Jamita Minggu 13 Oktober 2024 Minggu Paduapuluhon Dung Trinitatis tarsurat di buku Habakuk 2 ayat 1 - 4. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Halak Partigor Mangolu Binahen ni Parsihohotna Marhaporseaon." Rap ma hita mangihuthon hatoranganna.
Pendahuluan
Panurirang Habakuk i ma panurirang na maringanan di harajaon Juda di Jahudi Selatan. Lomos do roha ni panurirang i ala ni saluhut dosa na diida ibana, i ma: Hasesega, hasusurang di paruhumon, ulaon sipinsangon, gumodang angka halak na jahat sian na burju. Marsak do panurirang i mamereng saluhut na masa i, dipangido ibana do pangurupion sian Debata, alai seolaholah ndang olo Debata mangalehon pangurupion (ida Habakuk 1:2). Alai dipapos Debata do ibana umbahen marhaporseaon jala mangolu di bagasan haporseaon.
Pembahasan
Ayat 1
Di bagasan ayat on dipatuduhon do hasatiaon ni Panurirang Habakuk na sai mar pos ni roha ibana di adopan ni Debata, i ma dipaima jala dihaposi ibana do na adong alus jala huaso ni Debata laho mangadopi saluhut na masa. Sian on boi do tabereng i ma gabe sitiruon do panurirang Habakuk molo marsitaonon hita. Di na marsitaonon panurirang i sai dilului ibana do hasintongan sian Debata. Taringot tu "panatapanhu," "partanobatoan," "manatapnatap," on ma laho patuduhon pangalaho na sabar, sabam jala mar pos ni roha di Debata.
Hatiha i, inganan panatapan, di huta manang di luat, gabe inganan na dipangke laho mangida, mamereng jala mamparrohahon angka musu. Diibarathon Panurirang Habakuk ma ibana tarsongon halak na di panatapan i, waspada ibana jala jaga laho mamereng angka na masa jala paimahon alus sian Debata. Boasa ingkon diibarathon panurirang i ibana tarsongon i? I ma na laho patuduhon haradeonna, hasiaponna dohot benget ni rohana laho manangihon jala manjalo alus sian Debata. Ndang na ulaon na mura nian marsabar, tarsongon panurirang Habakuk on, tarlumobi ma molo niida angka sitaonon na dokdok i.
Ayat 2-4
Dison taida do alus ni Jahowa taringot tu alualu ni panurirang Habakuk i. Mansai ringkot do botoonta, nang pe sai hira na lambat manang sai hira na hurang hatop Debata mangalusi angka alualunta, alai ingkon ingotonta do, sai na ro do alus ni Debata di sungkunsungkunta nang di angka anggukanggukta. Ndang hea tarlambat Tuhan i laho bertindak maradophon angka na masa di parngoluonta.
Dison dipapos Debata jala diapoi Debata do panurirang Habakuk taringot tu na masa hatiha i, asa diuhirhon ibana aha na pinasahat ni Debata. Adong do uhum manang jambar ni angka si ginjang roha dohot na so mangolu di bagasan hatigoran, alai dipatorang Debata do tu panurirang Habakuk, sada konsep taringot tu ngolu na sintong. I ma, halak partigor i mangolu do binahen ni parsihohotna marhaporseaon.
Ingkon disurathon jala diuhirhon panurirang i do asa dipatorang tu saluhut halak asa sude umboto alus ni Debata tu panurirang Habakuk. Boasa? Asa adong mambohali ngolu ni angka na porsea di na manorushon parngoluonna, jala masa ma angka na pinalumehon ni Debata di parngoluan ni jolma.
Di ayat tolu disosoi Debata do asa paimaihon di angka pambahenanNa taringot tu angka na masa. Adong be do tingkina dipamasa Tuhan i angka paruhuman dohot angka na naeng sipamasaonNa. Ingkon sabam do roha ni na porsea laho paimahon i saluhutna, jala tung so tartading. Angka si ginjang roha, i ma jolma na sala dihuasona, ndang ias di bagasan paruhumonna, sisurang di angka parkarejoan jala na mambahen angka jolma na metmet gabe tardegedege jala angka halak partigor gabe taruhum. Alai mangolu di bagasan haporseaon do angka partigor. Ala ni i nang pe di bagasan sitaonon, dihaposi nasida do Debata, tarsongon Panurirang Habakuk na sai satia jala sabar paimahon alus ni Debata taringot tu angka na masa.
Kesimpulan dan Refleksi
1. Mangolu di bagasan Haporseaon.
Haporseaon na mangolu mambahen pamanganta gabe tarbahen hita manghatahon na denggan. Jala ala ni haporseaon i do tong na mangarahon pingkiranta dohot rohanta. Haporseaon mambahen cara pandangta marasing sian portibi on, gabe tarbahen hita mangalapati saluhut na masa na adong di portibi on. Ndang holan sekedar porsea alai mambahen hita tolap mangulahon angka na denggan.
Lam marhaporeaon lam ringgas ma mangulahon angka na tigor, i do umbahen didokhon, halak na tigor mangolu di bagasan haporseaon. Jala haporseaon mambahen hita manat jala tinggil mangalapati saluhutna na masa na di tano on. Ala na adong haporseaonta maradophon hasintongan ni Debata, taboto ma aha sipamasaonta molo marhasangapon hita. Molo mangolu hita di bagasan haporseaonta taboto ma aha do lapatan ni hamoraonta nang songon i hagabeonta. Haporseaon on ma mambahen hita gabe sulusulu di na holom jala tungkot di na landit, ala di bagasan haporseaon do taida angka pangurupion ni Debata.
Haporseaon i do tong na mambahen hita, molo marsitaonon mangalehon di hita panghirimon, ai adong do ari sogot siparadeon ni Debata. Haporseaon i mambahen hita mangarimangi boasa adong ari nantoari, ari saonari jala ari marsogot. Godang do jolma na merasa marhaporseaon alai ditundali do Debata ala ni angka na masa di ngoluna. Hape sian angka na masa i do, sian ngolu si ganup ari asa tarida parbue ni haporseaon i. Tarsongon panurirang Habakuk na sai mar pos ni roha di Debata. Sai manatapnatap ibana, rade rohana manjanghon angka Hata ni Debata di sitaonon na dokdok i, ala ni i tarbahen ibana ma gabe tio pamingkirionna mangadopi angka sitaonon.
Haporseaon i mambahen hita gabe sadar, ai ndang ala ni hagogoonta hape umbahen tarbahen mangolu ro di sadari on. Ndang marlapatan hape saluhutna na di hita i molo so adong haporseaonta laho mangalapati saluhutna i. Jala ditangkasi Martin Luther do i marhite hata Sola Fide (lapatanna hanya oleh iman - holan ala ni haporseaon), asa unang merasa jolma i mangasahon dirina laho mangolu, tarlumobi ma maralohon angka na jat. Tung boasa do didokhon panurirang Habakuk partigor i mangolu do binahen ni parsihohotna marhaporseaon. Ala haporseaon i do na mambohali, manuktuki jala na memimpin jolma i mangulahon nasa na denggan.
2. Mar Hasabamon jala mar Pos ni Roha tu Debata.
Sabam jala benget tarsongon panurirang Habakuk di na laho paimahon alus na sian Debata raringot tu pargulmiton na masa di bagasan parngoluonna. Hasabamon (kesabaran) gabe sada parbue manang bukti ni jolma na porsea. Di bagasan Poda 14:29 didok "Halak na lambat tarrimas do sigodang panimbangon, alai halak na parpiripiri pagodang haotoon." Gabe sigodang panimbangon ma tutu angka na sabam, sabar jala marserep niroha. Ala ni na sabar do Panurirang Habakuk paimahon alus ni Debata dalan laho patuduhon haporseaonna.
Songon dia do huroha hasabaron hinorhon ni haporseaon? I ma tarsongon na didok di Rom 12:11-12, "Unang sumurut ringgas ni rohamuna! Partondi na girgir ma hamu! Oloi hamu ma Tuhan i! Mar las ni roha ma hamu manghirim! Mar benget ni roha ma di haporsuhon! Jugulhon hamu ma martangiang! Amen.
Posting Komentar