Jamita Minggu 2 Februari 2025 Minggu Paopathon Dung Epiphanias tarsurat di Psalmen 71 ayat 1 - 6. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Jahowa do Dolok Batu dohot Partanobatoanta." Rap ma hita mangihuthon hatoranganna.
Pendahuluan
Di parngoluon on tontu hea do hita mangido pangurupion sian angka dongan. Mangido pangurupion do hita tu dongan na taetong tuk jala boi mangurupi hita. Mangido pangurupion patuduhon keterbatasan manang hagaleonta jala mangharingkothon pangurupion sian halak na gumogo sian hita. Somal do halak na mangido pangurupion uju masa sitaonon, parungkilon manang ragam parsorion. Ringkot do hita mangido pangurupion tu angka dongan na boi mangurupi hita mangadopi sitaonon, parungkilon manang ragam parsorion asa margogo hita mangadopi saluhutna i.
Turpuk ni Jamita on marisihon tangiang ni sahalak na mangido pangurupion dohot gogo songon i nang panumpahion ni Debata di na masa sitaonon, arsak dohot ragam ni parsorion di ngoluna.
Pembahasan
Torop do angka na bisuk mandok ia Psalmen 71 on i ma udut ni tangiang ni si Daud. Martangiang do si Daud mangidohon tu Debata pangurupion dohot haluaon sian ragam ni haporsuhon dohot sitaonon na masa di ngoluna, tarlumobi di hatuaon ni umurna. Alai molo taida isi ni tangiang di Psalmen 71 on digombarhon do hamaolon dohot sitaonon na mansai dokdok na niadopan ni sasahalak manang sada bangso. Molo dilapati do turpuk on taringot sitaonon ni sasahalak, i ma na masa tu si Daud tontu boi do martudutudu tu sitaonon, hinahansit dohot parsorion na masa di ngoluna di pangarimason ni si Saul na naeng mamunu ibana. Alai molo dilapati do turpuk on taringot tu sitaonon ni sada bangso, i ma bangso Israel martudutudu ma on tu masa habuangan. Masa habuangan i ma masa hapariron, sitaonon manang parsorion na niadopan ni bangso Israel. Bagas joro, na nilapati inganan hamianan ni Jahowa Debata, na mian do Debata di tongatonga bangso Israel nunga malengse. Ndang adong be hataridaan ni bangso i gabe sada bangso na bolon. Ndang adong bangso na olo mangurupi na olo mampargogoihon bangso i sian haporsuhon dohot sitaononna, ndang adong pangalualuanna.
Uju na masa saluhutna i ma dihatindanghon parpsalmen, Jahowa do haporusanNa. Hata marhaporusan di turpuk ni Jamita on i ma patuduhon hadirion ni parpsalmen na gale jala na so margogo mangadopi angka hamaolon na masa. Diharingkothon do pangurupion dohot gogo na ro sian luar ni hadirionna, na olo mangurupi asa malua sian hamaolon dohot sitaonon na masa. Boi do jolma marhaporusan tu arta manang sinamot na adong di portibi on, ala dihangoluhon ibana do arta dohot sinamot do dalan haluaon tu dirina. Halak si songon on ma na jotjot mandok: hepeng do na mangatur saluhutna. Adong do jolma na marhaporusan tu donganna. Alai ringkot do botoonta, maol do jumpang pangurupion sian halak na so manghirim di balos sian na niulana. Molo pe adong na si songon i, martingki jala marsuhat do halak mangurupi hita; ndang na boi angka dongan tongtong mangurupi hita di ganup tingki. Turpuk ni Jamita on manjamitahon tu hita, Jahowa do na tau haporusanta di ganup tingki. Na so marpansohotan do Jahowa mangurupi hita. Ragam do dalan ni Debata laho patuduhon na tau Ibana do haporusanta, patuduhon hagogoonNa na so hatudosan i tu angka bangso di angka jolma na tongtong marhaporusan tu Ibana. Ndang tagamon murak ganup na mambahen Jahowa haporusanNa. Di panghilalahon parpsalmen do pandonganion, pangaramotion dohot panarihonon ni Jahowa di ngoluna di na masa sitaonon dohot na hansit di ngoluna. Marhite saluhut pambahenan ni Jahowa Debata, salpu ma sitaonon i jala salpu ma na hansit songon naung dihilala ibana. Jahowa do na paulihon ngoluna dohot pasingkophon na ringkot di ngoluna.
Di tongatonga ni ragam parsorion dohot sitaonon na masa i mangido do parpsalmen di haluaon marhitehite hatigoran ni Jahowa. Ndada marhitehite hasintonganna, hadirionna, ulaon na denggan angka naung binahenna di tingki na salpu, jala ndada sinamot dohot arta na dipangasahon ibana di na mangido haluaon tu dirina. Mangasahon hatigoran ni Jahowa, marpardomuan ma i tu hasintongan dohot hatigoran uhum ni Debata (keadilan Allah). Hasintongan dohot hatigoran ni Debata maralo do i tu dosa dohot ragam ulaon na so marpardomuan tu hasintongan dohot hatigoran ni Debata. Saluhut upa tinuhor ni dosa dohot ulaon na jat, i ma hamatean. Hamatean ndada holan dilapati hamatean di pardagingon alai hamatean di partondion na manghorhon hasesega di parsaoran na denggan maradophon Debata dohot dongan jolma. Masa ma parporangan, parsalisian, nang ragam bangko na jat na asing.
Andorang masa hasesega ni harajaon Israel, jotjot do diulahon bangso i angka ulaon na maralo tu hasintongan dohot hatigoran ni Debata. Jotjot do dipaingot Debata bangso i marhite angka panurirang laho marhamubaon ni roha jala manadinghon angka ulaon na jat i, alai ndang ditangihon nasida. Songon upa ni ulaon na jat dohot dosa, masa ma hasesega di bangso Israel. Digombarhon do masa habuangan i, i ma masa songon uhum ni bangso Israel. Malengse bagas joro songon i nang pangarajai ni bangso i malengse saluhutna. Tarbuang halak Juda tu Babel deba ma i gabe hatoban, deba gabe parhobas harajaon ni Babel. Hansit do dihilala halak Israel na masa i jala manosak situtu. Ise jala aha ma na boi bahenon asa malua sian saluhutna i? Asyur dohot Misir pe ndang barani mangampini Israel maradophon harajaon Babel na niuluhon ni Nebukadnesar. Murak ma parngoluan ni Israel hinorhon ni hamamasa ni habuangan i.
Di na masa saluhutna i ma ma mangido haluaon parpsalmen marhitehite hatigoran ni Jahowa. Dos lapatan ni pangidoan on tu mangido asi ni roha ni Jahowa laho manobus dohot mamintori bangso i sian angka dosa. Mangidohon asi ni roha ni Jahowa laho pauliulihon Israel mulak songon bangso na bolon, na ginomgoman di bagasan hasintongan dohot hatigoran uhum ni Jahowa. Diparhatopot parpsalmen do Jahowa do partanobatoanna, tau inganan bongotanna tongtong. Partanobatoan marlapatan inganan parlinggoman, inganan partabunian sian musu, jala boi do gabe pangunsandean, inganan laho manio manang laho maradi laho mangalap hosa loja (tempat istirahat). Partanobatoan, i ma dolok batu na so jadi munsat na pataridahon pangurupion dohot pangondianon ni Jahowa Debata na so jadi munsat jala na so tupa muba. Padan asi ni roha ni Debata na so jadi munsat sian angka na niasianNa.
Diparhatopot parpsalmen do paboa holan tu Jahowa do pangunsadeonna sian bortian pe. Marhite parhatopotonna i, idaonta ma pos ni roha parpsalmen na polin tu Jahowa. Molo mangunsande jolma tu pangunsadean, tontu nunga sonang dihilala (hidup lebih tenang, nyaman dan tidak ada rasa khawatir) ndang masa be ganggu ni roha manang bohabohaon ala nunga adong pangurupion na tontu di ibana, i ma sian Jahowa Debata.
Kesimpulan dan Refleksi
Nunga tabolus sabulan di taon na imbaru. Molo masa taon na imbaru sai tadok do taon parasinirohaon, taon na gok panghirimon dohot ragam angka pangidoan. Alai ganup taon sai masa do ragam angka parsorion di pardalanan ni ngolu. Dengan kata lain, setiap tahun selalu ada pergumulan, penderitaan terjadi, walaupun pergumulan atau penderitaan itu lebih ringan atau bahkan lebih berat dibandingkan dengan tahun yang lalu. Dihatindanghon parpsalmen on do tu hita saluhutna, manang aha pe na masa di pardalanan ni ngolu, nang pe masa angka parsorion manang na dokdok di partingkian saonari dohot na naeng ro, adong do Jahowa, Debatanta na so tupa munsat padan asi ni roha dohot padan pangaramotion dohot pandonganionNa tu ganup jolma na sai manghirim di pangurupionNa.
Molo pe nuaeng godang na tapingkiri, dokdok sitaononta, hansit parniahapanta jala sai bobonosan hita laho mandalani ngolu on, songon na didok di Psalmen 71 : 1 - 6, paboahon tu hita na rade do Debata gabe inganan parlinggoman, pangunsandean laho paluahon hita sian angka na porsuk. Ibana do na mampargogoihon hita mandalani dohot manalpuhon saluhut na masa di hasiangan on. Songon i do nang angka sitaonon dohot parniahapanta. Pos ma rohanta di panarihonon dohot di pangaramotion ni Jahowa Debatanta. Ibana do na manumpakhon tu hita hahisaron ni pamatang, jala mangalehon tu hita gogo na imbaru. Tubu ma angka si las ni roha, tubu ma panghirimon dohot hahisaron ni daging laho mandalani ngolu on. Ai ndada punjung hita di saluhutna, alai sai didongani jala dipargogoi Jahowa do hita di saluhutna. Marsihohot ma hita manghaporseai jala marhatopothon: Jahowa do pangurupi di hita dohot partanobatoanta sahat ro di saleleng ni lelengna. Amen.
Posting Komentar