Jamita Minggu 29 Juni 2025 Minggu 2 Dung Trinitatis tarsurat di 1 Rajaraja 19 ayat 15 - 21. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Marhasatiaon Laho Mangihuthon dohot Manghobasi Debata." Rap ma hita mangihuthon hatoranganna.
Pendahuluan
Molo apala borat hamaolon i masa di bagasan ngolunta olo do tubu tu bagasan pikiran hata dohot langka pandelean. Lumobi ma molo masa hamaolon ala ni mangulahon na denggan hombar tu aturan na adong di huria, punguan manang pe na di parsaoran dohot dongan manang na marsahuta. Tarajumi do nian pambahenanta i songon dalan mangulahon Hata ni Debata. Hape baliksa, gabe hamaolon do panghorhonna di ngolunta. Ninna roha, sai hira na so marguna mangulahon na denggan i. Gabe tarimangrimangi ma angka naung taulahon na sai laon; maol mangulahon na denggan hape laos hamaolon do parbuena tajalo. Panghilalaanta, hira naung ditadinghon Jahowa hita. I ma pamilangion molo mangihuthon pikiran ni jolma. Hape, umboto do Jahowa aha na masa nang na ringkot di hita jala dilehon do dalan haluaon sian hamaolon i. Songon i ma na masa di pardalanan ni panurirang Elia.
Barita taringot tu si Elia dohot si Elisa manggohi 1 Rajaraja 17 sahat tu 2 Rajaraja 13. Di panggomgomion ni Raja Ahas, tutu do mandao Israel (harajaon utara) sian Debata jala marsomba tu Baal. Na tarjou do panurirang na dua on laho mamboan Israel mulak tu dalan ni Debata, jala di ujung ni ngolu ni si Elisa, nunga adong raja Jehu na manghaposi tu Debata. Di 1 Rajaraja 17-18, si Elia gabe parhitean ni Debata laho mambuktihon paboa Ibana do Debata ndada Baal. Masa do i marhite logo ni ari na leleng, dohot parbadaan maradophon angka panurirang ni Baal di dolok Karmel. Dung dibereng halak Israel parbadaan i, dipillit nasida ma Debata Jahowa, ai Ibana do Debata na tutu.
Pembahasan
Di bagasan turpuk Jamita on dipabotohon naung sanga mandele (putus asa) si Elia jala mangido asa mate ibana dung maporus sian pangaleleion (ancaman) ni si Izebel, jolma ni raja Ahab (1 Rajaraja 19 : 1 - 4). Mabiar do si Elia ala naeng pusaonna ibana. Nunga disuru si Izebel suruanna manopot si Elia mandok: "Ingkon pinsangon ni angka debata ma ibana molo so bunuon ni si Izebel si Elia marsogotna i suang songon na binahen ni si Elia tu hosa ni angka malim ni Baal". I do umbahen na maporus ibana mardalan tu halongonan, sadari mardalan daona. Mardalan ibana manuju dolok ni Debata mangido asa mate ibana nian.
Di bagasan holso ni rohana na bagas situtu, dijama surusuruan ma si Elia, alai borhat dope ibana mardalan opat pulu ari lelengna sahat tu dolok Horeb (na jotjot digoari di 5 Musa: dolok Sinai). Dipaingot na masa on do nang hita di pardalanan ni Israel opat pulu taon sian Sinai tu tano na pinarbagabaga i.
Di turpukta on, disosoi do si Elia asa mulak tu sangkap ni Debata. Dua hali disungkun Debata si Elia, jala sarupa do alusna. Dipaboa si Elia do borat ni keadaan ni Israel, na so holan maninggalhon padan tu Debata alai dohot do mangarupa angka jolma na marsihohot tu Debata. Dibahen i, disuru Debata do si Elia ruar sian liangna laho mangadopi Debata. Andorang ruar si Elia, dipapatar Debata do huasoNa, marhite alogo na gogo, lalo dohot api (1 Rajaraja 19 : 11 - 12). Na masa on paingothon hita di hataridaan ni Debata tu Israel uju baru marpungu nasida di dolok Sinai (2 Musa 19 : 16 - 19). Marhite hataridaanna i, dipaingot Debata do si Elia taringot tu huasoNa na so marguru tu panjanghonon ni jolma tu Ibana. Alai, di hataridaan ni huaso i, ndang pajumpang si Elia dohot Debata, ia so holan marhite huasoNa. Holan dung adong soara na ampit tarbege, dung i pe dihilala si Elia na hadir do Debata jala ruar manomunomu Ibana (1 Rajaraja 19 : 13). Alai nang pe songon i, rade do ibana manangihon.
Ndang dialusi Debata be holso ni si Elia, alai ditugashon do ibana hombar tu sangkap ni Jahowa (1 Rajaraja 19 : 15 - 18). Nunga dipajongjong Debata dalanNa manguhum angka si somba Baal, marhite sahalak raja sian Aram (Hasael) dohot sahalak raja sian Israel (Jehu). Na dua halak on ndang manaek dope tu habangsa i, alai si Elia do na sinuru laho mamiahi nasida gabe raja. Ternyata penerusna, i ma si Elisa do na mangulahon i. Di 2 Rajaraja 8-9, adong campur tangan sian si Elisa asa na dua halak na pinabangkit ni Debata manaek tu habangsa jala mangulahon tugas ni Debata. Marhuaso do Hata ni Debata maradophon politik ni portibi on.
Pandelean i olo do mambaen hita gabe sala manimbangi Debata. Tingki disungkun Debata si Elia "Aha do ulaonmu dison?", dialusi si Elia ma "Marmurukmuruk situtu do ahu nian humophop ulaon ni Jahowa, Debata Zebaot, ai nunga ditadinghon halak Israel parjanjianMu, nunga maloha angka langgatanMu, jala nunga dibunu angka panurirangMu marhite sian podang, sasada ahu nama tading, dohot hosanghi dope dilului nasida naeng buatonna" (ayat 10). Didok si Elia, sahalakna do mangula. Dipatuduhon si Elia holan ibana do na mangula, sude halak Israel nunga murtad, sude panurirang dibunu jala ibana pe diancam. Didia do nuaeng Debata? On ma na pinangido ni si Elia. Sala do si Elia manimbangi Debata. Dirimpu ibana holan sasadasa nama na mangula, sai hira na so parduli Debata. Nda on do na taadopi molo mangadopi pergumulan na borat jala mulai putus asa hita?
Kesimpulan dan Refleksi
Tubu sungkunsungkun sian turpuk on, hea do dipangido rohanta asa mate di tingki pergumulan na borat na tabolus? Tontu ndang sikap na sintong manang na denggan i. Marhite turpuk Jamita on tangkas do dipabotohon tu hita asa unang muramura mandele, alana: Parjolo, ndang tagamon tadinghonon ni Debata angka ianakhonNa na mangulahon HataNa sian bulus dohot ias ni roha. Nunga parjolo Jesus manaon pangunjunan na borat i, alai ndang mandele Ibana, gabe monang jala ditaluhon sorop ni hamatean i. Paduahon, ala sai adong do hamaolon di balik ni ganup haputusan na tabahen (taulahon) ingkon lam gogo do hita martangiang pasahathon ngolunta tu Debata. Molo tarimangi na masa tu si Elia mansai bagas do parbinotoan dapot hita. Di naung diboto ibana disangkapi si Izebel naeng mambuat hosana, ndang mangasangi ibana, nang pe diboto na tuk do huaso ni Jahowa manjagai ngoluna.
Menyingkir do ibana manjagahon hosana unang tarmara. Dipasahat si Elia do dirina tu Jahowa, i do umbahen sampe opat pulu ari opat pulu borngin lelengna mardalan manopot dolok ni Debata, i ma dolok Horeb. Gabe tubu muse sungkunsungkun tu hita saonari, boi do angka na porsea i malua sian holso ni roha? Jotjot do tadok, molo taida angka tanda halongangan, gabe porsea hita. Alai ndang sadia leleng dung salpu i, gabe lupa hita jala ganggu rohanta. Dipaingot do si Elia taringot tu hagogoon ni Debata, songon naung masa di dolok Horeb/Sinai (ayat 11-12). Alai angka i holan "patujolo ni" Debata do. Tung tangkas taida, holan marhite soara dope nunga ditanda si Elia hadirion ni Debata. Dibahen i, porlu do nang hita marningot huaso ni Debata, jala sai mulak gogo ma haporseaonta molo tatangihon soara ni Debata jala tapasahat alualunta tu Ibana. Manat ma hita, olo do pandelean i mambahen hita gabe sala menilai Debata, salah menilai kondisi sebenarna, jala mangambati mata dohot rohanta marnida campur tangan ni Debata di ngolunta. Hehe ma hita jala bersemangat, jala satia mangihuthon dohot manghobasi Debata, ai sasintongna ndang hea dipaloas Tuhan i hita marungkil sasada hita. Ibana do mual ni hagogoon di hita. Pos ma rohanta di Debata. Endenta mandok: Ho na loja ho na sorat, pos roham di Debata. Amen.
Posting Komentar