Epistel Parningotan Hananaek ni Tuhan Jesus tu Surgo Kamis 29 Mei 2025 tarsurat di buku Psalmen 93 ayat 1 - 5. Tapabagas ma pangantusionta taringot tu turpuk ni Epistel on. Hombar tu Almanak ni Hurianta dibahen ma ojahan ni Epistel "Jesus Hundul di Siamun ni Debata." Rap ma hita mangihuthon hatoranganna.
Pendahuluan
Molo diurupi halak hita di angka ulaon, tung mansai las do roha jala sai naeng hatahononhon ma i tu angka dongan na asing. Marhite pangurupion i, tapanghilalahon ma adong do hape dongan di portibi on. Alai, hita na mangolu di portibi, jotjot do marhamubaon na mambahen ganggu ni pingkiran. Ai ndang adong ulaon na laho siulahononhon mardalan dohot denggan ianggo di bagasan ganggu ni pikiran. Parpsalmen marhite Psalmen 93 on, paingothon hita taringot tu: "Ise do Tuhan Debata, raja na mamarenta di bagasan hatigoran, jala na so marhamubaon." Ai holong na mubamuba i ma holong na so marhaporseaon tu Debata.
Pembahasan
1. Raja David mamuhai pandohan na togu i ma "Jahowa do Raja." Ndada holan pandohan jala panindangion, alai sada panindangion na mangolu di bagasan haporseaon. Di bagasan turpuk on didok do "marpahean hamuliaon" manggombarhon hamuliaon dohot harajaon ni Jahowa. Songon sada raja na marpahean harajaonNa, dipatudu Debata do otoritas dohot huasoNa di portibi on. Holan debata do raja na pahothon saluhutna di angka ingananNa. Dipanghilalahon parpsalmen do songon dia balga ni huaso ni Jahowa di ngoluna (ayat 1).
2. Ayat 2, dipaingot hita, nang pe jotjot tapanghilalahon portibi on sai manosak di ngolunta, alai Jahowa Debata sai manjaga jala patoguhon hita laho mandalani parngoluon. Ibana do haporusan jala hagogoon na pahothon haporseaon ni parpsalmen laho mamolus ariarina. Ingkon pos do rohanta tu Debata na sai mandongani jala na margogoihon hita (patudos 5 Musa 31 : 6 - 8).
3. Sian mulana sahat ro di ujungna, Debata do partanobatoan na so olo muba jala na hot manongtong. Debata do mandongani hita sian bortian sahat tu ujung ni hamatean di portibi on (Psalmen 37 : 25). Pandohan on pahothon harajaon ni Debata di angka na tinompaNa. Jahowa na so marmula jala na so marujung, alai manontong di bagasan habadiaonNa (ayat 3).
4. Ayat 4-5, digombarhon parpsalmen do parhasak ni aek ni galumbang laut i. Dipanghilalahon parpsalmen tung borat do sitaonon di ragam ni pardalanan ni ngoluna. Molo sian pangantusion, galumbang ni laut digombarhon hagogoon na so boi tardodo songon dia do balgana. Alai, Psalmen on laho patoguhon sasintongna Jahowa Debata na marhuaso di banua ginjang dohot di banua toru gumogo sian saluhutna i. Nang pe adong sitaonon, adong do Debata gabe haporusan na paluahon hita sian sitaonon i.
Kesimpulan dan Refleksi
Molo tarimangi Psalmen 93 on, ringkot do hita manungkun tu bagasan rohanta: sian ias ni rohanta do hita manghaholongi Debata? Molo di bagasan sitaonon hita, tu Debata do hita marhaporusan? Jotjot do hita di bagasan arsak ni roha, biar ni roha jala di bagasan hatahutan molo dung ro sitaonon. Alai, marhite holong ni Debata, sai dilehon do tu hita panghirimon dohot dame na sian Ibana. Di na mandalani parngoluon on, ingkon ingot do hita tu Debata, i ma Raja na so halompoan jala na so marhamubaon dibahen portibi on. Di sude angka sitaonon, ingkon tapangasahon hagogoon na sian Jahowa Debata.
Taungkap ma rohanta asa Debata na mangarajai sandok ulaonta di portibi on. Molo Debata na mangula di bagasan ngolunta, hita pe tama ma mangulahon angka na denggan asa manghorhon parbue na denggan.
Sai martangiang ma hita tu Debata asa dilehon di hita hagogoon laho marhaporusan tu Ibana, jala manghatindanghon Ibana do Raja na marhuaso. Anggiat ma sai dipaingot Debata hita molo adong sitaonon na masa di bagasan ngolunta, holan Jahowa do haporusan, pangusandean na togu jala na so marhamubaon jala pujima Debata di saluhut sitaonon manang di angka las ni roha pe. Amen.
Posting Komentar