Jamita Partangiangan Epistel Minggu 11 Mei 2025 Minggu Jubilate tarsurat di buku Pangungkapon 7 ayat 9 - 17. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Debata na Marmahani BangsoNa." Rap ma hita mangihuthon hatoranganna.
Pendahuluan
Jubilate, marolopolop tu Debata ma sandok tano on, i do goar ni Minggu on. Marharoroan sian hata "joobel" di hata Heber, manang sian hata "jubile" di hata Latin do hata "jubilate", lapatanna marsuraksurak di bagasan las ni roha. Songon soara ni alogo na marngongos di tombak longolongo, songon i ma dipangido soara ni na porsea i mangolophon Tuhan i di portibi on na gok parungkilon on, tama pataridahononta las ni roha dohot olopolop ala dipapatar Tuhan i, Ibana do Parmahan di hita.
Domu tusi do na pinasahat ni si Johannes tu huria na parjolo na marungkil i marhite pangungkapon on dipasahat si Johannes, "Debata na marmahani bangsoNa, marsuraksurakma di bagasan las ni roha". Disurat si Johannes Pangungkapon on uju tarbuang ibana di pulo Patmos. Tarbuang ibana ala parsihohotonna mangahaposi Jesus. Di habuangan i dipasahat Debata tu Ibana bagabagaNa, papatarhon hamuliaon ni Kristus, jala pasohothon parungkilon ni na porsea i. Ditongos Pangungkapon on sian habuangan, laho mangapuli na 7 huria na marungkil ala pangaleleon ni Kesar Domitianus. Dipaksa Kesar Dominitianus na porsea i marsomba tu ibana, jala diorai marsomba tu Kristus. Manang ise na tardapot marsomba tu Jesus dipamate, manang dipasiaksiak. Masihol angka na dipasiaksiak i malua sian parhatobanon ni harajaon Rom. Domu tu siholnasida i ma dipasahat Pangungkapon on na papatarhon hamuliaon ni Kristus. Sahat Ibana tu hamuliaon i ala habengeton dohot pangoloionNa, songon birubiru ni Debata. Di hapapatar ni hamuliaonNa i sude na tinompa mamujimuji jala marsomba tu Ibana.
Pembahasan
Debata na marmahani bangsoNa: Dipalua jala dipamonang hita sian nasa parungkilon. On ma pangungkapon na pinasahat ni Tuhan i tu si Johannes jala disurathon ibana do i jala ditongos tu 7 huria di bona ni hakristenon na tongon mangadopi parsorion na sumalin sian angka na manghasogohon Barita na Uli taringot tu Jesus Sipalua i. Porsuk situtu parniahapan nasida uju i. Digosagosa jala mangadopi pangarupaon na borat situtu nasida. laos godang do na mate tarbunu ala na manghatindanghon haporseaonna tu Jesus. Di saluhut na masa i sahat ma surat ni si Johannes on tu nasida. Gabe apulapul na sumurung ma on di nasida, patubu hagogoon, panghirimon na mangolu dohot haporseaon na togu di nasida laho mangadopi parungkilon bolon i. Jala tutu situtu marpanghorhon na denggan do barita pangungkapon i, tutu adong do nasida na mandele jala na manundalhon haporseaonna ala ni haporsuhon i. Alai torop do nasida na tongtong marsirangguthon parungkilon nasida i di bagasan haporseaon. Di tingkina mansohot do parungkilon i, boi do rarat barita nauli i jala hot do jongjong huria ni Tuhan i di Jerusalem, dohot di sandok Judea dohot di Samaria sahat ro di ujung ni tano on, sahat tu hita di partingkian si nuaeng.
Nang tu hita pe sahat do barita pangungkapon naung sinurathon ni si Johannes on, na pahothon haporseaonta tu Jesus birubiru i, asa marhite barita pangungkapon on boi lam togu haporseaonta, tarlumobi uju mangadopi ragam ni hamaolon dohot parungkilon di parngoluonta. Alai pos ma rohanta molo Debata na gabe parmahan di hita ndang loasonNa angka na porsea manongtong di bagasan parungkilon. Nunga ditaluhon Jesus hamatean jala nunga dipatuduhon Ibana na monang Ibana sian hamatean i jala nunga hehe di ari patoluhon. Marhite haheheon i ma dipatudohon Jesus huasoNa manaluhon nasa parungkilon i. Ibana do na paluahon jala pamonanghon hita sian nasa haberniton (ayat 10). Umbahen i tahaporseai ma Ibana. Ala di bagasan parungkilonta i do dipatuduhon Debata, holan Ibana do Debata gabe siparmahan na paluahon jala na pamonanghon hita sian parungkilon (patudos 2 Korint 12 : 9 - 10).
Tapuji jala tasomba ma Debata ala naung dipamonang hita. Pujipujian i ma hapuasan (ekspresi) ni roha na membanggakan sada halak. Binanggahon sada halak ala adong hasurungan, halobianna. Dung diida, hasurungan dohot hamuliaon ni Birubiru i, diida si Johannes na tinompa dohot na mangolu mamuji Birubiru i, toropna so dapot bilangan ni jolma, sian nasa bangso, marga dohot houm dohot hata, angka na jongjong di adopan ni habangsa i dohot di adopan ni Birubiru i (ayat 9) laho mamuji Ibana na maruloshon abit na saksak jala na maniop maremare di tangan nasida. Abit na saksak i ma gombaran habadiaon dohot hamuliaon ni Debata. Maremare (daun palem) i ma simbol hamonangan dohot las ni roha. Marlas ni roha angka na badia i mangendehon pujipujian tu Debata ala hamonangan di hatuaon di Debatanta na manghunduli habangsa i, dohot di birubiru i (ayat 10). Pujipujian i pinatolhas ni angka na porsea ala malua nasida sian nasa parsorion dohot hagogotan na dihilala nasida di portibi on. Surgo i gabe inganan las ni roha di angka halak na manjalo haluaon sian Debata.
Isi ni pujipujian na pinasahat nasida i ma tentang "keselamatan dari Allah" (soteria to Theo). Jongjong ma saluhut surusuruan i humaliang habangsa i dohot humaliang angka sintua i dohot parngolu na opat i, dung i manungkap ma nasida di jolo ni habangsa i huhut marsomba tu Debata (ayat 11) pujipujian i marisihon hasangapon, hapistaran, hamauliateon dohot hagogoon, hatoguon ma di Debatanta ro di salelenglelengna (ayat 12). Dipuji nasida birubiru i ala patar hamuliaonNa, Pargogo na so hatudosan, Parbinoto na sun.
Ringgas ma hita mamuji Tuhan i ala taparhatopot Ibana do mual ni nasa na adong, mangurupi dohot mangondingi hita sian hamagoan. Tapasahat ma ngolunta dohot nasa na adong di hita gabe pujipujian tu Tuhan i. Habalgaon dohot pambahenan ni Debata na tadai ganup ari, i do na tahatindanghon di pujianta tu Debata. Tapuji Ibana ala dipalua hita sian dosanta, marhite mudarNa na durus di dolok Golgata ditobus hita sian uhum dosa dohot hamatean, i do na tahalashon di parngoluonta.
Debata na marmahani bangsoNa, ditobus jala dipatongon angka na porsea tu hasonangan (ayat 14-17). Di habuangan Patmos diida si Johannes nasa na tinompa di banua ginjang, di banua tonga dohot di banua toru mangendehon pujipujian tu Birubiru i, ala naung dihamonanghon sitaononNa. Monang Ibana di sitaonon i ala benget jala marpangoloion. Ndang hurang sian 29 hali digoari Jesus "Birubiru" di Pangungkapon on. Songon birubiru na mangalehon dirina bahen hasonangan ni jolma, songon i ma Jesus maneahon diriNa asa malua jolma sian dosana. Nda benget do Birubiru mangalehon imbuluNa tu sigustingi Ibana? Ngalian Birubiru i asa las pamatang ni jolma marhite imbulu ni Birubiru i na pinature gabe hain wol. Songon i ma Jesus umbahen digoari Birubiru. Diseahon diriNa di silang i asa malua jolma sian uhum dosa i. Pandohan Birubiru di Pangungkapon dohot di turpuk on naeng mangondolhon habengeton dohot pangoloion ni Jesus na manghamonanghon parungkilonNa. Ala habengetonNa taripar Ibana tu hasangapon (patudos Jesaya 53 : 7).
Habengeton dohot pangoloion na songon i ma dipangido sian angka na porsea, na manaon na porsuk ala parsihohotonna manghaposi Kristus. Hebengeton i ma hasabaron di bagasan pergumulan mangula siulaon ala pangoloion tu na mangalehon ulaon i. Taadopi ma parungkilon i di bagasan habengeton dohot pos ni roha. Debata gabe siparmahan na denggan, manogihon angka na benget marroha di na mangadopi parungkilon i, ditogihon asa di bagasan haporseaon tu Tuhan Jesus, diburi nasida sian hadosaon nasida di bagasan mudar ni Birubiru i (ayat 14). Laos marhite i ma diparbadiai hita di bagasan haporseaon dohot habengeton ni roha mandai angka hasonangan na pinatupa ni Debata molo martahan di pangunjunan i, ndang be male nasida, ndang be mauas, ndang be ditinggang las ni ari nasida, manang dia na mohop pe (ayat 16) togihononNa ma nasida tu angka mual aek hangoluan, jadi apusan ni Debata nasa iluilu sian mata nasida (ayat 17). Di angka na marpos ni roha jala porsea tu Debata sai togihonon ni Debata do tu hasonangan, malua jala tanggal ma nasa holso di angka na ro tu jolo habangsa ni Debata, na mangoloi Ibana arian dohot borngin di bagasan joroNa (ayat 15). Asa marsaringar marhite pamujionta i songon na didok si Johannes, "ianggo Ibana patut lam ganda, lam moru ma anggo ahu" (patudos Johannes 3 : 30).
Kesimpulan dan Refleksi
Marhite turpuk on dipaingot tu hita halak na porsea jala na satia tu Debata di ari parpudi i dimateraikan gabe siparmonang molo martahan haporseaonna di pangunjunan dohot parungkilon i, diuloshon ma tu nasida abit na saksak i ma patandahon haluaon dohot hamuliaon sian Debata. Halak na monang sian parungkilon hinorhon na memperjuangkan haporseaonna tu Debata, dapotna ma tumpal hangoluan jala hatuaon na sian Debata (patudos Jakobus 1 : 12), rap ma angka na porsea i dohot Ibana, di harajaonNa. Ndang be male angka na porsea i, ndang be mauas, ndang be ditinggang las ni ari nasida, manang dia na mohop pe. Mangolu ma na porsea rap dohot Ibana di bagasan dame dohot las ni roha di surgo.
Tapuji ma Debata marhite AnakNa Jesus Kristus na paluahon jala pamonanghon hita sian parungkilon. Pamujionta i ma tanda hasongkalan ni Debata. Nunga monang Ibana manaluhon hamatean jala hundul Ibana di habangsa hasangapon i. Nunga salpu haleaon dohot parsorion i jala nunga sahat Ibana tu hamuliaon i, antong nang hita pe naeng monang ma nian maralohon parungkilon i marhite na tongtong hita marhaposan tu Ibana. Manang boha pe borat ni parsorionta, naeng tongtong hita manghamonanghon parungkilonta i di bagasan haporseaon na togu tu Tuhan i. Ai nunga monang Ibana maralohon sibolis dohot hamatean i hita pe patauhononNa do monang manaluhon parsorion i, asal ma tongtong tapangasahon Ibana na marhuaso mangurupi jala mangaramoti hita asa unang marmara, na marhuaso manuturi hita di dalan ni ngolunta jala na tongtong mamasumasu hita. Ala ni ndang adong be sidalianta sumurut sian haporseaon i ndang adong be sidalianta mandele manang maheu. Marhite pos ni rohanta tu Ibana, boi ma jumpang gogo mangadopi na masa i dohot gogo mamuji pasangap Ibana, Tuhan na marmulia jala na sangap. Amen.
Posting Komentar