Jamita Partangiangan Epistel Minggu 19 Oktober 2025 Minggu 18 Dung Trinitatis tarsurat di buku Lukas 18 ayat 1 - 8. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Nunga Huida Debata." Rap ma hita mangihuthon hatoranganna.
Pendahuluan
Ojahan ni turpuk on i ma "Nunga Huida Debata". Songon dia do parnidaon ni sadasada halak taringot tu Debata? Boi do diida jolma Debata secara langsung? Parnidaan tu Debata i ma marhite haporseaon ta tu Ibana. Ndang diida mata anggo Debata alai diida roha marhite haporseaon di bagasan holong ni rohana di ngolunta. Ngolu ni halak na porsea i ma marhite tangiang. Tangiang i ma dalan ni angka naporsea i laho marsaor dohot Debata di bagasan ngoluna.
Marhite tangiang, disi ma tapasahat angka na tahirim. Martangiang patuduhon parsihohotonta do i tu Debata paboa holan Debata do alus ni angka na tapangido marhite tangiangta i. Jesus patupahon pangajarion tu angka siseanNa marhite umpama sahalak ina na mabalu na ro tu sahalak panguhum. Dipangido ina na mabalu i asa dioloi pangidonna i ma membela hakna. Anggo di mulana ndang pintor dioloi panguhum i pangidoan ni ina na mabalu i. Marhite umpama ni Jesus di turpuk Lukas 18 : 1 - 8 on, i ma naeng parsiajaranta, songon dia do tangiang na ditangihon Debata.
Pembahasan
Ingkon tongtong martangiang jala na so tupa lemba (ayat 1) na marlapatan do i unang marna loja, jala unang lalap di parlalapan ni portibi on alai jugulhon hamu ma martangiang, jala unang mansadi hamu martangiang (Rom 12 : 12). Di turpuk on adong do sada ina na mabalu dohot sahalak panguhum. Dua halak na di gombarhon di turpuk on i ma patuduhon parasingon ni jolma secara status sosial. Boi do panguhum i ma gombaran ni halak na gogo, na sangap, halak na marhuaso. Jala na mabalu i ma halak na gale, na so mardihadiha. Panguhum i ma sahalak na diparsangapi, halak na gogo na gabe parhitean ni Debata di na laho pasahathon hapintoran tu angka jolma i.
Molo tabereng di ayat 2-3 on didok: disi adong sada panguhum na so mabiar tu Debata jala ndang dipardulihon donganna jolma. Panguhum na dietong gabe parhitean ni Debata, hape ndang manghabiari Debata jala ndang dipardulihon ibana donganna jolma lumobi ma tu sahalak ina na mabalu na digombarhon halak na gale, hatihai ro manopot sahalak na marsangap i ma panguhum i, asa dipintori ibana maralohon alona. Diparhatopot ina na mabalu i do dirina sahalak na gale maralohon musuna, ndang hatahata sambing pangidoanna i tu panguhum i. Alai na dihatahonna i, i ma sian ias ni rohana dohot dirina na sasintongna. Alai ndang diharingkoti roha ni panguhum i.
Alai ndang marna loja ina i laho manopot panguhum i, huhut sai dijugulhon ibana pasahathon angka pangidoanna i ma asa dipintori ibana maralohon alona i, ujungna ditolopi panguhum i do pangidoan ni parompuan na mabalu i asa unang sai lalap ibana di nengnengi. Ditolopi ibana pangidoan ni ina na mabalu i ndang ala na mabiar ibana di Debata. Alai asa malua do ibana sian ungutungut ni parompuan na mabalu i. Tangkas di dok ibana "tutu do ndang huhabiari Debata jala ndang parduli ahu di jolma, alai hupintori nama na mabalu on, atik beha ro ibana maon muse dinengnengi ahu, atik beha ro ibana maon muse manggariangi ahu" (ayat 4 - 5).
Di Psalmen 145 : 18 dohot 19 mandok "Donok do Jahowa di sude angka na manjou Ibana, tongon tahe di sude angka na manjou di bagasan hasintongan. Ibana mambahen lomo ni roha ni angka na manghabiari Ibana, jala dibege do angguknasida jala dipalua do nasida". Sada hak na sumurung do on di hita, Jahowa sipanompa na sun gogo i mangido hita asa jonok tu Ibana jala rade do Ibana manangihon sude angka alualunta i marhite tangiangta. Tangiang patoguhon paralealeanta tu Jahowa. Molo jotjot manghatahatai na maraleale taringot panghilalaan dohot pingkiran ni nasida be, lam togu ma paralealean ni nasida. Suang songon i do nang hita, molo jotjot hita martangiang tu Jahowa lam togu ma haporseaonta. Marhite tangiang i boi tapabotohon tu Ibana panghilalaanta, holsonta dohot angka parungkilon na taadopi di bagasan ngolunta.
Songon sada ina na mabalu na manghirim manjalo pamintorian sian panguhum di bagasan ngoluna, di bagasan roha na marsitutu ibana laho mangido tu panguhum i, alai ndang pintor ditolopi panguhum i pangidoan ni ina na mabalu i, ditulak do ibana ndang pintor dioloi pangidoanna i. Ndang marna loja ibana jala ndang gabe mandele di bagasan ngoluna alai sai dijugulhon ibana do manopot panguhum i, jala dapotna ma tahe parbue ni roha na marsitutu i ibana. Suang songon i do nang hita, molo marsitutu do hita di bagasan tangiangta i, marsitutu hita ro tu adopan ni Debata, nda tung pasombuonna hita manongtong di bagasan angka parungkilon i, di hagogotan i, alai lehonon ni Debata do tu hita hombar tu angka na taparsinta di bagasan ngolunta on.
Ai Debata, tung so pintoranna ma angka na pinillitNa, angka na manjou ibana arian dohot borngin? Tung pangerngeronna ma di nasida? Tagamon do jumpang Anak ni Jolma i ma haporseaon di tano on di haroroNa i (ayat 7 - 8). Jolma na marsitutu di ngoluna dohot na sai manjou goar ni Debata marhite haporseaonna di bagasan angka parungkilonna, dapotan do hape di ngolu na tama sian Debata.
Kesimpulan dan Refleksi
Marhite turpuk on tangkas diida ina na mabalu i songon dia balga ni holong ni Debata di bagasan ngoluna, ndang dipaloas ibana sai hot di angka parungkilon i jala dipalumehon do di ibana angka na hinirim ni rohana i ma asa malua ibana sian angka tahi ni jolma na so denggan. Di bagasan roha na marsitutu "nunga diida ibana Debata" marhite alus ni angka tangiangna di bagasan angka parungkilon i, marnida ibana di Debata marhitehon haporseaon na di bagasan ngoluna. Nunga dijalo ibana denggan basa ni Debata di bagasan ngoluna. Ndang adong na so tarpatupa Debata di bagasan ngolunta, molo ro hita marsitutu tu adopan ni Debata laho mangido pangurupion (Lukas 1 : 37).
Jolma na tongtong satia di bagasan ngoluna tu Debata molo tung pe di bagasan angka parungkilon, hamaolon dohot angka hasusaan di ngoluna, dapotan angka pasupasu na uli na denggan do i muse di bagasan ngoluna. Jugulhon ma martangiang jala unang marnalemba asa Tongtong Debata na mamintori hita di ganup ngolunta. Martangiang ma hamu, mardongan sandok pangidoan dohot elekelek di bagasan Tondi, manang sadihari pe, huhut dungo jala jugul tontong tumangianghon saluhut angka na badia (Epesus 6 : 18) huhut haporseai ma Debata sian nasa roham di bagasan ngolum ai holan ibana do na tuk paluahon hita sian angka hasusaan, parmaraan dohot angka pangunjunan di portibi on. Ala ni i, ida ma jala haposi ma Ibana sian nasa roha asa tongtong dapotan pasupasu na sian Debata. Amen.
Posting Komentar