaru, alai sian parbinotoan Biblika saurdot do angka pande bisuk mandok paboa Markus do Evangelium natumua. Sian Markus do godang sipatudu tu Evangelium Mateus dohot Lukas. Ianggo Evangelium Johannes asing muse do panguhalan (sumber) ni baritana.
Mardomu tusi mura do antusan angka pandohan (hata) na tarsurat di Evangelium Markus. Didok di bindu 1:1 "On ma mula na Barita na Uli ni Jesus Kristus," lapatanna laho mamaritahon Jesus do hamonangan huhut haluaonta. Di hata Gorik euangelion marlapatan do i Barita na Uli. Barita na Uli dia do ulaning? Ala naung monang hita di parporangan. Uju marporang dua bangso di inganan partongtangan mamintor disuru do sahalak siboan barita tu huta, molo naung talu musu i. Dia ma baritana? "Nunga monang hita!" On ma euangelion. Laos i do dibaritahon Markus di Evangeliumna on. Nunga monang Tuhan i jala talu sibolis. Ingkon baritahononhon do hamonangan ni Tuhan marhite Jesus Kristus tu saluhut houm dohot bangso; ndada holan tu na hisar pamatang dohot do tu angka na marsahit; ndada holan tu halak Israel sambing, tu saluhut bangso do tahe.
Pembahasan
Didalani jala didapothon Jesus do Luat na Asing di Luar ni Hajahudion (ayat 24)
Dung marsoal Jesus tu halak Parise na ro sian Jerusalem borhat ma Ibana tu luat Tirus. Borhat sian luat Nasaret, huta hagodanganNa i tu luat ni angka halak sileban (parbegu). Diajari Jesus angka na torop i asa malua sian pamingkirion ha-jahudi-on na hopit i. Dietong roha ni halak Jahudi (Israel) do na ummarga adatnasida sian angka adat na asing. I do umbahen dipatihi do sahalak Jahudi asa unang saor tu bangso manang halak sileban. Sipata, mamolusi huta sileban pe sitongka do di nasida. Baliksa Jesus ditondong do mandalani luat ni angka parbegu, i ma Tirus. Ndang dialang rohaNa bongot tu sada jabu di luat i. Nian di rohaNa ndang pola botoon ni natorop haroroNa, alai dang tarbahensa.
Sahalak Ina Mandapothon Jesus Asa dipatupa Hamamalum di Boruna (ayat 25)
Ndang piga dan dibege sada inaina ma barita paboa naung di luat i Jesus. Dibaritahon do di ayat on partondi na hodar boru ni inanta i. I do umbahen dihalaputi ro tu Jesus marsinggang, mangido hanamalum di boruna i.
Sahalak Parbegu Mangido Haluaon Sian Jesus (ayat 26)
Tangkas dipabotohon dison paboa parbegu do inaina i, sian bangso Siroponisia. Ndang marpardomuan halak Jahudi tu halak Siroponisia. Alai dipangido ina i do asa dipabali nian Sibolis i sian boruna.
Haporseaon na Togu Sian Sahalak Ina (ayat 27)
Tangkas do alus ni Jesus taringot tu pangidoan ni parompuan Siroponisia i. "Loas jolo bosur angka dakdanak," ninna Jesus. Lapatanna unang ambati hasosonggop ni hatuaon / haluaon na sian Jahowa tu bangso Israel. Ai tu bangso Israel do dipamasa haluaon i. Nasida do bangso naung pinillit ni Jahowa. Di duru ni bangso Israel digombarhon do nasida tu sada hata na tung mansai sungka (kasar). Dipatudos do nasida tu biang. Pahanpahanan na tung mansai lea di pangantusion ni halak Jahudi. "Ndang tama buaton sipanganon ni angka dakdanak, laho mandabuhonsa tu jolo ni angka biang. Naeng dohononna disi i ma paboa Israel (halak Jahudi) do dakdanak (anak ni Debata), alai biang do angka bangso parbegu (bangso Siroponisia pe dohot do disi).
Aut hita ra, olo nama tadinghononta Jesus i alani karas ni hata i. Ai ndang dietong hape hita masuk tu horong ni angka na patut manjalo turpuk hatuaon i. Alai ndang songon i ianggo inaina Siroponisia i. Dioloi jala diihuthon ibana do hata pinasahat ni Jesus i. "I do nian Tuhan," ninna. Dung i udut ma dipatuduhon serep dohot toruk ni rohana. Didok, "Dohot do angka biang, na di toru ni meja i ... ," ninna ibana. Di toru ni meja do angka dongan, ndada songon deba biang si saonari. Lumobi ma di adat ni angka sibontarmata (Eropa) dietong do sipata dos jolma dohot biang. Gari ulang tahun ni biang i pe olo dipestahon tuanna. Tung mansai lea do biang di bagas pangantusion ni angka jolma di turpuk on. "Mangallang pinarpisikpisikhon ni angka dakdanak." Ndada na dinulut sipanganon i, jala ndang bagianna i. Pinarpisikpisikhon lapatanna rimarima do i. I pe paimaonna huhut anahononna do i. Longang do roha mamereng pangalaho ni ina i mangodothon hadirionna. Tutu patutoru diri do dalan laho mangido tu adopan ni Jahowa Debata. Nda tung ala ni angka pambahenanta manang denggan ni parniulaanta. Sola Fidei ninna angka reformator.
Jesus Patupa Hamamalum di Boru ni Sahalak Ina i (ayat 29-30)
Umbege i, pintor dialusi Jesus do ina i, "Ala ni hatami, laho ma ho, nunga ruar Sibolis i sian borumi!" Ndang pola be adong dalan / proses na ingkon sibolusonna, pintor hamalumon sian parsahiton nama jaloonna.
Sahalak na Nengel jala na Mangungu diboan Mandapothon Jesus (ayat 31-32)
Naeng mamolus ma Jesus sian tongatona ni sada huta na margoar sisampulu huta (Dekapolis). Diboan ma sahalak na nengel huhut mangungu tu adopanNa. Adong do na mamboan na marsahit i, ndada na ro sandiri. Tutu ala na nengel huhut na mangungu do ibana, na ingkon do adong mangusung huhut manghatahon pangidoanna. Dielek na mamboan i Jesus asa diampehon tanganNa tu na marsahit i.
Hepata (Mungkap ma) (ayat 33-35)
Diampehon Jesus do tanganNa maradophon na marsahit i? Jumolo do "diboan holang sian na torop," asa tangkas diida angka jolma i aha na masa. "Dijullukhon ma jarijariNa jala marsitijur manjama dilaNa" naeng patuduhon praktik hadatuon naung somal diula di tongatonga ni angka halak parbegu. Dilesemi Jesus do angka pangalaho si songon i laho pamalum angka sahit. Marhosa godang Ibana huhut manaili tu ginjang. Naeng ajaranNa angka jolma i paboa sian banuaginjang (Debata Jahowa) do haroroan ni nasa hamamalum sian parsahiton. "Mungkap ma!" (Hepata!) sada parenta sian banuaginjang laho manotas dalan angka na sompol di pinggol dohot simangkudap ni na ngungu i. Jala tutu masa ma songon i.
Denggan Saluhutna dibahen Jesus (ayat 36-37)
Dipopai Jesus do angka na torop i asa unang dipaboaboa angka na masa i tu angka halak. Dipasiding Jesus do angka roha na paburnangburnang diri. Di hata si nuaeng didok pencitraan. Alai tung so tarbunihon ni angka na torop i do longang ni rohana maradophon angka na masa i. Laos panindangion nasida do mandok nunga denggan saluhutna dibahen Ibana (Jesus).
Kesimpulan dan Refleksi
Haporseaonta mandok haluaon dohot hatuaon do na binoan ni Jesus sian banuaginjang. Tung sude do taruli sian angka na niulaNa i. Alai pigapiga sian hita sai ngotngot sipata rohanta mandok holan hita do pinalua, pinature ni Jesus. Hape ndang, sude do hape. Angka na di bagsan parsahiton pe taruli do di Barita na Uli sian Tuhanta Jesus. Tarsurat gabe halak Kristen ibana manang pe ndang. Tung so tarambatan ni angka bilangbilang ni hajolmaon do asi dohot holong ni roha ni Tuhanta di portibi on. Tahalashon ma holongNa na balga na so hasuhatan i, asa dipature jala dipadenggan luhut gulmit ni ngolunta. Amen.
Posting Komentar