Jamita Partangiangan Epistel Minggu 22 Juni 2025 Minggu 1 Dung Trinitatis tarsurat di buku Psalmen 42 ayat 1 - 12. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Jesus na Manaluhon Tondi na Jat." Rap ma hita mangihuthon hatoranganna.
Pendahuluan
Psalmen 42 i ma sada Psalmen na sinurat ni raja David na manggombarhon sihol ni rohana tu Debata di na di bagasan partinaonan jala panghilalaan songon halak na tarpunjung ibana. Secara khusus Psalmen 42 on patuduhon tung borat do perjuangan ni parpsalmen mangadopi depresi dohot tantangan spiritual/haporseaonna.
Secara psikologis, halak na di bagasan depresi ujungna boi do gabe songon halak na rintik molo so tolapsa laho manaluhon depresina i. I ma na dipanghilalahon parpsalmen hatiha i, songon na hera marporang do ibana laho manaluhon tondi na jat, hatahuton, holsoan, na naeng padaohon ibana sian Debata. Manghirim do parpsalmen di haroro ni Debata di angka sitaonon dohot laho manaluhon angka musu na mangarongom ibana. Molo sian buku Padan na Imbaru, ndang na holan pajonok hita tu Debata Jesus, alai dohot do laho manaluhon sude angka huaso ni tondi na jat na boi manegai habadiaon dohot ngolu na gok dame.
Pembahasan
Ayat 1-2
Manggombarhon sihol na mansai bagas, pola do sampe didok "songon panghalungunhon ni ursa di angka guluan, songon i do panghalungunhon ni tondingku tu Ho, ale Debata." Di bagasan ngolu on, "hauason" manggombarhon porlu ni huaso ni Tuhan di hita. Hita angka na porsea di Jesus Kristus, sihol i paboahon porlu do parsaoran dohot Debata na mangalehon ngolu jala na manaluhon sude angka huaso na jat i ma na mangambati parsaoranta dohot Debata.
Ayat 3-4
Dison parpsalmen mandok songon dia keadaanna na di bagasan tekanan jala diintimidasi angka jolma na mangarehei ibana marhite sungkunsungkun: "Di dia do Debatami?" Panghilalaan ni parpsalmen, pangunjunan na ro tu ibana i sian angka tondi na jat na paintophon haporseaonna tu Debata. Di tingki hita di bagasan panghilalaan putus asa manang tekanan sian angka jolma, boi ma taingot Jesus boi manaluhon sude angka huaso ni setan, mangapuli hita, jala pajonokhon hita tu Debata.
Ayat 5-6
"Boasa sai tungki ho, ale tondingku, jala boasa sai marsak ho di bagasan ahu?" Marpanungkun do parpsalmen tu dirina sandiri ala di bagasan partinaonan ibana. Alai, tangkas do haporseaon dohot panghirimonna tu Debata Sipalua ibana. Di partingkian si songon on, taida ma ringkot do pasahathon saluhut arsak ni rohanta tu Tuhan. Jesus na manaluhon hamatean, dohot angka tondi na jat, i ma na margogoihon hita laho marpanghirimon tu Debata, manang di bagasan sitaonon dohot las ni roha.
Ayat 7-8
Pandohan "sai masiharaan do angka sampuran dibahen soara ni hasakmu, sude angka ombakmu dohot galumbangmu manghuphupi ahu" tung borat do sitaonon na tinaon ni parpsalmen. On ma na patuduhon songon dia do tekanan na dipanghilalahon parpsalmen hatiha i. Alai parpsalmen mangakuhon Debata mangalehon holongNa di tonga ni ari dohot bot ni ari. Ai marhuaso do Jesus laho marmudumudu jala mamasumasu hita di sude angka partingkian.
Ayat 9-10
Marpanungkun do parpsalmen: "Boasa tung dihalupahon Ho ahu?" tung mabiar situtu do molo pandohan on. Alai, diboto Tuhan i do sitaononna i, jala mangantusi do Ibana di panghilalaanna i. Nang hita pe di tingki di bagasan tekanan jala songon na merasa ditadinghon hita, tahaporseai ma Tuhan i na tuk manaluhon angka tondi na jat, jala Ibana di lambungta mangalehon hamonangan. Sude angka sitaonon na songgop, boi do i gabe dalan ni Tuhan i patuduhon huasoNa di bagasan ngolunta.
Ayat 11-12
Mulakulak do dipatangkas parpsalmen hadirionna tu Debata, pola dua hali diulahi ibana patangkashon "boasa sai tungki ho ale tondingku, jala boasa sai marsak ho di bagasan ahu, haposi ma Debata." Lapatanna, parpsalmen laho patoguhon haporseaon di tongatonga ni angka sitaonon na masa di ngoluna. Ditaluhon Tuhan i do angka huaso ni tondi na jat jala diboan Ibana do dame di hita. Panghirimonta i ma diurupi Tuhan i ma hita sian hatahutan jala dipatupa ma hamonangan di sude angka na mangago haporseaonta tu Debata.
Kesimpulan dan Refleksi
1. Pasahat ma saluhut arsakmu tu Debata. Parpsalmen manogihon hita asa pasahathon angka arsak ni roha tu Debata, nang pe di bagasan tekanan sian angka jolma pangarehei. Di ngolu si ganupa ari, tondi na jat jotjot do mambahen hita mangalupahon Debata marhite hatahuton, biar ni roha dohot angka lan na asing. Alai, Jesus Sipalua hita marhuaso do manaluhon huaso ni angka tondi na jat. Ai mangalehon hangoluan dohot dame do umbahen na ro Ibana tu portibi on. Molo songon na hatahuton, mauas, gok tekanan hita songon parpsalmen, mangido gogo ma hita sian Jesus na monang sian huaso ni sibolis jala mangalehon hita roha na dame.
2. Pasolhot ma dirim tu Debata. Hita na di bagasan hatahuton ingkon do pasolhot diri tu Debata. Parpsalmen di bagasan hatahutonna sai marhaporusan do ibana tu Debata. Halak na pasolhot diri tu Debata, ndang tagamon so masa pangunjunan di ibana. Alai, pangunjunan i do mambahen ibana lam solhot tu Sipalua i sian hatahuton nang hagogotan. Ala ni i, ringkot situtu hita pasolhot diri tu Debata marhite haporseaon, pambahenan jala panghirimon na mangolu.
3. Haporseai ma huaso ni Debata. Jotjot do hita songon na so tolap laho mangadopi na masa di ngolunta. Sipata sitaonon i mambahen hita lam dao jala holip sian Debata. Molo tahilala songon na leleng tangan ni Tuhan i mangurupi hita pintor hatop do hita mandele. Ingkon songon parpsalmen ma nian hita na mangolu on, tung songon dia pe sitaonon na ro tu ibana sai dihaporseai do Debata na tau paluahon ibana sian sitaonon i.
4. Ulahon ma hangoluanmu. Molo naeng mangolu hita, ingkon ulahonontan do hangoluan i. Aha do lapatanna mangulahon hangoluan? Ndang tama holan mananginangi hita, alai ingkon siula hata i do. Tudos do songon orbuk na sai dihagigihon jolma, molo lohot di paheanna. Songon i do nang Debata, tung so lomo do rohaNa mida halak na sai mangulahon angka na maralo tu lomo ni rohaNa. Ai ndada jolma na paluahon hita sian sitaonon, hatahuton, alai hita sandiri do na paluahon hita marhite na mangulahon jala marhite pangurupion na sian Debata.
Parpsalmen mangajari hita molo di bagasan tekanan dohot keputusasaan hita, ingkon marhaporusan tu Jahowa do. Di bagasan Jesus Kristus, adong ma di hita panghirimon na mangolu, ala naung ditaluhon Ibana angka tondi na jat, jala dilehon do di hita huaso laho mardalan di bagasan hamonangan. Uju di bagasan tekanan manang ganggu ni pikiran, tapasahat ma sude tu Jesus Kristus na mangalehon di hita hasonangan na manongtong (Mateus 11 : 28). Mangasahon haporseaon na togu tu Debata, dapotan dame dohot pangurupion ma hita. Amen.
Posting Komentar