Jamita Minggu 22 Juni 2025 Minggu 1 Dung Trinitatis tarsurat di Lukas 8 ayat 26 - 39. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Jesus na Manaluhon Tondi na Jat." Rap ma hita mangihuthon hatoranganna.
Pendahuluan
Boha do pandapotta, adong do tondi na jat (sibolis, setan, jin) di portibi on? Na deba mandok, adong; na deba mandok, ndang adong, na deba mandok, ragu. Jotjot do masa hagaoron di sada huta holan ala ni na adong tuduhan parbegu ganjang. Jumpang muse angka parulaon na maralo tu Hata ni Debata i ma parulaon hadatuon, sipelebegu, manghaposi sahala, manjalo pasupasu sian angka na mate, porsea di angka hasandaran dohot ulaon hasipelebeguon na asing.
Maralo do tu Jesus molo tapaloas pamatangta on gabe inganan ni sibolis dohot parhitean ni sibolis laho pasahathon sipasahatan tu jolma. Ndang na laho gabe inganan parmianan sibolis ditobus Jesus hita sian parhatobanon ni dosa marhitehite hamamateNa. Turpuk Jamita sadari on, i ma barita huaso ni Tuhan Jesus Kristus manaluhon tondi na jat, jala hataridaan na so dihalomohon Tuhan Jesus huaso ni sibolis maringanan di pamatang ni jolma. Asa lam antus hita mangantusi ondolan turpuk Jamita on, masuk ma hita tu hatorangan ni turpuk.
Pembahasan
Ia turpuk Jamita sadari on i ma Barita na Uli na sinurathon ni si Lukas, sahalak pandaoni naung porsea hinorhon ni pangajarion ni si Paulus. Disurathon si Lukas do Barita na Uli on hirahira taon 58-65 M na martujuan laho mambaritahon tu si Teopilus, sahalak na sangap di harajaon Rom taringot Tuhan Jesus dohot tanda halongangan na binahenNa. Marnida na hansit dohot sitaonon na niadopan ni halak Kristen uju i, alai ndang boi mangambati hararat ni Barita na Uli taringot Tuhan Jesus Kristus. On do na mambahen penasaran pigapiga na sangap di harajaon Rom naeng mananda Tuhan Jesus Kristus na binaritahon ni angka apostel. Songon i nang si Teopilus, ringkot do di rohana naeng mambege dohot mananda ise do Jesus Kristus, na binaritahon ni angka apostel i.
Sada sian saluhut barita na binaritahon si Lukas taringot tu huaso ni Tuhan Jesus tu si Teopilus i ma huaso na manaluhon tondi na jat. Sahat ma Jesus dohot angka siseanNa tu luat Gadara tondonghon ni luat Galilea (ayat 26). Dung tardarat Ibana, adong ma sahalak pangisi ni huta i partondi na hodar, naung nunga na nia lelengna ndang olo be marabit jala ndang olo mian di jabu, di angka parbandaan do ibana (ayat 27). Molo sahalak jolma naung sinonggopan ni tondi na jat, ndang tolap be jolma i mangalo angka tahitahi ni sibolis marhitehite hadirionna sandiri, dia ma na hombar tu na hinalomohon ni sibolis, i do na niulahonna jala digohi. Gabe marlea do jolma i binahen ni sibolis jala sai marnasusa do ngoluna. Ndang adong jumpang hasonangan di ibana. Ndang diboto be na denggan, ndang dihalomohon angka hadengganon.
Di ayat 28 tarida do parulaon ni sibolis na so manghalomohon haroro ni Tuhan Jesus di luat Garada, ala diboto sibolis na so margogo ibana mangalo huaso dohot gogo ni Tuhan Jesus. Alai naeng do berusaha sibolis i mangambati Tuhan Jesus mian di luat i alai ndang tolap. Ditanda jala diparhatopot sibolis do hatimbulon dohot huaso ni Tuhan Jesus na mangatasi huasona nang huaso ni angka donganna. Ndang tolapna, alai mangelek do ibana tu Tuhan Jesus asa unang diarsahi ibana. Tutu do nian parasi ni roha do Tuhan Jesus, jala balga do holong ni rohaNa tu ganup na ro tu Ibana. Alai ndada songon i ianggo sibolis. Dibaen sibolis i do dalan asa mandapot asi ni roha ibana sian Tuhan Jesus, alai ndang dapotna (ayat 29).
Marhuaso do Tuhan Jesus manegai ulaon ni sibolis, ndang adong gogo manang huaso na boi dipatudos tu gogo dohot huaso ni Tuhan Jesus. Peak do di toru ni patNa huaso dohot gogo ni sibolis. Disungkun Tuhan Jesus do goar ni sibolis na songgop tu jolma i. Laos didok sibolis i do goarna Legion (ayat 30). Hata Legion marlapatan loksa, torop manang godang. Naeng do dipatobohon sibolis molo torop manang godang nasida, lam margogo ma nasida mangalo huaso manang gogo ni Tuhan Jesus. Ai tung susa do ngolu ni jolma inganan hasandaran ni sibolis pangago i, diparsulampak nama pamatang ni jolma na sinonggopanna i, mangido asi ni roha ma muse ibana tu Tuhan Jesus asa unang dipaksa nasida turun tu banua toru, jala diloas nasida mamongoti angka babi na pinarmahan ni angka parmahan na di luat i (ayat 31). Sekilas boi do idaonta manang marpandapot haoloion ni Tuhan Jesus patupahon na pinangido sibolis marhite na olo Jesus marsuru Legion i masuk tu angka babi na di ladang i (ayat 32).
Laos ruar ma tondi na jat i sian jolma i, dibongoti ma angka babi, laos marbubur ma na sapunguan i tu tao laos mate mogap (ayat 33). Dipangke Jesus do angka pinahan na adong di ladang i laho mamboan sibolis na marloksa i tu ingangan banua toru. Inganan paruhuman na parpudi, inganan na gok anggukanguk dohot sitaonon na hansit. Ndang adong partingkian dilehon Tuhan Jesus tu sibolis i laho marhamubaon ni roha, alai pintor dipataru do sahat tu inganan hamagoan, inganan na gok na hansit dohot anggukangguk, inganan paruhuman ni sibolis pangago i.
Di tingki masa saluhutna i, diida angka parmahan ni pinahan i ma na masa i pintor maporus ma nasida, jala dibaritahon ma i di huta dohot di angka ladang (ayat 34). Boi do dohononta maporus pe angka parmahan i, ala ni biar ni rohanasida do marnida huaso ni Tuhan Jesus na monang maralohon huaso ni sibolis parjahat i, somal do mabiar jolma mardonokhon angka naung hona songgopan ni sibolis, alai ndada songon i molo Tuhan Jesus. Tuhan Jesus Kristus justru mamarenta sibolis i laho manadinghon jolma na sinonggopanna.
Marhahipason ma jolma na pinaluaNa i. Ndang be gabe inganan parmianan ni sibolis pamatang ni jolma na pinalua ni Tuhan Jesus. Hatahuton ma angka jolma na marnida jala mambege halongangan na binahen ni Tuhan Jesus. Tung balga situtu roha ni jolma na pinalua ni Tuhan Jesus, asa dohot ibana gabe siihuthothon Tuhan Jesus (ayat 38). Alai dipopai Tuhan Jesus do ibana, disuru Tuhan Jesus do ibana asa mulak (ayat 39), muli mamboan jala pararathon barita halongangan na binahen ni Tuhan Jesus. Gabe sar ma barita taringot haluaon na pinatupa Tuhan Jesus.
Kesimpulan dan Refleksi
Di partingkian si nuaeng on tongtong dope mangula angka sibolis mangalului pamatang ni ise ma na gabe inganan hasandaranna. Torop do rupa ni sibolis ianggo si nuaeng. Ragam do nuaeng rupa manang haragamon ni sibolis. 1 Petrus 5 : 8 mandok: "Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna." Ndang boi tapangasahon hadirionta mangalo huaso ni sibolis, alai tapangke ma huaso ni Goar ni Tuhan Jesus. Tung margogo jala marhuaso do hata ni Tuhan Jesus Kristus manaluhon huaso ni sibolis dohot soropna.
Ragam do dalan ni sibolis na boi mambahen hita lilu jala gabe parhiteanna pasauthon angka tahitahina. Boi do i marhite panjaga badan, sumangot manang sahala ni naung mate (disarupahon sibolis i do rupana tu keluarga manang halak naung mate asa porsea hita tu ibana), begu, jin dohot angka na suman tusi. Disuman sibolis do pangajarionna songon na tarsurat di Bibel, na boi mambahen hita porsea di Tuhan jala porsea di sibolis (sinkretisme), mambahen ajiajian dohot ulaon hasipelebeguon na asing.
Gomos ma taalo sibolis i marhitehite huaso Goar ni Tuhan Jesus Kristus. Gomos ma hita mangalo sibolis marhitehite haporseaon di Tuhan Jesus Kristus (1 Petrus 5 : 9). Unang tapelehon pamatangta on gabe inganan hasandaran dohot inganan parmianan sibolis manang tondi na jat, gabe hagigion do i di Debata. Ndang jumpang hadengganon dohot hasonangan di ngolu ni na sinonggopan ni tondi na jat. Ala ni i, tapelehon ma pamatangta on gabe inganan ni Tondi Parbadia, asa boi pangkeonta pamatangta on gabe hasangapon dohot hamuliaon ni Debata. Amen.
Posting Komentar