Jamita Partangiangan Epistel Minggu 29 Juni 2025 Minggu 2 Dung Trinitatis tarsurat di buku 1 Tessalonik 3 ayat 1 - 13. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Marhasatiaon Laho Mangihuthon dohot Manghobasi Debata." Rap ma hita mangihuthon hatoranganna.
Pendahuluan
Sada na mangonjar roha ni Apostel Paulus manongos surat tu huria Tessalonik i ma di na so adong be dihilala ibana kesempatan laho ro mangebati huria i. Sihol situtu rohana naeng marnida angka na masa di ruas ni huria i. Dibahen i ma umbahen disuru ibana si Timoteus mandapothon huria na adong di Tessalonik laho patoguhon rohanasida marhaporseaon tu Tuhan Jesus, jala asa hot marsitogutoguan di ngolu siganup ari. Diholsohon si Paulus do asa tongtong togu haporseaon nasida tu Kristus, unang sumurut. Unang munggil binahen ni angka haporsuhon i nanggo sahalak pe sian nasida. Disuru si Timoteus manopot huria i laho manangkasi haporseaonnasida, atik beha naung diunjuni si pangunjuni i, ai molo munggil haporseaon ni sahalak pe dietong do i mambahen gabe magopo halojaon ni angka apostel i.
Tung las do roha ni Apostel Paulus ai dung mulak si Timoteus sian Tessalonik, diboan do angka barita las ni roha i ma haporseaon dohot holong ni roha na tongtong marsihohot di nasida. Angkup ni i tung burju do huria i marningot angka parbarita na uli naung mangula di nasida jala sihol do rohanasida naeng idaonna manang pajumpang muse dohot Apostel Paulus rap dohot angka donganna parhobas ni huria i.
Holong dohot sihol ni roha lumobi unduk ni roha marhaporseaon di Tuhan Jesus gabe apulapul na sumurung di roha ni Apostel Paulus nang pe masa ragam ni hagogotan dohot haporsuhon diadopi nasida. Na masa i gabe dihilala Apostel Paulus do gabe mual ni "hangoluan" molo marparbue panghobasionna jala manongtong di haporseaon nang pe lan pangunjunan. Ndang mansadi apostel i martangiang lumobi lam gomos mangido tu Tuhan i, borngin dohot arian, asa anggiat boi nasida pajumpang bohi muse, laos patingkoshon ia adong dope hahurangan ni haporseaon ni ruas ni huria Tessalonik, ai huria na imbaru dope nasida. Ndang mungkin dope sude ruhutruhut ni haporseaon ni halak Kristen diboto nasida.
Pembahasan
Aha do na boi dapot hita impola ni na masa di huria Tessalonik? Saotikotikna adong piga dapot hita:
Manongtong Marhaporseaon di Tuhan Jesus
Hatiha i, huria i mangadopi hamaolon ni parngoluon na mansai borat isarana pangaleleon, fitnah, maol mangula manang manggohi haporluan ni ngolu si ganup ari ala ni haporseaonna.
Nian, ndada holan di huria Tessalonik, di angka huria na deba pe boi do angka hamaolon ni ngolu mambahen marhusor di haporseaonna jala mandao sian Debata, manang manadinghon Debata. Hea do ra tabege songon dia sahalak mandok kecewa tu Debata molo masa hamaolon ni ngolu na tung borat. Ra adong do sian nasida na gabe so olo be marminggu, ndang olo be ro tu partangiangan manang ndang olo be martangiang di jabuna, ala mulai meragukan denggan basa ni Debata di ngoluna.
Haporsuhon na ni adopan ni huria i olo do mambahen gabe ganggu haporseaonnasida tu Debata, tarlumobi ma molo ro sibolis mangunjuni nasida na naeng mangalononghon haporseaonnasida tu Debata. On ma na diholsohon si Paulus. Hape, marasing do sian aha na hinabiaran ni Apostel i maradophon huria na adong di Tessalonik. Baliksa, manongtong do nasida marhaporseaon tu Tuhan Jesus.
Lam Marsihaholongan
Huria na di Tessalonik tongtong do nasida marsihaholongan. Nang pe adong na mangelaela nasida alai ndang olo nasida gabe sega parsaoranna.
Marningot Angka Parhalado na Hea Manghobasi di Huria i
Tung burju do nasida marningot angka parbarita na uli naung mangula di nasida, jala sihol rohana naeng idaonna manang pajumpang muse. Sada sitiruon ma tutu parngoluan ni ruas ni huria Tessalonik. Unang ma tutu, holan holip satongkin sian adopan ni pangula ni huria i pintor ganggu manang munggil haporseaonta, gabe dao nang holong na marsihaholongan. Adong muse na pintor manghalupahon parhalado i, nang pe i ala na pinda tugas manang pinda huta, na pensiun, lumobi ma molo naung marujung ngolu pintor ndang dianturehon angka keluargana manang na lebih ngeri, gabe diparoaroa angka ulaonna, dipatubutubu hata asa dianggap salah angka ulaonna, keputusan-keputusan di tingki pelayananna, pola sampe adong na mangaluhon tu angka panguhum di portibi on. Taingot ma na tarsurat di buku na badia i: "Ingot hamu ma angka na manguluhon hamu, na paboahon hata ni Debata tu hamu" (Heber 13 : 7).
Holong ni roha na tubu di bagasan rohanta ingkon do bertumbuh jala lam matoras, togu jala marparbue. Taajari nang angka donganta asa dohot nang nasida marsihaholongan. Adong ma nian usaha na dengan sian hita patubu jala pahembanghon holong i. Ingkon tasuan jala patupaonta do holong i di bagasan rohanta.
Pagandahon partubu ni holong ni roha ni Debata di bagasan rohanta, dos do i songon na manjaga dohot mangaradoti sada porlak. Ingkon tajaga do angka suansuanan na metmet na tasuan asa boi denggan tubu jala marparbue di tingkina. Unang lupa, ingkon dohot do hita mangalehon napu huhut paiashon angka na boi manegai pe. Songon i ma parbue ni holong ni Debata; ingkon tasuanhon do holong ni roha ni Debata di bagasan rohanta marhite na mangalehon tingki laho marsaor di bagasan tangiang dohot mangarimangi HataNa.
Kesimpulan dan Refleksi
Di sihol ni roha ni si Paulus laho mandulo muse Huria Tessalonik, ujungna dipasaut Debata do. Mangihuthon buku Ulaon ni Apostel dibaritahon do, dung sidung ulaon parjamitaon ni si Paulus di Korint dohot Epesus, mulak ma ibana tu Makedonia (Ulaon ni Apostel 19 : 21; 20 : 1 - 2). Di na dua pardalananna tu Makedonia, dilehon ibana tingki laho manopot angka na porsea di Tessalonik. Di tingki si Paulus mardalani tu Asia, adong do dua halak Tessalonik mandongani ibana (Ulaon ni Apostel 20 : 4). On ma na mambuktihon na tongtong do ibana marsaor dohot angka na porsea di Tessalonik, jala marsiurupan di panghobasion mambaritahon Barita na Uli. Jadi tangkas ma disi naung dialusi Debata tangiangnasida.
Songon si Paulus dohot si Timoteus na mangharingkothon huria Tessalonik, songon i ma nian nang hita. Marsiajar ma hita manarihon dohot mamparrohahon angka dongan na marungkil di ngolu on. Marhite i, boi ma hita dipangke Debata gabe ulaula na metmet na patuduhon tu angka dongan na so ditadinghon Debata nasida manang dia pe na masa di parngoluanna.
Di sada diskusi Panangkasion Hata ni Debata (Penelaahan Alkitab) disungkun uluan ni diskusi i ma tu na ro disi mandok: "Adong do na imbaru diulahon Debata di ngolumuna?" Sahalak sian nasida mandok: Di situasi na mansai maol i mansai ringkot do di ibana hasabaron laho mangadopi natuatuana naung matua, laho mangurus tunggane dolina na marsahit, dohot habisukon laho mangantusi angka ianakhonna. Dung i, dibahen ibana ma sada komentar na menarik na maralo tu pingkiran ni halak na torop, "Porsea do ahu, na imbaru na diulahon Debata di ngolunghu, i ma pabalgahon hagogoonhu dohot mangalehon tingki laho manghaholongi." Dibahen i, ingkon adong do sudut pandang di hita mamereng na indah di ganup na masa di ngolunta, ai disi do Debata tongtong mandongani hita molo satia hita. Amen.
Posting Komentar