Jamita Minggu 29 Desember 2024 Minggu Dung Natal tarsurat di 1 Timoteus 1 ayat 12 - 17. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Mandok Mauliate di Saluhut Denggan Basa ni Jahowa." Rap ma hita mangihuthon hatoranganna.
Pendahuluan
Masuk tu horong surat parmahanion do surat on, diparmahani Apostel Paulus si Timoteus, ianakhonna mangihuthon partondion. Borhat sian pengalaman ni Apostel i, di balga ni denggan basa ni Tuhan i naung sahat tu ibana. Panandaon ni Apostel Paulus di denggan basaNa i, naeng gabe pangonjar hahinsaon ni roha di panghobasion ni si Timoteus di na mangulahon tohonan haparhaladoonna. Asa songon semangat ni Apostel Paulus di ulaon parbaritanaulion i, ala naung jumolo didai ibana denggan basa ni Tuhan i, na sai lambas roha ni Tuhan i marnida pangalaho ni ibana andorang gabe ApostelNa.
Sada sian parrohaon ni Debata na lambas marroha i, naeng suan di roha nang pangalaho ni anak partondionna si Timoteus. Nunga jumolo dihangoluhon Apostel Paulus parrohaon na songon i na sai lambas rohana di na manghobasi Tuhan i marhite pararathon Barita na Uli i. Manang beha pe ragam ni hamaolon nang parungkilon sahat tu na talpe tu hamatean, manongtong do ibana sahat ro di ujung ni ngoluna manghatindanghon Kristus Sipalua tu angka sipelebegu i. Naeng gabe tiruan ngolu ni Apostel Paulus tu si Timoteus marhite surat on.
Pembahasan
Panindangion ni Apostel Paulus di turpuk on boi disagi gabe 2: parjolo ayat 12-14 jala paduahon ayat 15-16. Na dua bagian on adong hasejajaronna, i ma na mangondolhon parngoluonna andorang so marhamubaon jala dung marhamubaon (gabe Apostel ni Kristus). Dihatindanghon ibana rumang ni holong ni Kristus jala secara langsung dipasahat ibana mauliate ni rohana tu Tuhan i. Ala dietong Tuhan i ibana jolma haposan, umbahen dipabangkit gabe parhaladoNa. I do apala na gabe ojahan ni Apostel Paulus di na pasahathon mauliate ni rohana tu Tuhan Jesus Kristus. Tontu hak ni Tuhan i do mamillit ise na gabe parhaladoNa. Ndang pola manimbangi beha do parngoluon ni jolma na pinillitNa i. Saluhutna tung saguru lomo ni rohaNa sambing do. Paretongan ni Tuhan i tu si Paulus na mandok "haposan" marojahan sian habasaronNa. Jala toho do paretongan i, ala tung haposan do si Paulus di angka na pinasahatNa tu ibana, na ingkon sihobasanna.
Tung mananda diri do Apostel Paulus ai didok ibana do "panginsahi, pangalele jala siulahon gogo (orang yang penghujat, penganiaya dan ganas). Songon i ma rumang ni ngoluna andorang so gabe apostel. Mangihuthon pikiran ni hajolmaon mansai bangkol do tarjalo roha. Alai molo di Debata ndang adong na so mungkin, ndang adong na so tarpatupa Debata, sian na bengkok boi do gabe tigor, sian na jogal boi gabe lampot, sian parjahat gabe jolma na burju, dohot na asing. I do na hinatindanghon ni Apostel Paulus tu si Timoteus. Huaso holong ni Tuhan i boi maruba angka na so mungkin mangihuthon pamingkirionta.
Sai na umbalga do holongNa sian rimasNa. Nang pe hea ibana gabe pangalele siihuthon Kristus di na so pamotoanna, ala dietong ibana i halomoan ni Debata. Alai tong do dietong ibana i gabe dosa, haru dosa na niula na so sian pamotoan pe ringkot do pardamean (patudos Heber 9:7; 3 Musa 5:15-19). Mansai bagas do panolsolion ni dirina di angka ulaonna nasailaon i, na sai mangalelei siihuthon Kristus. Di bagasan panolsolionna i boi jumpangna holong satia na sian Kristus i, songon na nidokna di ayat 15 "nunga ro Kristus Jesus tu portibi on, paluahon angka pardosa; sian angka i do ahu na parjolo." (Di antara orang berdosa, akulah yang paling berdosa).
Reformator Martin Luther mandok "The recognition of sin is the beginning of salvation" (pengenalan akan dosa adalah permulaan keselamatan, panandaonta di dosanta gabe mula ni haluaonta). "Be a sinner and sin mightily, but more mightily believe and rejoice in Christ" (jadilah orang berdosa, dan berdosalah dengan hebat, tetapi percayalah kepada Kristus dan bersukacitalah dalam Kristus lebih hebat). Tontu ndang gabe didok hita asa torus mangulahon dosa, manang manuntun mardosa, ala gabe maralo tu surat Rom 6:1-2. Lapatan ni pandohan ni Martin Luther i ma nang pe hita jolma pardosa, alai haporseaon tu Kristus boi mangatasi saluhutna dosa i, siala ni i do ingkon sai marlas ni roha hita.
Molo tapamanat ayat 16 patuduhon klimaks panindangionna sahalak na mardosa, na sapatutna hona uhum, alai justru sabalikna do na nidapotna. "Alai ala ni on do, umbahen na diasi i ahu: naeng jumolo marhite sian ahu patuduhonon ni Kristus sandok lambas ni rohaNa i, bahen tiruan di angka na naeng porsea." Asa gabe hagogoon na mangonjar hinsa ni roha ni si Timoteus di ulaon panghobasionna tu joloan ni ari, asa disurathon ibana surat na on. Di Minggu Dung Pesta Natal on, ringkot do tapahusorhusor hata on, asa hita pe angka parhobas di tongatonga ni huria i, nang di angka panghobasion na asing pe, gabe hagogoon na mangonjar hinsa ni rohanta ma surat on. Ala naung jumolo tapaidaida jala tadai balga ni holong ni roha ni Debata maradophon hita. Las ni rohanta di Pesta Natal naung tahalashonon i gabe sai manamba, semangatta mulaulaon, palashon roha ni Tuhan i.
Jumpang ma klimaks ni pamujion ni Apostel Paulus di ayat 17 "Hamuliaon dohot hasangapon salelenglelengna ma di Raja na so marmula i; i ma Debata na manongtong, na so dapot idaon, na mamunjung i." Tarida sian ayat on parolopolopon ni roha ni Apostel Paulus di na manghamauliatehon denggan basa ni Tuhan i. Habagason roha mauliatena tu Kristus i, gabe sada panindangion na mansai arga di hadirion ni si Timoteus nang tu angka jolma siihuthon Kristus ro di ombas on. Haru tu si Paulus jolma na tardok "pangalele" songon i ma balga ni holong ni Kristus tu ibana (Yunani "kharis," kasih karunia; holong satia). Boi nilapatan: "parsangapion, penghargaan; pangasion, pengasihan; pambohalion, pembekalan. Angka on ma naung nilehon ni Tuhan i tu si Paulus, Timoteus nang tu hita angka parhobas di huria i, nang parhobas di ulaon na marragam i. Siala ni i tung tama do hita mandok mauliate tu Ibana, Raja na marhuraja sian mula ni panompaon i, ro di panompaon na imbaru.
Mandok mauliate di saluhut denggan basa ni Tuhan i, i do alus na niigil Tuhan i sian hita. Ala ndang tolapta laho mambalos angka denggan basaNa i. Holan roha mauliate do, alai roha mauliate na boi pinataridahon marhite parbue ni holong. Mamelehon sandok gulmit ni ngolunta nang nasa na adong di hita gabe pelean na hushus tu adopanNa. Molo nirimangan saluhut denggan basa ni Tuhan i, ndang habilangan hita jala ndang taretongan hita di ngolunta on.
Kesimpulan dan Refleksi
Ingkon rajumanta do ia ngolunta on nunga diparbohali marhite bisuk nang hasintongan ni Hata ni Debata di nasa panghobasionta. Godang do jolma naung umboto jala mandai denggan basa ni Tuhan i, alai sai na bangkol dope pasahathon mauliate ni rohana. Tanda hamauliateon tu Tuhan i ndang holan di hata, alai lobi sian i ingkon tarida marhite parniulaan, panggulmiton ni ngolu siap ari. Songon pandok ni Apostel Paulus di Surat Pilippi 2:12 "mardongan biar dohot lomos ni roha ulahon hamu ma haluaonmuna!"
Ringkot do taparidahon roha mauliate di denggan basa ni Tuhan naung taparsaulihon di bagasan ngolunta. Tu ise? Parjolo tu na jumonok hita, isara ni dongan saripe, ianakhon, natuatua, hombar balok, dongan sahuta nang sahuria. Las ni roha di tingki Natal jotjot do dipatupa marhite pasahathon silehonlehon tu na hurangan, tu na so marama so marina dohot na asing. Saluhutna i gabe responta/ alusta paboa jolma na porsea tu Tuhan i. Taulahon ulaon holong i ndang asa lam ditambai angka ondeng i tu hita, ala naung jumolo do dipasahat Tuhan i tu hita ragam ni na ringkot di ngolu. Ala naung tatanda jala tadai do denggan basa ni Tuhan i di ngolunta on. Amen.
Posting Komentar