Jamita Minggu 31 Mei 2026 Minggu Trinitatis tarsurat di Mateus 28 ayat 16 - 20. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Gabe Sitindangi Debata Sitolusada." Rap ma hita mangihuthon hatoranganna.
Pendahuluan
Dung hehe Jesus, dipatudu do diriNa tu angka sisean di sada dolok, di Galilea. Dipasahat Ibana do angka poda na parpudi, lumobi ma di hinaringkot ni mamaritahon Barita na Uli. Turpuk Mateus 28:16-20 on ndada holan panimpuli ni Evangelium Mateus, dison ma huhut Jesus patuduhon haheheonNa jala pasahathon huasoNa, pasahathon parsuruon tu angka sisean, jala pasahathon pangaramotion na so ra suda, jala patuduhon hasitolusadaoan ni Debata Ama, Anak dohot Tondi Parbadia. Turpuk on jotjot do digoari “Tona na Badia” (Amanat Agung). On ma ojahan parbaritaan Barita na Uli, pamodaion, pangajarion, panindangion jala ngolu ni huria na di bagasan sondang harajaon ni Debata. Aha do Tona na Badia i? Jala aha do na naeng sihatindanghononta? Tapabagas ma pangantusionta taringot tu turpuk on.
Pembahasan
Buku Evangelium Mateus digurithon hirahira taon 80-90 Dung Kristus (Setelah Masehi), dison ma pamuhai di hajongjongan ni punguan ni halak Kristen na pulik sian halak Jahudi. Digurithon hirahira di Antiokia, Siria, sada huta na torop pangisina sian angka desa na ualu, jala torop do disi punguan ni halak Jahudi nang angka na so Jahudi na marragam. Marhadomuan ma on tu isi ni Barita na Uli sian Mateus na diparadophon tu ajaran ni hajahudion dohot parbaritaan Barita na Uli tu saluhut bangso. Tubu ma sungkunsungkun hatiha i: Tadinghonon do hajahudion molo niihuthon Jesus? Jala aha do na patut siulahonon maradophon angka bangso parbegu?
Hatiha i lam ganda do ruas ni huria jala ndang holan halak Jahudi, jala mansai porlu do botoon taringot tu huaso ni Kristus tu saluhut bangso, pandidion, pangajarion na mansai ringkot. Ringkot do muse di huria hatiha i pabotohon identitasna na marharoroan sian ajaran ni Jesus jala ungkap do i nang tu angka halak na so Jahudi ro di sude angka bangso parbegu.
Uju digurithon turpuk on, huta Judea dohot humaliangna di bagasan panggonggomion ni kesar Rom na otoriter, militeristik jala na manghajongjonghon panombaon tu kesar. Kesar Domitianus na mamarenta hatiha i (taon 81-96 M), manghajongjonghon panombaon tu kesar, jala i ma na manghorhon paraloan maradophon halak Kristen na manghaporseai Tuhan Jesus. Ia pangisi ni Rom hatiha i torop do na manomba ganaganaan (dewa-dewi), adong muse do na mameop angka parsiajaran (filsafat) ni halak Gorik, adong na manomba kesar jala adong do ugamo naung adong hian disi. Marasing do halak Kristen maradophon angka nasida, ala holan sada do Debata na sinomba ni halak Kristen jala ndang manomba tu ganaganaan manang kesar, jala ndang mardebatahon angka debata (dewa-dewi) ni halak Rom.
Ayat 16
"Sisean na sampulu sada ... ." Dung hamamate ni si Judas Iskariot (ida Mateus 27:3-10), ndang digoari be nasida "sampulu dua sisean". Inganan Galilea na di ayat on i ma inganan na ringkot ala dison do Jesus mamuhai panghobasionNa (ida Mateus 4:12-17). Di Buku Mateus, huta Galilea i ma mula na imbaru, inganan pangungkapon jala pamuhai di parbaritaan tu saluhut bangso.
Ayat 17
Hata “disomba ma” di ayat on molo di hata Gorik i ma “proskyneō” na marlapatan “unduk” manang “mangalompit tot” (menunduk atau bersujud) jala marlapatan ma i “marsomba”. Di Padan na Robi ulaon si songon on holan dipatupa tu Debata do (patudos 2 Musa 20:5; Psalmen 95:6), jadi hata i dipangke laho pahothon hadebataon ni Jesus hombar tu Buku Mateus. Jesus naung hehe sian hamatean i ndada holan sada guru alai Debata sisombaon.
“ … alai na ganggu do roha ni na deba … .” Hata “ganggu” (hata Indonesia: Ragu-ragu) di bagasan hata Gorik “edistasan” holan dua hali do hata on adong di Padan na Imbaru i ma di ayat on dohot di Mateus 14:31 uju lonong si Petrus ala ganggu (bimbang, goyah, tidak yakin). Di bagasan konteks ni ayat on, hagangguon ni na deba i ma ala ni: ndang tarbahen nasida dope mangantusi haheheon ni Kristus. Adong paraloan ni haporseaon dohot pikiran ni jolma na so tuk laho manigati huaso ni Debata. Maol dope tarjalo rohanasida saluhut na niida nasida i.
Ayat 18
“ … didapothon Jesus nasida … .” Hata on laho pahot haporseaon nasida jala pataridahon diriNa tu angka na ganggu dope. Hata “nasa huaso” di bagasan hata Gorik “pasa exousia” i ma huaso na gok maradophon surgo ro di saluhut na tinompa, di surgo: marhuaso do Ibana di ginjang ni angka surusuruan, pardisurgo, jala di dimensi rohani. Di tano on: marhuaso do Ibana maradophon saluhut jolma, bangso, angka pamarenta nang harajaon.
Ayat 19-20
Turpuk on ma tona na badia (sering disebut Amanat Agung). “Laho ma hamu … .” On ma hata ni Jesus na marsuru (kata-kata pengutusan) angka sisean i nang angka na porsea borhat tu liat portibi on.
“ … Podai hamu ma saluhut bangso ... .” Boi dilapati gabe “ … bahen ma saluhut bangso gabe siseanHu … ” (jadikanlah semua bangsa murid-Ku). Molo na nidokna “saluhut bangso”, ndada holan halak Jahudi be, nang halak Batak pe ingkon do gabe sisean ni Jesus. On ma sada ulaon pararathon Barita na Uli, sian na parjolo holan tu bangso Israel hian (ida Mateus 10:5-6), saonari nunga gabe tu saluhut bangso. Hata “podai” di bagasan hata Gorik i ma “Mathēteusate” na marlapatan mangarahon, mangajarhon, mamodahon, nasa jolma di nasa bangso asa marroha pangoloion tu ajaran ni Kristus.
Pandidion, i ma sada tanda na laho masuk tu hatopan ni halak Kristen angka na badia (patudos Ulaon ni Apostel 2:38-41). Ia hata “didi” (baptis) di bagasan hata Gorik “baptízontes” na marharoroan sian hata “baptízō” na marlapatan: mandidi, mamburi, dipabonom. Lapatanna dipadidi manang dipabonom ma tu bagasan goar ni Debata Ama, Anak dohot Tondi Parbadia. Pandidion i, i ma di bagasan “goar” ndang “angka goar” manang “goargoar” (tunggal bukan jamak) na marlapatan ma i sada do Debata. Hata “ … di bagasan goar … ” marlapatan ma i masuk tu bagasan huaso dohot parsaoran dohot Debata Sitolusada, jala gabe sada parsaoran hita dohot Debata. Di bagasan goar ni Debata Ama, Anak dohot Tondi Parbadia do haluaon i dipasaut. Di bagasan goar ni Ama, Anak dohot Tondi Parbadia dipatuduhon Jesus do Ibana ndada holan jolma biasa, alai Ibana ma Debata sipujion jala sisombaon, jala Ibana di bagasan Hasitolusadaon ni Debata.
Di ayat 20, hata “ajari” di hata Gorik i ma “Didaskō” na marlapatan ma i “mangajar”. Molo hata “mangaradoti” di hata Gorik i ma “Tērein” na marlapatan “mangaradoti”, “mangulahon”, “mangoloi” (patudos Johannes 14:15). Mangajar i ma sada sian ulaon marbarita na uli na ingkon ulahonon ni angka na porsea tu sandok liat portibi on. Siajarhonon i ma saluhut na pinatikhon ni Jesus (ida Johannes 13:34, Mateus 5-7, Johannes 8:12, 14:6 dohot angka na asing).
Di saluhutna i, diboto Jesus do di ulaon marbarita na uli jala di ulaon angka panghobasion ni angka apostel i sai na adong do angka hamaolon, angka tahi ni parjahat jala ulaon ni sibolis na naeng mangambati ulaon harajaon ni Debata. Ala ni i didok Jesus do “ … sai na dongananHu do hamu ganup ari … ” i ma pangaramotion ni Jesus na so olo suda di sude partingkian jala di sude inganan. “ … Rasirasa ro ajal ni hasiangan on.” Hata on mangapuli angka huria nang angka na porsea molo marsitaonon nasida mangadopi angka na masa.
Kesimpulan dan Refleksi
Sada sian ragam ulaon ni huria i ma marturia, na marlapatan gabe sitindangi, laho mangarahon angka bangso tu parsaoran di bagasan hasitolusadaon marhite pandidion dohot pangajarion. Ulaon marbarita na uli di hita i ma mangarahon asa saparsaoran hita nang saluhut bangso tu bagasan hasitolusadaon i. Ulaon marbarita na uli ndang tarula hita jala ndang tuk gogonta laho mangulahon i sasada hita, ala ni i do umbahen ditutup Jesus tonaNa marhite hata pangaramotion na pahot jala mampargogoi. Manghatindanghon Debata manang gabe sitindangi ni Debata Sitolusada i ma panjouon tu ganup halak Kristen. Ai tu sandok portibi on do naeng pabotohononta holong dohot parsaoran ni Tuhan i.
Saluhutna hita tarjou do asa gabe sitindangi ni Debata Sitolusada, ndada holan ulaon ni pandita manang pangula ni huria i. Di bagasan ngolunta siapari nang di ulaon karejo dohot profesi, boi do tarbahen hita gabe sitindangi ni Debata marhite patuduhon holong na niajarhon ni Jesus, marhite i gabe mananda ma angka jolma na adong di humaliangta, Debata na manghaholongi hita marhite parange, nang ulaonta.
Molo so taulahon tona ni Jesus i, aha ma na masa tu hita? Songon na nidok ni Apostel Paulus di 1 Korint 9:16 “ … marjea do ahu, aut so hubaritahon i.” Molo naung gabe halak Kristen hita, tapaunduk ma dirinta gabe sitindangi ni Debata tu sandok portibi on. Di bagasta be, nang pe laho hita mangaranto, marsingkola, borhat tu luat na dao, ingkon tahatindanghon do Debata. Saluhut parbinotoanta, arta, hasangaponta, pinomparta, karejonta, ingkon tapangke do i laho mambaritahon Debata sitolusada. Amen.
Posting Komentar