Jamita Minggu 3 Maret 2024 Minggu Okuli tarsurat di buku Psalmen 19 ayat 8-15 na manurathon taringot tu panghatindanghonon ni haporseaon ni parpsalmen di patik ni Debata. Dihatindanghon parpsalmen do paboa patik ni Debata i mansai denggan, palambokhon roha, togu jala mangalehon parsiajaran di angka jolma na so marparbinotoan. Ditogihon parpsalmen do nasa jolma asa biar mida Jahowa, ai ummuli do angka sian manang aha pe. Parpsalmen pe marpangunsandean jala holan mangasahaon Tuhan i do di bagasan ngoluna, di angka ariarina dipasahat ibana do ngoluna tu Tuhan i. Tapabagas ma pangantusionta taringot tu pangahtindanghonon ni haporseaon ni parpsalmen on jala tatiru ma i di tongatonga ni ngolunta. Hombar tu Almanak ni hurianta dibahen ma ojahanna "Hata ni Debata na Sun Denggan." Tapamanat ma hatoranganna.
Pendahuluan
Raja David na manggurithon surat on, marnida haulion dohot hagogoon ni Jahowa marhite nasa na tinompa-Na. Sude angka na binahenNa i, digurithon denggan marhite Hata ni Debata (patik ni Debata) na mangatur pardenggan ni pardalanan ni sude angka jadijadian-Na. Saluhutna i dipatandahon tu jolma na tinompaNa i, asa sude ma tahe jolma i mananda Jahowa dohot gogoNa marhite Hata ni Debata. Molo taparrohahon sian ayat 1-6, termasuk ma on na ginoaran "Penyataan Allah secara Umum." Tagoari ma on, dipataridahon Jahowa do diriNa marhite nasa na tinompaNa. Ibana do Jahowa na mangolu, na manjadihon langit dohot tano on, manjadihon nasa na adong na gabe pangisi ni portibi on. Laos Ibana do na mambahen atur mardalan tahe sude angka jadijadian Na i, asa hombar tu sangkapNa. Dibahen do mataniari patiurhon arian, laos dipatupa angka bulan dohot bintang laho mandongani borngon ni ari. Laos marhite arian dohot borngin, gabe tubu ma na ginoaran "partingkian."
Arian dohot bodari patubuhon pembagian ni tingki. Dimulai ma i sian na tagoari bulan (Januari - Desember). Sian i, marbagi ma muse tu Minggu (52 Minggu ma sataon). Marbagi ma muse tu ari (365 ari ma sataon manang 30 ari ma sabulan). Marbagi ma muse tu Bagi ni selai (24 jam ma sadari saborngin). Molo di hata teologia adong ma na ginoaran dua (2) rumang ni partingkian: Parjolo, digoari ma i Kronos, na marlapatan ma i 'tingki na mulak ro muse,' isarana sian Januari sahat tu Desember, mulak muse tu Januari. Sian ari Sinen tu ari Minggu, mulak muse tu ari Sinen. Sian pukkul 01.00 sahat tu pukkul 24.00 mulak muse tu pukkul 01.00. Angka na mangula sian Sinen tu Sabtu, maradi ma di ari Minggu, alai mulak ma muse mangula di ari Sinen na i. I ma partingkian na ginoaran Kronos. Paduahon, digoari ma i Kairos, molo di hata Indonesia digoari ma on "Waktu yang tidak akan terulang kembali." Didok muse ma on 'kesempatan.' Isarana songon ngolu ni jolma holan masa di na sahali i. Ala ni i do, di haKristenonta ndang tahaporseai songon na nidokna re-inkarnasi, songon haporseaon ni na leban mandok: molo mate jolma i, boi do i muse mulak mangolu gabe halak na asing, manang gabe tompaan na asing muse.
Laos mardomu tusi ma muse, dipatiur Janowa do nang pardalan ni jolma i asa malua sian uhum ni dosa. Laos dipasahat tu hita asi ni rohaNa asa dipalua hita sian i marhite Tuhanta Jesus na manobus dosa ni jolma. Jala marhite hamatean-Na di hau pinarsilang, gabe malua hita sian hamatean i, jala mulak mangolu di hangoluan sogot rap dohot Ibana. I do na ginoaran nakkaning Kairos ondeng. Ndang adong dalan na asing, tung holan marhite Tuhan Yesus do dipatupa Jahowa dalan tu haluaon ni Jolma. Laos saleleng mangolu dope hita sahat tu tingki on, dilehon dope di hita "kesempatan', asa mamangke ngolunta i hombar tu asi ni roha naung pinatupa ni Jahowa tu hita jolma di bagasan Kristus Yesus Tuhanta. Laos i do na ni endehon ni si David di turpuk ta on. Sude ma tahe dalan ni ngoluna na diadopi ibana, tung sada kesempatan do i sian Jahowa Debata. Molo pe gabe dipillit ibana gabe sahalak raja gumonggom Israel, tung so sian parbinotoanna do i, dungkon ni na sian pamillition ni Jahowa sambing . Sude ma tahe hasangapon, hamuliaon, hamoraon; tung basa ni Jahowa do i. Ibanna ringkot do di ibana biar mida Jahowa asa mangantusi ibana mangendehon gogo ni Jahowa marhite angka pambahenanNa.
Pembahasan
Sian pamuhai ondeng, taida ma jolo na gabe ojahan di hita dalanta lam mananda Debata nang di pardalanan ni ngolunta:
Hata ni Jahowa Pasintonghon Jolma (Ayat 8)
"Tung so adong do sian jolma i na sintong jala mananda hasintongan dungkon ni na sian hasintongan ni Jahowa. Jala hasintongan ni Jahowa tarpatupa Ibana do i marhite Hata ni Debata na tarsurat. Jala marhite Hata ni Debata, dapotan ma jolma i mananda Debata, mangantusi hasintongan ni Debata, jala na mangalehon bisuk tu angka jolma asa mangulahon na denggan. Hata ni Debata i do Hata na ruar sian pamanganNa sandiri. Laos digurithon angka naposoNa ma i asa gabe uhum siingoton ni angka bangsoNa asa mananda nasida di Debata Jahowa dohot di hasintonganNa. Termasuk ma sian songon barita pamuhai ondeng, tung godang do angka barita na binege taringot tu hajajadi ni portibi on; termasuk ma nang marhite haporseaon ni angka bangso na leban na mandok "Alam ada karena dirinya sendiri." Jala adong muse na mandok: "Semesta ini terbentuk karena unsur pertemuan panas dan dingin." Alai ndang lomo roha ni Debata gabe lilu jolma i marhite barita na sala. Asi ni roha ni Debata dipasahat marhite HataNa, Jahowa do na manjadihon portibi on ro di nasa isina. Hata ni Debata na tarsurat i, pasintonghon barita ni jolma taringot tu hajajadi ni portibi on.
Alai ndang holan i tahe, Hata ni Debata, tong do manaringoti sangkap ni Jahowa na ingkon siulahonon ni jolma i. Termasuk ma disangkapi Tuhanta i do naeng ma marbisuk jolma i tahe di pardalanan ni ngoluna. Bisuk na sian Debata mambahen jolma i mangantusi mangulahon hasintongan ni Debata. Jala sada sian bisuk na minaksud di turpuk ta on, i ma mangantusi manghatindanghon gogo ni Jahowa Debata naung mangatur pardalanan ni ngoluna songon pangatur ni Jahowa di sude jadi angkajadianNa. Tung so adong do hasintongan ni jolma i molo so dihatindanghon gogo ni Jahowa di ngoluna. Jala ganup jolma na mameop Hata ni Debata, margogo do ibana manhatindanghon gogo ni Jahowa di sude pardalanan ni ngoluna tu angka donganna jolma. Panghatindanghonion i, digoari ma i gabe pengalaman yang indah, hidup bersama dengan Tuhan dan kekuatan-Nya.
Hata ni Jahowa Patiurhon Mata ni Jolma (Ayat 9)
Marhite Hata ni Debata, dipatuduhon Ibana do angka na denggan na ingkon siulahonon ni jolma i. Angka na tau pasangaphon goar ni Jahowa na mamarmulia marhite angka pangalaho na tama. Laos marhite hata ni Jahowa, dipatuduhon Ibana do angka parange na maralo tu lomo ni roha ni Debata, jala na manghorhon uhum ala mangalaosi na sinangkapan ni rohaNa. Digoari ma i "Patik/Hukum/Titah." Marhite pengalaman hidup ni angka bangso ni Debata, pengalaman hidup ni angka naposo ni Debata, ro di angka raja dohot panurirang, sude ma i tarsurat di Hata ni Debata. Ndang adong na buni, termasuk ma dosa ni raja David dohot Solomon, digurithon do i denggan jala terbuka. Termasuk ma hatangkangan ni bangso Israel tu Debata na mambahen nasida gabe tarbuang tu Misir, tu Babel lan na asing, paingothon hita tu konsekuensi ni pangalaho na mandao sian sangkap ni Jahowa.
Alai laos dipatuduhon Debata do nang asi ni rohaNa marhite Hata ni Debata naung dibaritahon sian na robi. I ma haluaon ni jolma pardosa marhite birubiru ni Debata, marhite pomparan ni si Ishak, si Jakkob, dohot si Daud. I ma haluaon na pinatupaNa marhite Tuhan Yesus Kristus na mate humophop hita jolma. Songon i do nang dipasahat tu hita on angka 'pedoman hidup baru,' termasuk ma angka ende psalmen on, songon i nang hata ni angka parjamita dohot bisuk na ginurithon ni si Solomon dohot di sude barita na pinasahat ni angka apostel di padan na imbaru. Sude na i paingothon hita taringot angka dia do dalan ni ngolu na ingkon siulahononhon dalan pasangaphon Jahowa Debata. Sude ma tahe angka na ginurithon di Hata ni Jahowa i, patiurhon mata ni jolma laho mangantusi angka na denggan jala mangulahonsa. Patiurhon mata ni jolma asa manirang dirina sian angka parange na manghorhon dosa. Sude na i, tarsurat di Hata ni Debata.
Hata ni Jahowa Manghorhon Biar Mida Jahowa (Ayat 10)
Ala ruar sian Tondi ni Debata do Hata i, jala Debata do Hata i, mangolu do nang Hata ni Debata di ngolu ni jolma na manjanghon Hata ni Debata di ngoluna. Songon i do didok Tuhanta : "Ingkon songon i do Hatangki na ruar sian pamanganku: Ndang mulak boti tu Abu, ingkon bahenonNa do lomo ni rohangku, jala manjadi tu na Hutongos." (Yesaya 55:11). Jala na hinalomohon roha ni Jahowa sian jolma i tahe i ma 'biar mida Jahowa." Jala tung so tau do jolma i marroha biar mida Jahowa molo so dihalomohon rohana Hata ni Debata na tarsurat i. Jala hata ni Jahowa na pineop ni jolma i, Sian i gabe lam tangkas ma mangantusi hita, boasa gabe lam ngali pangalaho ni angka jolma nuaeng on hinorhon ni kemajuan jaman on? Ala nunga lam ditadinghon jolma I be hata ni Debata, laos gabe gumodang nama rohana dilehon tu angka kemajuan ni teknologi. Songon I do nang angka jolma na so ra olo mangalehon rohana tumangihon Hata ni Debata nang di parsaoran ni Huria, tarida do i sian sikap na gulut di arta, na so mangantusi sopan santun mangkatai tu dongan jolma, na muramura paturimason, rumatanggana na mura sursar, angka iananghonna na so ra olo aturon denggan jala manusai, sai holan na patubutubu hata na so denggan di donganna jolma . Jala mura terikutikut dohot pangalaho ni donganna na so denggan. Ujungna goaron ma sude tahe pangalahona patuduhon na so biar mida Jahowa. Mulana nakkaning, sian na so dilehon rohana manangihon Hata ni Jahowa. Molo nga masa sitaonon di angka jolma na sisongon on, antar mura do mandele jala gabe manalai Tuhan I di ngoluna. Hape, na so mian do Hata ni Jahowa di Rohana, na talup margogoihon tondina Manahan di sude angka parmaraan.
Uli ni Hata ni Debata (Ayat 11-13)
Sian ayat 11-13 on, dipaingot ma hita di Uli ni Hata ni Debata. Gumarga sian mas dohot sere (ayat 11). Sai digogohon jolma I do mangula asa tamba artana. Jala somal do mas manang sere dibahen songon sada tabungan masa depan ala sai jumotjot do naik arga ni on, jala marbunga gadison muse. Alai dipaingot ma tu hita, dao dope ummarga hata ni Debata sian mas nang sere. Hata ni Debata mambahen diri ni jolma i lam arga di adopan ni Jahowa. Molo lam arga jolma i, lam godang do perhatian ni Debata tusi. Ala ni i, molo naeng lam godang perhatian ni Jahowa nang tu hita, lam ta pagodang ma perhatianta tu Hata ni Debata. Didok muse tumonggi sian situak ni loba. Ala gok dohot panghirimon do Hata ni Debata. Ala mangolu do i Hata ni Debata i, jala mangula nang di haporseaonta, gabe margogo do angka jolma na marhabot ni roha, ditambai roha mauliate nang di angka na marlasniroha, dilehon haluaon di angka na manghirim gogo ni Jahowa. Hata ni Debata na mian di roha ni jolma, paingothon jolma i di angka dalan na sintong. Songon I do pengalaman ni si David di turpuk ta on, na hinatindanghonna na paluahon ibana sian dalan na sala. Lam godang dipeop jolma i Hata ni Debata, lam godang do panghirimon tu ibana sian gogo ni Jahowa. Hata ni Debata padaohon biar ni roha, dohot manahan pamatang ni jolma i asa unang mangulahon hajahaton. Ida ma godang ni hata na ro sian angka aleale na pasonanghon rohanta sipata, alai ndang sude hatanasida i na gabe hata hasintongan. Ai godang sian hata ni jolma i tarsongon pasonanghon rohanta ala adong naeng sibuatonna sian hita. Jala jotjot do hata ni jolma gabe hata sidua baba, hata na olo pabadabadahon, hata na olo mangaliluhon; alai Hata ni Debata, sai manontong patiurhon dalanta asa mandao sian hajahaton.
Kesimpulan dan Refleksi
Songon tangiang ni si David di ayat 14-15, songon i ma hita disosoi asa mangido nang di tangiangta asa dipadao hita sian ragam ni haliluon na mambahen hita lam mandao sian Debata. Alai, taharinggashon ma tutu na tumangihon Hata ni Debata (rajinlah membaca dan memikirkan Firman Tuhan), ai hata ni Debata do na gabe sada koneksi di hita laho mangantusi sangkap ni Jahowa na ingkon siulahononta di ngolunta si ganup ari. Hata ni Debata margogoihon hita laho mamillit parsaoran na denggan. Amen.
Posting Komentar