Jamita Partangiangan Epistel Minggu 25 Oktober 2026 Minggu 21 Dung Trinitatis tarsurat di buku 1 Johannes 2 ayat 18 - 27. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Mangalului Pangondianan di Goar ni Jahowa." Rap ma hita mangihuthon hatoranganna.
Pendahuluan
Surat on tarmasuk ma tulisan epistel na ginurithon apostel Johanes, ima sahalak sian sapuludua sisean ni Tuhan Jesus tu huria na adong di Asia na diojakhon si 70 siseanni Jesus (Luk. 10). Angka pakar padan naimabaru patoranghon ia si Johanes panurat buku on ima Johannes anak Zebedeus (Mat 10:2), hahana ni si Jakobus na ditubuhon si Salome (Mat 27:56, Mrk 15:40). Ondolan surat on: Jesus ima Debata nagabe jolma na ginoaran Anak ni Debata, Sipalua diangka na porsea jala ringkot do holong di ngolu ni halak Kristen nagabe tanda angka anak ni Debata. Ondolan on songon sada spiral na sai mardomu tu donganna. Sada gabe ojahan ni na sada nari jala ndang boi sirang sian na sada i. Angka pakar naimbaru patoranghon, dung matua apostel Johannes, lao ma ibana tu huta Epesus di Junani jala maringanan disi. Jadi ro ma angka parhalado Huria Epesus tu aposteli, mangido asa disurathon aposteli sada buku na patoranghon Kristologi dohot ulaon ni ngolu halak Kristen dina songon saksi mata dipangkobasion ni Tuhan Jesus ibana asa patoguhon haporseaon nasida di haroro ni parjamita pargapgap na pasahathon hata naso tutu taringot tu Jesus na lao paliluhon haporseaon ni huria i. Alani do surat 1 Johannes on naeng menongkal angka jamita pargapgap jala patoranghon angka ojahan ni haporseaon ni halak Kristen asa boi martahan dihasintongan jala pahothon Jesus do parhiteanta (parakletos) tu Ama I dihadosaanta jala pangondian di halak porsea. On ma na ditolak angka halak na didok si Johannes Antikristus.
Pembahasan
Huria na hinaholongan, Di zaman saonari on hita mangolu di godang tantangan na manegai partondion nta. Zaman modern na taadopi on ndang holan mamboan hamajuon ni teknologi alai dohot do arus sipaotooto na gogo na jotjot secara halus menyusup tu ngolu ni bangso ni Debata. Godang do na mandok manghatai mangasahon goar ni Debata, alai ndang sude manghatai mardongan tondi dohot hasintongan na sintong. Di zaman na lam kabur parasingan ni na sintong dohot na roa, ringkot do di bangso ni Debata sada na pasti, i ma haporusan partondion na so olo mubauba. turpuk on paingothon tung mansai ringkot do parsaoran ni jolma dohot Debata nang songoni parsaoran hita sama hita jolma. Jala dipabotohon si Johannes do songon dia marpasaoran na sintong jala na naeng ro do angka panegai parsaoran ni naporsea dohot Debata. Ima angka pangarehei na digoari si Johannes Antikristus. Jotjot do tabege istilah na mandok “serigala berbulu domba” na mandok antikristus i songon babiat na marrupahon birubiru (pat. Mat. 7:15; Judas 1:17-19).
Ayat 18-19
Dipungka apostel Johannes do bagian on marhite tabe na gok holong: “Hamu angka anaha, tingki parpudi do nuaeng.” Pandohan Junani “tingki parpudi/waktu terakhir” (eschatē hōra) ndang na mandok na tibu marujung portibi on mangihuthon kronologisna, alai baliksa martudutudu do i tu tingki na manontuhon, i ma tingki di na sahat sude sangkap haluaon ni Debata tu puncakna di bagasan Kristus. Sian haroro ni Jesus tu portibi on, nunga mangolu hita di tingki na digoari “zaman parpudi” tingki na marbadai hatiuron dohot haholomon, hasintongan dohot sipaotooto. Dung i, didok si Johannes ma hata na barani jala na mambahen mabiar: “…songon naung binege hamu, na ro do antikristus i, jala nunga torop nuaeng hehe antikristus i.” Istilah antikristus marharoroan sian dua hata: anti (mangalo manang manggantihon) dohot Christos (Kristus). Jadi, “antikristus” lapatanna dalan laho mangalo manang manggantihon hajongjongan ni Kristus na sasintongna. Ndada holan sada di tingki di ujungna na manulak Jesus, alai ganup na adong, pangajarion, dohot pribadi do na manulak Jesus songon Anak ni Debata jala Sipalua portibi on.
Bukti na tangkas taringot tu hadirionnasida tarida di ayat 19: “Sian tongatongata do nian haroro nasida, alai ndang donganta nasida”. Taparrohahon ma, diondolhon si Johannes do paboa parmaraan na umbalga ndang ro sian duru, alai sian tongatonga ni parsaoran ni angka na porsea do. Hea do angka halak on rap hundul marsaor, manjou goar ni Tuhan i, jala olo do ra mangajari di huria i. Alai ndang tutu rohanasida marurat tu Kristus. Dung borhat nasida, tarida ma na so masuk tu pamatang ni Kristus nasida. On ma parmaraan partondion na umbalga di huria saleleng on: ndang serangan sian duru (luar), alai pengkhianatan sian bagasan. Angka na manulak Kristus jala manggantihon Barita na Uli na sintong i dohot habisuhon portibi, popularitas, manang poda na so sintong, i do “godang antikristus” na nidok ni si Johannes. Jadi, sian mulana, diondolhon si Johannes do paboa pangaramotion na sintong holan di bagasan goar ni Tuhan i do, ndang di identitas parugamoon, ndang di struktur ni huria, alai di parsaoran na sintong dohot Kristus na mangolu i do.
Ayat 20-21
Dung dipalumba si Johannes parmaraan i, dipapos ibana ma roha ni bangsona: “Naung miniahan ni Na-badia i do hamu, jala saluhut do hamu mambotosa.” (ay. 20). Hata chrisma (miahi) dibuat sian hata chriō, lapatanna “miahi dohot miak.” Di Padan na Robi, parmiahion i ma tanda ni sasahalak na dipillit jala dipapulik Debata,isara ni angka raja, malim dohot panurirang. Di Padan na Imbaru, ndang miak be parmiahion on, alai Tondi Parbadia sandiri do (pat.2 Korint 1:21–22). Jadi molo didok si Johannes, “Naung miniahan do hamu sian na badia i”, na patoguhon ibana do paboa ganup na porsea nunga dimeteraihon Tondi Parbadia jala ala ni i di ibana do parbinotoan partondion laho manirang na sintong sian na so sintong. Tondi Parbadia ndada holan sada huaso sambing, alai pribadi hadebataon do na mian dibagasan roha ni angka na porsea laho: manogihon tu hasintongan (Joh.16:13), mangajarhon saluhutna (Joh.14:26), jala sai tongtong ma marsihohot tu Kristus. On ma na ginoaran ni si Johannes perlindungan internal. Parlinggoman ni partondion ndang parjolo ro sian duru (aturan, organisasi, manang sistem parugamoon), alai sian bagasan do, ima Tondi Parbadia na mangolu di bagasan hita. Didok si Johannes muse: “Hubahen pe surat on tu hamu, ndang ala na so diboto hamu hasintongan i, alai naung diboto hamu tahe, jala ndang sian hasintongan nasa gabus.” (ay. 21) Lapatanna, ndang na mangalehon parbinotoan na imbaru si Johannes, alai baliksa na patoguhon parbinotoan naung tartanom hian di huria i marhite ulaon ni Tondi Parbadia. Tondi Parbadia i do na manjaga haporseaonnasida asa unang targuncang binahen ni gabus. Jadi, mangalului haporusan tu goar ni Tuhan i marlapatan do i mangolu dibagasan pamiahion dohot panogunoguon ni Tondi Parbadia ganup ari. Molo so adong Tondi Parbadia, gabe mahiang do huria i jala mura lilu; alai marhite Tondi Parbadia, boi do huria i manirang soara ni Debata sian soara ni portibi on.
Ayat 22-23
Dung i didok si Johannes ma mansai tegas: “Ise do pargabus i, nda na mansoadahon Kristus i, na mansoadahon Ama i dohot Anak i.” (ayat 22). On ma inti ni parsoalan i. Didok si Johannes do angka panipu on “pargabus” ala disoadahon nasida do Jesus Kristus, Mesias dohot Anak ni Debata manang na targoar ma nasida Gnostisisme. Molo Gnostik mamingkiri hasitolusadaon ni Debata marhite pingkiranna alai anggo halak porsea dimiahi Tondi Nabadia i do. Panipuon na umbalga ndada moral manang pangalaho na so denggan, alai na mansoadahon Kristus na sintong i do. Ayat 23 diuduti dohot pandohan na bagas teologis: “Manang ise na mansoadahon Anak i, ndang di ibana Ama i, alai manang ise na marhatopothon Anak i, di ibana do Ama i.” On ma na patoguhon na so mungkin parsaoran dohot Debata molo so Kristus. Ndang adong dalan tu Ama i anggo so Anak i (Joh.14:6). Dohot hata na asing, Kristus do pusat ni pangaramotion dohot parsaoran tu Debata. Manang ise na manulak Kristus, mago ma pangaramotion ni Debata, ai holan di bagasan AnakNa do jumpang goar ni Debata (Pilippi 2:9–11). Jadi pangaramotion na sintong ndang holan “porsea tu Debata secara umum”, alai porsea tu Debata songon na pinataridahon ni Jesus Kristus. Molo so adong panandaon na sintong taringot tu Kristus, ndang adong haluaon jala ndang adong pangaramotion.
Ayat 24-26
Dung i didok si Johannes ma: “Jala hamu, na binegemuna sian mulana, ingkon i do mian di bagasan hamu.” (ay. 24). Pandohan “na binegemuna sian mulana” martudutudu tu poda ni angka apostel taringot tu Jesus Kristus, barita na uli na sintong. Diondolhon si Johannes do asa unang ditadinghon huria i ojahan ni haporseaonna jala unang mangalului "parbinotoan na imbaru" na mambahen nasida lilu. On ma barita tu huria saleleng ni lelengna: "Tinggal ma hamu di Barita na Uli na sintong, unang ma hamu mangaliat tu Barita na Uli na asing." Molo mian Hata i di bagasan hita, gabe adong ma lombulombu hasintongan di hita. Hata i do na maminsang, mangajari, manogunogu dohot margogoihon hita (2 Tim. 3:16-17). Sabalikna, molo adong na manimbil sian Hata i, ima sada dalan laho mangungkap celah gabe bongot tondi sipaotooto. Disurat si Johannes di ayat 26: “Husurathon on tu hamu, asa jaga hamu maradophon halak na naeng mangaliluhon hamu.” Lapatanna, jaga i ma sada rumang na konkrit laho mangalului parlinggoman tu goar ni Debata. Ndang boi hita holan hohom; ingkon taalo do sipaotooto i marhite hasintongan na mangolu, ima Hata ni Debata na tarsurat di bagasan rohanta.
Ayat 27
Ayat na parpudi i ma inti ni sude barita ni si Johannes: "Ai mian do di bagasan hamu pamiahion na jinalomuna sian Ibana. mian ma hamu di bagasan Ibana, songon na niajarhonna tu hamu." Dison dipasada si Johannes do dua hasintongan na balga: Pamiahion ni Tondi Parbadia (aspek internal), dohot Hata ni Kristus na manongtong (aspek luar). Rap mangula do na dua i asa tongtong hita mian di bagasan Kristus. "Mian dibagasan" (menō en autō) lapatanna mian, marsihohot, mangolu di bagasan parsaoran na solhot jala torus. Songon ranting i na mambuat hangoluan sian hau anggur i (Joh. 15:4-5), songon i do nang hita holan boi do mangolu di partondion molo tongtong hita mardomu tu Kristus. On ma inti ni pangaramotion partondion: Ndang holan pasidinghon haliluon, alai mian di adopan ni Kristus ganup ari. Molo mian hita dibagasan Ibana, Tondi Parbadia do na manjaga rohanta, Hata i do na marmudumudu langkanta, jala holong ni roha ni Debata mangaramoti ngolunta sian nasa sipaotooto ni portibi on.
Kesimpulan dan Refleksi
Sian na singkola minggu jotjot do pribadi Jesus dipatandahon tu hita. Jesus I parholong, manesa dosa dosa ni angka jolma ala hadirionna dang jolma biasa. Alai Debata na badia na mangondihon uhum ni dosa marhite holong na manontong. Jala Barita ni Apostel Johannes di 1 Johannes 2:18–27 ndang holan joujou asa manat sian sipaotooto, alai baliksa joujou asa maradian di bagasan pangaramotion ni goar ni Tuhan i, holan marhite i do hita jumpangan hasonangan partondion, hahipason dohot haluaon. Torus do muba portibi on, jala tondi sipaotooto torus do mangula marhite cara na lam halus jala canggih. Poda na manulak Kristus boi do ndang sai tarida di bagasan rumang na terang-terangan, alai boi do buni di pamingkirion modern na manulak kedaulatan ni Debata. Alai sungkun sungkunna tu hita. mian do hata ni Debata di ngolunta?. Haporusan na sintong ndang inganan pardagingon manang lembaga parugamoon, alai hadirion partondion na mardomu tu Kristus do. Holan molo mian hita di bagasan goarNa, malua ma ngolunta sian sipaotooto ni antikristus. Ala goar ni Debata ndada holan gelar sambing, alai hataridaan ni hadirion ni Debata na mangolu do i, na papatarhon huaso, holong dohot hasintonganNa tu bangsoNa. Lapatanna, manang ise na marhaporusan tu goar ni Jesus, ndang pasombuonna. Adong do di nasida holong ni Ama i, pamiahion ni Tondi Parbadia, dohot hadirion ni Kristus di bagasan nasida. Alani do dibagasan konfesi HKI Ponggol I Bindu 2 Ayat 5 mandok HKI manongkal pangantusion dohot poda na mansoadahon hajolmaon dohot hadebataon ni Jesus, isara ni doketisme, gnostik politeisme, atheisme, animisme, dinamisme, ebionisme, arianisme, apolinarisme, kenotisme, adopsionisme dan ajaran atau aliran lainnya. (pat. Joh. 1:1, 14; 1 Joh. 5: 20).
Hamu angka dongan, mangalului haporusan manang pangondianan tu goar ni Tuhan i, marlapatan do i mamillit hasatiaon tu Kristus. Pangaramotion na sintong ndang malua sian portibi on, alai mangolu di portibi on mardongan roha na hot tu Kristus. Ai molo so Ibana ndang adong pangaramotion, alai dibagasan Ibana do pos ni roha: “Manang ise na mian di bagasan Anak i, dapotan hangoluan na saleleng ni lelengna do ibana.” Amen.
Posting Komentar