Jamita Partangiangan Epistel Minggu 18 Oktober 2026 Minggu 20 Dung Trinitatis tarsurat di buku 1 Samuel 3 ayat 10 - 14. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Dijou jala Dipillit Debata." Rap ma hita mangihuthon hatoranganna.
Pendahuluan
Samuel sorang songon alus ni Debata ditangiang ni ina na si Hanna; nasappe tariluilu tu Debata disihol jala hirim ni roha na marianakkon. Hanna songon boruboru nahol, naung sampe matua ndang marianakkon alai marhite tangiang namarsihohot dibagasan tondi dohot hasintongan dibagasan natariruilu jala mardongan padan tu Debata, namandok molo sorangan di anak ibana, naingkon pasahathon anakna tu Debata saleleng ni ngoluna (1 Sam. 1:28). Dialusi Debata do tangiang dohot Pangidoan na, jala dipatupa do hombar tu padan naung niundukkonna tu Debata jala diauhon roha ni si Hanna do, Debata do namanjou jala namamillit si Samuel gabe naposoNa umbahen sorang tu portibion; Alani i tung dibagasan olopolop do ibana manaruhon dohot mamelehon si Samuel tu bagas joro ni Debata.
Pembahasan
Tuhan manjou si Samuel songon panjouonNa naparjolo jala dialusi si Samuel panjouon i songon alus naparjolo i; O Samuel, Samuel! Gabe didok si Samuel ma: Mangkuling ma Ho, ai mananginangi do naposomon (Ay 10). “Mangkuling ma Ho, ai mananginangi do naposomon”. Pataridaon haradeon ni si Samuel manangihon dohot mangoloi soara Ni Debata namarpanghuling. Diangka ayat namangihut, tangkas disuarahon Tuhan marhitehite suara namanghuling tu si Samuel namarisihon uhuman tu malim Eli (Malim napagodanggodang dohot namangajari si Samuel) dohot tu dua anakkonna ima si Hofni dohot Pinehas. Dung i ninna Jahowa ma tu si Samuel: “Ida ma, pamasaonku ma uhum sada di Israel, tung marnginging do pinggol ni ganup na umbegesa duansa”. Uhum namambahen marnginging pinggol ni si Eli dohot duasa anakna si Eli ima si Hofni dohot Pinehas. Nungnga dipatik i Tuhan Debata angka malim manjalo tohap, jambar ni nasida diganup pelean na nipelehon ni bangso i tu Debata hombar tu angka aturan nasiulahononna, asing ni naung dipatik i manang ditontuhon ingkon gabe sipelehononma i tu Tuhan Jahowa (3 Musa 7:29-36; 1 Samuel 2:12-17); alai nadua anak ni Malim Eli mangaroro pelean ni bangso i marhite ondamondam jala narumoa nasida modom dohot angka porompuan naso inantana, namarhobas di bagas joro nabadia (1 Samuel 2:22). On ma dosa namassai borat nagabe hailaon ni bagso i jala mangkorhon uhum namassai borat ala ni pardosaon ni nasida.
Ala ni borat ni uhum i pola ingkon namanginona tu naingkon mate nasida. Ai ditodo jala dipillit nasida gabe parhobas bagas joro / bagas mangaradoti ulaon partondion (di bagas joro), alai pangalaho ni nasida ndang tudos tu panjouon partondion manang pangalaho ni pangula bagas joro hombar tu pamilliton dohot panjouoni; gariada tahe nasida mamillit dirina manutup pinggol manang nengel tu suara panjouon dohot parsuruon ni debata mangula patik dohot hasintongan. molo pandok ni hata batak ditodo hundul tu halangulu alai sai girgiran do hundul ditalaga. Girgir do nasida mangulahon hagiot ni daging namangalangi lompan jagal pelean tu Debata. Mambuati dohot manakko pelean situtungon tu Debata, mambuati pelean manang lompan nauntabo, pasombu tagas ni nasida. Sian pangalaho on tarida Eli dohot dua anakna natumagonan mamillit ndang mangulahon soara, parsuru ni Debata manang patik hasintongan ni Debata, ala ni ingkon gabe taruhum nasida; mate si Eli dohot dua anakkonna di ari nasada (hari yang sama).
Marhite Samuel dipasahat Tuhan boaboa tu uhuman nadihonahon tu si Eli dohot tu nadua anakna si Hofni dohot Pinehas, ala ni angka dosa-dosa nasida dohot konsekuensi dosa ni nasida ndang boi sesa marhite pelean situtungon. Ima borat ni dosa i di adopan Ni Debata. Boasa ingkon manginona uhum tu malim Eli ala ni dosa ni anakna? Di didok di ay. 13 “Ai nunga hulumbahon hian tu ibana, paboa Ahu parlulu dompak pinomparna ro di salelenglelengna, ala hajahaton na binotona, ai mangalo torutoru tu nasida angka anakna i, hape so mangonai hata ibana tu nasida”. Artina nungnga dipaingot Debata tu si Eli taringot tu uhum ni Debata ingkon lalu tu anakkonna, alai ndang marna dipasingot, dipodai, dipissang si Eli dosa ni anakna nadua i. Malim Eli songon malim siradoti patik hasintongan ni Debata ndang mamissang mangonai hata tu anakna na melanggar patik ni Debata. Malim namamodai, mangajari jolma natorop di patik ni Debata alai di tonga ni bagasna (anakkonna paulaula na so uhum manang patik). Konsekuensi nabalga jala natajom tu kegagalan ni sahalak uluan namameop huaso nabalga alai gagal mangulahon di tongan i bagasna. Seharusna ingkon jumolo do jamitana dohot aturan uhum i dipatupa ditonga bagasna (dirina) baru pe marlakku tu nahumaliang.
Dung i modom ma si Samuel ro di torang ni ari, dung i diungkap ma angka pintu ni joro ni Jahowa. Alai mabiar do anggo si Samuel paboahon pangungkapon i tu si Eli. Alai di udut ni turpuk on dipatolhas Debata do dohot tegas tu si Samuel songon panurirang DIJOU JALA DIPILLIT DEBATA ingkon barani mangkatindangkon dohot pasahathon tona dohot uhum ni Debata tu sude jolma (bangso) hombar tu hasintonganna.
Kesimpulan dan Refleksi
Songon si Samuel NADIJOU JALA DIPILLIT DEBATA patolhashon hataNa, songoni do nang hita DIJOU JALA DIPILLIT DEBATA patolhashon hataNa tu sandok portibion. Jala rade manangihon suara joujou ni Debata dimanang aha parsuruNa tu hita. Songon dia Debata mamakkulingi angka naporsea di angka partingkian nasalpu i songoni do tong sahat ditikki saonari on mamangkulingi Debata tu hita, marhitehite AnakNa Jesus Kristus (Heber 1:1-2). Jesus Kristus pasahathon patik holong tu hita jala mamangkulingi hita marhite asi Ni rohaNa, jala hot ro di salelengnilelengna do asi ni rohaNa.
Posting Komentar