Jamita Partangiangan Epistel Minggu 20 Juli 2025 Minggu 5 Dung Trinitatis tarsurat di buku Amos 8 ayat 1 - 12. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Mamillit na Dumenggan." Rap ma hita mangihuthon hatoranganna.
Pendahuluan
Ndang na hasuhatan denggan basa ni Jahowa marmudumudu bangso Israel. Nunga tung dipatuduhon Jahowa angka denggan ni basaNa holan laho manghophop bangsoNa i. Nungga tung godang angka panurirang na gabe perpanjangan tangan dohot na pasahat Hata ni Debata laho marmudumudu huhut maniroi bangso i asa manongtong mangolu di bagasan roha na biar mida Jahowa. Alai sai jotjotan do bangso i sai mangulahon angka hatangkangon na mambahen jut roha ni Jahowa.
Tandip ma i di masa hapanurirangon ni panurirang Amos, topet di masa harajaon ni Raja Jerobeam II gumomgom Israel bagian Utara dohot Raja Uzia gumomgom Jehuda bagian Selatan ni Israel, hatangkangon ni bangso i, i ma na so pajongjong hasintongan nasida jala ginjang ni roha ni parugamoon. Panurirang Amos, sahalak parmahan na godangan tingkina marmahan di ladang. Alai tarbege do sahat tu ibana rumang ni pangalaho ni halak Israel na di perkotaan, na gok mangulahon dosa.
Tarmasuk Raja Jerobeam II na laos sarupa pangalahona dohot amana i ma Raja Jerobeam 1, na tong mangulahon hajahaton, jala mambahen jut roha ni Debata. Kebobrokan moral dohot haporseaon mardomu tuk ma di tongatonga ni bangso i. Mida i, marhite turpok on, ro ma Debata laho pasiaphon bangso i. Asa songon na sinuriranghon ni panurirang Amos, na ro ma Debata laho manguhum bangso i, marhite serangan militer bangso Asyur. Nian, marningot denggan basa ni Jahowa gumomgom bangso Israel, ndang patut be bangso i mangulahon si sosongon i maradophon Debata. Alai dietong roha ni bangso i do huroha nunga na denggan na niulana, hape ndang sadar nasida na ro ma Debata laho manghuhum nasida. Sai dirimpu bangso i do huroha sai dapotan parsaulian nasida di na mangulahon si songon i, hape tu hamagoan do. Songon pandok ni halak Batak, sai nirimpu parhunihan hape pargadongan; sai nirimpu parsaulian hape hamagoan. Dibahen i, asa unang lilu hita di angka pardalanan ni ngolu on, tapamanat hatorangan ni turpuk on, laho mangarangrangi mamillit na dumenggan i.
Pembahasan
Panurirang Amos na sian Tekoa, sian bagian selatan (Judea) Israel do ibana tarjou gabe panurirang. Sasintongna, panjouon ni si Amos gabe panurirang ndang na pola ala tertarik manang na songon na bergumul ibana di angka pangalaho ni bangso i. Alai holan ala ni panjoun ni Debata sambing do tu ibana. Unduk do si Amos di panjouon i. Ala tangkas do tutu, dihilala jala dihatindanghon ibana rumang ni parngoluan ni bangso i, naung dao manimbil sian Jahowa. Dipillit si Amos do mangoloi Debata, ai i do na dumenggan. Dumenggan do tutu unduk di parsuruan ni Debata. Unduk ni roha ni si Amos sebagai sahalak parmahan, tandip do di dirina, na ingkon parmahanonna bangso i, asa anggiat antus di lumbalumba ni Debata taringot tu paruhuman i. Parjolo ma dipalumbahon Debata tu ibana, dipataridahon Tuhan Jahowa taringot tu rumang ni paruhuman i. Ahu, ida ma, sada hirang na marisi parbue naung malamun. Lapatanna, ndang marpainte jo be Tuhan Debata ro manguhumi bangso i. Asa pandohan on sada ilustrasi do on sian hata Heber na mamangke dua pangantusion, (qayis) lapatanna buah dohot (qes) lapatanna akhir. Sai hira parsaulion do binereng tutu hirang na marisi parbue naung malamun hape hamagoan nama, i ma akhir ni ngolu ni bangso i; akhir ni hajahatonna. Tandip ma i, songon alus ni ni Debata di ayat 2 i, " ... Nunga jumpang hasisimpul ni bangsoHu Israel, ndang be marsombusombu Ahu mida ibana."
Adong ma sada partingkian, i ma tingki paruhuman i, ndang sompat be bangso i marnonangnonang manangkapi na naeng siulahonon ni nasida. Ndang adong kisah ni bangso i laho palua dirina sian paruhuman i. Bahkan, disadarhon tu bangso i, bahwasana ndang jolma i nampuna tingki jala ndang siboto tingki nasida. Lapatanna, di bagasan kronologi (kronos) parngoluan ni jolma i, ndang adong sada partingkian na lehet (kairos) na naeng sihalashonon ni nasida di tingki paruhuman. " ... PaubaonHu ma ari rayamuna gabe pangandungan, jala saluhut endemuna gabe andung ... " (patudos ayat 10). Ai jorbut nasa tahitahi ni nasida di pardalanan ni ngoluna be. Ai manipu do nasida (ndang pajongjong hasintongan) marhite na mandok, " ... Andigan pe ulaning salpu poltak ni bulan asa manggadis eme hita? Andigan salpu dohot ari Sabbat, asa tarungkap sopo paremean? Laho pametmethon solup, jala pabalgahon arga dohot mangansi marhite sian hatian si paotooto." Patealhu do nasida, sai hira adong dope kesempatan (kairos) di nasida laho mar las ni roha di hadosaonna. So haru disadari nasida hadirionna na gok dosa. Dietong roha ni nasida do, bahwasana denggan basa ni jahowa (kairos) sai hira na so mararga. I do umbahen sai pamenakhu dihilala roha ni nasida di hatangkangonna. Dibahen i, nunga tung dipamboanboan na masa i (kronos) nasida tu halumlamon laos marujung di paruhuman i ma (qes) akhir, si nakin.
Bobrok do moral ni nasida, marhite na di haginjanghon roha ni nasida parugamoonna, hape ndang marparbuehon na denggan. Dietong roha ni nasida do patik na 10 i holan teori sambing, na gabe sibanggahonon alai ndang diulahon. Diaturhon do di 3 Musa rumang ni pambahenan na denggan maradophon halak na pogos, ingkon do sarihonon jala dilindungi angka hak-kewajibanna. Alai songon, naung dipatorang di ginjang si nakin, i ma gabe dimanfaathon angka na mora i do na bekerja sama dohot angka malim laho mamisat angka na pogos, marhite na marlomolomo di hak dohot kewajiban ni angka na pogos i. Na sasintongna, nasida do bertanggung jawab laho marmudumudu angka na pogos i songon naung niaturhon ni Jahowa di buku 3 Musa i.
Sandok, ditengatengahon nasida do parugamoonna marhite angka ritual-ritual ni hajahudionna, alai tung maralo sambing do angka di parulaonna tu na sasintongna. Ai dietong roha nasida do ndang marnida Debata di saluhut angka parulaonna i. Dibahen i, maringkon do Debata marhite paruhuman i, asa haru dipaingotingot bangso i ma muse uhum ni Debata na so boi lomolomohon ni nasida. Ingkon rapar jala mauas situtu bangso i di paruhuman i. Alai ndang na mauas di siinumon manang rapar di sipanganon alai tu Hata ni Debata do (patudos ayat 11). Mauas jala raparon ma nasida umbege paniroion ni Debata dohot panghuling ni Debata asa haru dipapuas partondionna. Ai na sai laon, ndang sadar nasida di hajahatonna umbahen mahiang haporseaon i. Songon pandohan ni parpsalmen i do, sai songon ursa do jolma i na malungun di angka guluan, manghalungunhon Debata di bagasan ngoluna (patudos Psalmen 42 : 2). Na gabe si songon i ma na masa bahenon ni Debata tu tongatonga ni bangso i. Na marsitutu ma Jahowa pamasahon paruhuman i marhite serangan ni tentara Asyur. Ai ndang sadia leleng, masa ma paruhuman i tu bangso Israel dung sinuriranghon ni si Amos na masa on. Talu do bangso i maralohon tentara Asyur jala bolong ma bangso Israel tu habuangan Asyur.
Kesimpulan dan Refleksi
Molo nijujuran do di pardalanan ni ngolunta, gok do angka uli basa naung pinalumehon ni Jahowa tu hita. Jala ndang hasuhatan balga ni holong ni rohaNa tu hita. Alai di parpudian ni ari on, hinorhon ni "haulion" ni haportibion on, ragam elaelana tu hita asa haru sarombang hita dohot portibi on. Di sada sisi, si hamuliatehonon do nian na adong di portibi on, lumobi ma di kemajuan ni zaman si nuaeng on. Justru, dipangke Debata do nang portibi on gabe parhiteanNa laho parorot hita. Alai, sipata sai taetong do sude angka parsaulian angka na di portibi on, umbahen gok halak hita Kristen na gabe lilu di bagasna, ndang sadar hita hape nunga tu hamagoan. Mirisna, gabe taoloi muse do angka na masa i, umbahen gabe lam tu bagasna hita madabu tu hajahaton. Bahkan, olo sai hira siboto tingki hita di bagasan ngolu on; seolah-olah hita nampuna tingki (kronos). Hape nunga lam mandao hita sian angka denggan basa ni Jahowa na manongtong ganup tingki di bagasan ngolunta (kairos). Molo antar adong angka hata togutogu asa unang padaohu hita mangalangka, pintor sai mura do hita mandok, "adong ma annon tingki ni i (maksudna laho paubahon roha)". Ndang taingot jala ndang tasadari be angka denggan basa ni Jahowa i.
Laos songon dia pe, pasti taboto do mambandinghon na denggan dohot na so denggan. Ai nungga suatu hal na alamiah i di hadirion ni jolma. Ndang adong jolma mamparsinta angka na so denggan masa di bagasan ngoluna. Bahkan, sian dakdanak molo manonton film action hita, nunga taboto hian mananda ise do penjahatna jala ise na burju. Jala ndang adong mangarahon hita, alai nunga dipabotohon di nalar pikiranta, selalu do berpihak hita tu na burju i (na denggan). Asa dung i, sotung taoloi tarrimas Debata di bagasan ngolunta. Pardenggan basa do Jahowa jala sai mulak do rohaNa mida hita, alai ingkon taingot, upa ni pambahenanta na jahat i, ingkon jaloonta do di parumuhan i. Dibahen i, sotung sanga pabagashu rimas ni Debata maradophon hita, sai tapillit ma angka na dumenggan i, tapangke tingkinta, laho padonokhon diri tu Debata, unang marpainte jo, ai paruhuman i, ndang marpainte jo i anggo dung pamasaonna. Amen.
Posting Komentar