Jamita Minggu 21 September 2025 Minggu 14 Dung Trinitatis tarsurat di Psalmen 24 ayat 1 - 10. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Jahowa Zebaot, Ibana do Raja Hamuliaon i." Rap ma hita mangihuthon hatoranganna.
Pendahuluan
Turpuk Jamita on, i ma sada Ende Psalmen sian Raja David. Psalmen on digurithon songon tanda hamuliateon ni roha ni raja i, siala pandonganion ni Jahowa di bangsoNa Israel. Pandonganion ni Jahowa, mansai tangkas do dihilala bangso i, marhite ragam ni las ni roha dohot pasupasu na pinamasa ni Jahowa tu nasida, tarlumobi muse, naung monang bangso i maralohon bangsa na sai laon mambahen nasida sai di bagasan hatahuton, i ma bangso Palistim.
Dijou, dipillit jala disuru Jahowa do Si David, mandopang musu ni bangsoNa i (Palistim), laos dihamonanghon si David do paraloan i. Lam martamba do las ni roha ni bangso i di Hamonangan i, ai ndang adong sian nasida (Israel) na gabe korban di tontanga ni, songon na somal di angka na masa di ganup parporangan. Hamamasa ni parporangan i, i ma na langsung berhadap-hadapan antara si David sian horong ni halak Israel dohot si Goliat sian horong ni halak Palistim. Si David manaluhon si Goliat holan marhite sada batu ni ambalang na hona tu ulu (pardompahan) ni si Goliat, laos mate ma si Goliat. Marnida na masa i, pintor sumurut tu pudi do saluhut parangan ni halak Palistim, sebagai tanda hataluan nasida (mengakui kekalahan (1 Samuel 17)).
Mangihut ma muse, dung tarpillit si David gabe raja di Israel. Adong do sihol ni roha ni bangso Israel na mansai balga situtu, i ma taringot Poti Parpadanan. (Poti Parpadanan i ma, sada poti na metmet na dibahen halak Jahudi, inganan ni angka ulaula na badia di ugamo nasida, isarana: 2 (dua) Lei Batu, na dijalo si Musa sian Jahowa uju di dolok Sinai, na marisihon 10 (sampulu) patik; tungkot ni si Harun; dohot roti manna). Dihaporseai halak Jahudi do, paboa Poti Parpadanan i ma songon hataridaan (bentuk kehadiran) ni Jahowa di tongatonga ni bangso i. Jadi mansai arga situtu do poti parpadanan i di ngolu ni bangso dohot ugamo Jahudi.
Hape, nunga na nia lelengna, poti parpadanan i mago so diboto bangso i. Mangihuthon turiturian ni halak Israel, Poti Parpadanan i nunga ditangko halak Palistim, laos dipangke nasida (Palistim) gabe inganan panombaon tu dewa nasida, jala nunga 20 (dua pulu) taon lelengna. Dung monang bangso i, laos mangihut ma muse jumpang (mulak) tu nasida Poti Parpadanan i. Laho manghalashon naung jumpang Poti Parpadanan i, diuluhon Raja David ma patupa ulaon pesta bolon di bangso i, i ma pesta mangusung Poti Parpadanan i masuk tu undungundung naung dirade hian ingananna di Jerusalem. Mansai gok las ni roha di bangso i, marsuraksurak mamuji Jahowa mangiringiring poti parpadanan, i ma ulaon bolon dipamasa bangso i (2 Samuel 6 : 17), laos gabe sibonsiri ni turpuk Jamita on.
Pembahasan
Huaso dohot Hamuliaon ni Jahowa (ayat 1-6)
Asa lam ampit pangantusion taringot turpuk ni Jamita on, mansai denggan situtu do, molo tangkas tajaha buku 2 Samuel 6. Disi digurithon do angka na masa uju disangkapi dohot dipatupa Raja David ulaon mangusung Poti Parpadanan sian ingananna na parjolo sahat tu Jerusalem.
Di mulana, Poti Parpadanan i disimpan di bagas ni si Aminadab. Laho mangusung Poti Parpadanan i tu Jerusalem, ditogihon si David do 30 (tolu pulu) halak sian bangsa Israel donganna. Dipamasuk nasida ma Poti Parpadanan i tu hureta, laos ditogu anak ni si Aminadab na margoar si Usa dohot si Ahio ma hureta i. Hape di pardalanan i, tarsulandit do lumbu na manarik hureta i, gabe naeng dabu Poti Parpadanan i, laos ditangkup si Usa do Poti Parpadanan i. Nian denggan do na binahen ni si Usa i, alai gabe hona uhum si Usa marhite na dibunu Jahowa si Usa. Hinorhon ni habadiaon ni Jahowa, ndang jadi dais angka na marlaok dosa.
Marnida na masa i, gabe mabiar situtu do si David, gabe marhusor ma rohana, diuba ma pardalanan mamboan Poti Parpadanan sian sangkap na parjolo, ai ndang be ditorushon mamboan Poti Parpadanan i tu Jerusalem, alai didok si David ma asa dipeakhon Poti Parpadanan i di bagas ni si Obed-Edom.
Dung tolu bulan Poti Parpadanan i dipeakhon di bagas ni si Obed-Edom, ndang masa uhum tu keluarga i songon na nihabiaran ni Raja David, alai baliksa do na masa, gok pasupasu do si Obed-Edom dohot sude isi ni bagasna. Dung sahat barita i tu si David, diulahi si David ma mangusung Poti Parpadanan i sian bagas ni Obed-Edom laos dipeakhon di bagasna, di Jerusalem.
Sian na masa on, dibahen si David ma sada Ende Psalmen, na marisihon: "Huaso ni Jahowa dohot hamuliaonNa. Marhite ende Psalmen on, disoarahon si David do, ia Jahowa, i ma pargogo na so hatudosan. Ibana do na manompa dohot nampuna nasa na adong di portibi on, termasuk jolma manisia. Laos huaso ni Jahowa ndada holan di portibi on, alai di banua ginjang, di banua tonga dohot di toru ni tano (laut dohot sunge).
Ia taringot tu hamuliaon ni Debata, didok si David do paboa na badia do Jahowa. Pandohan na badia di turpuk on, di hata Heber dipangke pandohan dəšōw, na marharoroan sian hata qādoš na marlapatan: memisahkan diri, holang sian dosa. Ndang adong na badia songon Jahowa (Psalmen 99 : 5). Na badia do Jahowa Zebaoth (3 Musa 19 : 2) alai baliksa, mardosa do jolma, ala ni i hadosaon ni jolma ndang tuk pajumpang dohot habadiaon ni Jahowa.
Di ginjang nunga dipaandar, paboa hinorhon ni habadiaon ni Jahowa, gabe mate si Usa na maniop Poti Parpadanan i. Marhite sian na masa i, disoarahon si David do paboa ndang saluhut jolma tuk mandapothon Tuhan i. Laho mempertegas pernyataan i, dibahen si David ma sungkunsungkun na mandok: Ise do na jadi nangkok tu dolok ni Jahowa? Jala ise do na hum jongjong sogot di hajongjongan ni habadiaonNa i?
Dolok na didokna di turpuk on, i ma dolok Sion, inganan habadiaon ni Jahowa (Jesaya 8 : 18), jala laos di dolok on do Raja David dipasupasu gabe sada Raja ni Israel (Psalmen 2 : 6). Dolok na timbo do dolok on, patandahon hasangapon ni Jahowa, na tumimbo sian angka partogi ni portibi on.
Na mangihut, didok si David do angka halak na jadi nangkok tu dolok ni Jahowa, i ma partangan na lidang na so mangulahon dohot marlaok dosa. Ndada holan tangan sambing na nidokna dison, alai dohot do nang angka bagian ni pamatang na asing, isarana: simalolong, simanjojak, sipareon dohot lan na asing.
Manomba Debata Jahowa ingkon do di bagasan roha na ias. Alana, molo na roa do di roha ni jolma, roa do dohot parulaonna (Mateus 15 : 18). Taingot ma, totap do jolma mardosa marhite panghataion, mardosa marhite parlangkaan, mardosa marhite angka parnidaan.
Na mangihut muse didok, halak na manomba Debata Jahowa di bagasan hatigoran, i ma halak na so marpangansi (munafik), alai tigor jala ias so marlindang, alai na manomba Jahowa marsundutsundut (turun temurun), lapatanna, ndang adong sian pomparan nasida na manimbil manomba debata na asing, alai baliksa, angka halak na mangalului bohi ni Jahowa i ma angka na so boi holang diriNa sian Jahowa, alai tongtong pasolhothon dirina tu Jahowa ganup ari.
Bongot Raja ni Hamuliaon i
Songon naung digurithon di ginjang, Poti Parpadanan diboan sian bagas ni si Obed-Edom tu Jerusalem, huta ni raja David. Laho manomunomu dohot pasiat Poti Parpadanan i masuk tu Jerusalem, disoarahon si David do asa diungkap angka harbangan ni huta Jerusalem.
Di buku Padan na robi uju Panurirang Hesekiel, dipabotohon do paboa adong do 12 (sampulu dua) harbangan (Heber: Sya'ar) na marlapatan pintu manang bahal haruar dohot masuk tu Jerusalem. Na sampulu dua i, dibahen tungkan Utara margoar bahal Ruben, bahal Juda dohot bahal Levi; tungkan Purba (Timur) margoar bahal Josep, bahal Benjamin dohot bahal Dan; tungkan Dangsina (Selatan) margoar bahal Simeon, bahal Isasar, dohot bahal Zebulon; tungkan Pastima (Barat) margoar bahal Gad, bahal Aser dohot bahal Naptali (Hesekiel 48 : 30 - 35). Saluhut harbagangan i diungkap manomunomu raja hamuliaon na naeng bongot tu ingananna di Jerusalem.
Molo lam pinamanat na ginurithon ni Panurirang Hesekiel na di ginjang i, paboa Jerusalem i ma pusok (pusat) ni sude liat portibi on, sian Utara tu Dangsina; sian Pastima tu Purba. Lapatanna, saluhut isi ni portibi on, mangungkap harbangan (bahal) na di ibana be, termasuk bangso Indonesia. (Catatan: Sian peta na adong sahat ro di tingki on, Indonesia termasuk do bagian ni pintu harbangan sabola Timur, khususnya Pulau Jawa dan Sumatera bagian Selatan na masuk horong ni bahal Josep; na asing, isara ni Papua, Kalimantan. Sulawesi, Sumatera Tengah sahat ro di Nangroe Aceh Darussalam masuk tu horong ni bahal Benjamin).
Harbangan na didok na di turpuk on, i ma roha ni jolma i. Dipangido turpuk Jamita on, asa ungkap laho manjanghon haroro/habobongot ni Jahowa. Ingot ma, haroro ni Jahowa tu ganup na porsea, songon si Obed-Edom, ndada mambahen hasusaan manang hamatean, alai baliksa mamboan pasupasu tu ganup jolma partangan na lidang, na ias roha, parroha na so mangihuthon na so hasea, jala na so olo margana laho mangansi (ayat 4-5).
Kesimpulan dan Refleksi
Huria Kristen Indonesia (HKI), i ma huria naung tang (matoras), naung marumur 98 (sia pulu ualu) taon. Di umur na mansai ganjang, nunga tingkina jumpang di tonga ni huria pangabahan ni ngolu dohot haporseaon na lam pita. Alai, molo dibahen do rujiruji, ra satolop do hita mandok paboa mansai godang dope sipareahan ni ganup huria nang ruas ni huria i, baik marsasahalak nang rap angka dongan saparsaoran di huria i. Lam martamba ari, naeng do nian lam martamba bilangan ni angka na porsea, alai kenyataanna, mansai dao do bilangbilang ni torop ni ruas di buku (secara administrasi) molo dibandinghon tu torop ni na aktif di ulaon huria i.
Uju di tingki ni Raja David, diungkap do saluhut harbangan asa bongot Raja ni Hamuliaon i. Nuaeng, ditogihon turpuk Jamita on, asa saluhut ruas ni Huria mangungkap rohana, manjanghon Jesus, Raja na marmulia i. Ro Ibana manopot jolma i, asa taruli pasupasu na binoanNa. Dibahen i, di haroroNa i, naeng ma jumpangNa hita songon halak partangan na lidang, na ias roha, na so mangihuthon na so hasea, jala na so olo margana laho mangansi.
Di taon 2025, digoari do taon "Peningkatan Mutu Pelayanan dan Pendidikan." Pelayanan dan Pendidikan tudos tu dua sisi mata uang, na so boi sirangon. Pelayanan dan Pendidikan, i ma sada ciri ni gereja HKI (najolo: HChB). Ai di ganup inganan hajongjongan ni Gereja, sai mangihut do disi jongjong nang singkola. Ingkon angkuhononta do paboa hinorhon ni kebijakan ni pamarenta, godang do singkola ni HKI ndang boi bertahan hidup manang mate. Alai marhite turpuk Jamita on, gabe renungan do tu hita, boha do asa boi mangolu jala meningkat pelayanan ni HKI di bidang pendidikan. Pendidikan na nidokna, ndada holan pendidikan formal, alai pendidikan na patimbo parbinotoan dohot pangauhonon sian parbinotoan i, asa lam bangkit parngoluon.
Ndang adong na tarpangasahon hita, so holan Jahowa. Ibana nunga rade manopot hita, alai asa gabe pasupasu haroroNa, naeng ma hita mangolu di bagasan ngolu halomoan ni Jahowa. Amen.
Posting Komentar