Jamita Partangiangan Epistel Minggu 13 Oktober 2024 Minggu Paduapuluhon Dung Trinitatis tarsurat di buku Rom 1 ayat 16 - 17. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Halak Partigor Mangolu Binahen ni Parsihohotna Marhaporseaon." Rap ma hita mangihuthon hatoranganna.
Pendahuluan
Melekat dope pemahaman Judaisme di tongatonga ni huria Rom hatiha i. Jala adong dope pangantusion na mandok ala ni mangulahon Patik do jolma asa dapotan haluaon. Hape ndang si songon i na niantusan ni Apostel Paulus taringot tu haporseaon ni halak Kristen na sasintongna. Lumobi ma hatiha i mansai parir do na masa tu halak Kristen, ala dipalealea jala digosagosa kesar Rom. Adong do habiaran jala pandelean sipata na ro tu halak Kristen uju i. Ala ni i, marsampur ma angka ragam ni parungkilon. Muse naeng ringkot halak Gorik na naeng gabe siihuthon Jesus alai gabe parsoalan ma on. Dison ma taida boha do panindangion ni Apostel Paulus laho pasaehon jala patoranghon na denggan tu Huria Rom.
Pembahasan
Ayat 16
Barita na Uli (euangelion manang "Injil" di bagasan bahasa Indonesia). Boasa do tung didok Apostel Paulus tu huria Rom "ai ndang huhailahon ... " ala Barita na Uli i do hagogoon ni Debata, on ma sada pernyataan na penting sian na gabe sada naposo ni Debata na mangharingkothon dirina laho mambaritahon Harajaon ni Debata. Dipagarang jala ni pabaranihon Apostel Paulus do dirina, ai ndang maila ibana laho mambaritahon Barita na Uli i. Hatiha i angka na porsea di Huria Rom olo do gabe maila, boasa, ala sian panindangion ni hajolmaon ndang jolma na membanggakan Jesus. Apalagi Jesus mate tarsilang, sada cara hamamate na lea nang pe hehe Ibana sian hamatean i. Jala hatiha i pe ndang na muramura jolma laho marhaporseaon tu Barita na Uli i, alana manang ise na barani jala na tardapot siihuthon Jesus leleon ni halak ni kesar Rom do nasida asa dipamate. Godang do halak na porsea di Huria na parjolo i na gabe agoan hosa ala ni haporseaonna. Alai adong do na maila jala mabiar, gabe ditundali Jesus i tarsongon na hea masa tu si Petrus (ida Mateus 26). Jadi disosoi Apostel Paulus Huria Rom asa unang pola maila jala unang pola mabiar laho marhaporseaon. Jala didokhon do ia Barita na Uli i do hagogoon ni Debata na paluahon nasa na porsea jala mambahen nasa na porsea marhagogoon.
Boasa ma tung apala holan halak Jahudi dohot halak Gorik na targoar di bagasan turpuk on? Jadi konteks di Huria Rom na mayoritas sian dua, i ma Jahudi dohot Gorik. Boasa halak Jahudi na parjolo? Ala haluaon i jumolo do disaorhon tu halak Jahudi naung manjalo Patik ni Debata. Patik i ma Hata ni Debata na gabe sitiruon jala na mangajari pardalanan ni ngolunasida. Alai ndang sadar nasida ai jolma na mardosa do nasida. Sipata gabe pilit do panindangion ni nasida taringot tu Patik i, diboto do alai ndang diulahon, i do umbahen di Matius 23 dipabotohon Jesus angka na sala, ai ndang saurdot pangalaho ni nasida dohot Patik i. Ro ma Jesus laho pasauthon luhut Patik i, ai ndang boi singkop tarula jolma saluhutna Patik i. Dihaholongi si Paulus do halak Jahudi jala ibana pe najolo halak parugamo Jahudi do. Jala mansai ringkot do di Apostel Paulus laho mamaritahon Barita na Uli. Jala tarutang do si Paulus molo ndang dibaritahon ibana Barita na Uli i. Marhite turpuk on do tabereng, i ma haluaon na sian Tuhan i, ndang be holan tu halak Jahudi, alai dohot do tu halak Gorik dohot tu saluhut bangso. Ndang na muramura aha na niulahon ni Apostel Paulus on, laho pamasukhon halak Gorik laho si jalo Barita na Uli molo niida ai halak ugamo Jahudi hian do si Paulus. Alai dibaritahon ibana do Barita na Uli i ndang holan tu halak Jahudi alai ingkon do dohot halak Gorik jala saluhut bangso.
Ayat 17
Aha do na boi taida sian Barita na Uli i? I ma hatigoran ni Debata. Jala marhite turpuk on ma tabereng kekhasan ni Iman Kristen maradophon angka ugamo ugamo na asing "na sian haporseaon tu haporseaon ... mangolu do partigor hinorhon ni haporseaonna." Haporseaon (iman) di bagasan hata Gorik i ma pisteos sian hata pistis na marlapatan "haporseaon." Di bagasan Heber 11:1 dipatorang do "Alai anggo haporseaon i, pos ni roha do i di angka sihirimon, jala pamotoan na tontu taringot tu na so niida." Huaso ni Barita na Uli i mamboan jolma ruar sian hangoluan ni haportibion jala mamboan jolma tu cara pandang na imbaru, i ma sian haporseaon. Barita na Uli i ingkon do dipabotohon tu saluhut bangso asa porsea nasida. Didokhon do di bagasan Rom 10:17 "asa sian na tumangihon do ro haporseaon ... " boasa tung mansai penting taringot tu haporseaon on? Di hatiha i adong do pangantusion, ai ala ni na mangulahon Patik do umbahen dapotan haluaon jolma i, na deba mandokhon ala na marpangalaho na burju do. Alai on ma perbedaan ni halak Kristen dohot halak na so Kristen, i ma "haporseaon tu haporseaon" halak na mangulahon na denggan belum tentu porsea, alai jolma na porsea i ingkon do mangulahon na denggan. Haporseaon i do na mamboan hita mangulahon nasa na denggan. Marasingasing do panaandaan ni jolma taringot tu aha do na denggan. Alai haporseaon mambahen hita marningot Barita na Uli (Injil) na gabe tolak ukur ni pangalaho na denggan. Jala dikutip Apostel Paulus do Habakuk 2:4 laho pa tang aha na nidokna i taringot tu haporseaon.
Kesimpulan dan Refleksi
Nunga dipatorang tu hita Barita na Uli i ma Hagogoon ni Debata. Molo ndang marhagogoon hita, ndang tarbahen hita laho mardalan, nang pe apala pigapiga langka. Isarana jolma na male, gale, gabe ndang marhagogoon ala ndang marsipanganon alai disuru laho mardalan mansai dao, ndang tarulahonsa i, alana ndang adong gogona. Jala songon i do nang parngoluon on. Ndang tarbahen hita mamolus jala mandalani ngolu on molo ndang marhagogoon hita.
Sian dia do dapotta hagogoon i? I ma sian Barita na Uli na sian Debata. Aha do huroha didokhon di bagasan Barita na Uli i na mambahen hita marhagogoon? Sian godang ni nas, tapillit ma dua. Na parjolo, Mateus 28:20 " ... ai ida ma, sai na dongananHu do hamu ganup ari, rasirasa ro ajal ni hasiangan on." Na paduahon, Mateus 11:28 "ro ma hamu tu Ahu, hamu angka na loja jala na sorat, asa Hupasonang hamu" mansai uli situtu angka Barita na Uli i.
Nang pe porsea hita, alai ndang gabe mago sitaonon i. Ro do sitaonon, alai bedana, gabe tajalo do hagogoon na sian Debata di na mamolus sitaonon i hita. I do na mambahen asa marhagogoon hita, ala ni Barita na Uli i. Porsea ma hita di Barita na Uli i, asa marhagogoon hita mangadopi parngoluon on.
Posting Komentar