Jamita Natal II 26 Desember 2024 tarsurat di Psalmen 98 ayat 1 - 9. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Jahowa Papatar Hatuaonta." Rap ma hita mangihuthon hatoranganna.
Pendahuluan
Psalmen 98 on sarombang tu na ginoaran Psalmen na mangondolhon hahuasaon ni Debata songon sada Raja naung manghamonanghon sada parporangan (93, 95 - 99). Turpuk on marisihon panindangion dohot pamujion ala haluaon na pinatupa ni Debata maradophon bangso Israel. Dipapujipuji parPsalmen on Debata ala balga ni holong satiaNa tu bangsoNa i. Nang pe jotjot bangso i manimbil sian dalan hasintongan i, alai sai torus do diingot Debata padanNa maradophon bangso i. Pujipujian di Psalmen on bidang do hinanghamna, parjolo patuduhon pujipujian sian angka jolma na pinillitNa i (1-3). paduahon saluhut jolma pangisi ni portibi on (4-6), patoluhon pamujian na pinasahat ni saluhut nasa na tinompoa, tano dohot laut ro di sude pangisina (7-9).
Molo tarimangrimangi di parngoluonta on, tung godang do sasintongna na boi mambahen demak panghilalaanta jala mansai sonang sohariboriboan. Ala ni i gabe taronjar rohanta pasahathon pamujion i tu Debata. Nang pe sabalikna godang do tong jolma i na bangkol manghamauliatehon angka denggan basa ni Jahowa naung sahat di ngoluna. Di pesta Natal na paduahon on, marhite Psalmen on naeng pahusorhuoronta balga ni pambahenan ni Debata di ngolunta, lumobi di bagasan Jesus Tuhanta i. I ma apala ojahan ni las rohanta sadari on. songon las ni roha ni parpsalmen i. Tasigati ma hamoraon ni Hata ni Debata marhite turpuk Jamita on.
Pembahasan
Adong dua hamamasa haluaon bolon na pinatupa ni Debata di pardalanan ni bangso Israel na mansai lohot di roha nang pikiran ni bangsoNa i, jala na sai dimemehon sian sundut tu sundut. I ma haluaon sian parhatobanan Misir dohot sian tano habuangan Babel. Sian sejarah na dua on ma gabe dasor nasida pasahathon pujipujian nang hasangapon tu Debata. Tung tanda halongangan do na masa i di ngolu ni bangsoNa i nang di adopan ni bangso na asing pe. Sai na monang do di parporangan bangsoNa i, ala Debata na mandongani nasida. Saluhutna naung pinatupa ni Debata i, marojahan di hasatiaon ni Debata di padanNa laos patuduhon hatigoran nang hasintonganNa tu portibi on. Siala ni pambahenan ni Debata i ma, na mangonjar bangso i manongtong mangendehon ende na imbaru. Ende na imbaru on ma hataridaan roha mauliate nasida.
Habalgaon huaso ni Debata na paluahon bangso Israel dipasingkop di bagasan Jesus Kristus. Natal boi do dilapati hagogok ni holong ni Debata tu nasa jolma dohot portibi on marhite huaso ni Debata di bagasan Jesus, Debata na gabe jolma. Haluaon na pinatupa ni Debata di bagasan Jesus Kristus dang terbatas be holan tu Israel alai manghangham saluhut bangso nang nasa na tinompa i. I do umbahen didok parpsalmen asa pamujian tu Debata ndang holan sian bangso Israel, dohot do nang sian nasa na tinompa i nang saluhut bangso. Pemulihan na pinatupa ni Debata di bagasan Jesus Kristus, i ma pemulihan total, sude naung sanga sego i hinorhon ni dosa. Di bagasan Jesus ma puncak/ hagogok holong ni Debata.
Digombarhon Psalmen on do "ritual penobatan Raja," Raja na sangap marmulia na monang manaluhon angka musu. Songon Raja Daud uju mulak sian parporangan dung monang manaluhon musu ni Israel, ditomutomu angka jolma na nirajaanna marhite ende las ni roha nang tortor mardongan uninguningan/ alat musik. Psalmen 98 on ma na gabe puncak halalas ni roha nasida di hamonangan manaluhon angka musu. Molo tarefleksihon di ngolu ni hakristenonta nueang, manongtong do habalgaon huaso ni Tuhan i margogoihon hita angka na porsea i. I do umbahen monang angka na porsea i manaluhon sorop ni sibolis. Sorop ni sibolis na mangula di hadirion ni jolma i na sai mangela asa mangulahon dosa nang roha diri. Nang angka hamaolon ni ngolu na boi paholanghon jolma i sian Debata. Boi dihamonanghon saluhutna mardonganhon huaso ni Debata di bagasan Jesus Kristus.
Marningot sude denggan basa ni Jahowa i, naung paluahon hita sian rante ni sibolis i. Patut ma antong asa ndang marnamontok hita pasahathon mauliate ni rohanta marhite ende pujipujian mardonganhon/ marangkup arbab, sarune dohot soara ni sangka. Tung saluhut ma tahe angka alat musik na adong i, on ma gombaran pamujian na totalitas. Pamujian tu Debata sasingkop ni singkopna. On do na pinangido ni psalmen on. Asa molo mamuji Tuhan ingkon total do, dang alangalang. Ala Tuhan i pe patupahon haluaon di hita sian totalitas ni holongNa do na tangkas idaonta di bagasan Jesus Kristus.
Di ayat 9 dipabotohon ia ulaon ni Tuhan i ndang holan paluahon jolma i sian gomgoman ni sibolis pangago, alai dohot do laho manguhum. UhumonNa ma portibi on marhitehite hatigoran dohot angka bangso marhitehite hasintongan. Di hata Heber ia hasintongan didok "tsedeq." Hata on jotjot dihonahon tu siihuthon Ibana, manang halak Kristen. Tsedeq lapatanna mangulahon na sintong. Borhat sian lapatan ni hata on ingkon mangulahon na sintong do molo gabe jolma siihuthon Kristus. Ingkon tandi ngoluna sian na asing na so siihuthon Kristus dope. Ndang boi sarombang ngolu ni halak Kristen dohot angka jolma na nirajaan haportibion dope. I ma na gabe tanggungjawab ni halak Kristen saleleng mangolu dope.
Marhite Psalmen 98 on diarahon do asa sai tapujipuji Tuhan i, Tuhan na marhuaso mangatasi angka huaso-huaso na adong di sandok portibi on. Mangarahon nang saluhutna pangisi ni tano on mamestahon habalgaon habangsa ni harajaon ni Tuhan i. Pamujian marangkup alat musik na adong di jolma i nang sian angka na tinompa ro di saluhut sian angka bangso na marragam i. Lumobi ma di pesta Natal na paduahon on, tung saluhut halak Kristen di sandok portibi on muba do las ni rohana sian na somal. I do patandahon naung diauhon halak Kristen di ngoluna. Debata na marhuraja di ngoluna nang di atas tano on.
Songon dia do hataridaan hasintonganNa di portibi on? Tontu marhite angka na manghaporseai Tuhan i. Gabe parhiteanNa ma hita patuduhon huhut mandalanhon sangkap hatuaon ni Debata. Boi ma idaon nang daion angka jolma na asing hasintongan ni Debata i marhite panggulmiton ngolu ni halak Kristen. Asa boi angka na asing i tartait gabe mangihuthon lomo ni roha ni Tuhan i nang dalan hasintongan na sian Tuhan i. Gabe tangkas ma tarida hatigoran, hasintongan nang haulion na tinompa ni Debata songon di mula ni panompaon i.
Kesimpulan dan Refleksi
Pangantusionta raringot sada hal, laos dihatiha i do hita mambahen gombaran (framing) taringot aha naung taida, tabege, tahilalahon jala tahangoluhon. Molo talapati ngolunta on gabe sada kesempatan jala pasupasu sian Tuhan i, i do gabe hataridaan gombaran ni ngolunta. Kualitas ni ngolunta ditontuhon marhite "bingkai" na tabahen i. Molo diarahon hita asa mangendehon ende na imbaru di turpuk on, marangkup sude alat musik, ala naung jumolo do Ibana patupahon angka halongangan di ngolunta. Angka halonganganNa naung patar diida jala didai angka jolma i mamuhai sian na jolo songon binaritahon di Padan na Robi, Padan na Imbaru sahat tu si saonari nang tu ari na mangihut. Ende na imbaru on diendehon dohot roha na imbaru nang pangalaho na imbaru. Ende na imbaru marlapatan "proses pembingkaian ulang" marhite pangulahonon na lobi denggan. Songon pandohan ni Reformator Martin Luther, gareja na tutu, i ma gareja na sai paimbaruhon panghobasionna (eklesia reformata semper reformanda).
Antong taauhon ma haluaon na pinatupa ni Debata di ngolunta, ai tung na balga do pambahenanNa, naung tangkas taida jala tahilalahon marhite Natal, Debata na olo gabe jolma. Marhite Jesus dipatuduhon Debata habalgaon ni holongNa nang huasoNa asa sonang nasa jolma na olo manjanghon haluaon na pinatupaNa i. Molo dung sonang angka na nirajaanNa i, adong ma balosna sian nasa jolma marhite na pasahathon ende pujipujian, ende na imbaru mardongan parhinaloan, uninguningan gabe pujipujian nang hasangapon di Ibana. Amen.
Posting Komentar