Jamita Partangiangan Epistel Minggu 4 Mei 2025 Minggu Misericordias Domini tarsurat di buku 1 Korint 1 ayat 4 - 9. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Ai Naung Gabe Mamora do Hita di Bagasan Ibana di Saluhutna i." Rap ma hita mangihuthon hatoranganna.
Pendahuluan
Selamat ulang taon ma di hurianta HKI na pa-98 taon. Nunga godang jala ragam naung dibolus hurianta HKI, mamungka sian 01 Mei 1927 sahat tu tingki on. Ndang tarpajojor jala ndang tarhabilangan angka pasupasu ni Debata na tongtong manumpahi huria HKI (parhalado dohot ruasna) di ragam parngoluonna jala hombar tu hinaringkotanna be. Ragam do hamaolon na niadopan ni angka natuatua na pajongjong hurianta HKI alai boi do i saluhutna disalpuhon jala dipasidung holan ala asi ni roha dohot denggan basa ni Debata tu HKI. Molo pe didok HKI mardalan sian hapogoson alai ndang gabe pangambati tu hamajuon ni HKI sahat tu tingki on.
Sada sian godang ni na pinarsinta ni angka jolma di hasiangan on i ma hamoraon. Aut sura disungkun, olo do hita mamora? Tontu torop do mandok olo. Molo hata ni natuatua mandok: simbora gukguk, duldul otik; mamora hita luhut, alai sumurung ma au saotik. Pandohan i boi do dilapati mamora ma saluhut parhalado dohot ruas ni HKI, alai sumurung ma di au, di hami, di hurianami di HKI nami otik sian saluhutna. Turpuk Epsitel sadari on manaringoti hamoraon na ingkon adong di hita saluhutna. Hamoran songon dia do na dipangido turpuk on? Masuk ma hita tu hatorangan ni turpuk.
Pembahasan
Luat Korint i ma sada huta na mansai ribur jala torop angka partigatiga sian desa na ualu laho martigatiga di labuan huta Korint. Marpanghorhon do hariburon dohot hatoropon i di ragam pangantusion manang parbinotoan sian angka na bisuk na binoan sian luatnasida be. Torop do halak Kristen di huta Korint on angka na mora manang siparadongan marhite jamita manang panghobasion ni si Paulus uju mian ibana di luat Korint. Dung borhat si Paulus manguduti panghobasionna, hinorhon ni ragam angka jolma na ro mamboan hasomalan, parbinotoanna be tu luat Korint masa ma parbolatbolatan di luat i. Parbolatbolatan i marpanghorhon tu hasesega ni parsaoran ni halak Kristen di huria i. Tutu do nian mamora nasida di siadongan, alai molo di parsaoran na denggan dohot di pangantusion taringot tu ulaon partondion ndang boi dope dohonon nasida naung mamora. Umbege na masa i hirahira taon 53 - 56 disurathon si Paulus ma suratna on, na marisihon taringot pangajarion hakristenon ni halak Kristen di luat i dohot angka parulaon ni halak Kristen.
Dibuhai do turpuk jamita on (i ma ayat 4) na patuduhon las ni roha ni si Paulus marnida hamajuon dohot lam torop halak na di huta Korint gabe Kristen. Ndada dietong si Paulus hinorhon ni jamita manang panghobasionna, alai holan ala asi ni roha ni Debata sambing do naung nilehonNa di bagasan Jesus Kristus. Holan di bagasan Tuhan Jesus Kristus do mamora hita di saluhutna, di sandok hata nang di pangantusion (ayat 5). Mamora di saluhutna, ndang na martudutudu holan di sihumisik manang di siadongan. Alai hamoraon di saluhutna i ma hamoraon di pangantusion dohot di parbinotoan taringot basabasa ni Debata di ngoluna. Mamora ma nasida di saluhutna. Na marlapatan mamora ma di pangantusion taringot Tuhan Jesus Kristus, mamora di angka pambahenan na denggan, mamora di angka poda dohot pangajarion na sintong, mamora di ragam silehonlehon, jala mamora di angka ulaon parasinirohaon, songon na pinatupanasida laho mangurupi huria na pogos songon na masa di huria na di huta Jerusalem (ida ayat 5-6).
Molo nunga mamora di saluhut marlapatan ma i, na so masa be na hurang di ngolunasida. Singkop do dihilala si Paulus di hamoraon ni huria na di Korint. Ndada holan mamora di arta, di siadongan alai naeng ma mamora di partondion, mamora di parulaon na denggan. Marsihohot ma nian huria i di saluhut hamoraonnasida huhut maimaima di hapapatar ni Tuhan Jesus Kristus (ayat 7). Tontong ma nian mamora huria na di Korint di hamoraon partondion, mamora di angka ulaon parasinirohaon, mamora di angka pangajarion, poda dohot ragam pangantusion na tontu di Hata ni Debata huhut maimaima di ari ni Tuhanta Jesus Kristus (ayat 8). Ari ni Tuhan martudutudu do tu ari haroroNa na paduahalion, ari di na ro Ibana di bagasan hamuliaon surgo, ari manang partingkian paruhuman na parpudi mamboan angka na badiaNa tu hangoluan saleleng ni lelengna.
Haposan do Debata naung manjou hita tu parsaoran dohot AnakNa Tuhan Jesus Kristus (ayat 9). Dipatupa Debata do haluaon tu ganup jolma di bagasan hadirion ni Tuhan Jesus Kristus. Ibana do na patupahon panobusion dohot hasesaan ni dosa tu ganup jolma (patudos Johannes 3: 16-17). Marhite panobusion dohot hasesaan ni dosa masa ma pardengganan parsaoran ni jolma tu Debata jala parsaoran ni jolma tu jolma. Ndang masa be parbolatbolaton, ndang masa be hagunturon di huria. Alai ngolu parhahamaringgion ma na masa disi, na marsipasingkopan di na humurang. Jala i do na gabe hatandiaan naung mamora di partondion dohot di ulaon parasinirohaon, ndada holan mamora di parartaon manang sinamot.
Kesimpulan dan Refleksi
Di ulang taon ni HKI pa-98 taonhon di tanggal 01 Mei 2025. Molo tarimangrimangi pardalanan ni hurianta sian angka taon tu taon, dipabotohon do tu hita naung mamora do hita di bagasan Tuhanta, sian taon 1927 sahat tu taon 2025 on, nang pe ragam angka hamaolon na niadopan ni HKI, alai na so jadi pasombuon ni Debata punjung di manaon i. Sai ditumpahi Debata do basabasa dohot asi ni rohaNa tu HKI umbahen sahat tu tingki on HKI hot jongjong laho patuduhon hamoraonNa di ganup panghobasion ni HKI di portibi on. Jotjot do didok HKI huria na metmet, huria na pogos alai molo nunga di bagasan Tuhan Jesus Kristus hita, HKI i ma huria na bolon jala mamora. Bolon jala mamora do HKI di ganup ulaon panghobasionNa.
Dia ma hataridaan habolonon dohot hamoraon ni HKI? Damang dohot dainang na hinaholongan, habolonon ni HKI i ma Hata ni Debata, hamoraon ni HKI i ma hamoraon di partondion dohot ulaon parasinirohaon. Ndada holan di balga ni gedung, godang ni sinamot, arta manang uang kas ni huria na patuduhon bolon manang mamora HKI. Mamora ma HKI di pangantusion dohot habisukon di Hata ni Debata dohot angka ulaon na hombar tu lomo ni roha ni Debata; mamora do HKI di angka ulaon parasinirohaon dohot di panumpahion di angka na hurangan (marhite Panti Asuhan Zarfat dohot angka ulaon Diakonia na asing), mamora do HKI di angka ulaon parbaritanaulion, mambaritahon habalgaon dohot hatimbulon ni Jahowa Debata (marhite ulaon Marturia), mamora do HKI di angka ulaon parsaoran tu Debata dohot dongan jolma na tongtong rap marsitumpahan di angka ulaon las ni roha dohot habot ni roha (marhite ulaon Koinonia) dohot lan hamoraon na so tarpajojor.
Molo masa si songon i, ndang be begeon barita masa parbolatbolaton di huria HKI, masa hagunturon dohot hasesega huria holan ala ni parhepengon; ndang masa be na so marsiantoan parhalado tu parhalado, manang parhalado tu ruas, manang ruas tu ruas; dohot lan ulaon na jat na asing. Manghorhon hadengganon do sude hamoraon na sian Debata ndang mardongan hangaluton dohot hasesega. Antong, hita sude ruas dohot parhalado ni huria HKI, tapatuduhon ma na tutu do HKI i ma huria na bolon dohot mamora. Ndada holan mamora di sinadongan, alai mamora di saluhut ulaon na denggan. Amen.
Posting Komentar