Jamita Partangiangan Epistel Minggu 12 Oktober 2025 Minggu 17 Dung Trinitatis tarsurat di buku Daniel 3 ayat 13 - 18. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Mambaritahon Barita na Uli sian Hibul ni Roha." Rap ma hita mangihuthon hatoranganna.
Pendahuluan
Patolutaonhon di gomgoman ni si Joiakim harajaon Juda, ditungkum si Nebukadnesar, raja Babel i do huta Jerusalem. Hatiha i, hombar tu tona ni raja i, saut do diangkut si Aspenas (naposo ni Nebukadnesar) tu Babel deba sian halak Israel i ma angka pinompar ni raja dohot sian halak na sangap. Diboan asa gabe marhaladoi di istana ni raja Nebukadnesar. Angka nasida i ma angka dolidoli na so adong tihasna, angka na uli rupa, angka na pantas di sandok hapistaran, angka parhapistaran godang, angka na marroha, jala angka na tau marhalado. Tingki i adong ma opat halak dolidoli na diboan tu Babel, i ma na margoar Daniel (Belsazar), Sadrakh (Hanaya), Mesakh (Misael) dohot Abednego (Azarya) (Daniel 2 : 48 - 49).
Siala posisi jabatan na hinundulan ni si opat halak Jahudi on, naung gabe patubu hansit ni roha (iri hati) do hape i di angka pegawai na asing naung leleng menjabat di istana ni raja i. Tarmasuk ma angka nasida pegawai ni raja i na sian halak Kasdim (Daniel 3 : 8). Siala i gabe diasungi manang sai mangalului dalan ma nasida boha carana manggojaphon siopat halak Jahudi on (mereka mencari celah para pemuda cerdik pandai ini dengan tujuan menjatuhkan reputasi baik atau menghancurkan posisi jabatan mereka).
Dungkon disahap raja i sada aturan na mandok ingkon sude halak ginomgomanna unduk marsomba manang mamele tu patung ganaganaan sere naung pinajongjongna (ayat 3 - 7), gabe sai dipamanatmanat halak Kasdim i ma siopat halak Jahudi on. Dung dibereng na so olo halak i marsomba tusi, pintor dialuhon ma nasida tu raja i (ayat 8-12), dohot maksud asa diuhum nasida jala laos dipaturun ma sian jabatanna i. Umbege alualu i piripirion jala muruk situtu ma raja i. Alai hinorhon ni balga ni holongna tu na opat halak on, ndang pintor didabu uhum tu nasida. Jolo dijou do nasida laho patangkashon (mengklarifikasi) pangalahona i. Taringot tu son ma na dihatai di turpuk Epistel ombas on.
Pembahasan
Dung ro dolidoli Jahudi i mangadop raja tu istanana, dibahen balga ni holongna tu halak on, jolo ditawarhon raja i do tu nasida win win solution. Di ayat 25-16 didok: "Atehe, tongon do ale Sadrak, Mesak dohot Abednego, ndang olo hamu mamele tu debatanghu, jala ndang olo hamu marsomba tu ganaganaan sere naung hupajongjong i? On pe molo olo hamu nuaeng, disi dibege hamu suara ni sarune, tulila, hasapi, arbab, sordam, gondang dohot sandok ragamragam ni parhinaloan, marsinggang jala marsomba tu ganaganaan naung hupauli i? Alai molo so olo hamu marsomba, ingkon tongkin nari hamu timpalhononhon tu liang pamurunan na marnalanala! Dung i idaon ma manang Debata dia na tuk paluahon hamu sian tanganhu!" Molo di hata siganup ari nuaeng on, boi dohonon tar songon on ma pandohan win win solution i: Ayolah Sadrakh, Mesakh dan Abednego, kalian cukup sujud saja kok, tidak perlu macam-macam, yang penting orang banyak bisa melihat kalian tunduk terhadap perintahku. Setelah itu kamu pasti akan kuberi harta dan posisi yang bagus."
Sian tawaran i, tung marusaha situtu do nian raja i mangelek (membujuk) halak Jahudi on, boha ma asa unang gabe guntur angka pegawaina na asing i ala ni cemburuna. Alai ternyata martahan do nasida di prinsip hadirionna. Ndang olo nasida mangoloi elekelek (bujukan atau rayuan) ni raja i. Ai didok nasida do mangalusi raja i: "Ale Nebukadnesar, ndang pola alusannami ho, anggo taringot tu na nidok mi. Molo lomo roha ni Debatanami, na huoloi hami, sai paluaonNa do hami sian liang pamurunan na marnalanala i dohot sian tanganmu, ale rajanami. Alai nang so lomo rohaNa, ingkon botoonmu do, ale rajanami, na so olo hami mamele tu angka debatamu manang marsomba tu ganaganaan sere, naung pinajongjongmi" (ayat 16-18). Pintor torang do alus i dihatahon nasida tu raja i, ala pasti disadari nasida do molo naeng marsualjawab (berdebat) tu raja i ndang tarbahen monangna i. Mardomu ala naung tangkas do dihaporseai nasida, ianggo Debata Jahowa na sinombanasida i tung Debata na marhuaso do paluahon nasida sian ragam ancaman i. Jala Debata na so adong hatudosanna do Ibana martimbanghon nasa debata na adong di tano on.
On ma ojahan na tangkas mandasori rohanasida di na mangalusi hata ni raja Nebukadnesar i. Hot ni haporseaon nasida i saurdot ma tu na hea hinatahon ni si Jeremia mandok: "Iale Tuhan Jahowa, ida ma nunga dijadihon Ho angka langit dohot tano on marhitehite hagogoonMu na godang i dohot marhitehite tanganMu na toltol i, ndang adong na so tarpatupa Ho nanggo sada; ida ma, Ahu do Jahowa, Debata ni nasa manisia. Tung adong ma tagamon na so tarpatupa Ahu?" (Jeremia 32 : 17, 27). Alai nang pe songon i, tong do dilapik nasida hatana mandok: "Alai nang so lomo rohaNa, ingkon botoonmu do, ale rajanami, na so olo hami mamele tu angka debatamu manang marsomba tu ganaganaan sere naung pinajongjongmi" (ayat 18). Na marlapatan do i paboa na so holan roharohanasida sambing dipangasahon, alai saguru di Debata Jahowa do hasahatan ni ngoluna (mereka bertiga tidak memaksakan kehendak, akan tetapi berserah kepada kehendak Allah). Hombar tu goar ni minggunta on, gabe sada Barita na Uli ma on na dipasahat sian hibul ni roha.
Kesimpulan dan Refleksi
Tangkas dope ra taingot be, di ari 1 Juni 1945 naung salpu tubu ma Pancasila di bangsonta Indonesia on. Di pidato na bersejarah pinasahat ni amanta Sukarno hatiha i adong lima ojahan tu hatutubu ni bangsonta on. Sada sian i, Ketuhanan yang Maha Esa. Ia bangso na naeng malua sian parhatobanon na mansai leleng i, ingkon gabe sada bangso na martuhan do. Laos dipatorang do hatiha i mandok na so jadi masipatoruan, alai ingkon na masiargaan do sude penduduk Indonesia taringot tu haporseaonna ganup. Ganup ugamo marhak do tubu di Indonesia on. Ganup penduduk marhak do patupahon angka ulaon parugamoon saurdot tu na hinaporseaanna be. Jala na so jadi manang ise pe mamaksahon haporseaonna tu na asing. Di UUD 1945 Pasal 29 ayat 2 didok tanggungjawab ni negara do manjagahon hak asasi ni rakyat Indonesia marugamo. Laos dipatogu ma i muse di TAP MPR No. II/MPR/1978 taringot tu Ekaprasetia Pancakarsa.
Angka dongan, molo di ombas ni turpukta on, ndang ditanda si Nebukadnesar dope taringot tu hak asasi on. Dipaksahon ibana do sude na torop nirajaanna ingkon unduk marsomba tu debatana, i ma sada ganaganaan sere na pinajongjongna. Manang ise na so mangoloi parenta i ingkon uhumonna. Sikap ni tolu halak dolidoli Jahudi on gabe sada barita na uli ma di ombasta si nuaeng on naung marnampunahon UUD 1945 dohot naung satolop tu ondolan ni Pancasila i. Umbahen na so unduk pe nasida tu pemaksaan i ndang apala ala naung pasti situtu dope diboto nasida na pasti ma paluaon ni Debata nasida sian tangan na gogo ni Nebukadnesar. Tarida do i sian hatanasida na mandok: "Molo lomo roha ni Debatanami, na huoloi hami, sai paluaonNa do hami sian liang pamurunan na marnalanala i, dohot sian tanganmu, ale rajanami. Alai nang so lomo rohaNa, ingkon botoonmu do, ale rajanami, na so olo hami mamele tu angka debatamu. Sikapnasida on patuduhon parsihohotonna mampartahanhon hak asasi nasida. Di barita na mangihutna, dung diida raja i na didongani Debata do tolunsa halak on (patudos Daniel 3 : 24 - 28), gabe diboto ibana ma na so jadi hape patupaon be na songon i.
Mangula do Debata mampartahanhon hak asasi marugamo ni si Sadrakh, Mesak dohot Abednego dohot hak asasi manulak pamaksaon ni Nebukadnesar na mambutbut hak asasi nasida. Na so jadi paksaon sasahalak manomba debata manang dia pe tahe. Mangula Debata paluahon na satia manomba holan Ibana (Daniel 3 : 28). Laos sian pamangan ni raja i do ruar hata on: "Pinuji ma Debata ni si Sadrak, si Mesak dohot si Abednego, naung marsuru suruanNa asa paluahon naposoNa, angka na marhaposan tu Ibana, gabe ndang dioloi patik ni harajaon, tung diseahon do dagingnasida, asal unang mangoloi manang marsomba tu debata si leban, dungkon ni tu Debatana" (3 : 28). Ala nunga diboto raja i lomo ni roha ni Debata Jahowa, i ma na so jadi paksaonna manang ise manomba debata sian sere pinajongjongna, jala na dipalua Debata do na so olo manomba debatana i, di ujungna gabe diparuar ibana ma sada uhum na mangorai manang ise manginsahi Debata Jahowa.
Asa tangkas do sian pengalaman ni raja Nebukadnesar dohot si tolu halak Jahudi na satia on, i ma: Na parjolo, diondihon Debata do na satia tu Ibana. Na paduahon, dialo Debata do nasa na mambutbut hak asasi ni sasahalak na manomba Ibana. Hombar tusi, ala negara na marpancasila dohot marUUD 1945 do negaranta on, taulahon ma na mangihut on: Parjolo, ndang jadi hita mambutbut kebebasan ni manang ise donganta jolma laho manomba na ni haporseaanna. Negara songon tangan ni Debata mangalo hita molo tapatupa i. Paduahon, ndang jadi hita, patupa pangaleaion tu na hinaporseaan ni donganta jolma. Negara songon tangan ni Debata mangalo hita molo tapatupa i. Patoluhon, Ndang jadi hita mangaloas adong manang aha dohot manang ise mambutbut kebebasanta manomba na tahaporseai, ima Tuhanta Sitolusada i. Negara songon tangan ni Debata mangurupi hita molo tapatupa i. Ndang jadi hita mabiar, alai satia ma hita manomba Debata Sitolusada i, ai satia do Ibana mandongani dohot paluahon hita sian rumang ni nasa pangoraion ni panombaannta tu Ibana. Debata palua hita sian angka i. Negara songon tangan ni Debata mangondihon hita patupa kebebasanta manomba Ibana. Amen.
Posting Komentar