Jamita Partangiangan Epistel Minggu 31 Mei 2026 Minggu Trinitatis tarsurat di buku Jesaya 44 ayat 1 - 8. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Gabe Sitindangi Debata Sitolusada." Rap ma hita mangihuthon hatoranganna.
Pendahuluan
Di tongatonga ni portibi na sai mubauba jala gok parungkilon on dipatudu Debata do holong ni rohaNa dohot panjouonNa marhite turpuk on. Nasida na di bagasan habuangan jala angka tahi ni pangelaela laho manomba debata si leban, tongtong do dipatang haporseaon ni bangso Israel ai Ibana do na manjadihon, na paluahon, paulihon, jala ndang adong dungkon ni Ibana. Di bagasan habuangan manang na naeng tu habuangan nama nasida hatiha i (abad ke-6 SM). Magoan tano do nasida, hancur nang joro ni Debata, jala gabe si sungkunon identitas ni nasida sebagai bangso na pinillit ni Debata. Gabe ro sungkunsungkun, boha? Satia dope Jahowa tu hita? Jala ro dope hamaolon na sian angka panomba debata si leban na adong di Babel. Boha do sangkap ni Debata maradophon nasida mangadopi i saluhutna.
Pembahasan
Ayat 1-2
Hata “tangihon ma” di bagasan hata Heber i ma “shema” sada panggoraan asa diparateatehon Hata ni Debata dung hona podai bangso Israel di bindu 43. Di bindu 44 naeng pasahaton ni Debata ma holong satia na sian Ibana. Di ayat 1 on ma parhitean ni bindu 43 taringot tu uhum ni Debata laho mandapothon na naeng paulionNa do bangso i di bindu 44 on. Israel i ma bangso ni Debata jala naposoNa na dipillit ala asi ni roha ni Debata. Di bagasan ayat 2 tarida do hasatiaon ni Debata na tongtong mangurupi bangso i. Jala digoari nasida “na tigor” (Alkitab TB 2 mamangke hata “Hai Yesyurun”) (patudos 5 Musa 32:15; 33:5; 26) nang pe sipata manimbil nasida, alai tongtong do Tuhan i satia maradophon nasida.
Ayat 3-4
Aek, i ma tanda ni pasupasu dohot hangoluan, tarlumobi ma di kondisi ni tano na adong di Israel na mahiang. Hata “mauas” dohot “mahiang” on ma gombaran ni keadaan nang dohot haporseaon nang partondion ni bangso Israel: Mahiang, mandele, ndang marpanghirimon. Dibahen i dilehon ma “ … TondingKu … ” asa sombu uasnasida jala mangolu nang partondionnasida. Jala on ma panurirangon taringot tu habobongot ni Tondi Parbadia di Padan na Imbaru (ida Ulaon ni Apostel 2). Jala ndada holan di nasida pasupasu ni Debata alai manongtong do tu angka sundut na naeng ro. Martumbur marlapatan ma i ndang mahiang be nasida alai gabe bangso na marparbuehon na denggan, jala simbur magodang nasida ndang ditaluhon angka duhutduhut i nasida. Duhut i ma tanda ni angka hasusaan, angka parsorion jala angka hagiot ni daging na olo mambahen na so denggan tu angka na porsea.
Ayat 5
On ma respon ni bangso i maradophon naung pinauli ni Debata jala di bagasan las ni roha manggoari dirina ampuna ni Jahowa. Holong satia ni Jahowa nunga be masuk tu hadirion ni bangso i. Di bagasan asi ni roha ni Jahowa tau do hita mandok “ahu ampuna ni Debata” nang pe hea hita manimbil, alai asi ni roha ni Debata do na manjanghon. On ma hasil ni naung pinauli ni Debata.
Ayat 6
Jahowa do Raja ni nasida na marlapatan marhuaso do Ibana laho paluahon jala mamarenta di tongatonga ni nasida nang di sandok hasiangan on. Di bagasan ayat on dipatorang ma na hot ro di saleleng ni lelengna do Debata. Sian Ibana do haroroan ni angka na adong, jala nunga adong Ibana tagan so adong dope angka harajaon, angka pamarenta. Jala marhadomuan ma on tu Pangungkapon 1:17-18 na mandok ai Jesus do mulana dohot ujungna (alfa dan omega). Jala hata “ … ndang adong Debata dungkon ni Ahu” marlapatan ma i holan sada do Debata na sintong jala on ma hata laho maralohon pardebata si leban (politeis) dohot angka ganaganaan di Babel (patudos Jesaya 44:9-20). Mungkin adong do hea tarbege hita halak non-Kristen hea mandok “tiada Tuhan selain Allah” alai nunga jumolo di Bibelta i tarsurat hata “tiada ilah selain Aku … ” (Alkitab TB 2). Ala ni i ndang tarpatudos hita Debata Jahowa tu angka debata ni ugamo manang kepercayaan manang dewa-dewi ni na asing, ai holan sada do Debata na sintong i ma Debata Jahowa na tasomba. Ndang jadi dohononta sarupa sude ugamo, haporseaon ni halak Kristen i do na manghatindanghon hasintongan ni Debata.
Ayat 7-8
Ia ayat 7 on ma hata na maralohon ganaganaan, dialo Ibana do angka debata si leban nang angka ganaganaan na so tarbahen laho mamboto manang patuduhon angka aha na masa sogot. Jala ayat 8 on ma hata na patoguhon jala mangapuli bangso i: “Unang hamu tahutan, unang ma monditondit … ” nang pe di habuangan nasida, alai adong do holong satia ni Debata na mangalehon panghirimon di nasida. Ingkon do gabe sitindangi bangso i di saluhut hata manang asi ni roha na pinasahat ni Debata tu nasida tarlumobi ma di tano habuangan i. Ndang tarbahen ni na asing, ndang tarbahen ni angka debata si leban manang ganaganaan laho mangaramoti bangso i songon na binahen ni Debata Jahowa.
Kesimpulan dan Refleksi
1. Dijou Debata do hita asa gabe sitindangi ni goarNa, huasoNa, padanNa jala angka sangkapNa di tongatonga ni portibi on. Nang pe hea hita manimbil jala ramun di si na uju i pangalahonta, alai dilehon Debata do holong ni rohaNa tu angka na manangihon panjouonNa. Tarjou do hita luhut asa gabe naposoNa, asa unang marhabiaran manghatindanghon Debata di sandok portibi on. Luhut na mauas, na male, na oto, na sega, na holom ingkon do paulion ni Debata marhite panghatindanghononta.
2. Hita on ampuna ni Debata do. Jala i do lapatan ni “Huria” i ma “Kyriake” lapatanna ampuna ni Debata (milik Tuhan). Boi do muba tindakanta maradophon sada barang manang benda molo taboto barang ni ise do i. Molo taboto “oh ... buku ni presiden do on” manang “oh … ampuna ni gubernur do on” pastina ndang sembarangan hita bersikap maradophon i. Songon i do nang hita, ala ampuna ni Debata do hita ndang sembarangan manang ramun parangenta.
3. Holan Debata Sitolusada (Ama, Anak dohot Tondi Parbadia) do na tutu na ingkon si sombaon manang si oloan jala ndang adong dungkon ni i. Unang tapatudos, manang disamahon tu debata ni ugamo na asing, ai ndang sarupa i. Nang pe berengon hera na sarupa alai ndang sarupa i, jala ndang patut sitangihononhon debata si leban. Nunga talu angka ganaganaan, angka tahi ni sibolis dibahen Debata. Jala unang tagantihon Debata ala ni hamoraon, hagabeon manang hasangapon. Ingkon Debata do jumolo na marhuaso, marhasangapon, marhamoraon di bagasan rohanta be. Ndang jumpang hita di debata na asing songon na binahen ni Debata sitolusada. Amen.
Posting Komentar